Limited Edition အနေနဲ့ သီချင်းခွေ ရောင်းချသွားမယ့် “Project K”အဖွဲ့

အောက်တိုဘာလအတွင်းမှာ ထွက်ရှိတော့မယ့် Project K အဖွဲ့ရဲ့ ပထမဆုံးအခွေမှာတော့ ကလို့ကောင်းမယ့်သီချင်း ၊ ဆိုလို့ကောင်းမယ့်သီချင်းဆိုပြီး ဘောင်ခတ်မထားဘဲ စိတ်ကြိုက်ပဲ ဖန်တီးထားတယ်လို့ သိရပါတယ်။

“သီချင်းအပ်ကတည်းက ကဖို့အတွက်ဆိုပြီး မအပ်ဘူး။ ဘောင်ထဲမှာဖြစ်သွားမှာစိုးလို့။ တေးရေး ဆရာတွေကတော့ သိပြီးသားပေါ့နော်။ ဒါပေမယ့် ကျနော်တို့က ဘောင်မခတ်ထားဘူး။ စိတ်ကြိုက် ဖန်တီးပေးပေါ့။ အဲဒီလိုဖန်တီးပေးတာ ကိုမှ အကနဲ့လိုက်ရင် အကနဲ့ထည့်မယ်။ အကနဲ့မလိုက်ရင် ဘယ်လိုပုံစံမျိုးတင်ဆက်မလဲဆိုတာကို တိုင်ပင်ကြ တာပေါ့။ အဓိကကတော့ သီချင်းအပ်ရင် ကဖို့ အတွက်ရယ်လို့ မအပ်ပါဘူး” လို့ Project K အဖွဲ့ရဲ့ ခေါင်းဆောင် ထက်ဘုန်းနိုင်က ပြောပါတယ်။

သူတို့ရဲ့ ပထမဆုံးအခွေဖြစ်တဲ့ The Beginning ဆိုတဲ့အခွေကိုတော့ Limited Edition အနေနဲ့ တခွေကို မြန်မာငွေ ၁သောင်းခွဲကျပ်နဲ့ ရောင်းချပေးသွားမယ်လို့ သိရပါတယ်။

အဆိုပါ ၁သောင်းခွဲကျပ်နဲ့ရောင်းချမယ့် အခွေထဲမှာတော့ CD တချပ် ၊ DVD တချပ် ၊ ဘန်ကောက်မှာ ရိုက်ကူးထားတဲ့ ဓာတ်ပုံစာအုပ်နဲ့ တယောက်ချင်းစီရဲ့ပုံတယောက်စီနဲ့ Group ပုံတပုံ စုစုပေါင်း ၈ ပုံပါဝင်သွားမယ်လို့သိရပါတယ်။

“အများဆုံးဆိုရင် တယောက် ၂ကြောင်းပဲ။ သက်လည်း သက်သာတယ်။ အပေးအယူက မမျှစရာ မလိုဘူး။ တယောက် ကို ၂ပိုဒ်လောက်ဆိုရင် သီချင်းကပြည့်သွားပြီ။ နိုင်ငံတကာမှာဆိုရင်လည်း တချို့အဖွဲ့တွေဆိုရင် အရမ်းများတယ်။ ဘောလုံးတသင်းစာလောက်ရှိတယ်။ တချို့ဆိုရင် ဆိုတောင်မဆိုလိုက်ရဘူး။ ကျနော်တို့ကတော့ အဲဒီလိုမျိုးမရှိပါဘူး။ တယောက်တပိုဒ်ဆိုရင် ပြည့်သွားပြီ” လို့ Project K အဖွဲ့က ပြောပါတယ်။

အကပိုင်းက ကျွမ်းကျင်ပြီးသားဖြစ်ပေမယ့် အဆိုပိုင်းကနယ်ပယ် စိမ်းသလိုဖြစ်နေပေမယ့် နေရာတကာမှာ အခက်အခဲ ဆိုတာရှိတဲ့အတွက် ကြိုးစားရမှာဖြစ်တယ်လို့ ဆိုပါတယ်။

“ကျနော်တို့က အဆိုမှာ အရမ်းကြီးတော်ချင်မှတော်လိမ့်မယ်။ ဒါပေမယ့် ကျနော်တို့လုပ်သမျှ အကုန်လုံးက ကျနော်တို့ မှာ ၁၀ဖိုးရှိရင် ၁၀ဖိုးပေါ်အောင် ထုတ်ပြမယ်။ တတ်စွမ်းသလောက် အနုပညာကိုချစ်တဲ့စိတ်နဲ့ ဖန်တီးတယ်ဆိုတော့ ပရိသတ်က လက်ခံမယ်လို့ မျှော်လင့်တယ်” လို့ Project K အဖွဲ့က ပြောပါတယ်။

Project K အဖွဲ့ကတော့ ၂၀၁၆ ခုနှစ်မှစတင်ကာ အကအဖွဲ့တဖွဲ့အနေနဲ့ ရပ်တည်လာခဲ့ပြီး ယခုအခါမှာတော့ အဖွဲ့ဝင် ၇ယောက်နဲ့အတူ ဆန်းသစ်သော အကများကို ဖန်တီးလျက်ရှိပြီး “The Beginning” ဆိုတဲ့အခွေ ထွက်ရှိတော့မှာ ဖြစ်တဲ့ မြန်မာနိုင်ငံရဲ့ Boy Band အဖွဲ့ တဖွဲ့ ဖြစ်ပါတယ်။

The post Limited Edition အနေနဲ့ သီချင်းခွေ ရောင်းချသွားမယ့် “Project K” အဖွဲ့ appeared first on ဧရာဝတီ.