မကြာသေးခင်က ဖြစ်ပေါ်ခဲ့တဲ့ ကချင်ပြည်နယ် ဖားကန့်ဒေသအတွင်းမှ မြေပြိုမှုကြောင့် ထိခိုက်ခဲ့ကြတဲ့သူတွေအတွက် ဇာတ်မင်းသားဖိုးချစ်က အွန်လိုင်းပရဟိတ ဈေးရောင်းပွဲတော်ပြုလုပ်ပြီး လှူဒါန်းသွားမယ်လို့ ပြောပါတယ်။
“ဖားကန့်မှာ မြေစာပုံပြိုလို့ ထိခိုက်သွားကြရတဲ့ သွေးရင်းသားရင်းများအတွက် Online ပရဟိတ ဈေးရောင်းပွဲတော် ကျင်းပပါမယ်ဗျာ။ အရင်းများကိုစိုက်ထုတ်ပြီး ရောင်းရသမျှ အားလုံးကို လှူဒါန်းပေးသွားပါ့မယ်နော်။ ကိုယ်ရှင်သန်နေတာ အများအတွက် ဖြစ်စေချင်ပါတယ်”
“ အားလုံး အနုပညာညီအစ်ကိုမောင်နှမတွေ ကိုယ်တိုင်ပေးပို့ ရောင်းချသွားကြမယ်။ အသေးစိတ် ကြေညာပေးပါ့မယ်ဗျာ ကျနော်တို့လက်ရာလေးတွေ စားရင်း ကုသိုလ်ယူနိုင်ကြပါစေ” လို့ ဖိုးချစ်က ဆိုထားပါတယ်။
အဆိုပါဈေးရောင်းပွဲတော်အတွက် အရင်းစိုက်ထုတ်၍ ရောင်းရသမျှအားလုံးကို လှူဒါန်းသွားမှာဖြစ်ပြီး အနုပညာညီအစ်ကိုမောင်နှမများ ကိုယ်တိုင်ပေးပို့ရောင်းချသွားမှာဖြစ်တယ်လို့ သိရပါတယ်။
နယ်မှလူများအတွက် ရောင်းချရန်စီစဉ်ထားတဲ့ ပစ္စည်းများကတော့ ဇော်ဂျီမြန်မာ နှလုံးသည်းခြေဆေး ၊ ပိုသူလှူလိုသူကူ အသင့်စားငါးရံ့ခြောက် ၊ အာလူးကြော်ထုတ် ၊ အမှတ်တရအကျီၤများ ၊ တံဆိပ်ပန်းအိုးလေးများ (ပန်းအစစ်) တို့ကိုရောင်းချရန် စီစဉ်ထားတယ်လို့ သိရပါတယ်။
ရန်ကုန်မြို့အနီးကိုတော့ ကိုယ်တိုင်ချက်မယ့် သီးစုံချဉ်ဟင်း ၊ ဝက်သားကြာညှိ့နှပ် ၊ ကြာဆန်ဟင်းခါးစတဲ့ အစားအသောက်တွေကို ရောင်းချပေးသွားမှာဖြစ်ပြီး ရောင်းမယ့်ပစ္စည်းများကိုတော့ ဈေးနှုန်းမသတ်မှတ်ဘဲ မှာတာနဲ့ပို့ပေး၍ လှူတဲ့ငွေကို လက်ခံကာ ပြန်လည်လှူဒါန်းသွားမှာဖြစ်တယ်လို့ သိရပါတယ်။
လက်ရှိမှာတော့ ဇော်ဂျီမြန်မာ နှလုံးသည်းခြေဆေးမှ သိန်း ၃၀ ဖိုးစတင်လှူဒါန်းထားပြီး ရောင်းရငွေအားလုံးကို လှူဒါန်းသွားမှာဖြစ်တယ်လို့သိရပါတယ်။ မှာယူဆက်သွယ်ရမယ့် ဖုန်းနံပါတ်များနဲ့ အစီအစဉ်များကိုလည်း ထပ်မံကြေညာသွားမှာဖြစ်တယ်လို့ ဆိုပါတယ်။
ဖားကန့်မြေစာပုံပြိုကျမှုကြောင့်ဇူလိုင်လ ၂ရက်နေ့က လူပေါင်း ၂၀၀ ကျော်ပျောက်ဆုံးခဲ့ပြီး လူ ၁၀၀ ကျော်သေဆုံးခဲ့ရတာ ဖြစ်ပါတယ်။
The post ဖားကန့်မြေစာပုံပြိုမှုမှာ ထိခိုက်ခဲ့ရသူများကို လှူဒါန်းမယ့် ဖိုးချစ် appeared first on ဧရာဝတီ.