၂၀၁၈ ကုန်ခါနီး တရက်အလို ဒီဇင်ဘာလ ၃၁ ရက်နေ့မှာ ထွက်ရှိလာတဲ့ စိတ်ဝင်စားစရာ သတင်းကောင်းလေး ရှိပါတယ်။ အာရှပရိသတ်တွေက “Asia Prince” လို့ ချစ်စနိုးခေါ်ကြတဲ့ Running Man အဖွဲ့ဝင် လီဂွမ်ဆူရဲ့ Dating သတင်းပါ။ လီဂွမ်ဆူဟာ မင်းသမီး လီဆူဘင်းနဲ့ ချစ်သူတွေဖြစ်နေကြောင်းကို ယနေ့၊ ဒီဇင်ဘာလ ၃၁ ရက်နေ့မှာ အေဂျင်စီတွေကတဆင့် အတည်ပြုပေးလိုက်ပါပြီ။
လီဂွမ်ဆူရဲ့ အေဂျင်စီ King Kong က “မင်းသား လီဂွမ်ဆူနဲ့ မင်းသမီး လီဆူဘင်းတို့ ချစ်သူတွေဖြစ်တာ ၅ လ လောက် ရှိပါပြီ။ ၂၀၁၆ ခုနှစ် Running Man အစီအစဉ်မှာ တွေ့ဆုံခဲ့ပြီး ရင်းနှီးသွားကာ အခုလို ချစ်သူတွေ ဖြစ်ခဲ့ကြတာပါ။ နှစ်ယောက်လုံးကလည်း ချစ်သူတွေ ဖြစ်တဲ့အကြောင်းကို ရင်းနှီးတဲ့ မိတ်ဆွေ အသိုင်းအဝိုင်းတွေကို ပြောပြထားပါတယ်။ သူငယ်ချင်းတွေကိုလည်း ချစ်သူစုံတွဲအဖြစ် တရားဝင် မိတ်ဆက်ပေးထားပါတယ်”လို့ အတည် ပြုပြောကြားခဲ့ပါတယ်။
မင်းသမီး လီဆူဘင်း ၂၀၁၆ ခုနှစ်မှာ Running Man အစီအစဉ်ကို ပါဝင်ခဲ့တုန်းက လီကွမ်ဆူကို စိတ်ဝင်စားတဲ့ အကြောင်း ပြောပြခဲ့ဖူးပါတယ်။ “သူ ကျမကို ကတောက်ကဆ ပြန်လုပ်တဲ့ အပြုအမူလေးက သဘောကျစရာပါ။ ကျမတို့နှစ်ယောက် လိုက်ဖက်မှုရှိတယ်လို့လည်း ထင်တယ်” လို့ ပြောခဲ့ဖူးပါတယ်။
လီဂွမ်ဆူကလည်း လီဆူဘင်းက လိုက်ဖက်မှုရှိတယ်လို့ ပြောလိုက်တဲ့စကားကို အတည်ပေါက်နဲ့ “ကျနော် လီဆူဘင်းနဲ့ တွဲဖို့ ဆုံးဖြတ်လိုက်ပါပြီ။ နောက်တပတ်မှာ ကျနော်တို့ နှစ်ယောက် လက်ထပ်မယ့်သတင်းကို ကြေညာသွားပါ့မယ်”လို့ ၂၀၁၆ Running Man အစီအစဉ်မှာ ဆိုခဲ့ဖူးပါတယ်။
၂၀၁၆ Running Man အစီအစဉ်အပြီးမှာ လီဂွမ်ဆူနဲ့ လီဆူဘင်းတို့ သူငယ်ချင်းအဖြစ် ရင်းနှီးသွားခဲ့ပြီး လွန်ခဲ့တဲ့ ၅ လလောက်ကစလို့ ချစ်သူအဆင့် ရောက်ခဲ့ကြတာပါ။ သူတို့နှစ်ယောက်ရဲ့ သတင်းကို မီဒီယာတွေ ပရိသတ်ရှေ့ ချမပြခင်ကတည်းက ရင်းနှီးတဲ့ သူငယ်ချင်းမိတ်ဆွေတွေကို ပွင့်ပွင့်လင်းလင်း ပြောပြခဲ့ကြပြီး တွဲခဲ့တယ်လို့ သိရပါတယ်။
သူငယ်ချင်းတွေနဲ့ တွေ့ဆုံ စားသောက်ကြတဲ့အခါ စုံတွဲတက်လေ့ရှိပြီး လီဂွမ်ဆူက လီဆူဘင်းနဲ့ ချစ်သူတွေ ဖြစ်နေတဲ့အကြောင်းကို ပရိသတ်ရှေ့ ချပြမှာပါလို့ မကြာခဏပြောတဲ့အကြောင်း သူတို့နဲ့ နီးစပ်တဲ့ အသိုင်းအဝိုင်းက တဆင့် သိရပါတယ်။
Ref: Soompi
The post Running Man မှာ ဆုံတွေ့ခဲ့ပြီး ချစ်သူတွေ ဖြစ်သွားကြတဲ့ လီဂွမ်ဆူနဲ့ လီဆူဘင်း appeared first on ဧရာဝတီ.