The Voice Myanmar Season 1 ကနေ ပရိသတ် အားပေးမှုရရှိလာခဲ့တဲ့ အဆိုတော်ငွေစိုးက တကိုယ်တော် တေးစီးရီးထွက်ဖို့ ပြင်ဆင်နေသလို မကြာခင်ပြုလုပ်မယ့် Season 2 ကိုပြိုင်ပွဲဝင်မယ့် ပြိုင်ပွဲဝင်တွေကိုလည်း ကျန်းမာရေးဂရုစိုက်ဖို့ အကြံပေးစကားများ ဧရာဝတီကို ပြောပါတယ်။
“The Voice Myanmar Season က Season 2 လည်း လာတော့မယ်။ ပြိုင်ပွဲဝင်တွေကို ပြောပြချင်တာက ပြိုင်ပွဲတခုကို ပြိုင်တော့မယ်လို့ ဆုံးဖြတ်ထားရင် အသံအတွက် ထိန်းသိမ်းပါ။ ကျန်းမာရေးဂရုစိုက်ပါ။ အစားအသောက် ဆင်ခြင်ပါ။ အိပ်ရေး ဝဝအိပ်ပါ။ သီချင်းတွေ ကြိုရွေးပါလို့ပြောချင်ပါတယ်”
“Season1 တုန်းက ကျနော်လုပ်ခဲ့တာ ဘာမှ သိပ်မရှိဘူး။ ကျန်းမာရေး ဂရုစိုက်တယ်။ သီချင်းတွေ ကြိုရွေးတယ်။ ကြိုလုပ်တယ်။ ပရိသတ်နဲ့ တသားတည်းကျမယ့် သီချင်းမျိုးလေးတွေ ပရိသတ်မကြားတာကြာတဲ့ သီချင်းလေးတွေ ပြန်ဆိုတယ်” လို့ ငွေစိုးက ဆိုပါတယ်။
တကိုယ်တော်တေးစီးရီးအတွက် သီချင်းတွေလုပ်နေပြီး ပရိသတ်များနားဆင်နိုင်ဖို့ အွန်လိုင်းကနေလည်း Single Song တွေတင်ပေးဖြစ်နေတယ်လို့ ဆိုပါတယ်။ တကိုယ်တော်အခွေကိုတော့ ဖေဖော်ဝါရီနဲ့ မတ်လ အတွင်းထွက်နိုင်အောင် ကြိုးစားနေပြီး ဒီနှစ်အတွင်းတော့ ထွက်နိုင်ဖို့ သေချာကြောင်းဆိုပါတယ်။
ငွေစိုးက အဆိုတော်အပြင် သရုပ်ဆောင်အဖြစ် Canel+ မှာပြသနေတဲ့ “စာမျက်နှာသစ်”ဆိုတဲ့ ဇာတ်ကားမှာ ပါဝင်သရုပ်ဆောင်ထားတယ်လို့ ဆိုပါတယ်။
“ကျနော် Canel+ အတွက် “စာမျက်နှာသစ်” ဆိုတဲ့ ဇာတ်ကားလေးမှာ ပါဝင်သရုပ်ဆောင်ထားတယ်။ အဆိုပိုင်းကလာတဲ့ သူဆိုတော့ သရုပ်ဆောင်ပိုင်းမှာ ခက်ခဲတယ်။ သီချင်းကျက်ရတာနဲ့ မတူဘူး။ နောက် ဝါရင့်တွေနဲ့ သရုပ်ဆောင်ရင် ရှိန်တော့ ကျက်ထားတာတွေမေ့ကုန်တယ်။ သူတို့က လက်တွဲခေါ်ပေးတော့ နောက်ပိုင်းအဆင်ပြေ သွားတယ်”
“ကျနော် သရုပ်မဆောင်ချင်ဘူး။ MTV လိုမျိုးက သိပ်ပြဿနာမရှိဘူး။ ကိုယ့်ကြောင့် ပရိသတ်အနှောင့်အယှက် ဖြစ်မှာ စိုးတယ်။ ကိုယ့်သမီးကိုယ်တိုင်က ဖေဖေသရုပ်ဆောင်တာ ကောင်းတယ်။ မျက်လုံးတော့ပြင်ရမယ်တဲ့ သမီးကိုယ်တိုင်က ဝေဖန်တယ်။ ကိုယ့်သမီးက ကိုယ့်ကို အားပေးတယ်။ သီချင်းဆိုလည်းအားပေးတယ်” လို့ ငွေစိုးက ဆိုပါတယ်။
သမီးတယောက်ရဲ့ ဖခင်ဖြစ်တဲ့အတွက် သမီးဖြစ်သူနဲ့ ပတ်သက်တဲ့ ခံစားချက်ကိုလည်း အခုလိုဆိုပါတယ်။
“ သမီးက ငွေနှင်းရတီပါ။ အသက်က ၁၀နှစ် မန္တလေးမှာနေပါတယ်။ သမီးလေးကို သူ့ရဲ့ စိတ်နဲ့ ထပ်တူကျတာကိုပဲ လုပ်စေချင်တယ်။ ကျနော်ကိုယ်တိုင်က ဒါလုပ်ပါလို့ မတိုက်တွန်းချင်ဘူး။ အဖေရော အမေရော ဂီတလိုင်းက ဆိုတော့ သူ့မှာလည်း ပိုးတော့ ပါတယ်။ သူအင်္ဂလိပ် သီချင်းတွေနားထောင်တယ်”
“ကျနော်သမီးအတွက် သီချင်းလေး တပုဒ်ဆိုဖို့ရှိတယ်။ ကိုလင်းကို ရေးခိုင်းထားတယ်။ ကိုလင်းကလည်း သမီးလေး နှစ်ယောက်မွေးထားတာလေ။ သူ့ရေးပေးရင် ကိုယ်နဲ့ ထပ်တူကျမယ်ထင်လို့ သူရေးပေးမယ်ပြောတယ်။ ကျနော့်အယ်ဘမ်လ်ထဲမှာ ပါမယ်”လို့ ငွေစိုးက ပြောပါတယ်။
အဆိုတော်ငွေစိုးက The Voice Myanmar Season 1 မှာ Winner ရရှိခဲ့ပြီး နောက်ပိုင်း သီချင်းတွေ သီဆိုနေသလို အွန်လိုင်းကနေ ပရိသတ်အတွက် သီချင်းသစ် နှစ်ပုဒ်တင်ပေးထားပါသေးတယ်။
The post “The Voice Myanmar” အဆိုပြိုင်ပွဲ ဝင်မယ့်သူတွေကို အကြံပေးစကားပြောတဲ့ ငွေစိုး appeared first on ဧရာဝတီ.