မြန်မာ့လက်ရွေးစင် ဘောလုံးသမားတဦးဖြစ်တဲ့ ကျော်မင်းဦးကတော့ ဒူးခေါင်းဒဏ်ရာကြောင့် ထိုင်းနိုင်ငံ ဘန်ကောက်မှာ ခွဲစိတ်ကုသမှု ခံယူနေရပြီး ဘောလုံးပြန်ကန်ဖို့အတွက် ခွဲစိတ်ပြီး အရှိန်ယူရဦးမယ်လို့ ပြောပါတယ်။
“ခွဲစိတ်လိုက်ရင်တော့ ဆရာဝန်ကပြောတာ ၁၀၀ ရာခိုင်နှုန်း အာမခံတယ်။ ခွဲစိတ်မှု မလုပ်ခင် Gym ကစားဖို့ပါပဲ။ ခွဲစိတ်ပြီးရင် ကြွက်သားတွေက သေးသွားမှာဆိုတော့ ထိန်းထားဖို့အတွက်တော့ လိုအပ်တယ်။ ကျနော် ဘောလုံးကန်ဖို့ အတွက် ခွဲစိတ်ပြီးရင် အရှိန်ယူရဦးမယ်။ အဲဒီအတွက် စောင့်ဆိုင်းပြီးတော့ အားပေးပါဦးလို့ ပြောချင်ပါတယ်”လို့ ကျော်မင်းဦးကပြောပါတယ်။
အဆိုပါဒဏ်ရာကြောင့် အချိန်ကာလတခုအကြာ ဘောလုံးလောကမှ အနားယူကာ မွေးရပ်မြေကို ပြန်သွားခဲ့ပြီး ဘောလုံးအဖွဲ့ချုပ် ဥက္ကဋ္ဌရဲ့ ထောက်ပံ့မှုနှင့် သူ့ရဲ့ဘောလုံးကန်ချင်တဲ့ တွန်းအားကြောင့် ပြန်လည်ကစားဖို့အတွက် ဖြစ်လာတာလို့ ဆိုပါတယ်။
“တွန်းအားပေးတယ်ရယ်လို့ ကန်ဖူးတဲ့သူတိုင် းသိတယ်။ ဥက္ကဋ္ဌကလည်း ကျနော့်အပေါ်မှာ ဒုတိယအဖေလိုပဲ။ သူကျနော့်အပေါ်မှာ အများကြီးကောင်းခဲ့တယ်။ ဥက္ကဋ္ဌနဲ့တွေ့တဲ့အခါ မလွန်ဆန်နိုင်ဘူး။ ကျနော်ကလည်း ကစားချင်စိတ်ရှိတယ်” လို့ ကျော်မင်းဦးကပြောပါတယ်။
ခွဲစိတ်မှုပြုလုပ်တဲ့ အခြေအနေကတော့ အောင်မြင်မှု ရာခိုင်နှုန်းများပြီး မေလ ၁၂ ရက်နေ့ကလည်း နောက်တကြိမ်ခွဲစိတ်ရန်အတွက် ဘန်ကောက်ကို ရောက်ရှိသွားပြီ ဖြစ်ပါတယ်။
ဘောလုံးသမားတယောက်အနေနဲ့ အောင်မြင်မှုတခုရရှိခဲ့တဲ့ ကျော်မင်းဦးကိုတော့ လတ်တလောမှာ မိန်းကလေးပရိသတ်အများစုက ဝန်းရံနေကြပြီး ရုပ်ရည်ချောမောမှုကြောင့် အနုပညာအလုပ်များလုပ်ရန် ကမ်းလှမ်းခဲ့ပါက လုပ်ဖို့ရှိ၊ မရှိကိုလည်း အခုလိုပြောပြခဲ့ပါတယ်။
“ကျနော့်အတွက် ဘောလုံးက နံပါတ် ၁ပါပဲ။ ဘောလုံးက အားတဲ့ရက်တွေ ကျရင်တော့ လုပ်ဖြစ်မယ်ဆိုတာ သရုပ်ဆောင်ရယ်လို့တော့ မဟုတ်ပါဘူး။ သရုပ်ဆောင်လုပ်တာ တော်တော်ကြီးကို ခက်ခဲပါတယ်။ အဲဒီလောက်ထိတော့ မဟုတ်ပါဘူး။ အနုပညာအလုပ်က ကျနော်မလုပ်ချင်ဘူး”လို့ ကျော်မင်းဦးကပြောပါတယ်။
ကျော်မင်းဦးကတော့ သူ့ကိုချစ်ခင်ကြတဲ့ ပရိသတ်များနဲ့ တွေ့ဆုံစကားပြောကြတဲ့ We Love Group ရှိပြီး ခွဲစိတ်မှုတွေနဲ့ မအားလပ်သေးတာကြောင့် အပြင်မှာတွေ့ဆုံမှုမပြုလုပ်ရသေးဘူးလို့ ဆိုပါတယ်။
The post ဘောလုံး ပြန်ကန်ဖို့အတွက် ဘန်ကောက်မှာ ဒူးခေါင်း ခွဲစိတ်မှု ပြုလုပ်နေတဲ့ ကျော်မင်းဦး appeared first on ဧရာဝတီ.