သရုပ်ဆောင် ရွှေသမီးက သူ့ရဲ့ Facebook Page မှာ အစားအသောက်များကို အမြဲတမ်း စားပြလေ့ရှိပြီး ဒီလိုစားပြနေပေမယ့် Food Blogger တယောက်အဖြစ် မခံယူထားဘူးလို့ ဆိုပါတယ်။
“သူများတွေကတော့ ရွှေ့ကို Food Blogger လုပ်နေပြီလား ဖြစ်နေပြီလား ပြောကြတယ်။ အဲ့လိုတော့ မခံယူပါဘူး။ ဘာဖြစ်လို့လဲဆိုရင် အလုပ်တခုက မလွယ်ကူဘူး။ ပညာရပ်တခုက မလွယ်ကူဘူး။ အမြင်မှာတော့ အစားလေးစားပြရုံပဲလို့ ထင်ကြတယ်။ ဒါပေမဲ့ အနောက်မှာ စဉ်းစားရတာတွေ Plan ချရတာတွေ စားနေတဲ့ အတောအတွင်းမှာ ဘာတွေပြောရမလဲ။ ဘယ်လိုလေးတွေ လုပ်ရမလဲပေါ့”
“ကြည့်တဲ့သူကို ဆွဲဆောင်မှုရှိအောင် ဘယ်လိုလုပ်ရမလဲ။ အဲ့လိုတွေအများကြီးရှိတယ်။ ကိုယ်တွေကျတော့ အဲ့လိုစားတာတွေကို ထိုင်ကြည့်ရတာကို သဘောကျတဲ့သူ ဝါသနာပါတဲ့သူထဲမှာ ပါတယ်။ ကိုယ်တိုင်လည်း အစားအသောက်စားရတာကို ကြိုက်တယ်။ အဲဒါကြောင့် ရိုက်ပြီးတင်ဖြစ်တာပါ” လို့ ရွှေသမီးက ပြောပါတယ်။
Food Blogger အနေနဲ့ လုပ်ကိုင်နေတဲ့ Professional တွေလောက် မကျွမ်းကျင်သေးဘဲ ပုံမှန်စားနေကျအတိုင်းကို ပရိသတ်များအတွက် ဖျော်ဖြေရေးအနေနဲ့ လုပ်ဖြစ်တာလို့ သိရပါတယ်။
“ဘလော့ဂါလို့တော့ မခံယူသေးပါဘူး။ တကယ်အလုပ်လုပ်နေတဲ့ ပရော်ဖက်ရှင်နယ်တွေလောက်တော့ ရွှေက မကျွမ်းပါဘူး။ ကိုယ်လုပ်တတ်သလိုလေး ကိုယ်ပုံမှန်စားနေကျအတိုင်း စားပြီးတော့ ပရိသတ်ကို ဖျော်ဖြေရေးတခုလိုပဲပေါ့။ ဒါပေမဲ့ အခုနောက်ပိုင်းမှာ စီးပွားရေးတခုအနေနဲ့ စဉ်းစားလာရတယ်။ ရွှေက စားစားပြနေတော့ လာလာပို့တဲ့သူတွေက များလာတယ်။ အဲ့တော့ စီးပွားရေးတခုအနေနဲ့ လုပ်မယ်လို့ စဉ်းစားထားတယ်” လို့ ရွှေသမီးက ပြောပါတယ်။
နောက်ပိုင်းမှာတော့ အစားအသောက်စားပြတာကို စီးပွားရေးတခုအနေနဲ့ လာရောက်ပို့တဲ့ ကြော်ငြာစေချင်သော အစားအသောက်များကို စီးပွားရေးတခုအနေနဲ့ လုပ်သွားမယ်လို့ သိရပါတယ်။
“စီးပွားရေးလုပ်ရင်လည်း ကိုယ့်အတွက်အလှူလေးတွေ လုပ်ဖို့အတွက် တဖက်တလမ်းက ငွေရှာတယ်လို့ တွေးပြီးတော့မှ စီးပွားရေးလုပ်ပါမယ်လို့ ပြောချင်ပါတယ်။ ပြောရရင်တော့ ငွေကြေးတခု ယူပြီးတော့မှ စားပြဖြစ်မယ်။ ဒါလေးတွေကလည်း ကိုယ့်အတွက်ဆိုတာထက် အလှူလေးတွေ လုပ်ဖို့ကို ပိုပြီးတော့မှ စဉ်းစားဖြစ်တယ်”
“အနုပညာကြေးရရင် အမြဲတမ်းတော့ ၃ ပုံ ၁ ပုံ ၊ ၁၀ ပုံ ၁ ပုံ ဖယ်ဖယ်ပြီးတော့မှ စုထားတတ်တယ်။ အလှူလုပ်ဖို့အတွက်ကို စုထားတတ်တယ်။ အဲ့လိုမျိုးလေးတွေ သေချာလေး ထဲထဲဝင်ဝင် လုပ်ဖြစ်သွားပြီဆိုရင်လည်း အဲ့လိုမျိုးလေးပဲ လုပ်ဖြစ်မှာပါ” လို့ ရွှေသမီးက ပြောပါတယ်။
အခုမှစလုပ်တဲ့ Food Blogger များကိုတော့ သူတို့လည်း စီးပွားရေးအနေနဲ့လုပ်တာဖြစ်တဲ့အတွက် ပြန်ကြည့်ပေးရတဲ့ အပိုင်းတွေရှိတယ်လို့ ဆိုပါတယ်။
“အခုကတော့ အွန်လိုင်းစားတဲ့ဟာတွေက ပိုများတယ်။ သူတို့တွေကို ရွှေကြည့်တယ်။ တချို့ဆိုရင်လည်း နာမည်ရပြီးသားတွေပေါ့။ တချို့ဆိုရင်လည်း အခုမှစလုပ်တဲ့သူတွေလည်း ရှိတယ်။ အခုမှ စလုပ်တဲ့သူတွေကျတော့လည်း ရွှေပြန်ကြည့်ပေးတဲ့ အပိုင်းတွေ ရှိတယ်။ ဘာလို့လဲဆိုတော့ သူတို့လည်း စီးပွားရေးတခုအနေနဲ့ လုပ်ကြတာဆိုတော့ သူတို့ကိုလည်း ပြန်ကြည့်ပေးတဲ့ အပိုင်းလေးတွေလည်း ရှိပါတယ်” လို့ ရွှေသမီးက ပြောပါတယ်။
ဆက်လက်ပြီး “ပညာရပ်တခုက မလွယ်ဘူး။ Food Blogger ဆိုတာကတော့ တခြားသူတွေ အမြင်မှာ စားနေတာပဲပေါ့။ တကယ်ကျ အဲ့လိုမဟုတ်ဘူး။ စီစဉ်ရတာတွေ တကယ် ပရော်ဖက်ရှင်နယ် လုပ်နေတဲ့သူတွေက တပတ်တပတ် ဘာစားပြရမလဲ။ ဘယ်လိုလုပ်ရမလဲ။ စားနေတာနဲ့လည်း မပြီးသေးဘူး”
“စားဖို့အတွက်တွေ စီစဉ်ဖို့အတွက်တွေကို ဝင်ငွေရှိမှဖြစ်မှာ အဲ့အတွက်ကြောင့် စားသောက်ကုန်နဲ့ ပတ်သက်တဲ့ အရာတွေကိုလည်း ပရိုမိုးရှင်းတွေ ချိတ်ဆက်ရတာတွေလည်း အများကြီး ရှိနိုင်တယ်။ တွင်တွင်ကျယ်ကျယ် လုပ်နေတဲ့ သူတွေမှာလည်း ပိုပြီးတော့ရှိမှာပဲ။ ရွှေတို့ကျတော့ အဲ့လို သိပ်မရှိဘူး။ အိမ်မှာ ရှိတာလေးတွေကို ထမင်းလေးနဲ့ နယ်ဖတ်စား ပရိသတ်ကိုပိုပြီး အချိန်ပေးဖြစ်တာပေါ့” လို့ ပြောပါတယ်။
ရွှေသမီးကတော့ ကိုဗစ်ကာလ အိမ်မှာနေရတာအချိန်မှာ အစားအသောက်စားတာနဲ့ စာဖတ်တာတွေကိုလုပ်ဖြစ်ပြီး အိမ်မှာ အေးအေးဆေးဆေး နေရတာကြောင့် စိတ်အပန်းပြေတယ်လို့လည်း ဆိုပါတယ်။
You may also like these stories:
ရွှေ့ပြောင်းလုပ်သားတွေ နေရပ်ပြန်ဖို့ လေယာဉ် စီစဉ်ပေးခဲ့တဲ့ အမီတာဘဂျမ်း
Tik Tok မှာ သဘောကျသူတွေကို ရုပ်ရှင်ခေါ်ရိုက်မယ့် ကိုပေါက်
အလုပ်အကြိုးစားဆုံး မင်းသားအဖြစ် Nicolas Cage မှတ်တမ်းဝင်
The post Food Blogger တယောက်လို့ မခံယူထားဘူးလို့ ရွှေသမီး ပြော appeared first on ဧရာဝတီ.