“မြန်မာရုပ်ရှင်လောကမှာ အားနည်းချက်ရော၊ အားသာချက်ရော ရှိနေတာပါ”

တချိန်က ပရိသတ်အားပေးမှု ရရှိခဲ့သလို ခုချိန်မှာလည်း မအေးသောင်းဆိုပြီး ပရိသတ် အားပေးမှု ရရှိထားတဲ့ အေးဝတ်ရည်သောင်းက မြန်မာရုပ်ရှင်လောကဟာ အားနည်းချက်၊ အားသာချက်ကတော့ အတူတူရှိနေတယ်လို့ သူရဲ့ အမြင်ကို ဧရာဝတီကို ပြောပါတယ်။

“မြန်မာရုပ်ရှင်လောကကို ပေါက်စီတို့ထက် တော်တဲ့သူတွေက လုပ်နေကြပါတယ်။ အားနည်းချက်၊ အားသာချက် ကတော့ အမြဲတမ်းရှိနေမှာပဲ။ အားနည်းချက်ပဲ ဖိပြောနေရင်တော့ အားနည်းချက်ချည်းပဲ ဖြစ်နေမှာပေါ့။ အားသာချက်လည်း အများကြီး ပြောင်းလဲသွားတာရှိတော့ အားနည်းချက်တွေကို ဘယ်လိုမျိုး အားသာချက်ဖြစ်အောင် ပြောင်းကြမလဲ။ အားသာချက်တွေကိုလည်း ဘယ်လိုမျိုး ပိုကောင်းမွန်အောင် လုပ်ကြမလဲဆိုပြီး လုပ်သင့်ပါတယ်” လို့ မအေးသောင်းက ပြောပါတယ်။

မအေးသောင်းက လတ်တလောမှာ အနုပညာလှုပ်ရှားမှုအနေနဲ့ ကြော်ငြာများ ရိုက်ကူးနေသလို ပွဲတက်၊ ဓာတ်ပုံရိုက် စတဲ့အလုပ်တွေ လုပ်ဖြစ်နေတယ်လို့ ဆိုပါတယ်။ မကြာမီမှာလည်း ဇာတ်လမ်းတွဲအသစ်တခု ရိုက်ကူးဖို့ ပြင်ဆင်နေလို့လည်း သိရပါတယ်။

မြန်မာရုပ်ရှင်လောကနဲ့ ပတ်သက်ပြီး သရုပ်ဆောင် ကျော်ကျော်ဗိုဟာ မကြာသေးခင်က “ကျွန်တော်ရှက်လို့” ဆိုတဲ့ ဇာတ်လမ်းတို တင်လိုက်တဲ့ အပေါ်ကိုလည်း မအေးသောင်းက သူရဲ့ အမြင် အခုလို ဆိုပါတယ်။

“ကိုကျော်ကျော်ဗို တင်ထားတဲ့ ဗီဒီယိုလေး တွေ့တယ်။ သွေးကတော့ ပြောတာပေါ့နော်။ သူတို့ ဘိုးစဉ်ဘောင်ဆက် အနုပညာကို ရူးသွပ်တယ်။ ကြိုးစားခဲ့ကြတယ်။ သူရိုက်ထားတာလေးကို အသိအမှတ်ပြုတယ်။ သဘောလည်း ကျတယ်” လို့ မအေးသောင်းက ဆိုပါတယ်။

“ပေါက်စီတို့တုန်းက မင်းသမီးနည်းတော့ အခွင့်အရေး ပိုရတယ်။ အခုခေတ်က ကျတော့ မင်းသမီးတွေ ပိုများလာတယ်။ ဒါပေမယ့် ပိုခက်ခဲမယ် ထင်တယ်။ တက်ဖို့၊ ကျဖို့လည်း လွယ်တယ်။ အဓိကကတော့ ကိုယ်တိုင်ကြိုးစားဖို့က ပိုအရေးကြီးပါတယ်” လို့ သရုပ်ဆောင် လောကမှာ မင်းသမီး ပေါများလာတဲ့အပေါ်ကို အခုလို ဆိုပါတယ်။

နှင်းဝတ်ရည်သောင်း၊ အေးဝတ်ရည်သောင်းနဲ့ ဆွိဝတ်ရည်သောင်းဆိုတဲ့ ညီအစ်မ ၃ ယောက်စလုံး အနုပညာလောကမှာ ရပ်တည်နေကြပြီး ညီအစ်မ ၃ ယောက်ပေါင်းပြီး အနုပညာလုပ်ငန်း တွဲလုပ်ကိုင်ဖို့ အစီစဉ်တော့ မရှိဘူးလို့ ဆိုပါတယ်။

“ပေါက်စီတို့ ညီအစ်မ ၃ ယောက် အနုပညာလုပ်ငန်းတွေ တွဲလုပ်ဖို့ မရှိပါဘူး။ ညီအစ်မ ၃ ယောက်က တွေ့ရင် စကားများနေတာနဲ့ အနုပညာလုပ်ဖို့ မတိုင်ပင်ဖြစ်ဘူး။ ညီအစ်မ ၃ ယောက်ဆုံရင် မုန့်စားတယ်။ ကစားတယ်။ ပေါက်စီကို အေးဝတ်ရည်သောင်းတုန်းက အားပေးတဲ့ ပရိသတ်တွေရော အေးသောင်းဆိုပြီး အားပေးတဲ့ ပရိသတ်တွေကို ကျေးဇူးတင်ပါတယ်” လို့ မအေးသောင်းက ပြောပါတယ်။

အစ်မကြီးဖြစ်သူ နှင်းဝတ်ရည်သောင်းက လက်ရှိ အနုပညာအလုပ်များကို မလုပ်ကိုင်တော့ဘဲ လန်ဒန်မြို့မှာ နေထိုင်နေတယ်လို့ သိရပြီး ညီမ ဆွိဝတ်ရည်သောင်းကတော့ သီချင်းများ သီဆိုနေတဲ့ အဆိုတော်တဦးလည်း ဖြစ်ပါတယ်။

The post “မြန်မာရုပ်ရှင်လောကမှာ အားနည်းချက်ရော၊ အားသာချက်ရော ရှိနေတာပါ” appeared first on ဧရာဝတီ.