တလောက အချစ်ရေးနဲ့ အိမ်ထောင်ရေးများနဲ့ ပတ်သက်တဲ့ ကောလဟလများ ထွက်ပေါ်ခဲ့သူ သရုပ်ဆောင် မြတ်ကေသီအောင်က အိမ်ထောင်ဆိုတဲ့ ထောင်ထဲ နောက်တခါ ပြန်မဝင်ချင်တော့ဘူးလို့ ဆိုပါတယ်။
မြတ်ကေသီအောင်က အချစ်ရေးနဲ့ပတ်သတ်တဲ့ ခံစားချက်တချို့ကို Facebook ပေါ်မှာလည်း မကြာခဏ ဆိုသလို ရေးသားတင်လေ့ ရှိသူတဦးပါ။
ဒါနဲ့ ပတ်သက်လို့ “အစ်မမှာ ကုန်ကြမ်းတွေ အများရှိလို့လေ။ အစ်မက သွားရင်းလာရင်း သတိရရင် စာလေးတကြောင်း ကောက်ရေး အဲဒီလို ရေးထားထားပြီးတော့ အကြောင်းအရာလေးတွေ စုထားပြီး တင်ဖြစ်တာပါ။ စာအုပ်အထူကြီး ရှိပါတယ်။ ကြုံတိုင်း ရေးထားပါတယ်။ တင်မယ့်စာတွေ အများကြီး ရှိပါတယ်။ အစ်မ အသက်ပဲ ၅၀ ရှိနေပြီ။ အိမ်ထောင်ပြုဖို့ စိတ်ကူး မရှိတော့ဘူး။ အိမ်ထောင်ပြုခဲ့ပြီးသွားပြီ။ အိမ်ထောင်ဆိုတဲ့ အရသာကို သိခဲ့ပြီးသွားပြီ။ တကယ့် ထောင်ကျသလို ခံစားရပါတယ်။ နောက်တခါ ထောင်ထဲ မဝင်ချင်တော့ပါဘူး”လို့ မြတ်ကေသီအောင်က ပြောပါတယ်။
လက်ရှိမှာတော့ အနုပညာအလုပ်များကို သူမရဲ့ ကျန်းမာရေး အခြေအနေအရ ခဏနားထားပြီး မောင်ဖြစ်သူနဲ့ အတူ ဖွင့်လှစ်ထားတဲ့ စားသောက်ဆိုင်အလုပ်ကို လုပ်ဖြစ်နေတယ်လို့ သိရပါတယ်။
“အစ်မ အိုက်တင်လုပ်တဲ့အခါမှာ အရမ်းစိတ်နှစ်ပြီး လုပ်ရင် အဆင်မပြေတော့ဘူး။ ကျန်းမာရေးကြောင့် ခဏ နားထားတာပါ။ စီးပွားရေးကတော့ မောင်လေးနဲ့တူတူ လုပ်တာဆိုတော့ ပင်ပင်ပန်းပန်းကြီးတော့ မဟုတ်ပါဘူး။ Cashier ထိုင်ပေးရုံပဲ။ ဒါပေမယ့် မထင်ထားဘဲနဲ့ ပရိသတ်က အရမ်းလာကြတယ်။ အဲဒါနဲ့ Cashier ထိုင်ရုံ မဟုတ်ဘဲနဲ့ စားပွဲလည်း ဝင်ထိုးရတယ်”လို့ မြတ်ကေသီအောင်က ပြောပါတယ်။
Café Lu ဆိုတဲ့ စားသောက်ဆိုင်လေးကို မောင်ဖြစ်သူနဲ့အတူ ဖွင့်ထားပြီး မြတ်ကေသီအောင်ကိုယ်တိုင် ဆိုင်ထိုင်တဲ့ အတွက် ပရိသတ်တွေက လာရောက်အားပေးမှု များပြားပြီး အဆင်မပြေဖြစ်ရတာတွေလည်း ရှိခဲ့တယ်လို့ မြတ်ကေသီအောင်က ပြောပါတယ်။
“ဘာပဲဖြစ်ဖြစ် အနုပညာသမားက ပရိသတ်နဲ့ ကင်းကွာလို့ မရဘူးလေ။ ကိုယ့်ဘာသာ ဘာကြီးပဲ ဖြစ်နေဖြစ်နေ အစ်မဆိုင်မှာ လာစားတဲ့သူတွေဆို တွေ့မှာပါ။ အစ်မ ဖော်ဖော်ရွေရွေ နေတတ်တယ်။ ချိုချိုသာသာ ပြောတတ်တယ်။ သူတို့တွေ ဆိုင်ကိုလာတိုင်း ကျေးဇူးတင်ပါတယ် ပြောတယ်။ ပြန်သွားရင်လည်း ကျေးဇူးတင်ပါတယ် ပြောတယ်။ ဘာလိုအပ်လဲ ဆိုတာလည်း မေးတယ်။ လိုအပ်တာရှိရင် ပြင်ပေးပါမယ်လို့လည်း ပြောတယ်”
“ဒါမျိုးဆိုတာက မင်းသမီးတယောက်အနေနဲ့ ပြောဖို့ ခက်ခဲတဲ့ စကားလေ၊ ဒါပေမယ့် အစ်မအနေနဲ့ အဲဒီအချိန်မှာ မင်းသမီးလို့ မသတ်မှတ်ထားဘူး။ အဲဒီအချိန်မှာ အစ်မက ဒီဆိုင်ရဲ့ပိုင်ရှင် အဲဒီအတွက် ဆိုးတာတွေကောင်းတာတွေ အကုန်လုံးကို ရင်ဆိုင်ဖို့အတွက် တာဝန်ရှိတယ်”လို့ မြတ်ကေသီအောင်က ပြောပါတယ်။
အကယ်ဒမီ မြတ်ကေသီအောင်ကတော့ လက်ရှိအချိန်မှာ စီးပွားရေးဘက်ကို အာရုံစိုက်ကာ လုပ်ဖြစ်နေပြီး ဇာတ်ကား ရိုက်ကူးမှုများ အနေဖြင့် ကမ်းလှမ်းမှုများ ရှိသော်လည်း နယ်ဘက်မှာ သွားရောက်ရိုက်ကူးရမှာ ဖြစ်တဲ့အတွက် ငြင်းပယ်ခဲ့တယ်လို့ ဆိုပါတယ်။
The post “အိမ်ထောင်ဆိုတဲ့ ထောင်ထဲ နောက်တခါ ပြန်မဝင်ချင်တော့ဘူး”ဆိုတဲ့ မြတ်ကေသီအောင် appeared first on ဧရာဝတီ.