ပရိသတ်တွေနဲ့ နှစ်တော်တော်ကြာကြာ ဝေးကွာနေခဲ့တဲ့ အဆိုတော် ရေဗက္ကာဝင်းဟာ ကချင်ဘာသာနဲ့ သီဆိုထားတဲ့ တကိုယ်တော်သီချင်းခွေ “Maka”ထဲမှ သီချင်းများမှာ ကချင်ဘာသာနဲ့ သီဆိုထားပေမယ့် တိုင်းရင်းသားအားလုံးကို ကိုယ်စားပြုတယ်လို့ ပြောပါတယ်။
“ကချင်ဘာသာနဲ့ ထုတ်တယ်ဆိုတာက ဒီနိုင်ငံမှာနေထိုင်ကြတဲ့ တိုင်းရင်းသားတွေအကုန်လုံးကို ကိုယ်စား ပြုပါတယ်။ ကချင်လူမျိုး တခုထဲကို ကိုယ်စားပြုတာမဟုတ်ပါဘူး။ တိုင်းရင်းသားတွေမှာ ကိုယ်ပိုင်ရှိတဲ့ ယဉ်ကျေးမှုတွေ၊ ဝတ်စားဆင်ယဉ်မှုတွေ၊ ထုံးတမ်းစဉ်လာတွေ၊ ဂီတအနုပညာတွေ စာပေဘာသာ စကားတွေ အသီးသီး ရှိကြပါတယ်။ အဲဒီဟာကို အနုပညာအဖြစ်ပြောင်းပြီးတော့ တနိုင်ငံလုံး နားဆင်လို့ ရအောင် တခြားတိုင်းရင်းသားအခွေတွေလည်း ဈေးကွက်ကျယ်ပြန့်သွားအောင် ဆိုတဲ့ရည်ရွယ်ချက်နဲ့ ထုတ်တာပါ” လို့ အဆိုတော် ရေဗက္ကာဝင်းက ပြောပါတယ်။
အဆိုပါ ကချင်ဘာသာစကားနဲ့ သီဆိုထားတဲ့ Maka အခွေထဲမှာ သီချင်းစုစုပေါင်း ၁၁ ပုဒ် ပါဝင်ပြီး သီချင်းများကိုလည်း Music Video ရိုက်ကူးထားကာ သီချင်းစာသားများကိုလည်း ပရိသတ်များ နားလည်နိုင်စေရန်အတွက် မြန်မာဘာသာပြန်ကာ စာတန်းထိုးပေးထားတယ်လို့ သိရပါတယ်။
“ဒီအခွေ ခေါင်းစဉ်လေးရဲ့ မြန်မာလို အဓိပ္ပာယ်ကတော့ ရေဗက္ကာရဲ့ အရောင်အသွေး၊ အရောင်အဆင်း ပုံရိပ်၊ အဲဒီလိုသဘောမျိုးကို အမည်ရပါတယ်။ တိုင်းရင်းသားအခွေဆိုရင် တိုင်းရင်းသားတွေထဲမှာပဲ ပြီးသွားတာ မဟုတ်ဘဲနဲ့ ကျယ်ကျယ်ပြန့်ပြန့် တခြားလူမျိုးတွေရော အားလုံးနားထောင်လို့ရတဲ့ အနေအထားအထိ ဈေးကွက်ရော နားထောင်တဲ့သူတွေရော ကျယ်ကျယ်ပြန့်ပြန့် ဖြစ်စေချင်တယ်” လို့ ရေဗက္ကာဝင်းက ပြောပါတယ်။
တေးသံရှင် ရေဗက္ကာဝင်းကို ပရိသတ်များက သူမရဲ့သီချင်းအသစ်များနဲ့ တကိုယ်တော်အခွေကို မျှော်လင့် ထားကြပြီး ယခုထွက်ရှိလာတဲ့အခါ ကချင်ဘာသာစကားနဲ့ သီဆိုထားတဲ့ သီချင်းများ ထွက်လာတဲ့အပေါ် မြန်မာသီချင်းများ နားထောင်ချင်တဲ့ ပရိသတ်များအတွက် “မြန်မာအချစ် သီချင်းတွေလည်း လုပ်နေပါတယ်။ အရင်တုန်းက သီချင်းတွေနဲ့ ယှဉ်ရင် ဂီတပုံစံက တော်တော်လေး ပြောင်းလဲမှု ရှိသွားပါပြီ။ အဲဒီ သီချင်းခွေ ထွက်လာရင်လည်း အားပေးကြပါ။ တော်တော်များများတော့ ပြီးနေပါပြီ။ ကချင်ခွေ အရင် ထွက်လိုက်တဲ့ အခါ ကျတော့ ခဏနားလိုက်တဲ့ သဘောပါ။ အဲဒါလည်း အမြန်ဆုံးထွက်နိုင်အောင် ကြိုးစားမှာပါ” လို့ ရေဗက္ကာဝင်းက ပြောပါတယ်။
အဆိုတော် ရေဗက္ကာဝင်းရဲ့ ကချင်ဘာသာစကားနဲ့ သီဆိုထားတဲ့ ပထမဆုံး တကိုယ်တော် တေးသီချင်းခွေ “Maka” သီချင်း Album မိတ်ဆက်ပွဲကို ဖေဖော်ဝါရီလ ၉ ရက်နေ့က ရန်ကုန်မြို့၊ ဆာကူရာတာဝါမှာ ကျင်းပ ပြုလုပ်ခဲ့တာ ဖြစ်ပါတယ်။
The post တိုင်းရင်းသားအားလုံးကို ကိုယ်စားပြုတဲ့ ရေဗက္ကာဝင်းရဲ့ ကချင်သီချင်းခွေ “Maka” appeared first on ဧရာဝတီ.