ကိုယ်တိုင်လည်း ဒါရိုက်တာအဖြစ် ရိုက်ကူးနေသလို စီးရီးတွဲတွေမှာလည်း ပရိသတ်အကြိုက်တွေ့အောင် သရုပ်ဆောင်ပီပြင်တဲ့ မင်းဦးက သူကိုယ်တိုင် ဒါရိုက်တာအဖြစ် ပထမဆုံး ရိုက်ကူးထားတဲ့ “ချူဆီ” ရုပ်ရှင်ကို ပရိသတ်တွေကြိုက်ကြတာ ဝမ်းသာတယ်လို့ ဆိုပါတယ်။
“ကျနော့်ကို စီးရီးတွဲမှာ သရုပ်ကောင်းတယ်ကြိုက်ကြတယ်ဆိုတော့ အရမ်းဝမ်းသာရတယ်။ ဘယ်လို ပြောရမှန်း မသိဘူး။ နောက် ကျနော်ရိုက်တဲ့ ‘ချူဆီ’ကိုလည်း ကြိုက်ကြတော့ အရမ်းဝမ်းသာရတယ်။ ပထမဦးဆုံးကားလေးလည်း ဖြစ်တယ်။ ကျနော် အပြည့်အဝတော့ မပျော်ဘူး။ ဘာလို့လဲဆိုတော့ ငါဒီထက် ပိုပြီးကြိုးစားဦိးမယ်။ ဒီထက်ကောင်းအောင် လုပ်ရဦးမယ်ဆိုတဲ့ အသိတခုရတယ်။ နောက်ပိုင်းတော့ စီးရီးကားလေးတွေလည်း ရိုက်မယ်။ ဇာတ်ကားကြီးတွေလည်း ရိုက်သွားမယ်”လို့ မင်းဦးက ပြောပါတယ်။
မင်းဦးက လတ်တလောမှာလည်း ရုပ်ရှင်ကားကြီးနဲ့ ဇာတ်လမ်းတွဲတွေ ရိုက်နေရတဲ့ အကြောင်းကိုလည်း အခုလိုပဲ ပြောပါတယ်။
“လတ်တလောတော့ ကားကြီး ‘တခါက ဆတ်သေချောင်း’ ကား ရိုက်တယ်။ ပြီးတော့ MRTV-4နဲ့ ဇာတ်လမ်းတွဲ ရိုက်မယ်။ စီးရီးတွဲတွေကို အရင်တည်းက စိတ်ဝင်စားတယ်။ ကာရိုက်တာကိုလည်း ပီပီပြင်ပြင်လုပ်ရတယ်။ ပရိသတ်ကိုလည်း အကြာကြီးပြလို့ ရတယ်။ ဗီဒီယိုတို့ ရုပ်ရှင်တို့က ၂ နာရီထက် ပိုပြလို့မရဘူးပေါ့။ စီးရီးတွဲက ဇာတ်လမ်းရှည်ရင် ရှည်သလောက် အပိုင်းနဲ့ ပြရတာဆိုတော့ ပရိသတ်နဲ့ နီးတယ်။ ဗီလိန်ပဲဖြစ်ဖြစ် ဘာပဲဖြစ်ဖြစ် ကိုယ်လုပ်ပြချင်တာကို အများကြီး လုပ်ပြလို့ရတယ်” လို့ မင်းဦးက ဆိုပါတယ်။
အိမ်ထောင်သက်၂ နှစ်ကျော်ပြီဖြစ်တဲ့ မင်းဦးက အိမ်ထောင်ရေး သာသာယာယာနဲ့ အေးအေးဆေးဆေးဖြတ်သန်းနေပြီး ရင်သွေးလည်းယူဖို့ကိုတော့ “ကျနော် ရင်သွေးက ယူတယ်။ မရသေးဘူး။ ရရင်လည်းပြောပြပါမယ်။ အခုချိန်မှာတော့ အိမ်ထောင်ရေးသာသာယာယာနဲ့ အေးအေးဆေးဆေးဖြတ်သန်းနေပါတယ်။ ကျနော်တို့ တားထားတာတော့ မရှိပါဘူး။ မရသေးတာပါ” လို့ ပြောပါတယ်။
“ရုပ်ရှင် အနုပညာဆိုတာ ကျနော့်ဘဝပါပဲ။ ဘာပဲဖြစ်ဖြစ် ပရိသတ်အတွက် ကိုယ်စွမ်းဉာဏ်စွမ်းရှိသလောက် အနုပညာတွေ လုပ်သွားတယ်။ သူများတွေလောက်တော်ချင်မှတော်မယ်။ တတ်ချင်မှ တတ်မယ်။ ကျနော်အကောင်းဆုံးဖြစ်အောင်တော့ ကြိုးစားနေမှာပါ။ ကျနော်ဖန်တီးလိုက်တဲ့ အနုပညာတခုက ပရိသတ်ရင်ထဲရောက်ရင် ကျေနပ်ပါပြီ”လို့ မင်းဦးက ပြောပါတယ်။
မင်းဦးက ၂၀၁၆ ခုနှစ်မှာ အကယ်ဒမီဆု ရရှိခဲ့သလို ဇာတ်ကားတွေ ဆက်တိုက် ရိုက်ကူးခွင့်ရလာပြီး ဇာတ်ကားရိုက်ကူးတဲ့နေရာတွေမှာ အရင်ကထက် နေရာပိုရရှိလာသလို သရုပ်ဆောင်ကောင်းတာကြောင့် ပရိသတ် အားပေးမှုလည်း အခိုင်အမာ ရရှိထားပါတယ်။
The post “ချူဆီ” ရုပ်ရှင်ကို ပရိသတ်တွေ အားပေးကြလို့ ဝမ်းသာနေတဲ့ မင်းဦး appeared first on ဧရာဝတီ.
