ဗိုလ်ချုပ် ရုပ်ရှင် ဇာတ်ကားကို ၂၀၂၀ တွင် ရုံတင် ပြသရန် စီစဉ်နေ

ဗိုလ်ချုပ်အောင်ဆန်း၏ အတ္ထုပ္ပတ္တိ ရုပ်ရှင် ရိုက်ကူးရေး လုပ်ငန်းကို ၂၀၁၈ ခုနှစ် ဇန်နဝါရီလတွင် စတင်ဆောင်ရွက်မည်ဖြစ်ပြီး ၂၀၂၀ ခုနှစ်တွင် ရုံတင်ပြသွားရန် စီစဉ်နေကြောင်း သိရသည်။

သာသနာရေးနှင့် ယဉ်ကျေးမှု ဝန်ကြီးဌာန အမြဲတမ်း အတွင်းဝန် ဦးထွန်းအုံက “ ၂၀၂၀ မှာ ရုံတင်နိုင်အောင် ကြိုးစားမယ်။ ၂ နှစ်အချိန်ယူထားတယ်။ ၂၀၁၈ မှာ ဇာတ်ညွန်းတွေကို ပြန်ပြင်မယ်။ ၂၀၂၀ မှာ ရုပ်ရှင်ရုံတင်နိုင်ရေး ကြိုးစားနေပါတယ်။” ဟုပြောသည်။

အဆိုပါ ရုပ်ရှင် ဇာတ်ကားကို ယခင်က ကျပ်သိန်း သုံးသောင်း အကုန်ကျခံ ရိုက်ကူးရန် ဇာတ်ညွှန်း ရေးခဲ့သော်လည်း ယခု အချိန်ထိ ဇာတ်ကားရိုက်ကူးရန် အလှူငွေ ကျပ် သိန်း ရှစ်ထောင့် သုံးရာခန့်သာ ရှိခြင်းကြောင့် ယခင်ရေးထားသည့် ဇာတ်ညွှန်းကို ပြန်လည် ပြင်ဆင်သွားမည် ဖြစ်ကြောင်း သိရသည်။

၎င်းဇာတ်ကားတွင် ဒါရိုက်တာ အဖြစ် ရိုက်ကူးမည့် ဦးမင်းထင် ကိုကိုကြီးက “ကိုယ်က စိတ်တခုတည်းနဲ့ လုပ်တယ်။ ဒေါ်အောင်ဆန်းစုကြည်သည် ဗိုလ်ချုပ် ရုပ်ရှင်ကိုတောင် ဖြစ်မြောက်အောင် မရိုက်နိုင်ဘူးလို့ အပြော မခံ နိုင်ဘူး။ ဒါကြောင့် ဘယ်သူမှ မလုပ်ရဲတာကို ခေါင်းခံပြီး လုပ်တယ်။ အဆဲခံရင်လည်း ကိုယ်တယောက်ထဲပဲ အဆဲ ခံလိုက်မယ်။ “ ဟု ဧရာဝတီသို့ပြောသည်။

ဦးမင်းထင် ကိုကိုကြီးက “ပါးစပ်လေးနဲ့ပဲ ကျနော်ဒါကို တာဝန်ယူတယ်ဆိုပြီး လုပ်မှာ မဟုတ်ဘူး။ တခြား အလုပ်တွေ ဘာမှ မလုပ်ဘူး။ ၂ နှစ် အချိန်ပေးပြီး လုပ်မှာ ကိုယ့်မှာ ရှိတဲ့ အနုပညာ၊ အတတ်ပညာ၊ ဉာဏ်ပညာ ၊ စိတ်၊ ကိုယ် ၊ ရှိနေတဲ့ အား အကုန်လုံးကို သုံးပြီးတော့ အလုပ်လုပ်မှာဖြစ်တဲ့ အတွက် အကောင်းဆုံး ပြင်ဆင်တယ်။ အဆိုးဆုံး အတွက်လည်း ပြင်ဆင်ထားပြီးပြီ။” ဟု ပြောသည်။

ဗိုလ်ချုပ်၏ အတ္ထုပ္ပတ္တိ ရုပ်ရှင် ဇာတ်ကားကို ရိုက်ကူးရန် သမိုင်း အထောက်အထား လွဲမှားမှု မရှိစေရေး အတွက် ကြီးကြပ်ဆောင်ရွက်မည့် ဗိုလ်ချုပ်အောင်ဆန်း အတ္ထုပ္ပတ္တိ ရုပ်ရှင် ရိုက်ကူး ထုတ်လုပ်ရေး လုပ်ငန်းကော်မတီ ကို ပြည်ထောင်စု အစိုးရ အဖွဲ့ ရုံး က နိုဝင်ဘာ ၂၄ ရက်နေ့တွင် ဖွဲ့စည်းခဲ့သည်။

အဆိုပါ ကော်မတီတွင် သာသာနာရေးနှင့် ယဉ်ကျေးမှု ဝန်ကြီးဌာနမှ ပြည်ထောင်စု ဝန်ကြီး သူရ ဦးအောင်ကိုက ဥက္ကဋ္ဌ အဖြစ်ဆောင်ရွက်ပြီး၊ ဒါရိုက်တာ ဦးမင်းထင်ကိုကိုကြီး၊ အနုပညာရှင်ထဲမှ ဦးလူမင်းနဲ့ အခြားအနုပညာရှင်များ ပါဝင်ပြီး၊ ဘဏ္ဍာရေးကော်မတီ ဒါရိုက်တာ အဖြစ် ဒေါ်အေးအေးခိုင်က တာဝန်ယူ ဆောင်ရွက် သွားမည် ဖြစ်ကြောင်း ဦးထွန်းအုံ ကပြောသည်။

ဗိုလ်ချုပ်အောင်ဆန်း ရုပ်ရှင် ဖြစ်မြောက်ရေး အဖွဲ့ကို ၂၀၁၂ ခုနှစ် ဖေဖော်ဝါရီ ၁၃ ရက်နေ့တွင် စတင်ဖွဲ့စည်းခဲ့ပြီး၊ အဆိုပါ ရုပ်ရှင်ကို ဗိုလ်ချုပ်အောင်ဆန်း အသက် ၁၀၀ ပြည့်သည့် ၂၀၁၅ ခုနှစ်က ရုံတင်ပြသ နိုင်ရန် စီစဉ်ခဲ့သည်။ သို့သော် နှစ်၁၀၀ ပြည့်တွင် ရုပ်ရှင် ရိုက်ကူးရေး အလှူငွေ ရှာရန် နမူနာသာ ရိုက်ကူး နိုင်ခဲ့ပြီး ၎င်း နမူနာကိုလည်း ဝေဖန်မှုများ ရှိခဲ့သည်။

မူလဇာတ်ညွှန်းအား ပြောင်းလဲရေးသားသေ်ာလည်း ပါဝင်သရုပ်ဆောင် မည့်သူများမှာ ယခင်ရွေးချယ်ထားသည့် ဗိုလ်ချုပ်အောင်ဆန်းနေရာတွင် ဘောလုံးသမား ကျော်ကျော်မျိုး၊ ဒေါ်ခင်ကြည်နေရာတွင် ကျောင်းဆရာမ ဇာခြည်လင်း တို့က သရုပ်ဆောင်သွားမည်ဟု သိရသည်။

၎င်းရုပ်ရှင် ဇာတ်ကားရိုက်ကူးရန် လိုအပ်သည့် အကူအညီများကို ပြည်ထဲရေးနှင့် ကာကွယ်ရေး ဝန်ကြီးဌာနများမှာ စစ်လက်နက်များ၊ ယူနီဖောင်းများ၊ လေယာဉ်ပျံ များနှင့် ဗုံးပေါက်မည့် ပစ္စည်းများ အပါအဝင် အကူအညီ ပေးသွားမည်ဟုလည်း သိရသည်။

“ ရုပ်ရှင် ရိုက်ဖို့ အတွက် လိုတဲ့ ဝန်ကြီးဌာနတွေ အကုန်လုံးက တာဝန်ယူမယ်။ ဥပမာ ကာကွယ်ရေးနှင့် ပတ်သက်တဲ့ လက်နက်၊ စက်ပစ္စည်း၊ အဝတ်အစား၊ ယမ်းဖောက်ခွဲတာမှ အစ ကာကွယ်ရေးက အထောက်အပံ့ လုပ်မယ်” ဟု ဦးထွန်းအုံ ကပြောသည်။

The post ဗိုလ်ချုပ် ရုပ်ရှင် ဇာတ်ကားကို ၂၀၂၀ တွင် ရုံတင် ပြသရန် စီစဉ်နေ appeared first on ဧရာဝတီ.