ပြီးခဲ့တဲ့ သီတင်းပတ်ကုန်ပိုင်းရဲ့ မြောက်အမေရိက ရုံဝင်ငွေစာရင်းဟာ “Hotel Transylvania 3: Summer Vacation” ရုပ်ရှင်အတွက် သတင်းကောင်းကို ဆောင်းကျဉ်းလာခဲ့ပြီး The Hollywood Reporter မီဒီယာရဲ့ အဆိုအရ အဆိုပါ ဟာသ Animation ရုပ်ရှင်ဟာ မြောက်အမေရိက ဒေသမှာ ဒေါ်လာ ၄၄ ဒဿမ ၁ သန်းနဲ့ တကမ္ဘာလုံးမှာ ဒေါ်လာ သန်း ၁၀၀ ရရှိခဲ့တယ်လို့ ဆိုပါတယ်။
အမေရိကန် မင်းသား Adam Sandler ပါဝင်သရုပ်ဆောင်ထားတဲ့ Dracula နဲ့ သူရဲ့ မွန်းစတား အပေါင်းအပါတွေဟာ ပင်လယ်ကြီးထဲမှာ ဇိမ်ခံသင်္ဘောကြီးနဲ့ အပျော်ခရီး ထွက်ကြရင်း Drac တယောက် သင်္ဘောရဲ့ ကပ္ပတိန် ဖြစ်သူ အမျိုးသမီးကို မမျှော်လင့်ဘဲ ချစ်မိခဲ့ပုံကို ဇာတ်အိမ်တည်ထားပါတယ်။
Sony မှ ကမ္ဘာလုံးဆိုင်ရာ ဈေးကွက်နဲ့ ဖြန့်ချိရေးဥက္ကဌ Josh Greenstein က “ကျနော်က မြင်းသုံးကောင် ပြိုင်ပွဲတခုလို့ ခန့်မှန်းထားခဲ့တာပါ။ နံပါတ် ၁ နေရာကို ရရှိလို့ တော်တော်လေးကို ပျော်ရွှင်မိပါတယ်။ အရမ်းကိုပဲ ယှဉ်ပြိုင်မှုများတဲ့ ဈေးကွက်တခုပဲဖြစ်ပါတယ်”လို့ “Hotel Transylvania 3” ရဲ့ အောင်မြင်မှုနဲ့ ပတ်သက်လို့ ပြောကြားခဲ့ပါတယ်။
အဲဒီသတင်းကတော့ မင်းသား Dwayne Johnson ရဲ့ ငွေကြေး အကုန်အကျခံ ရိုက်ကူးထားတဲ့ “Skyscraper” အတွက်တော့ သတင်းကောင်းတခု မဟုတ်ခဲ့ဘဲ မြောက်အမေရိကဒေသမှာ ကန်ဒေါ်လာ ၂၅ ဒဿမ ၅ သန်းသာ ရရှိခဲ့ပြီး ကမ္ဘာတဝန်းမှာတော့ ဒေါ်လာ ၆၅ ဒဿမ ၉ သန်း ရရှိခဲ့ပြီး ဖြစ်ပါတယ်။
ဒေါ်လာ သန်း ၁၃၀ အကုန်အကျခံရိုက်ကူးထားတဲ့ “Skyscraper” ရုပ်ရှင်ဟာ အဖွင့် သီတင်းပတ် ကုန်ပိုင်းမှာ မျှော်မှန်းထားသလောက် ဝင်ငွေရရှိထားတာ မရှိခဲ့ပါဘူး။ ဒီကားက ၁၄ လအတွင်းမှာ မင်းသား Johnson ရဲ့ ပဉ္စမမြောက် ရုပ်ရှင်ဖြစ်တဲ့အတွက် တချို့ရုပ်ရှင် ပရိသတ်အတွက်တော့ အံ့သြသင့်စရာ မဟုတ်ခဲ့ပါဘူး။
ဒါပေမယ့် မီးလောင်ပြီး ပြိုကျတောမယ့် မိုးမျှော် အဆောက်အဦးထဲမှာ ဓားစာခံအဖြစ် ဖမ်းဆီးခံထားရတဲ့ ဇနီးဖြစ်သူနဲ့ ကလေး ဖြစ်သူတို့ကို ကယ်ဆယ်ရေမယ့် FBI ဓားစားခံ ညှိနှိုင်းသူဟောင်း တယောက်အကြောင်း ရိုက်ကူးထားတဲ့ ရုပ်ရှင်ရဲ့ အက်ရှင်ဇာတ်ဝင်ခန်းတွေကိုတော့ ကြည့်ရှုသူတွေ အကြိုက်တွေ့ခဲ့ကြပါတယ်။
Universal ရဲ့ မြောက်အမေရိက ဖြန့်ချိရေး ဥက္ကဌ Jim Orr က “ကျနော်တို့မှာ နွေရာသီအချိန်တွေ အများကြီး ကျန်ပါ သေးတယ်။ ကျနော်တို့ရဲ့ ပရိသတ်ကတော်တော်လေးကို ကျယ်ပြန့်ပါတယ်။ ပြီးတော့ Dwayne Johnson ဟာ ဒီကမ္ဘာပေါ်မှာ စာအရရော တကယ့်လက်တွေ့အရရော အကြီးမားဆုံးရုပ်ရှင်စတားတယောက် ဖြစ်ပါတယ်။ သူနဲ့အတူ အလုပ်အတူလုပ်ရတာ အံ့သြဖို့ကောင်းပါတယ်” လို့ ပြောကြားခဲ့ပါတယ်။
မြောက်အမေရိကရုံဝင်ငွေစာရင်းမှာတော့ “Hotel Transylvania 3” ရုပ်ရှင်က ထိပ်ဆုံးမှာ ရပ်တည်နေပြီး အဲဒီနောက်မှာ တော့ ဒုတိယမြောက်သီတင်းပတ်အဖြစ် ရုံတင်တဲ့ “Ant-Man and the Wasp” ရုပ်ရှင်က ကန် ဒေါ်လာ ၂၈ ဒဿမ ၂ သန်းနဲ့ ဒုတိယနေရာ ၊ “Skyscraper” ရုပ်ရှင်က ၂၅ ဒဿမ ၅ သန်းနဲ့ တတိယနေရာ၊ “Incredibles 2” ရုပ်ရှင်က ဒေါ်လာ ၁၆ ဒဿမ ၂ သန်းနဲ့ စတုတ္ထနေရာ၊ “Jurassic World: Fallen Kingdom” ရုပ်ရှင်က ဒေါ်လာ ၁၅ ဒဿမ ၅ သန်းနဲ့ ပဉ္စမနေရာမှာ အသီးသီး ရပ်တည်နေပါတယ်။
Ref: etcanada
The post မြောက်အမေရိကမှာ “Skyscraper” ကိုကျော်တက်သွားတဲ့ “Hotel Transylvania 3” ရုပ်ရှင် appeared first on ဧရာဝတီ.