နာမည်ကျော် ကိုရီးယားအဆိုတော် Lee Hyori နဲ့ Girls’ Generation အဖွဲ့ဝင် Yoona တို့ဟာ ကိုဗစ်ကာလမှာ Mask မတပ်ဘဲ ကာရာအိုကေဆိုင်ကို သွားခဲ့တာကြောင့် ဝေဖန်ခံနေရတယ်လို့ သိရပါတယ်။
ပြီးခဲ့တဲ့ ဇူလိုင်လ ၁ ရက်၊ ညပိုင်းမှာ Lee Hyori ဟာ သူ့ရဲ့ Instagram ကနေ တိုက်ရိုက်ထုတ်လွှင့်မှုတခုကို ပြုလုပ်ခဲ့ပြီး Mask မတပ်ဘဲ ကာရာအိုကေဆိုင်မှာ ရောက်ရှိနေတာကို အဲ့ဒီ Live မှာ မြင်တွေ့ခဲ့ရပါတယ်။
အဲ့ဒီ Live ထုတ်လွှင့်မှုမှာ အဆိုတော် Lee က “Yoona နဲ့ အရက်သောက်ပြီးတဲ့နောက် ကာရာအိုကေဆိုင်ကို သွားခဲ့ပါတယ်။ Apgujeong မှာရှိတဲ့ ကာရာအိုကေဆိုင်တခု ဖြစ်ပါတယ်” လို့ ပြောကြားခဲ့ပါတယ်။
အဲ့ဒီ ကာရာအိုကေဆိုင်မှာ သူတို့ နှစ်ဦးနဲ့အတူ ရှိနေတဲ့ အမျိုးသားက တကယ်လို့ SM Entertainment က ဒီလိုနေရာမှာရှိတယ် ဆိုတာကို သိသွားပြီး ဖုန်းခေါ်လာရင် ဘယ်လိုလုပ်ကြမလဲလို့ မေးမြန်းခဲ့ပါတယ်။ အဲ့ဒီအခါမှာ Yoona က “အဆင်ပြေပါတယ်”လို့ ပြန်ဖြေခဲ့ပါတယ်။
“Hyori’s Homestay” အစီအစဉ်မှာ သူတို့နှစ်ဦး ပါဝင်ခဲ့ပြီးတဲ့အနောက် အခုလိုမျိုး အတူတူ ပြန်လည်မြင်တွေ့ ကြရတဲ့အတွက် သောင်းနဲ့ချီတဲ့ ပရိသတ်တွေက ပျော်ရွှင်ခဲ့ကြပါတယ်။ ဒါပေမဲ့ အခုလိုမျိုး သူတို့နှစ်ဦးဟာ Mask ဝတ်ဆင်ထားခဲ့ခြင်း မရှိခဲ့တာကို မြင်တွေ့ခဲ့ရတဲ့ ကိုရီးယား ပရိသတ်တချို့က စိတ်မသက်မသာ ဖြစ်ခဲ့ကြပါတယ်။
အဲ့ဒီလို မှတ်ချက်စကားတွေကို မြင်တွေ့ခဲ့ပြီးတဲ့နောက် Lee Hyori ဟာ Mask တပ်ခဲ့သလို Yoona ကလည်း ကာရာအိုကေဆိုင်ကို လာတဲ့အချိန်တုန်းက Mask တပ်ခဲ့တဲ့အကြောင်း ပြောဆိုခဲ့ပါတယ်။
ဒါပေမဲ့လည်း အင်တာနက် အသုံးပြုသူအချို့ကို စိတ်ကျေနပ်မှု မရရှိစေခဲ့ပါဘူး။ အထူးသဖြင့် ကိုရီးယားမှာ ဖြစ်ပွားနေတဲ့ ကိုရိုနာဗိုင်းရပ်စ် ပျံ့နှံ့မှုကို ထိန်းချုပ် ကန့်သတ်ဖို့နဲ့ ရောဂါ ကူးစက်ခံရသူတွေကို ကုသဖို့အတွက် အလုပ်ကြိုးစားနေကြတဲ့ ဆေးဝန်ထမ်းတွေကို ကျေးဇူးတင်ကြောင်း ပြောထားတဲ့ Thanks Challenge မှာ Lee Hyori နဲ့ Yoona တို့ ပါဝင်ကြတယ်ဆိုတဲ့ အချက်က ထောက်ပြစရာဖြစ်နေပါတယ်။
အခုလက်ရှိ တောင်ကိုရီးယားနိုင်ငံမှာ ကိုရိုနာဗိုင်းရပ်စ် ကူးစက်ခံရသူ တနေ့ကို ပျှမ်းမျှ ၄၅ ဦးလောက် တွေ့ရှိနေရတာကြောင့် အစိုးရက လူအချင်းချင်း ခပ်ခွာခွာနေဖို့၊ လူထုဆက်သွယ်ပို့ဆောင်ရေးကို အသုံးပြုတဲ့အခါ Mask တပ်ဖို့၊ ပြန်ဖွင့်လိုက်ပြီဖြစ်တဲ့ စားသောက်ဆိုင်နဲ့ ဘားတွေရဲ့ အဝင်အဝမှာ လာရောက်ကြသူတွေရဲ့ ဆက်သွယ်နိုင်မယ့် အချက်အလက်တွေ ချန်ထားခဲ့ဖို့ စတဲ့ လုပ်ဆောင်မှုတွေကို ချမှတ်ထားပါတယ်။
အခုလိုမျိုး ကိုဗစ်ကာလမှာ မလျော်မကန်ဖြစ်ခဲ့ရတဲ့ ဖြစ်ရပ်အတွက် Lee Hyori နဲ့ Yoona တို့လည်း သီးခြားစီ စာထုတ်ပြီး တောင်းပန်ခဲ့ပါတယ်။
Ref: koreaboo
The post Mask မတပ်ဘဲ ကာရာအိုကေဆိုင် သွားတဲ့ Lee Hyori နဲ့ Yoona ဝေဖန်ခံရ appeared first on ဧရာဝတီ.