တောင်ကိုရီးယားမင်းသမီး Son Ye-jin ဟာ “The Cross” လို့ အမည်ရတဲ့ ရုပ်ရှင်မှာ ပါဝင်ပြီး ဟောလိဝုဒ် ရုပ်ရှင်လောထဲ စတင်ခြေချတော့မယ်လို့ သိရပါတယ်။
မင်းသမီးရဲ့ အေဂျင်စီ MS Team အင်တာတိန်းမန့်ရဲ့အဆိုအရ မင်းသမီးဟာ ရုပ်ရှင်မှာ ပါဝင်ဖို့ စဉ်းစားနေပြီး အသေးစိတ် ညှိနှိုင်းဆွေးနွေးမှုတွေ လုပ်ဆောင်နေတယ်လို့ သိရပါတယ်။ တိကျတဲ့ ဆုံးဖြတ်ချက် ထွက်ပေါ်လာပြီဆိုရင်တော့ အတည်ပြုပေးမယ်လို့ သိရပါတယ်။
မင်းသမီး Son ဟာ အဲ့ဒီရုပ်ရှင်ထဲမှာ ကိုရီးယားလူမျိုး မဟုတ်တဲ့ အမျိုးသမီးဇာတ်ဆောင် နေရာကနေ ပါဝင်မှာဖြစ်ပြီး ဇာတ်ကားတကားလုံးမှာ အင်္ဂလိပ်လိုပဲ ပြောဆိုရမယ်လို့ ဆိုပါတယ်။ Avatar နဲ့ Clash of Titans ရုပ်ရှင်တွေထဲက သြစတြေးလျမင်းသား Sam Worthington က အဓိကမင်းသားအဖြစ် ပါဝင်မယ်လို့ ဒေသတွင်း မီဒီယာတွေမှာ ဖော်ပြပါတယ်။
အော်စကာဆုရရုပ်ရှင် “Parasite” ထဲက မင်းသား Lee Sun-kyun ကလည်း အဲ့ဒီရုပ်ရှင်မှာ ပါဝင်လာနိုင်ချေရှိတယ်လို့ သိရပါတယ်။ မင်းသားရဲ့ အေဂျင်စီ HODU&U အင်တာတိန်းမန့်က မင်းသားဟာ ရုပ်ရှင်အတွက် ကမ်းလှမ်းချက်ကို ရရှိထားပြီးလက်ခံစဉ်းစားနေတယ်လို့
နယူးဇီလန် ဒါရိုက်တာနဲ့ ဇာတ်ညွှန်းရေးဆရာ Andrew Niccol က “The Cross” ရုပ်ရှင်ကို ဇာတ်ညွှန်းရေးသားပြီး ရိုက်ကူးမှာ ဖြစ်တယ်လို့ သိရပါတယ်။ လာမယ့်နှစ် အစောပိုင်းလောက်မှာ စတင်ရိုက်ကူးမယ့် အဲ့ဒီရုပ်ရှင်ရဲ့ ဇာတ်ဝင်ခန်း တချို့ကို တောင်ကိုရီးယားနိုင်ငံမှာ ရိုက်ကူးမယ်လို့ သိရပါတယ်။
အသက် ၃၈ နှစ်အရွယ် မင်းသမီး Son ဟာ ၂၀၀၁ ခုနှစ်မှာ “Delicious Proposal” စီးရီးနဲ့ အနုပညာလောကထဲ စတင်ဝင်ရောက်လာခဲ့ပြီး ဝါရင့်ဒါရိုက်တာ Im Kwon Taek ရဲ့ “Painted Fire” ရုပ်ရှင်မှာလည်း သရုပ်ဆောင်ခဲ့ပါတယ်။ ၂၀၀၃ ခုနှစ်မှာ “Classic” ရုပ်ရှင်နဲ့ ၂၀၀၄ ခုနှစ်မှာ “A Moment to Remember” ရုပ်ရှင်တွေမှာလည်း ပါဝင်သရုပ်ဆောင်ခဲ့ပါတယ်။
အဲ့ဒီနောက်ပိုင်း မင်းသမီးဟာ ရုပ်ရှင်နဲ့ ရုပ်သံစီးရီးတွေမှာ တလှည့်စီ သရုပ်ဆောင်ခဲ့ပြီး မင်းသား Hyun Bin နဲ့အတူ “Crash Landing on You” ဒရာမာမှာ နောက်ဆုံး ပါဝင်သရုပ်ဆောင်ထားပါတယ်။
Ref: thejakartapost
The post ဟောလိဝုဒ်ရုပ်ရှင်မှာ ပါဝင်လာမယ့် မင်းသမီး Son Ye-jin appeared first on ဧရာဝတီ.