မင်းသမီး ကာဇုမိ အာရီမူရာနဲ့ မင်းသား ကန်တာရို အီတိုတို့ ခေါင်းဆောင် ပါဝင်ထားတဲ့ Fantasy ဆန်ဆန် “Before the Coffee Gets Cold (Café Funiculi Funicula)” ဂျပန်ဇာတ်ကားလေးက Time Travel အကြောင်းကို တင်ဆက်ပုံ ထူးခြားအောင် ရိုက်ကူးထားတဲ့ ဇာတ်ကားကောင်း တကားပါ။ ၂၀၁၈ ခုနှစ်က ထွက်ရှိထားတဲ့ ဇာတ်ကားဖြစ်ပြီး Rating ကလည်း IMDB မှာ (7.1) ရထားပါတယ်။
“Café Funiculi Funicula” လို့ နာမည်ဆန်းဆန်းလေး ပေးထားတဲ့ ကော်ဖီဆိုင်လေးမှာ ပါးစပ်ရာဇဝင်လေးတခု ရှိနေပါတယ်။ ကော်ဖီဆိုင်ထဲက ခုံတခုံမှာ သွားထိုင်လိုက်ရင် ကိုယ်သွားချင်တဲ့ အတိတ်ကို ပြန်သွားနိုင်တယ်လို့ လူပြောများနေတဲ့ ဆိုင်လေးပေါ့။ ဒီလိုသွားဖို့ဆိုရင် လိုက်နာရမယ့် စည်းကမ်းချက်လေးတွေ ရှိနေပါတယ်။
ပထမတချက်က အတိတ်ကိုပြန်သွားမယ်ဆိုရင် ဘာပဲလုပ်ခဲ့လုပ်ခဲ့ ပစ္စုပ္ပန်ကို ပြောင်းလဲသွားမှာ မဟုတ်ဘူး။ ဒုတိယအချက် အတိတ်ကို ပြန်သွားနေတုန်းမှာ ဒီကော်ဖီဆိုင်ထဲကနေ အပြင်ထွက်သွားလို့ မရပါဘူး။ တတိယတချက် ပြန်သွားမယ်ဆိုရင် ဖျော်ပေးတဲ့ကော်ဖီ ပူနေတုန်းအချိန်ပဲ အတိတ်မှာ နေခွင့်ရမှာဖြစ်ပါတယ်။ ကော်ဖီ ပြန်မအေးခင် ကုန်အောင် သောက်မှသာ ပစ္စုပ္ပန်ကို ပြန်ရောက်လာမှာပါ။
စတုတ္ထတချက်ကတော့ ထိုင်ခုံမှာ လူရှိနေရင် သူ မထမချင်း စောင့်ဆိုင်းပေးရမှာဖြစ်ပြီး သူထသွားမှပဲ အသုံးပြုနိုင်ပါမယ်။ နောက်ဆုံး တချက်ကတော့ အတိတ်ကို ပြန်သွားမယ်ဆိုရင် ကော်ဖီဆိုင်ကို လာခဲ့ဖူးသူတွေနဲ့ပဲ တွေ့ဆုံနိုင်မှာဖြစ်တယ်ဆိုတဲ့ အချက်လေးတွေကို သဘောတူမှ ပြန်သွားခွင့် ရမှာပါ။
ဒီရာဇဝင်လေးအကြောင်းကို ကြားပြီး တနေ့ တနေ့ ကော်ဖီဆိုင်ကို လာစောင့်နေကြတဲ့သူတွေလည်း မနည်းပါဘူး။ ဒါပေမယ့် ထူးခြားတဲ့တချက်က အတိတ်ကိုပြန်သွားလို့ရတဲ့ တခုတည်းသော ထိုင်ခုံလေးမှာ အမြဲတမ်းလိုလို လူလတ်ပိုင်း အမျိုးသမီးတယောက် စာအုပ်ဖတ်ရင်း ထိုင်နေတတ်ပါတယ်။ သူဘယ်အချိန် ထိုင်ခုံက ထမလဲဆိုတာ မသိသလို၊ ဘာလို့ ဒီလိုအကြာကြီး ထိုင်နေတယ် ဆိုတာကိုလည်း ဆိုင်ရှင်မောင်နှမ နှစ်ယောက်ကလွဲပြီး မသိကြပါဘူး။
ရည်စားက အမေရိကားထွက်သွားလို့ အတိတ်ကို ပြန်သွားချင်နေတဲ့သူရယ်၊ မမျှော်လင့်ဘဲ ညီမလေး ဆုံးရှုံးလိုက်ရလို့ သွားပြန် နှုတ်ဆက်ချင်သူရယ်၊ အတိတ်မေ့ရောဂါကြောင့် အမျိုးသားကို မေ့နေပြီး အရင်က မပေးလိုက်ရတဲ့ စာကိုပဲ ပြန်ပေးချင်နေတဲ့ အမျိုးသမီးတွေ သူတို့ တကယ်ပဲ အတိတ်ကိုပြန်သွားပြီး ဘယ်လို ခံစားခဲ့ရလဲ ဆိုတာကို ကြည့်ရှုရမှာ ဖြစ်ပါတယ်။
အတိတ်ကိုသွားတဲ့အခါ ကော်ဖီဖျော်ပေးရတဲ့ တာဝန်ကို မျိုးဆက် အဆက်ဆက် လက်ဆင့်ကမ်း ယူခဲ့ရတဲ့ နောက်ဆုံး မျိုးဆက် ကော်ဖီဆိုင်ပိုင်ရှင် ညီမ ခါဇုကရော အတိတ်ကို ပြန်သွားချင်ပေမယ့် မသွားနိုင်ဖြစ်နေတဲ့ အခက်အခဲကို ကော်ဖီဆိုင် အမြဲလာထိုင်နေကျ တက္ကသိုလ်ကျောင်းသားလေး ရူစုကီ သိသွားပြီး ဘယ်လို ဖြေရှင်းပေးမလဲဆိုတာ စိတ်ဝင်စားစရာ ကောင်းပါတယ်။
ထူးခြားတဲ့ ထိုင်ခုံလေးမှာထိုင်ရင် ကိုယ်သွားချင်တဲ့အချိန်ကို ပြန်သွားနိုင်ပေမယ့် အနာဂတ်ကို ပြောင်းလဲလို့ မရတဲ့ အချက်ကြောင့် ပြန်သွားခဲ့ကြသူတွေက ရလဒ်ကို တကယ်ပဲ လက်ခံနိုင်ရဲ့လား။ နောက်ထပ် ထူးခြားတာက အတိတ်ကို ပြန်သွားရုံတင် မဟုတ်ဘဲ အနာဂတ်ကိုပါ သွားလို့ရတယ်ဆိုတာ သိသွားကြတဲ့အခါမှာတော့ ဘာတွေ ပြောင်းလဲသွားမလဲ ဆိုတာ ဇာတ်လမ်းထဲမှာပဲ အဖြေရှာကြည့်ဖို့ ဒီဇာတ်ကားကို ညွှန်းဆိုပေးလိုက်ပါတယ်။ ။
You may also like these stories:
မတူတဲ့ ရသ နှစ်ခုခံစားရမယ့် “Badhaai Ho” နဲ့ “Departures”
“Game of Thrones” သီးခြား ခွဲထွက်ဇာတ်လမ်း ၃ ခု ရိုက်ကူးရန် ပြင်ဆင်နေပြီလို့ သိရ
Samsung တီဗီ မော်ဒယ်အသစ်တွေမှာ Google Assistant ပါဝင်လာဖွယ်ရှိ
ဂျပန်လူမျိုးတွေရဲ့ အသက်ရှည်ခြင်း လျှို့ဝှက်ချက်
The post ကော်ဖီ မအေးခင် အတိတ်ကို ပြန်သွားခွင့်ရမယ့် “Café Funiculi Funicula” appeared first on ဧရာဝတီ.