လာမယ့် ဧပြီလ၊ မြောက်ကိုရီးယားနိုင်ငံ ပြုံးယမ်းမြို့မှာ ဖျော်ဖြေမယ့် တောင်ကိုရီးယား ဂီတပညာရှင်တွေဟာ မြောက်ကိုရီးယား နိုင်ငံသားတွေကြားမှာ နာမည်ကျော်ကြားတဲ့ သီချင်းတွေကို ဖျော်ဖြေသွားမယ်လို့ ဂီတလုပ်ငန်း စောင့်ကြည့်သူတွေက မတ်လ ၂၅ ရက်နေ့မှာ ပြောကြားလိုက်ပါတယ်။
တောင်ကိုရီးယားရဲ့ အနုပညာအဖွဲ့ဟာ လာမယ့် ဧပြီလ နှောင်းပိုင်းမှာ ပြုလုပ်မယ့် ကိုရီးယားနှစ်နိုင်ငံကြား ဆွေးနွေးပွဲ မတိုင်ခင် ဧပြီလ ၁ ရက်နေ့နဲ့ ဧပြီလ ၃ ရက်နေ့တို့မှာ သီးခြားစီ ပြုလုပ်မယ့် ဖျော်ဖြေပွဲ နှစ်ခုအတွက် မတ်လ ၃၁ ရက် နေ့မှာ ပြုံးယမ်းမြို့ကို ၄ ရက်ကြာ ခရီးစဉ်အဖြစ် သွားရောက်ကြမှာလည်း ဖြစ်ပါတယ်။
ဖျော်ဖြေပွဲမှာ အဓိက ပါဝင်မယ့် သီချင်းတွေကတော့ မြောက်ကိုရီးယား နိုင်ငံသားတွေအကြား ကြိုက်များတဲ့ တောင်ကိုရီးယား အနုပညာရှင်တွေရဲ့သီချင်းတွေနဲ့ မြောက်ကိုရီးယားမှာ လူကြိုက်များလောက်တဲ့ သီချင်းတွေ ပါဝင်တယ်လို့ ဆိုပါတယ်။
မြောက်ကိုရီးယားသီချင်းအချို့ကို သီဆိုဖျော်ဖြေနိုင်ဖွယ်ရှိပြီး မကြာမီ ပြုလုပ်မယ့် ဖျော်ဖြေပွဲတွေဟာ ပြီးခဲ့တဲ့လမှာ ကျင်းပ ပြုလုပ်ခဲ့တဲ့ PyeongChang ဆောင်းရာသီအိုလံပစ်ပြိုင်ပွဲကိုဂုဏ်ပြုဖို့ တောင်ကိုရီးယားမှာ မြောက်ကိုရီးယား အနုပညာ အဖွဲ့ရဲ့ ဖျော်ဖြေမှုအတိုင်း အပြန်အလှန် ပြုလုပ်တာလည်း ဖြစ်ပါတယ်။
ခေတ်ပြိုင် ကိုရီးယားပေါ့ပ် ဂန္တဝင်အဆိုတော်တွေ ဖြစ်တဲ့ Cho Yong-pil နဲ့ Lee Sun-hee တို့လည်း သူတို့ရဲ့ နာမည်ကျော် သီချင်းတွေကို သီဆိုကြလိမ့်မယ်လို့ မျှော်လင့်ရပါတယ်။ ၂၀၀၅ ခုနှစ်မှာ မြောက်ကိုရီးယားနိုင်ငံမှာ တကိုယ်တော် ဖျော်ဖြေပွဲ ပြုလုပ်ခဲ့တဲ့ အဆိုတော် Cho ဟာ ကွယ်လွန်သူ ခေါင်းဆောင်ကြီး ကင်ဂျုံအီလ် ကြိုက်နှစ်သက်တဲ့ သီချင်းဖြစ်တဲ့ “The Cafe in the Winter” နဲ့ အတူ “Dear Friend” နဲ့ “Dream” သီချင်းတို့ကိုလည်း သီဆိုမှာ ဖြစ်ပါတယ်။
ပူးတွဲ ဖျော်ဖြေပွဲ ပြုလုပ်ဖို့ မြောက်ကိုရီးယားကို ၂၀၀၃ ခုနှစ်မှာ လာရောက်ခဲ့ဖူးတဲ့ အဆိုတော် Lee ဟာလည်း တောင်ကိုရီးယားမှာ ပြီးခဲ့တဲ့လက မြောက်ကိုရီးယားအဖွဲ့တွေ သီဆိုဖျော်ဖြေသွားတဲ့ “To J” လိုမျိုး နာမည်ကျော် သီချင်းတွေကို သီဆိုဖျော်ဖြေသွားမှာ ဖြစ်ပါတယ်။ ပေါ့ပ်အဆိုတော် Baek Ji-young ကတော့ “Like Being Shot by a Bullet” နဲ့ “Don’t Forget” လိုမျိုး အလွမ်းအဆွေး သီချင်းတွေကို သီဆိုလိမ့်မယ်လို့ မျှော်လင့်ရပါတယ်။
အဖွဲ့ဝင် ၅ ဦးပါဝင်တဲ့ အမျိုးသမီး အဆိုတော်အဖွဲ့ တခုဖြစ်တဲ့ Red Velvet ကတော့ “Red Flavor” , “Bad Boy” နဲ့ “Peek-A-Boo” သီချင်းတွေကို သီဆိုကြလိမ့်မယ်လို့ မျှော်လင့်ရပါတယ်။ တောင်ကိုရီးယားဘက်ကနေ ဂီတပညာရှင် ၈ ဦး နဲ့ မိန်းကလေးအဖွဲ့တခု အပါအဝင် အဖွဲ့ဝင် ၁၆ဝ ဦးပါဝင်တဲ့ အနုပညာအဖွဲ့တခုကို စေလွှတ်ဖို့ သဘောတူခဲ့ပေမယ့် ဧပြီလ ၃ ရက်နေ့မှာ ပြုလုပ်ဖို့ စီစဉ်ထားတဲ့ ပူးတွဲဖျော်ဖြေမှုကြောင့် စာရင်းထဲမှာ အနုပညာရှင်ကို ထပ်ပေါင်း ထည့်ခဲ့တာ ဖြစ်ပါတယ်။
တောင်ကိုရီးယားရဲ့ အနုပညာအဖွဲ့ထဲမှာ Rap အဆိုတော် PSY ကို ထပ်မံထည့်သွင်းဖို့ ဆွေးနွေးခဲ့ကြပေမယ့် ကိုရီးယား နှစ်နိုင်ငံဟာ သဘောတူညီချက် မရရှိခဲ့ကြပါဘူး။
Ref ; Yonhap
The post မြောက်ကိုရီးယားနိုင်ငံသို့ တောင်ကိုရီးယား ဂီတပညာရှင်များ သွားရောက် ဖျော်ဖြေမည် appeared first on ဧရာဝတီ.