စတုတ္ထမြောက် “Avengers” ရုပ်ရှင်ရဲ့ ပထမဆုံးအမြည်းဗီဒီယိုကို ပြီးခဲ့တဲ့ ဒီဇင်ဘာလ ၇ ရက်နေ့မှာ ဖြန့်ချိခဲ့ပြီး အဲဒီ့ နာမည်ကျော် Marvel ရုပ်ရှင်မှာတော့ စိတ်ခံစားမှုပိုင်းဆိုင်ရာ အဆုံးသတ်အထိ ဆွဲခေါ်သွားတာကို မြင်တွေ့ရပါတယ်။
“Avengers: Infinity War” ရုပ်ရှင်နောက်ပိုင်း လျှို့ဝှက်ချက်တွေကိုတော့ မြုှပ်ထားဆဲ ဖြစ်ပေမယ့် မကြာမီထွက်လာ တော့မယ် ရုပ်ရှင်ကတော့ “ခရီးစဉ်တပိုင်းရဲ့ အဆုံးသတ်” လို့ ဖော်ပြထားပါတယ်။
အဲဒီအမြည်းဗီဒီယိုထဲမှာတော့ မင်းသား Robert Downey Jr ရဲ့ ဇာတ်ကောင်ဖြစ်တဲ့ Tony Stark ဟာ Iron Man ဝတ်စုံကို ချွတ်ထားတာမြင်တွေ့ရပါတယ်။
ဒါ့အပြင် မင်းသား Chris Evans ရဲ့ဇာတ်ကောင် Captain America နဲ့ မင်းသမီး Scarlett Johansson ရဲ့ဇာတ်ကောင် Black Widow တို့ကို မဟာဗီလိန်ကြီး Thanos ရဲ့ ဖျက်စီးမှုအပြီး ကြေကွဲဝမ်းနည်းနေဟန် အနေအထားတွေနဲ့ မြင်တွေ့ရပြန်ပါတယ်။
ဒါ့အပြင် မင်းသား Paul Rudd ရဲ့ Ant-Man ကတော့ ကျန်ရှိတဲ့ Avengers ဇာတ်ကောင်တွေကို ကူညီဖို့ ကမ်းလှမ်းနေဟန် ပြကွက်နဲ့ ဗီဒီယိုကို အဆုံးသတ်ထားတာဖြစ်ပြီး ပရိသတ်တွေကတော့ နည်းနည်း စိတ်သက်သာရာရကြတယ်လို့ ဆိုပါတယ်။
ဒါရိုက်တာတွေဖြစ်ကြတဲ့ Anthony နဲ့ Joe Russo တို့ဟာ “Infinity War” ရဲ့ အခုနောက်ဆက်တွဲ ရုပ်ရှင်ကို တာဝန်ယူရိုက်ကူးပေးထားကြပြီး ဇာတ်ညွှန်းဆရာတွေအနေနဲ့ Christopher Markus နဲ့ Stephen McFeely တို့က ပါဝင်အားဖြည့်ထားကြပါတယ်။
ဒါရိုက်တာ Joe ရဲ့အဆိုအရ မကြာမီရုံတင်မယ့် “Avengers” ရုပ်ရှင်ဟာ ကြာချိန် ၃ နာရီရှိမယ်လို့သိရပါတယ်။ Marvel Studios ကတော့ ပြီးခဲ့တဲ့ ဒီဇင်ဘာလ ၈ ရက်နေ့မှာပဲ “Endgame” အမြည်းဗီဒီယိုဟာ Youtube မှာ ၂၄ နာရီအတွင်း လူကြည့်အများဆုံး စံချိန်ကို ၂၈၉ သန်းအကြိမ်အရေအတွက်နဲ့ ချိုးနိုင်ခဲ့တယ်လို့ ဖော်ပြလိုက်ပါတယ်။
အရင်စံချိန်ဟောင်းကို “Avengers: Infinity War” ရုပ်ရှင်ကတင်ထားခဲ့တာဖြစ်ပါတယ်။
Ref: etcanada
The post ၂၄ နာရီအတွင်း ကြည့်ရှုသူ ၂၈၉ သန်းကျော်သွားတဲ့ ‘Avengers: Endgame’ အမြည်းဗီဒီယို appeared first on ဧရာဝတီ.