“ဂျီဟောသူ” ဇာတ်လမ်းတွဲထဲမှာ အပျိုကြီး မမခင်အဖြစ် သရုပ်ဆောင်ထားတဲ့ ဈူးဈူးဈာန်ကတော့ ဘယ်သွားသွား အပျိုကြီးလို့ပဲ အခေါ်ခံရတယ်လို့ ပြောပါတယ်။
“ဈူးကို အခုအချိန်ထိ ဘယ်သွားသွား အပျိုကြီးလို့ပဲ ခေါ်ကြတယ်။ အပြင်မှာတွေ့လည်း အပျိုကြီး ဈူးဈူးဈာန်ဆိုတာက ခေါ်တော့ ခေါ်ကြတယ်။ ရှားတယ်။ ဇာတ်လမ်းထဲက ကာရိုက်တာကိုပဲ မှတ်မိကြတာများတယ်။ အဲ့အတွက် အရမ်းပျော်တယ်။ အခုအချိန်ထိ အပျိုကြီးဖြစ်နေရလို့”
“တကယ်ဆိုရင် လူရည်ချွန် ရိုက်တာ တော်တော်ကြာသွားပြီလေ လွှင့်တာ။ အခုအချိန်ထိ မမေ့သေးဘဲနဲ့ အပျိုကြီးဆိုပြီး ခေါ်ပေးတဲ့အတွက် ကျေးဇူးတင်တယ်” လို့ ဈူးဈူးဈာန်က ဧရာဝတီကို ပြောပါတယ်။
အဆိုပါ “မမခင်” ကာရိုက်တာအတွက် ကြိုတင်ပြင်ဆင်ရတဲ့အကြောင်းတွေကိုလည်း အခုလို ပြောပြခဲ့ပါတယ်။
“ကြိုတင်ပြင်ဆင်ရတာက ဒီကားက ၁၉၈၅ ခုနှစ်ကို သွားတယ်ဆိုတော့ သွားပုံလာပုံ စကားပြောပုံလေးတွေတော့ ပြင်ဆင်ရတယ်။ ဒါတွေအကုန်လုံးကို ရုံးကနေပြီးတော့ သင်တန်းတွေ ပေးတယ်။ လိုက်လုပ်ပြီး ကြိုးစားရုံပဲပေါ့။ သင်တန်းတွေကတော့ ရုံးကအကုန်လုပ်ပေးတယ်။ ဆံပင်တွေ၊ မိတ်ကပ်တွေ၊ အဝတ်အစားပိုင်းတွေကအစ အကုန်လုပ်ပေးတယ်။ ဈူးတို့ကကျတော့ ကာရိုက်တာဝင်ဖို့ပဲ အဓိကကြိုးစားရတာပေါ့” လို့ ဈူးဈူးဈာန်က ပြောပါတယ်။
ဆက်လက်ပြီး “ ဒီကားမှာ အများဆုံး သင်တန်းတွေ တက်ရတယ်။ ဘော်လီဘော တက်ရတယ်။ မြန်မာအကတွေ တက်ရတယ်။ စက်မှုကျောင်းသူဖြစ်တဲ့အတွက်ကြောင့် RIT ကျောင်းမှာ အခေါ်အဝေါ်တွေ ၄ ၊ ၅ ရက်လောက် သွားသင်ရတယ်။ သင်တန်းတွေကတော့ အများကြီးတက်ရတယ်။ ဘော်လီဘောကတော့ အဆိုးဆုံးပဲပေါ့” လို့ ပြောပါတယ်။
ကာရိုက်တာအတွက် လိုအပ်တဲ့ ဘော်လီဘော ကစားတာကိုတော့ ဝါသနာ မပါပေမယ့်”ဂျီဟောသူ” ထဲက မမခင်က ဘော်လီဘောကို ကျွမ်းကျင်စွာ ကစားတတ်တာကြောင့် ကြိုးစားပြီး သင်ယူခဲ့ရတယ်လို့ ဆိုပါတယ်။
“ဘော်လီဘောဆိုရင် ဝါသနာမပါဘူး။ ဒီကားထဲမှာ မမခင်တို့သည် ဘော်လီဘောကို ကျွမ်းကျွမ်းကျင်ကျင် ဆော့တတ်တယ်။ နိုင်တယ်။ အဲ့တော့ကြိုးစားပြီး သင်ရတယ်။ လက်မှာဆို အမာရွတ်တွေ သင်တန်းတက်တုန်းကဆို အရမ်းစိတ်ညစ်တာ။ အမှန်အတိုင်းပြောတာ။ ဒါပေမဲ့ ကိုယ့်ကာရိုက်တာအတွက်ပဲလေ။ သင်လိုက်တယ်။ ရိုက်တော့လည်း အကောင်းဆုံး ကြိုးစားပြီးဆော့တယ်။ အဆင်ပြေသွားတယ်။ ဘောလီဘော အခန်းလေး လာတော့မယ်” လို့ ဈူးဈူးဈာန်က ပြောပါတယ်။
မမခင် ကာရိုက်တာကိုလည်း စတင်လွှင့်တဲ့အချိန်က အနည်းငယ် အဆဲခံရပေမယ့် နောက်ပိုင်းမှာ ချစ်ခင်ပေးကြတဲ့အတွက် ကျေးဇူးတင်တဲ့အကြောင်းလည်း ဈူးဈူးဈာန်က ပြောပါတယ်။
စာရေးဆရာမကြီး မစန္ဒာရဲ့ နာမည်ကြီး ဝတ္ထုကို ပြန်လည် ရိုက်ကူးထားတဲ့ အဆိုပါ “ဂျီဟောသူ” ဇာတ်လမ်းတွဲကိုတော့ လက်ရှိ MRTV-4 ရုပ်သံလိုင်းမှာ အပတ်စဉ် တနင်္လာနေ့ကနေ သောကြာနေ့ အထိ ည ၇ နာရီအချိန်မှာ ထုတ်လွှင့် ပြသနေတာ ဖြစ်ပါတယ်။
You may also like these stories:
“ဂျီဟောသူမှာ ညိုထွေးဖြစ်ရင်ပဲ ကျေနပ်ပြီ”လို့ မေမီကိုကို ပြော
စာရေးဆရာမကြီး မစန္ဒာရဲ့ ဝတ္ထု “ဂျီဟောသူ” ဇာတ်လမ်းတွဲ မကြာခင် ပြသမည်
The post ဘယ်သွားသွား အပျိုကြီးလို့ အခေါ်ခံရတဲ့ ဈူးဈူးဈာန် appeared first on ဧရာဝတီ.