မြန်မာ့ရိုးရာ အတာသြင်္ကန် ပွဲတော်ကြီးမှာ ပရိသတ်တွေ ချစ်ကြတဲ့ အနုပညာရှင်များ ဖြစ်ကြတဲ့ အဆိုတော် နီနီခင်ဇော်၊ သရုပ်ဆောင် ခရစ္စတီးနား၊ နန်းဆုဦး၊ စိုးပြည့်သဇင်တို့က ရန်ကုန်မြို့ရဲ့ ဘယ်နေရာမှာ ရှိနေမလဲဆိုတာ ပြောပြထားသလို ပရိသတ်တွေအတွက် နှစ်သစ်ဆုတောင်း စကားသံများနဲ့ ကျန်းမာရေး ဂရုစိုက်ဖို့ကိုလည်း အခုလို ပြောပြထားပါတယ်။
နီနီခင်ဇော်
မြကျွန်းသာသြင်္ကန်မှာ အမိုက်စား ဖျော်ဖြေမှုတွေနဲ့ အတူ ရှိပါမယ်။ ဒီမှာ လမ်းလျှောက်သြင်္ကန်တွေရော၊ စတိတ်ရှိုးတွေရော မိသားစုတွေ ပျော်ကြမယ်လို့ နီနီ ထင်တယ်။ သြင်္ကန်မှာ ရေဆော့မယ့်သူတွေ အတွက်ပြောချင်တာက မနှစ်ကထက်တောင် ပိုပူပါတယ်။
အရမ်းပူနေတော့ ပရိသတ်တွေကိုလည်း စိတ်ပူတယ်။ ကိုယ့်ကိုယ်ကိုယ်လည်း စိတ်ပူတယ်။ ရေများများ သောက်ပြီး ဓာတ်ဆား များများသောက်ဖို့ ပြောချင်တယ်။ နီနီလည်း အဲ့လိုပဲ သောက်ပါတယ်။ အတက်နေ့ လမ်းလျှောက်သြင်္ကန်မှာ နီနီ ရေပက်ပါမယ်။
ခရစ္စတီးနား
ရန်ကုန်သြင်္ကန်ကို စည်ကားတာ မြင်ရတော့ အရမ်းဝမ်းသာပါတယ်။ အရင်နှစ်တွေကဆို သြင်္ကန်က ခြောက်သလို ဖြစ်သွားတယ်။ အခု လမ်းလျှောက်တွေ လုပ်လာတော့ အရမ်းကောင်းတယ်။ နှစ်တိုင်း ကိုယ်က ရန်ကုန်မှာ မရှိဘဲ နယ်မှာပဲ ရှိတယ်။ ဒီနှစ်လည်း တောင်ငူက CB Bank မဏ္ဍပ်မှာပဲ ရှိမှာပါ။ သြင်္ကန်ဆိုရင် အိမ်က ပေးမထွက်ဘူး။ အဲ့ဒါကို တရက် ခိုးထွက်ပြီး လည်တာ ပြန်တော့ အရိုက်ခံရတာက အမှတ်တရပဲ။
နောက်ပိုင်း အနုပညာလုပ်တော့ ပရိသတ်တွေနဲ့ပဲ ဖြတ်သန်း ဖြစ်ပါတယ်။ ယဉ်ကျေးလုံခြုံစွာနဲ့ ပျော်ရွှင်ကြပါ။ ယောကျာ်းလေး ပရိသတ်တွေလည်း ပျော်တာက ပျော်ပါ။ လျှော့ သောက်ပေးကြပါလို့။ ကျန်းမာရေးအတွက်ရော ရာသီဥတုက အရမ်းပူတဲ့ အတွက်ရော ပြောချင်ပါတယ်။
နန်းဆုဦး
သြင်္ကန် ၄ ရက် မြကျွန်းသာ လမ်းလျှောက်သြင်္ကန်မှာ ရှိပါမယ်။ ဖက်ရှင်တွေကတော့ ရာသီဥတုက အရမ်းပူတော့ ပေါ့ပေါ့ပါးပါး ဖက်ရှင်တွေ ပဲ ဝတ်ပါမယ်။ မဏ္ဍပ်တွေ နည်းသွားတယ်လို့ မြင်တယ်။ လမ်းလျှောက်သြင်္ကန်တွေ ရှိလာတော့ ပျော်ဖို့တော့ ကောင်းပါတယ်။
သြင်္ကန်ဆိုတာနဲ့ကို ပျော်နေပြီ။ အလုပ်ပဲ လုပ်နေလုပ်နေ၊ အိမ်မှာပဲနေနေ သြင်္ကန်ဆိုတာနဲ့ ပျော်နေပြီ။ ပရိသတ်တွေလည်း ရာသီဥတုက အရမ်းပူတဲ့အတွက် ရေများများသောက်ပြီး ကျန်းမာရေး ဂရုစိုက်ကြပါ။ ပေါ့ပေါ့ပါးပါး အဝတ်အစားလေးတွေနဲ့ လည်ကြပါ။ သိပ်မသောက်ပါနဲ့လို့ ပြောချင်ပါတယ်။
စိုးပြည့်သဇင်
လမ်းလျှောက်သြင်္ကန်ကို စိုးပြည့် အရမ်းကြိုက်တယ်။ ကားတွေနဲ့သွား၊ ပိုက်တွေနဲ့ ထိုးတာထက်စာရင် လမ်းလျှောက်ကြတာ မြန်မာ့ယဉ်ကျေးမှု၊ မြန်မာ့ရိုးရာလည်း ခံစားရတယ်လို့ ထင်တယ်။ စိုးပြည့် EDM တော့ သိပ်မကြိုက်ဘူး။ မသွားဖူးဘူး။ စိုးပြည့် သီချင်း ဆိုတာတွေကလည်း Band နဲ့ ဆိုတာ များတယ်။
ညီအစ်မ ၄ ယောက်ကတော့ သြင်္ကန်မှာ တူတူဆုံဖို့ မလွယ်ဘူး။ ရာသီဥတု အရမ်းပူတဲ့အတွက် ဂရုစိုက်စေချင်ပါတယ်။ သြင်္ကန်မှာဆို ပျော်ကြတယ်။ ပျော်တဲ့အခါ အရမ်းပျော်ပြီး မကဲကြဖို့ ကိုယ့်အသက်ကအရေးကြီးတယ်ဆိုတာလေး ဂရုစိုက်စေချင်ပါတယ်။
The post သြင်္ကန်မှာ ကျန်းမာရေး ဂရုစိုက်ကြဖို့ အနုပညာရှင်များ ပြော appeared first on ဧရာဝတီ.