“Mission: Impossible 7” ရုပ်ရှင်ဟာ ယူကေနိုင်ငံမှာ ရိုက်ကူးရေး လုပ်ငန်းတွေ ပြန်လည် လုပ်ဆောင်နိုင်ဖို့ အထူးချွင်းချက်တခုကို ရရှိခဲ့တယ်လို့ သိရပါတယ်။
နှစ်ပေါင်းများစွာကြာ အက်ရှင်ဇာတ်လမ်းတွဲ အဖြစ် ရပ်တည်ခဲ့တဲ့ စီးရီးရဲ့ နောက်ဆုံး ထွက်ရှိလာမယ့် အဲ့ဒီရုပ်ရှင်ဟာ ပြီးခဲ့တဲ့ ဖေဖော်ဝါရီလကတုန်းက အီတလီနိုင်ငံမှာ ရိုက်ကူးရေးတွေ လုပ်ဆောင်နေစဉ် COVID-19 ကပ်ရောဂါကြောင့် ရိုက်ကူးရေး လုပ်ငန်းတွေ ရပ်နားသွားခဲ့တာ ဖြစ်ပါတယ်။
အခုတော့ ကမ္ဘာတဝန်းမှာ ရုပ်ရှင်နဲ့ရုပ်သံရိုက်ကူးရေး လုပ်ငန်းတွေအပေါ် ချမှတ်ထားတဲ့ ကန့်သတ်ချက် တွေကို ဖြေလျှော့ပေးလာတာနဲ့အမျှ MI 7 အဖွဲ့သားတွေဟာလည်း လာမယ့် စက်တင်ဘာလက စလို့ ပြင်ပ ဇာတ်ဝင်ခန်းတွေ ရိုက်ကူးမှုကို ပထမဆုံး ပြန်လည် လုပ်ဆောင်ဖို့ ပြင်ဆင်နေခဲ့ပါတယ်။
အဖွဲ့သားတွေဟာ ထုတ်လုပ်ရေးလုပ်ငန်းကြီးတွေအပေါ် ယူကေနိုင်ငံက ချမှတ်ထားတဲ့ COVID-19 လမ်းညွှန်ချက်အသစ်တွေအတိုင်း လိုက်နာလုပ်ဆောင်ရမှာလည်း ဖြစ်ပါတယ်။
လက်ရှိမှာတော့ တခြားနိုင်ငံကနေ ရောက်ရှိလာပြီး ရိုက်ကူးရေး လုပ်ငန်းတွေ လုပ်ဆောင်မယ့် သရုပ်ဆောင်တွေနဲ့ ရိုက်ကူးရေးအဖွဲ့သားတွေကို သီတင်း ၂ ပတ် ကြာမြင့်မယ့် Quarantine ဝင်ရောက်ဖို့ ယူကေနိုင်ငံက အမိန့်တရပ် ထုတ်ပြန်ထားပေမယ့် MI 7 အဖွဲ့သားတွေသာ ချွင်းချက်နဲ့ ကင်းလွတ်ခွင့် ရရှိမှာ ဖြစ်တယ်လို့ Variety မီဒီယာက ဖော်ပြပါတယ်။
မင်းသား Tom Cruise ဟာ ယူကေရဲ့ ယဉ်ကျေးမှု ဝန်ကြီး Oliver Dowden နဲ့ စကားပြောဆိုခဲ့ပြီး ဗြိတိသျှရုပ်ရှင် အင်စတီကျုရဲ့ အဆင့် သတ်မှတ်ချက်တွေအတိုင်း လိုက်နာပြီး ရုပ်ရှင်နဲ့ ရုပ်သံထုတ်လုပ်ရေး လုပ်ငန်းတွေအတွက် နိုင်ငံတွင်းကို ရောက်လာတဲ့ သရုပ်ဆောင်တွေနဲ့ ဝန်ထမ်းတွေကို ခွင့်ပြုပေးမယ့် အစီအစဉ်အသစ်ကို ဖန်တီးရာမှာ ကူညီပေးမယ့်အကြောင်း ဆွေးနွေးခဲ့ကြပါတယ်။
အဲ့ဒီ ချွင်းချက်တွေကြောင့် မင်းသား Cruise နဲ့ ကျန်ရှိတဲ့ ရိုက်ကူးရေးအဖွဲ့သားတွေဟာ လုပ်ငန်းတွေ ပြန်စမယ်ဆိုရင် သီတင်း ၂ ပတ်ကြာ Quarantine ဝင်ရောက်မှုကနေ ရှောင်ရှားနိုင်မှာလည်း ဖြစ်ပါတယ်။ ရုပ်ရှင်ရိုက်ကူးရေးကို လာမယ့် စက်တင်ဘာလ မတိုင်ခင် ပြန်လည် စတင်ဖို့ ရည်ရွယ်ထားသလားဆိုတာတော့ ရှင်းရှင်းလင်းလင်း မသိရသေးပါဘူး။
ဒါပေမဲ့ အစီအစဉ်အရ သူတို့အဖွဲ့ဟာ ယူကေနိုင်ငံဆီ အရင်ဆုံး လာရောက်မယ့်ပုံမှာ ရှိနေပါတယ်။ တကယ်လို့ ချွင်းချက်သာ မရရှိခဲ့ဘူးဆိုရင်တော့ ရိုက်ကူးရေးဟာ သီတင်းနှစ်ပတ် ထပ်မံ နောက်ကျမှာဖြစ်ပြီး ၂၀၂၁ ခုနှစ်၊ နိုဝင်ဘာလမှာ ရုံတင်မယ်လို့ သတ်မှတ်ထားတဲ့ ရက်ထက် ပိုနောက်ဆုတ်သွားမှာဖြစ်ပါတယ်။
အခုရုပ်ရှင်ကို ရိုက်ကူးပြီးရင်တော့ “Mission: Impossible 8” ရုပ်ရှင်ကို ဆက်တိုက် ဆိုသလို ရိုက်ကူးမှာ ဖြစ်ပါတယ်။ အရင်ရုပ်ရှင်ဖြစ်တဲ့ “Mission: Impossible – Fallout” ရုပ်ရှင်ဟာ ဝေဖန်မှုတွေအရရော၊ ငွေကြေးပိုင်းဆိုင်ရာအရ အောင်မြင်မှုတွေရရှိခဲ့ပါတယ်။ ဒါကြောင့် Paramount ထုတ်လုပ်ရေးနဲ့ မင်းသား Cruise တို့ဟာ ရုပ်ရှင်ထုတ်လုပ်ရေးကို မြန်မြန်စတင်နိုင်ဖို့ တွန်းအားပေးနေတာလည်း ဖြစ်ပါတယ်။
Ref: screenrant
You may also like these stories:
ဇူလိုင်လအတွင်း ပြသမယ့် ကိုရီးယားဇာတ်လမ်းတွဲအသစ်များ
ဖားကန့်မြေစာပုံပြိုမှုမှာ ထိခိုက်ခဲ့ရသူများကို လှူဒါန်းမယ့် ဖိုးချစ်
“ဂျီဟောသူ”မှာ မော်မော်ကာရိုက်တာအတွက် ပေးဆပ်ထားတဲ့ ရွှေစင်ဝင့်ရှိန်
The post “Mission: Impossible 7” ရုပ်ရှင်ကို ယူကေမှာ ပြန်လည် ရိုက်ကူးခွင့်ရ appeared first on ဧရာဝတီ.