လူရွှင်တော် ကံပွင့်က COVID-19 ကာလမှာ အနုပညာလုပ်ငန်းတွေ မလုပ်ရသေးတာကြောင့် စိတ်မလေအောင် စီးပွားရေးတခုအနေနဲ့ ဆန်ရောင်းဖြစ်နေတယ်လို့ ဆိုပါတယ်။
“COVID-19 စဖြစ်ကတည်းက အိမ်ထဲမှာပဲ နေတာများတယ်။ ကျနော်ကတော့ ဘာမှမလုပ်ဖြစ်ဘူး။ အခုက ၁၅ ရက် ပြီးနိုး ၊ပြီးနိုးနဲ့ ၁၅ ရက်က ကြာလာတော့ ဒဏ်မခံနိုင်တော့ဘူး။ တခါတလေ ဖြစ်ချင်တာဖြစ်ဆိုပြီး ရိုက်ကူးရေးတွေ လုပ်ချင်စိတ်ပေါ်တယ်။ ဟိုရက်တော့ သမီးလေး ဖြူဖြူထွေးက ကြော်ငြာလေးတခု ဖေကြီး မိုးဒီနဲ့ မကြူနဲ့ ခေါ်ရိုက်တယ်။ သူက ဖုန်းနဲ့ ရိုက်တာ အဆင်ပြေတယ်”
“အဲ့ ကန့်သတ်ရက် ထပ်တိုး ၁၅ ရက်က မပြီးတော့၊ စိတ်မလေအောင် စီးပွားရေးလေးတခု အနေနဲ့ တူ၊ တူမတွေကလည်း ဆန်ဆိုင်ရှိတော့ လိုင်းပေါ်ကနေ ရောင်းပါလားပေါ့။ သူတို့ဆီက ဆန်ကို ဖောက်သည်ဈေးယူပြီး ရောင်းပါ။ လုပ်ကြည့်မယ်ဆိုပြီး လုပ်ကြတာ။ စရောင်းကတည်းကတော့ ကျနော်ပရိသတ်တွေ အားပေးကြပါတယ်။ တနင်္လာကနေ သောကြာ အော်ဒါကောက်ပြီး ကိုယ့်ကားနဲ့ပဲ စနေ၊ တနင်္ဂနွေ လိုက်ပို့တယ်” လို့ ကံပွင့်က ဧရာဝတီကို ပြောပါတယ်။
လက်ရှိအချိန်မှာ အနုပညာသမားတချို့ ဈေးရောင်းနေတာနဲ့ ပတ်သက်ပြီး ကံပွင့်က အခုလို ပြောပါတယ်။
“အခုချိန်မှာ အကုန်လုံးက အခက်အခဲတွေနဲ့ နေရင်းနေရင်း အခက်တွေနဲ့ နေသားကျစ ပြုနေပြီ။ ရုပ်ရှင်၊ သဘင်၊ ဂီတ ကိုယ့်အနုပညာလောကက အနုပညာသမားတွေ ဈေးရောင်းကြတယ်။ အနုပညာအလုပ်နဲ့ပဲ ရပ်တည်လာတဲ့သူတွေက ချက်ချင်းကြီး စားဝတ်နေရေးအတွက် လုပ်နေကြတာဆိုတော့ စိတ်မော လူမောလေးတွေတော့ အားလုံးမှာ ရှိကြတာပေါ့”
“ကျနော်တို့ အနုပညာလောကထဲက အဆင်မပြေကြတဲ့သူတွေ၊ နောက် အသက်ကြီးတော့ ရောဂါတွေ ဖြစ်နေသူတော့ အဆင်မပြေကြတာ တွေ့ရတော့ စိတ်မကောင်းဖြစ်ရတယ်။ အခုဖြူဖြူထွေးက အသက်ကြီး လူရွှင်တော်တွေနဲ့ ဇာတ်ပို့ တချို့ ကို ခေါ်ရိုက်ပေးတယ်။ အခုလို ခေါ်ရိုက်ပေးတော့ သူ့တို့ အပြုံးလေးတွေ ပီတိလေးတွေ မျက်နှာလေးတွေ မြင်ရတော့ ဝမ်းသာရတယ်။ အရင်လို ပျော်ပျော်ပါးပါးနဲ့ အနုပညာတွေ ပြန်လုပ်ကြရပါစေလို့ပဲ ဆုတောင်းနေရတယ်” လို့ ကံပွင့်က ပြောပါတယ်။
သရုပ်ဆောင်၊ လူရွှင်တော် ကံပွင့်ကတော့ သဘင်မှာလည်း လူရွှင်တော်အဖြစ် ပါဝင်ခဲ့သလို ရုပ်ရှင်နဲ့ ဗီဒီယို ဇာတ်ကားပေါင်း များစွာမှာ ဇာတ်ပို့၊ ဇာတ်ရံ တဦးအနေနဲ့ ပါဝင် သရုပ်ဆောင်ခဲ့သူ ဖြစ်ပါတယ်။
You may also like these stories:
“ရုပ်ရှင်သမားတွေ အလုပ်နိမ့်ပါးသွားပေမယ့် စိတ်ဓာတ် နိမ့်ပါး မသွားဘူး”
နာမည်တူ ရှိနေတဲ့အပေါ် ခံစားချက် ပြောပြတဲ့ ဘိုမ
“ရိုက်ကူးရေးတွေ ပြန်စမှာကို စိုးရိမ်မိတယ်”လို့ ကောင်းစံ ပြော
The post စားဝတ်နေရေးအတွက် အွန်လိုင်းမှာ ဆန်ရောင်းနေတဲ့ လူရွှင်တော် ကံပွင့် appeared first on ဧရာဝတီ.