အဆိုတော် Justin Timberlake (ဂျက်စတင်တင်းဘားလိတ်ခ်) က သူ့ရဲ့ သားငယ်လေး Silas ကို ဂုဏ်ပြုပြီး သူ့ရဲ့ သီချင်းအခွေ နာမည်ကို “Man of the Woods” လို့ နာမည်ပေးလိုက်ပါတယ်။
“Filthy” သီချင်းအဆိုတော် Justin ဟာ အသက် ၂ နှစ်အရွယ် သားဖြစ်သူအတွက် ရည်ရွယ်ပြီး မကြာခင် ထွက်ရှိလာတော့မယ့် သူ့ရဲ့ သီချင်းအယ်လ်ဘမ် နာမည်ကို “Man of the Woods” လို့ နာမည်ပေးတာနဲ့ ပတ်သက်ပြီး အဲဒီ နာမည်ဟာ အမေရိကန် ကျေးလက်ဂီတ တေးအယ်လ်ဘမ် နာမည်နဲ့ ဆင်တူနေတယ်လို့ ပြောလာတဲ့ ပရိသတ်တွေရဲ့ Message တွေအပေါ် Justin က ဟာသနှောပြီး ပြန်လည် ပြောဆိုလိုက်ပါတယ်။
“ကျနော့်သီချင်း အယ်လ်ဘမ် နာမည်ကို သားလေးအတွက် ရည်ရွယ်ပြီး ပေးလိုက်တယ်။ သူ့နာမည်ရဲ့ အဓိပ္ပါယ်က “တောအုပ်ကြီး” လို့ အမည်ရပါတယ်။ ဒါကြောင့် ကျနော့်ကို ကျေးလက်တေးအယ်လ်ဘမ် လုပ်နေတယ်လို့ မပြောကြပါနဲ့တော့ဗျာ။ ကျနော် အခုတော့ ကျနော့် မွေးနေ့အကြောင်းကိုပဲ ခံစားနေတာပါ” လို့ Justin Timberlake က သူ့ရဲ့ Instagram မှာ တင်ခဲ့တဲ့ ဗီဒီယိုဖိုင်ကနေ ပြောပါတယ်။
၂၀၁၈ ခုနှစ်၊ ဇန်နဝါရီလ ၃၁ ရက်နေ့မှာ အသက် ၃၇ နှစ် ပြည့်ခဲ့ပြီဖြစ်တဲ့ Justin က အဲဒီ ဗီဒီယိုတင်ပြီး နာရီအနည်းငယ် ကြာပြီးတဲ့အခါ သူရဲ့ “Montana” လို့ အမည်ရတဲ့ သီချင်းအသစ်ကို Instagram မှာ ဗီဒီယို အမြည်း တင်ခဲ့ပါတယ်။
အဆိုပါ “Montana” ဗီဒီယိုထဲမှာ သူက လာမယ့် ဖေဖော်ဝါရီလ ၄ ရက်မှာ ပြုလုပ်မယ့် အမေရိကန်ဘောလုံး နောက်ဆုံး ဗိုလ်လုပွဲနားချိန် ဖျော်ဖြေမှုအတွက် ပြင်ဆင်နေရင်း မင်နီဆိုးတားပြည်နယ်၊ မင်နီပိုလစ်မြို့မှာရှိတဲ့ U.S. Bank အားကစားကွင်းထဲမှာ ကခုန်၊ သီဆိုနေတာ တွေ့ရပါတယ်။
Justin ကတော့ သူဟာ ကျေးလက်ဂီတသီချင်းကို မဖန်တီးနေဘူးလို့ ပြောခဲ့ပေမယ့် တချို့သီချင်းတွေမှာ ကျေးလက်ဂီတ သံစဉ်တွေ ပါရှိတယ်လို့ မကြာသေးခင်ပဲ ပြောခဲ့ပါသေးတယ်။
Ref : Contactmusic.com
The post သားလေးအတွက် ရည်ရွယ်ပြီး အခွေနာမည်ပေးတဲ့ အဆိုတော် Justin Timberlake appeared first on ဧရာဝတီ.