ကချင်တိုင်းရင်းသူ အဆိုတော် အမွန်းကတော့ ယခုနှစ် နှစ်အစပိုင်းမှာ ချစ်သူနဲ့ စေ့စပ်ထားပြီး ဒီနှစ်အကုန်ပိုင်းမှာ မင်္ဂလာဆောင်မယ်လို့ ဆိုပါတယ်။ COVID-19 ကြောင့် မင်္ဂလာပွဲကိုတော့ ရွှေ့ဖို့ အစီအစဉ် မရှိဘဲ မူလအစီအစဉ်အတိုင်း ကျင်းပသွားမှာဖြစ်တယ်လို့ သိရပါတယ်။
“ဒီနှစ်အကုန်မှာ လက်ထပ်ဖို့အတွက် စီစဉ်ထားပါတယ်။ ပွဲကိုတော့ ရွှေ့ဖို့ စိတ်ကူး မရှိပါဘူး။ ဘာဖြစ်လို့လဲဆိုတော့ နှစ်ကုန်ပိုင်းဖြစ်သွားတော့ အဲ့အချိန်မှာ ဘယ်လို အခြေအနေရှိနေမလဲဆိုတာ မသိနိုင်သေးဘူး။ ဒါပေမဲ့ ကောင်းသော ပြောင်းလဲခြင်းနဲ့ ပြောင်းလဲလိမ့်မယ်လို့ မျှော်လင့်ထားတယ်”
“အဲ့အပေါ်မှာတော့ အကျိုးသက်ရောက်မှု မဖြစ်အောင် ပြင်ဆင်နေတယ်။ လူတွေကို ဘယ်လောက်ထိဖိတ်လို့ ရမလဲဆိုတာရယ်၊ အချိန်ပိုင်းဆိုင်ရာရယ် ပြင်ဆင်နေတယ်။ ရက်ပြောင်းဖို့တော့ စိတ်ကူး မရှိသေးဘူး” လို့ အမွန်းက ပြောပါတယ်။
အခုလို COVID-19 ရောဂါတွေကြောင့် အိမ်မှာ နေနေရတဲ့အချိန်မှာတော့ ဟင်းတွေ ပိုချက်ဖြစ်ပြီး မိသားစုနဲ့လည်း ပိုရင်းနှီးသွားတယ်လို့ ဆိုပါတယ်။
“အရင်တုန်းကဆို သာမန်ကာလျှံကာပဲ။ မိဘတွေ မောင်နှမတွေက အစပေါ့။ အမြဲတမ်းရှိနေတာပဲဆိုတော့။ အခုက တယောက်နဲ့ တယောက်က တွေ့ရဖို့ ခဲယဉ်းသွားတယ်။ တနေရာစီ နေရင် ပိုဆိုးတယ်။ အိမ်သားတွေလည်း အိမ်အပြင်ပေးထွက်လို့ မရတာမျိုးဆိုတော့ ပိုပြီးတော့မှ စည်းလုံးသွားတဲ့အချိန်လို့ ပြောလို့ ရပါတယ်” လို့ အမွန်းက ပြောပါတယ်။
အချက်အပြုတ်ကို ဝါသနာပါတဲ့ အမွန်းက ချက်ရပြုတ်ရတာ သူ့အတွက် အပန်းဖြေဆေး တခုဖြစ်စေတယ်လို့လည်း ဆိုပါတယ်။
“အမွန်းက အရင်ကတည်းက ထမင်းဟင်း ချက်ရတာ ဝါသနာပါတယ်။ အိမ်မှာ ချက်ပြုတ်စားရတာ အမွန်းအတွက် Relax ဖြစ်တယ်။ အမွန်းရဲ့အပန်းဖြေနည်းထဲမှာ ဟင်းချက်တာ ပါတယ်။ အရင်ကတည်းက ကိုယ့်ဘာသာ ချက်ဖြစ်တာပါ။ အခုမှတင်ဖြစ်တာပါ။ တင်ရင်လည်း Facebook Story လောက်ပဲ တင်တယ်”
“ဟိုတလောကတော့ မြစ်ကြီးနားက အစ်မတယောက် ဆန်စီးခေါက်ဆွဲ ပို့ပေးတော့ သူ့ကိုလည်းကျေးဇူးတင်ရင်းနဲ့ တင်ဖြစ်သွားတာ။ ချက်ရပြုတ်ရတာ ဝါသနာပါတယ်။ အသီးအရွက်တွေကို ချက်ပြုတ်ဖို့ ပြင်ဆင်နေရတာတွေကို တဆင့်ချင်းသွားရတယ်။ အဲဒါမျိုးတွေကို အပန်းဖြေတယ်လို့ ခံစားရတယ်” လို့ အမွန်းက ပြောပါတယ်။
အမွန်းရဲ့ချစ်သူကတော့ စတင်ချစ်ကြိုက်စဉ်က အမွန်းဟင်းချက်တတ်တာကို မသိဘဲ နောက်မှ သိပြီး အမွန်းရဲ့လက်ရာကို စားကောင်းတယ်လို့ ပြောကြောင်း ဆိုပါတယ်။
“သူက အမွန်းကို ပြောတယ်။ နင်ချက်တတ်တာကို အရင်ကတည်းက ဘာလို့ မပြောတာလဲတဲ့။ သူနဲ့ စတွေ့တုန်းကတော့ အမွန်းက ချက်ပြီး ဖိတ်ကျွေးတာမျိုးတွေ မရှိဘူး။ ကိုယ်တိုင်လည်း မချက်ဖြစ်ဘူး။ အလုပ်များနေတော့ သူနဲ့တွဲပြီး တော်တော်ကြာတော့မှ အမွန်းက ချက်ဖြစ်တဲ့အခါကျတော့ ကျွေးတော့မှ အစောကြီးကတည်းက မပြောဘူးတဲ့။ သူစားတဲ့အခါကျရင်တော့ စားကောင်းတယ်လို့တော့ ပြောတယ်”
“အမွန်းကတော့ ကိုယ့်ကိုသိလို့ကောင်းတယ်လို့ ပြောတာ မဟုတ်ဘူးလားလို့ ကြည့်တော့ အဲ့လိုလည်းမဟုတ်ရှာဘူး။ တကယ်လည်း စားတယ်။ ကြိုက်တယ်။ မဆိုးဘူးလို့တော့ ထင်တာပဲ” လို့ အမွန်းက ဆိုပါတယ်။
ချစ်သူက ဂျပန်စာဟင်းတမျိုးနဲ့ ချဉ်စပ်ဟင်းတွေကို ကြိုက်တာကြောင့်လည်း အဲဒီဟင်းကို အများဆုံး ချက်ကျွေးဖြစ်တယ်လို့ အမွန်းက ပြောပါတယ်။
“အမွန်းချက်တဲ့ ဂျပန်စာတခု ရှိတယ်။ ဂျပန်ဆော့တမျိုးနဲ့ချက်တဲ့ ကြက်သားဟင်း သူက အဲဒါကို အကြိုက်ဆုံးပဲ။ ပြီးရင် ရှမ်းခေါက်ဆွဲတို့ ဆန်စီးတို့ ကြိုက်တယ်။ အဲဒါ အဓိကပြီးတော့ တခြားချက်တာတွေ ရှိသေးတယ်။ ဗီယက်နမ်စာတွေ ချက်သေးတယ်။ အဲဒါကို သိပ်မကြိုက်ဘူး။ ကြက်ချဉ်စပ်တို့ဘာတို့ အဲဒါတွေကြိုက်တယ်။ အများဆုံးချက်ဖြစ်တာဆိုတော့ ကျွမ်းကျင်တာကလည်း အဲဒါပဲပေါ့”လို့ အမွန်းက ပြောပါတယ်။
အမွန်းကတော့ Stay at home ကာလအတွင်း အနုပညာ လှုပ်ရှားမှုအနေနဲ့ သူ့ရဲ့ သီချင်းအသစ် ၃ ပုဒ် Music Video တွေ ထွက်ရှိထားပါတယ်။
You may also like these stories:
ရိုက်ကူးရေးတွေ ပြန်စရင် အကောင်းဆုံးဖြစ်အောင် ကြိုးစားနေတဲ့ ယဉ်လက်
“ဝိုင်းစုခိုင်သိန်းနဲ့ မိန်းကလေးချင်း နမ်းတာ ပြဿနာ မရှိပါဘူး”လို့ လိမ္မော်သီး ပြော
ကိုဗစ်ကြောင့် ဘောလိဝုဒ်ကားတွေမှာ အကနဲ့ အနမ်း ဇာတ်ဝင်ခန်းတွေ ခွင့်မပြုတော့
The post နှစ်ကုန်ပိုင်းမှာ မင်္ဂလာဆောင်မယ့် အဆိုတော် အမွန်း appeared first on ဧရာဝတီ.