Variety မီဒီယာရဲ့ အဆိုအရ Warner Bros. ရုပ်ရှင်ထုတ်လုပ်ရေးနဲ့ ဆွေးနွေးညှိနှိုင်းမှုတွေ မပြီးဆုံးသေးပေမယ့် မင်းသား Joaquin Phoenix က မူရင်း The Joker ရုပ်ရှင်မှာ ပါဝင်သရုပ်ဆောင်ဖို့ သဘောတူလိုက်ပြီလို့ သိရပါတယ်။
“The Hangover” ရုပ်ရှင် ရိုက်ကူးသူ ဒါရိုက်တာက “Her” ရုပ်ရှင်မင်းသား Phoenix နဲ့ ပြီးခဲ့တဲ့ နှစ်နှောင်းပိုင်းလောက်မှာ တွေ့ဆုံခဲ့ပြီး စတူဒီယိုရဲ့ အတည်ပြုမှုကို စောင့်ဆိုင်းနေခဲ့ကြတယ်လို့ သတင်းအရင်းအမြစ်တွေက ဆိုပါတယ်။
မူရင်း The Joker ရုပ်ရှင်ဟာ Warner Bros. နဲ့ DC Entertainment တို့ကနေ ထုတ်လုပ်မယ့် ရုပ်ရှင် Project တခုဖြစ်ပြီး “Wonder Woman”, “Justice League”, “Batman v Superman: Dawn of Justice” နဲ့ “Man of Steel” တို့ပါဝင်တဲ့ ရုပ်ရှင်အုပ်စုထဲ ပါဝင်လာတော့မှာလည်း ဖြစ်ပါတယ်။
၂၀၁၆ ခုနှစ်မှာ ထွက်ရှိခဲ့တဲ့ “Suicide Squad” ရုပ်ရှင်မှာဆိုရင် မင်းသား Jared Leto က ဂျိုကာအဖြစ် သရုပ်ဆောင်ခဲ့ပြီး “Suicide Squad 2” ရုပ်ရှင်အသစ်မှာလည်း ပါဝင်သရုပ်ဆောင်မယ့်အပြင် အမည် မသတ်မှတ်ရသေးတဲ့ Joker နဲ့ Harley Quinn ရုပ်ရှင်မှာလည်း မင်းသမီး Margot Robbie နဲ့အတူ ပါဝင်ဖို့ ရှိနေပါတယ်။
ဒါရိုက်တာ Todd Phillips ဟာ ၁၉၈၀ အစောပိုင်းကာလများက ဂိုသမ်မြို့မှာ ဇာတ်အိမ်တည်မယ့် မူရင်းဂျိုကာ ရုပ်ရှင် အတွက် ဇာတ်ညွှန်းကို ရေးသားဖို့ ဇာတ်ညွှန်းရေးဆရာ Scott Silver နဲ့ အဖွဲ့ဖွဲ့ထားပြီး ဖြစ်ပါတယ်။ ဒါ့အပြင် မူရင်း ကာတွန်းစာအုပ်ကနေ ရိုက်ကူးမယ့် ရုပ်ရှင်ဆိုတာထက် မှုခင်း Drama အမျိုးအစား ပုံစံမျိုး ရိုက်ကူးမှာဖြစ်တယ်လို့ ဆိုပါတယ်။
မကြာသေးခင်တုန်းကလည်း မင်းသား Leonardo DiCaprio က ဂျိုကာ အနေနဲ့ ပါဝင်သရုပ်ဆောင်ဖို့ စိတ်ဝင်စားနေတယ်လို့ သတင်းထွက်ပေါ်ခဲ့ပါသေးတယ်။ လက်ရှိ ဂျိုကာ သရုပ်ဆောင် Jared Leto ကလည်း ဂျိုကာဇာတ်ကောင်အခြေပြု အခြားရုပ်ရှင်တခုမှာ ပါဝင်ဖို့ကိစ္စနဲ့ ပတ်သက်ပြီး နည်းနည်းလေး စိတ်ရှုပ်ထွေးနေရတယ်လို့ ပြောထားပါတယ်။
သူက “ကျနော် ဂျိုကာ ကိုချစ်ပါတယ်၊ သူဟာ တော်တော်လေးကောင်းတဲ့ ဇာတ်ကောင်ပါ။ သရုပ်ဆောင်ဖို့လည်း ပျော်ဖို့ကောင်းမယ့် ဇာတ်ကောင်ဖြစ်ပါတယ်၊ ဒါပေမယ့် စကြာဝဠာကြီးက အရမ်းကြီးတော့ ဂျိုကာအနေနဲ့ သရုပ်ဆောင်တဲ့အခါ ပိုင်ဆိုင်ခွင့်ရယ်လို့တော့ မရှိပါဘူး။ ခဏလေး ဆုပ်ကိုင်ထားပြီးတဲ့နောက် လက်လွှတ်ပေး လိုက်ရတာလည်း ဂုဏ်ယူစရာ ဖြစ်ပါတယ်။ တခြား ရုပ်ရှင်တွေအဖြစ် ဖန်တီးကြမယ်ဆိုရင်တော့ ဘယ်လိုပုံစံ ဖြစ်လာမလဲဆိုတာ စောင့်ကြည့်ဖို့ ကျနော် စိတ်လှုပ်ရှားနေပါတယ်” လို့ The Hollywood Reporter မီဒီယာကို ပြီးခဲ့တဲ့နှစ် စက်တင်ဘာလက ပြောဆိုထားပါတယ်။
မင်းသား Phoenix အနေနဲ့ လင်းနို့လူသားရဲ့ ဗီလိန်ကြီး Lex Luthor အဖြစ် “Batman v. Superman” ရုပ်ရှင်မှာ သရုပ်ဆောင်ဖို့ ကမ်းလှမ်း ခံခဲ့ရဖူးတဲ့အပြင် Marvel ရုပ်ရှင်ထုတ်လုပ်ရေးအတွက် Doctor Strange ရုပ်ရှင်မှာ ပါဝင်ဖို့ ဆွေးနွေးခဲ့ဖူးပေမယ့်လည်း အခွင့်အရေးတွေကို လက်လွတ်ခဲ့ရပါတယ်။
Amazon ရုပ်ရှင်ထုတ်လုပ်ရေးရဲ့ “You Were Never Really Here” မှာ သူ့ကို နောက်ဆုံးမြင်တွေ့ခဲ့ကြရပြီး ကွယ်လွန်သူ ကာတွန်းပညာရှင် John Callahan ရဲ့ ဇာတ်ကြောင်းကို အခြေခံထားတဲ့ “Don’t Worry, He Won’t Get Far on Foot” ရုပ်ရှင်မှာ သူ့ကို ထပ်မံမြင်တွေ့ ကြရဦးမှာပါ။ Jesus အဖြစ်သရုပ်ဆောင်ထားတဲ့ “Mary Magdalene” ရုပ်ရှင်ရိုက်ကူးရေးဟာလည်း မကြာသေးခင်ကပဲ ပြီးဆုံးခဲ့တာပါ။
Ref:aceshowbiz
The post မူရင်း The Joker ရုပ်ရှင်မှာ မင်းသား Joaquin Phoenix ပါဝင်မည်ဟု သတင်းများထွက်ပေါ် appeared first on ဧရာဝတီ.