ဒါရိုက်တာ အောင်ကိုလတ်နဲ့ အင်တာဗျူး

The Japanese Society of Cinematographers & Aung Ko Latt Motion Pictures Myanmar တို့မှ ပူးပေါင်း စီစဉ်တင်ဆက်လိုက်တဲ့ “နှလုံးသားထဲကသိစေချင်တဲ့ မြန်မာပြည်ခရီးစဉ်” မှတ်တမ်းရုပ်ရှင်ဇာတ်ကား မိတ်ဆက်ပွဲအခမ်းအနားကို ဖေဖော်ဝါရီလ ၃ ရက်နေ့က၊ ရန်ကုန်မြို့၊ ကမ္ဘာအေးဘုရားလမ်းပေါ်က Melia Yangon ဟိုတယ်မှာ ကျင်းပပြုလုပ်ခဲ့ပါတယ်။

အဆိုပါ မှတ်တမ်းရုပ်ရှင်ဇာတ်ကားနဲ့ပတ်သက်ပြီး Music အပိုင်းကို တာဝန်ယူ ဖန်တီး တီးခတ်ပေးထားတဲ့ Aung Ko Latt Motion Pictures မှ မြန်မာ ဒါရိုက်တာ ဦးအောင်ကိုလတ်ကို “နှလုံးသားထဲက သိစေချင်တဲ့ မြန်မာပြည်ခရီးစဉ်” မှတ်တမ်းရုပ်ရှင် အကြောင်းနဲ့ သူ့အနုပညာလှုပ်ရှားမှုတွေအကြောင်းကို ဧရာဝတီ သတင်းထောက် သီဟတိုးက တွေ့ဆုံမေးမြန်းထားပါတယ်။

မေး။ ။ ပထမဆုံး သိချင်တာက အခု မိတ်ဆက်လိုက်တဲ့ ဂျပန်နိုင်ငံက ဒါရိုက်တာတွေ လာရောက်ရိုက်ကူးထားတဲ့ “နှလုံးသားထဲကသိစေချင်တဲ့ မြန်မာပြည်ခရီးစဉ်” ဆိုတဲ့ ဇာတ်ကားလေး အကြောင်းကို မိတ်ဆက်ပေးပါဦး ခင်ဗျ။

ဖြေ။ ။ ဒီ “နှလုံးသားထဲကသိစေချင်တဲ့ မြန်မာပြည်ခရီးစဉ်” ဆိုတာကတော့ တကယ်တမ်းပြောရရင် ကျနော်တို့ Aung Ko Latt Motion Pictures Company နဲ့ JFC လို့ ခေါ်တဲ့ ဂျပန်နိုင်ငံရဲ့Cinematographers တွေရဲ့Society နဲ့ ကျနော်တို့နဲ့ ၂၀၁၃ မှာ ဂျပန်မှာ ဆုံဖြစ်သွားတယ်၊ အဲဒီတုန်းက ကျနော် “ကယန်းအလှ” ရုပ်ရှင်ဇာတ်ကားကို သွားပြတာ။ မဆွေဇင်ထိုက်ပါတယ်၊ ဦးသိန်းထွန်းအောင် ပါတယ်၊ ကျနော်ရဲ့Script Writer ပါတယ်၊ အဲဒီထဲမှာ ဂျပန်တွေကတော့အများကြီးပါတယ်။ ကျနော်က JFC ကို သွားတွေ့ပြီး စိတ်ဝင်စားတာပေါ့၊ ကျနော် သူတို့ကို ဖိတ်လိုက်တယ်၊ လာပါ မြန်မာပြည်ကိုလာရိုက်ပါလို့။ သူတို့ကလည်း “ဟုတ်ကဲ့ပါ၊ ကြိုးစားပါ့မယ်”ပြောပြီး ကျနော်လည်း မေ့မေ့ပျောက်ပျောက်ပဲ။ နောက်ပြီး ၂၀၁၆ မှာ ဆက်သွယ်လာပြီး ကျနော်နဲ့ အကြီးအကျယ် serious တွေ စလုပ်ပြီး အဲဒီအချိန်မှာ ကျနော်လည်း အကြီးအကျယ်ဝိုင်းလုပ်ပြီးတော့ အသေအလဲ ကူညီပေးလိုက်တယ်။ သူတို့ရဲ့ အိုင်ဒီယာနဲ့ သူတို့ပဲ။ ကျနော်တို့ ဘာမှ အိုင်ဒီယာ မပေးဘူး၊ သူတို့ကြိုက်သလိုရိုက်။ ဒါပေမယ့် မတူတာကတော့ ကျန်တဲ့ Documentary နဲ့မတူဘူး၊ ဘာလို့လဲဆိုတော့ သူက Docudrama မဟုတ်ဘူး၊ Narrative Documentary လည်း မဟုတ်ဘူး၊ တကယ့် ဟယ်လီကော်ပတာ ပျက်ကျတာတို့ ဘာတို့ Reality ကို ရိုက်ပြထားတဲ့ Realize Documentary လည်း မဟုတ်တဲ့အတွက် ဘာထူးခြားတာလဲဆိုတော့ Cinematographer တယောက်ရဲ့Feeling အတိုင်း သူ မြန်မာပြည်ကိုမြင်တဲ့ အမြင်အတိုင်း ရိုက်ပြတဲ့အတွက် စိတ်ဝင်စားစရာ ကောင်းပါတယ်။

မေး။  ။ ဒီဇာတ်ကားမှာ ဦးအောင်ကိုလတ် ဖန်တီးပေးထားတဲ့ Music အပိုင်းကိုလည်း သိချင်ပါတယ်။

ဖြေ ။  ။ ဒီ ဇာတ်ကားမှာ Music အပိုင်းကတော့ သူတို့ ကျနော့်ကို အကူအညီတောင်းတဲ့အတိုင်း ကျနော်က လိုက်ဖက်တဲ့ ခေတ်ပေါ် မြန်မာသံစဉ်လေးတွေ ပြန်တီးပေးလိုက်တယ်။ ဒုတိယအနေနဲ့ Episode 2 ကို ကျနော်ကတော့ လာမယ့် ဧပြီမှာ ဆာကူရာပွင့်တဲ့ အချိန်လေးမှာ Fuji-rama ကိုရိုက်ချင်ပါတယ်။ ကျနော်ကြိုးစားထားပါတယ် သွားပြီးတော့ ရိုက်ဖို့လုပ်ပ့ါမယ်။ ပြီးတော့မှ သြဂုတ် စက်တင်ဘာလောက်မှာ တခါ၊ ဇန်နဝါရီလလောက်မှာ မြို့တွေ၊ ရွာတွေ တခါပြန်ရိုက်မယ်ပေါ့။ သူတို့လိုပဲ ပြန်ကြိုးစားမယ်၊ အဲဒီအချိန်မှာ သူတို့က ၂၀၁၇ အကုန်မှာ ဒုတိယအကြိမ် သူတို့ဘက်ကလာနိုင်မလားပေါ့၊ ဒါကတော့ ကျနော်တို့ Aung Ko Latt Motion Pictures နဲ့ JFC တခုတည်းမဟုတ်ပါဘူး။ ဒီ မြန်မာနိုင်ငံရုပ်ရှင်လောကနဲ့ ကျယ်ပြန့်စွာ မိတ်ဆက်ပေးတဲ့အတွက် ဘယ်သူမဆို connect လုပ်ပြီး လုပ်လို့ရပါတယ်၊ ဘယ်သူပဲဖြစ်ဖြစ် ကျနော်တို့တိုင်းပြည်ကို အနုပညာအနေနဲ့ လာပြီးတော့ ဖန်တီးပေးတဲ့ JFC  ကိုလည်း ကျေးဇူးတင်တယ်၊ ကျနော်တို့မြန်မာပြည်သားဖြစ်ရတာ ဂုဏ်ယူတယ်။ ဘာဖြစ်လို့လဲဆိုတော့ Scenery ကလည်း မိုက်တယ်၊ တိုင်းရင်းသားတွေကလည်း အများကြီးပဲဆိုတော့ သူတို့အတွက်ကို အံ့သြစရာတွေက အများကြီးပဲ။ အဲဒီအတွက် ကျနော်အမြဲတမ်း ဂုဏ်ယူပါတယ်၊ ဝမ်းသာပါတယ်။

မေး။ ။ ဒီဇာတ်ကားကို ဘယ်နိုင်ငံတွေမှာ ပြသမယ်ဆိုတာ ပြောပြပေးပါဦး။

ဖြေ။ ။ ပြီးခဲ့တဲ့ အောက်တိုဘာတုန်းက TIFF (Tokyo International Film Festival) မှာ ပြပြီးပါပြီ၊ သူတို့ဘက်ကတော့ ဘယ်မှာပြမလဲ မသိဘူး။ ကျနော်တို့ဘက်ကိုတော့ Right ပေးထားပြီးပြီဆိုတော့ မီဒီယာတွေအားလုံးကို ဆွေးနွေးပြီးတော့ On Air, Free To Air အဲဒါတွေလုပ်လို့ရအောင် ကြိုးစားမှာပါ။

မေး။ ။ ဘယ်တော့လောက် စပြဖို့ ရည်မှန်းထားလဲဗျ။

ဖြေ။ ။ ဒီပွဲပြီးတာနဲ့ စပြီးဆွေးနွေးလို့ရပြီလေ၊ ခုနတုန်းက MRTV-4 ကမေးသွားတယ်ဆိုတော့ ဒါကတော့ များများပြလေ ကောင်းလေပါပဲ။

မေး။ ။ အန်ကယ် ထပ်ရိုက်မယ်ဆိုတဲ့ Fuji-rama အကြောင်း ပြောပြပေးပါလား။

ဖြေ။ ။ ဖူဂျီကတော့ တကယ်တမ်းကျရင် ဂျပန်မှာ လေးရာသီရှိတဲ့အတွက် ရာမတောင်က အရမ်းမိုက်တယ် နှင်းထဲမှာလည်း မိုက်တယ်၊ နေထွက်တဲ့အချိန်လည်း မိုက်တယ်၊ ဆောင်းဦးလည်း မိုက်တယ် ဒါပေမယ့် ကိုယ်က အချိန်ပေးပြီး သွားရိုက်နိုင်ဖို့ပဲ။ Japan Photographer တော်တော်များများကတော့ လှအောင်ရိုက်ထားတယ်။ ဒါပေမယ့် ကျနော်တို့သွားတဲ့အချိန်မှာ လောလော လောလောနဲ့ သွားမရိုက်ချင်ဘူးလေ။ သေချာအချိန်ပေးပြီး ရိုက်ပြီးတော့ မြန်မာပြည်ကို ပြန်ပြနိုင်အောင် ကျနော်ကြိုးစားပါ့မယ်။

မေး။ ။ အခုလိုမျိုး မြန်မာ့အလှတွေကို ဂျပန်ပြည်ကနေ လာရောက်ရိုက်ကူးတဲ့အတွက် အန်ကယ့်အနေနဲ့၊ မြန်မာနိုင်ငံသား တယောက်အနေနဲ့ ဘယ်လို ခံစားရလဲဆိုတာ သိချင်ပါတယ်။

ဖြေ။ ။ ပုံမှန် အရပ်သားတယောက်အနေနဲ့တောင် ကျနော် ဝမ်းသာပါတယ်။ အထူးသဖြင့် ကျနော်တို့ကတော့ ရုပ်သံနဲ့ Directing လုပ်နေပြီးတော့ ကင်မရာလည်း ဝါသနာပါပြီးလုပ်နေတဲ့သူဆိုတော့ ဘာပဲပြောပြော ကျနော်တို့ နေလေးစောင်းပြီး မှန်လေးကနေ အလင်းရောင်ဖောက်ပြီး အခန်းထဲဝင်လာတာတောင် ကျနော်တို့ ခံစားရတာပဲ၊ သူတို့လည်း ဒီလိုပဲ ကျနော်တို့ ဆီလာပြီး ခံစားတယ်ဆိုတာ ထားပါတော့ အိမ်နီးနားချင်း နိုင်ငံတခုကို သွားပြီး ရိုက်နေမယ့်အစား ကျနော်တို့ဆီလာရိုက်တာ ကျနော်တို့အရမ်းဝမ်းသာပါတယ်။ ဘာပဲဖြစ်ဖြစ် ကျနော်တို့ကလည်း တံမြက်စည်းလှဲပေးစရာရှိရင် လှဲပေးရမယ်၊ သန့်စရာရှိ သန့်ပေးရမယ်။ ကိုယ့်ရဲ့Culture ကို မိုက်အောင် လုပ်ပေးရမယ်။ ကိုယ်ကလည်း ကိုယ့်ကိုယ်ကိုယ် ပြန်လည်ထိန်းသိမ်းဖို့ လိုတာပေါ့။ ဘာလို့လဲဆိုတော့ ဧည့်သည်က တောက်လျှောက် ဝင်လာတော့မှာလေ။ ကင်မရာထမ်းပြီး ဝင်လာတော့မှာဆိုတော့ တဖြည်းဖြည်း ဘာပဲပြောပြော ကျနော်တို့အရုပ်တွေ ကျနော်တို့ နိုင်ငံရဲ့အရုပ်တွေ ကမ္ဘာပေါ်မှာကော အင်တာနက်မှာကော အများကြီး ကြည့်လို့ရပြီ။ ဂုဏ်ယူပါတယ်၊ တကယ်ပြောတာပါ။

မေး ။ ။ ဒီကနေတဆင့် ဂျပန်ရုပ်ရှင် နည်းပညာကို မြန်မာရုပ်ရှင်လောကက ဘယ်လို အတုယူစရာ ဖြစ်လာနိုင်လဲ။

ဖြေ ။ ။ တကယ်တမ်းပြောရရင် ကျနော်တို့ Crew တွေနဲ့ သူတို့တွဲလုပ်သလို၊ ဒီြ့ပင် ရုပ်ရှင်လုပ်ငန်းက Crew တွေ၊ Camera Assistant တွေ ဒါတွေအများကြီးဖြစ်လာမယ်။ ဒီ Opportunity တွေက ပညာ အပြန်အလှန် ဖလှယ်လို့ ရမယ်။ အခုဆိုရင် ကျနော်တို့ Crew တွေနဲ့ ရိုက်ကွင်းပေါ်မှာ ရက် ၂၀ လောက် အပြန်အလှန်တွေ့ကြတာဆိုတော့ အဲဒီဟာတွေက Challenge တခုပဲ။ မြန်မာအိမ်ထဲမှာပဲ မြန်မာ တိုင်းပြည်ထဲမှာပဲ လုပ်နေတာထက်စာရင် နိုင်ငံတကာ Crew နဲ့ နိုင်ငံတကာ Artist တွေနဲ့ တွေ့ပြီးတော့ Create လုပ်တာ ပိုကောင်းပါတယ်။

မေး ။ ။ ဒီလိုမျိုး နှစ်နိုင်ငံ ပူးပေါင်းရိုက်ကူးတဲ့အပေါ်ကို နှစ်နိုင်ငံ ချစ်ကြည်ရေးနဲ့ ယဉ်ကျေးမှုတွေကရော ဘယ်လောက်အထိ တိုးတက်လာမယ်လို့ မျှော်လင့်မိပါသလဲ။

ဖြေ ။ ။ အခု သူတို့ပြောတဲ့စကားကို သားတို့မြင်သွားတာပဲလေ သူတို့ပြောတဲ့အတိုင်း သူတို့ တကယ် Feeling နဲ့ ဒီအပေါ်မှာ သံယောဇဉ်တဖြည်းဖြည်း တွယ်လာတယ်။ အဲဒီကနေတဆင့် ဆင့်ပွားဆင့်ပွား ဒီ အကြောင်းပြောမယ့်ဟာတွေက ကျယ်ပြန့်လာမှာပဲလေ၊ ဘယ်လိုပဲပြောပြော သူတို့တင်မဟုတ်ပါဘူး။ ဒီ အထဲကို ဝင်လာတဲ့ Tourists တွေကော Tourism ကိစ္စတွေရော ကျယ်ပြန့်လာမှာ။ ဒီလိုမျိုးပေါ့။ အနုပညာနဲ့ပတ်သက်တဲ့ လမ်းကြောင်းကတော့ တဖြည်းဖြည်းကျယ်လာမှာပဲ။

မေး ။ ။ အန်ကယ့်ကိုဆို “ကယန်းအလှ” ဇာတ်ကား ရိုက်ကူးပြီးကတည်းက ဇာတ်ကားတွေ ရိုက်တာ သိပ်မတွေ့ရတော့ဘူး။ အနုပညာလှုပ်ရှားမှုအနေနဲ့ ဘာတွေလုပ်နေတယ်ဆိုတာ ပရိသတ်တွေကို တချက်ပြောပြပေးပါဦး။

ဖြေ ။ ။ အခုကတော့ ကျနော်တို့က Main စီးပွားရေးက ကြော်ငြာဆိုတော့ ကြော်ငြာကိုအဓိကရိုက်နေပါတယ်။ ဒုတိယကား ရိုက်ဖို့အတွက်ကို ပထမကားက ရှုံးသွားတာလေ၊ ဒါပေမယ့် ဂုဏ်သိက္ခာအားဖြင့် အောင်မြင်တဲ့အတွက်ကြောင့် ဒုတိယကားကိုလည်း ကျနော်တို့ ဘယ်လောက် အရှုံးခံပြီးကစ်မလဲပေါ့။ ကျနော်တို့ ပြချင်တာ ဘယ်လောက်ထိ ပြနိုင်မလဲပေါ့။ ဆိုတော့ ကျနော်တို့ ကြိုးစားနေပါတယ်။ ၂၀၁၇ လောက်မှာ ဖြစ်နိုင်မယ် ထင်ပါတယ်။ သေချာပြီဆိုရင်တော့ ကျနော်တို့ ပြန်ပြီးဆက်သွယ်ပါမယ်။ လက်ရှိကတော့ အဲဒါပါပဲ။ နောက် Documentary  အတိုလေးတွေ ရိုက်ဖြစ်တယ်။ နောက်ပြီးတော့ ရန်ကုန်လေယာဉ်ကွင်းဖွင့်ပွဲတို့ အဲဒါလေးတွေ ကျနော် လိုက်ရိုက်နေပါတယ်။

မေး။ ။ ရှုံးသွားတယ်ဆိုတဲ့ ဇာတ်ကားက “ကယန်းအလှ”လား။

ဖြေ ။ ။ ဟုတ်ကဲ့၊ ကယန်းအလှပါ။

မေး။ ။ ဒါပေမဲ့ ဒီ “ကယန်းအလှ”ကြောင့် နိုင်ငံတကာမှာ မြန်မာနိုင်ငံကို လူပိုသိသွားတယ်။ ကမ္ဘာကလည်း ကယန်းအလှရဲ့ ရိုက်ချက်တွေက နာမည်ကြီးတဲ့အပေါ်ကိုကော အန်ကယ့်ရဲ့ခံစားချက် သိချင်ပါတယ်။

ဖြေ ။ ။ ကျနော် အရမ်းပျော်ပါတယ်။ ဘာဖြစ်လို့လဲဆိုတော့ ကယန်းလူမျိုးတွေက ဟိုဘက်နိုင်ငံက လူမျိုးတွေလို တဖြည်းဖြည်း ဖြစ်ပြီးတော့ ကြေညာတောင် ကြေညာနေပြီ၊ အဲ့အချိန်မှာ ကျနော်က အစိုးရကိုတင်ပြပြီးတော့ ရိုက်ကူးခွင့် ရပြီးတော့ ရိုက်တယ်။ အကုန်ခံတယ်။ အဲဒီမှာ တိုင်းရင်းသားတွေကလည်း အကုန် ဝိုင်းကူတယ်၊ အဲဒါတွေက ဒီနေ့ ၂၀၁၃ မှာ ဖြန့်ဖြူးနိုင်တဲ့အတွက်၊ နိုင်ငံတကာလေကြောင်းလိုင်းတွေမှာလည်း “ကယန်းအလှ”ကို ကြည့်လို့ရတယ်။ ရုပ်ရှင်ပွဲတော် တွေမှာလည်း ကယန်းအလှက တင်လို့ရတယ် ဆုရတယ်ပေါ့လေ၊မြန်မာအကယ်ဒမီလည်းရတယ်၊ ဒါတွေဒါတွေ ကြည့်ခြင်းအားဖြင့် နိုင်ငံတကာက ကယန်းဆိုတာ မြန်မာပြည်က တိုင်းရင်းသားအစစ်ဆိုတာ ယုံကြည်သွားပြီပေါ့။ အဲဒါလေးက ကျနော်တို့အတွက် ဂုဏ်ယူစရာကောင်းပါတယ်။ ကျနော်တို့ Culture တွေကလည်း လှပတဲ့အတွက် သူတို့ ခံစားနိုင်ပါတယ်။

မေး။ ။ အန်ကယ့်ရဲ့လတ်တလော အနုပညာလှုပ်ရှားမှုကိုလည်း သိချင်ပါတယ်။

ဖြေ ။ ။ ကျနော်လက်ရှိကတော့ ကြော်ငြာဆက်လုပ်နေတယ်။ cooperate video တွေ လုပ်နေတယ်။ ရုပ်ရှင်ကားတကားလည်း ရှိတယ်။ နောက်ပြီးတော့ အခန်းဆက် ဇာတ်ကား (မနှစ်ကထွက်ထားတဲ့) “နေရယ် လရယ် အမှန်တရားရယ်” Second Season လာတော့မယ်။ အဲဒါ ဆက်ရိုက်ဖို့ လုပ်နေပါတယ်။

မေး။ ။ ဒီနှစ်မှာ ပြုလုပ်မယ့် မြန်မာ့ရုပ်ရှင် အကယ်ဒမီပေးပွဲကြီးအတွက်ရော
အန်ကယ်ရဲ့စိတ်ခံစားချက် ဘယ်လိုရှိလဲ သိချင်ပါတယ်။

ဖြေ ။ ။ အကယ်ဒမီကတော့ ကျနော် မျက်ခြေပြတ်နေပါတယ်၊ ဘာကြောင့်လဲဆိုတော့ မြန်မာကားနဲ့လည်း ကျနော် လွတ်နေတာ များတော့ ကျနော့်ကမ္ဘာထဲမှာပဲ ရှုတ်ယှက်ခက်နေတယ်။ ဒါပေမဲ့ ကျနော် နည်းနည်း ပြန် Study လုပ်လိုက်ဦးမယ်။ ဘာပဲပြောပြော ပိုပြီးပိုပြီး ကောင်းလာမယ်လို့ ထင်ပါတယ်။

မေး။ ။ မြန်မာ့ရုပ်ရှင်လောကကို မြန်မာကားကြည့်တဲ့ ပရိသတ်တွေက ဝေဖန်တာတွေရှိတယ်။ အဲဒီ့အပေါ်ကိုရော မြန်မာ့ ရုပ်ရှင်လောကကို အန်ကယ် ဘယ်လိုမြင်မိပါသလဲ။

ဖြေ ။ ။ မြန်မာရုပ်ရှင်လောကကတော့ ဘာပဲပြောပြော တဖြည်းဖြည်းကောင်းလာမှာပါ။ လူငယ်ဖန်တီးသူတွေ ပိုများလာဖို့ မျှော်လင့်ပါတယ်။ လူငယ်တွေကပဲ ခေတ်ကိုပြောင်းလဲမှာဖြစ်တဲ့အတွက်ကြောင့် များသောအားဖြင့် မိန်းကလေး ဒါရိုက်တာတွေ၊ လူငယ်ဒါရိုက်တာတွေအများကြီး ကင်မရာမန်းတွေ မျှော်လင့်ပါတယ်။ အခုချက်ချင်းချင်းတော့ ပြောင်းသွားမှာ မဟုတ်ပါဘူး။ ဝေဖန်မှုလေးတွေတော့ ခံရမှာပါပဲ၊ ဘာလို့လဲဆို ရှေ့မှာလည်း လုပ်ခဲ့တာတွေက စီးပွားရေးအတွက်ပဲ target ထားပြီး လုပ်ခဲ့တာ များတဲ့အတွက် လာမယ့်ရှေ့လျှောက်မှာ တဖြည်းဖြည်း ချိန်းသွားမယ် ထင်ပါတယ်။

မေး။ ။ အန်ကယ်က TV ကြော်ငြာတွေရိုက်ရင် သူများနဲ့မတူတဲ့ အိုင်ဒီယာတွေနဲ့ ရိုက်လေ့ရှိတဲ့ ဒါရိုက်တာ တယောက်ဆိုတော့ မြန်မာ့ TV ကြော်ငြာလောက အကြောင်းကိုရော တချက်လောက် ပြောပြပေးပါ။

ဖြေ ။ ။ TV ကြော်ငြာလောကကလည်း တဖြည်းဖြည်းပြုတ်ကျလာပြီ၊ နိုင်ငံခြားသားတွေဝင်ပြီးတော့ တိုက်ထုတ်တာ ကျနော်တို့ ထွက်ပြေးနေရပြီ၊ ဒါပေမယ့်လည်း စကာတင်ကျန်ဖို့လိုပါတယ်။ အဓိကက မြန်မာရဲ့Taste နဲ့ မြန်မာရဲ့Quality  ကို ကောင်းကောင်း ပြနိုင်ဖို့ရယ်၊ မြန်မာပညာရှင်တွေက နိုင်ငံတကာ စံချိန်မီပါတယ်၊ Concept ကိုလည်း ခိုင်အောင်ရွေးနိုင်ပါတယ်။ Copy Writer လည်း လုပ်နိုင်ပါတယ်၊ အဲ့လိုမျိုးပေါ့ နိုင်ငံတကာ Quality မျိုး ရိုက်နိုင်ပါတယ်ဆိုတဲ့ Production မျိုး စံကာတင်ပြီး ကျန်မှာမို့လို့ ကြော်ငြာ ကတော့ ပြောလို့မရသေးဘူး။ ကိုယ်ဖိုက်နိုင်ရင် ရမှာပဲ၊ ကိုယ့် Client က ကိုယ့်ကို ယုံကြည်ရင်ရမှာပဲ။ အခုအချိန်မှာတော့ ဝင်လုနေတဲ့လူတွေအများကြီးပဲ။ ဒါ နိုင်ငံတိုင်းပဲ တံခါးဖွင့်ရင် ဝင်လုမှာပဲ။

မေး ။ ။ အန်ကယ် ဘာများ ဖြည့်စွက်ပြီး ပြောချင်ပါသေးလဲ ခင်ဗျာ။

ဖြေ ။ ။ မင်္ဂလာပါ၊ Irrawaddy နဲ့ အင်တာဗျူး ခွင့်ရတဲ့အတွက် အထူးပဲ ဝမ်းသာပါတယ်၊ Irrawaddy ရဲ့ ပရိသတ်များ ကျန်းမာ၊ ချမ်းသာကြပါစေ။ ကျနော်ဒါရိုက်တာ အောင်ကိုလတ်ပါ၊ ဒီနေ့ အစီအစဉ်လေးကို Irrawaddy ကနေ ဖြေခွင့်ရတဲ့အတွက် ကျေးဇူးတင်ပါတယ်။ ကျနော်တို့ ဆက်ကြိုးစားပါ့မယ်။ဘာပဲဖြစ်ဖြစ်ပေါ့ အနုပညာဆိုတာ စီးပွားရေးနဲ့ ဆက်နွယ်သော်လည်း အနုပညာစစ်စစ်ထွက်ဖို့ ရေရှည်ခံသော ပန်းချီကားတချပ်ဖြစ်လာဖို့ အဲ့လိုမျိုး အလားသဏ္ဍာန်တူတဲ့ ရုပ်ရှင် ဖြစ်လာဖို့ ဆက်ကြိုးစားပါ့မယ်။ ကျေးဇူးတင်ပါတယ်။

The post ဒါရိုက်တာ အောင်ကိုလတ်နဲ့ အင်တာဗျူး appeared first on ဧရာဝတီ.