အိန္ဒိယနိုင်ငံမှ ထင်ရှားကျော်ကြားတဲ့ လေးစားအားကျဖွယ် ဘောလိဝုဒ် မင်းသမီး ၇ ဦး

အိန္ဒိယလိုမျိုး နိုင်ငံတခုမှာ အနုပညာရှင်၊ သရုပ်ဆောင်တွေကို ဒုတိယ ဘုရားသခင် နေရာမှာ ထားလေ့ရှိကြပြီး လူတွေရဲ့ အသက်ရှင် နေထိုင်မှု နေ့စဉ်ဘဝတွေမှာ အကျိုးသက်ရောက်မှုတွေ ရှိတယ်လို့ ထင်မြင်ကြပါတယ်။

အဲဒီ အနုပညာရှင်၊ သရုပ်ဆောင်များဟာ လူသားတဦး ဖြစ်ပေမယ့်လည်း သာမန်လူတွေထက် ထင်ရှားကျော်ကြားတဲ့ ကြယ်ပွင့်အဖြစ် လူသန်းပေါင်းများစွာက သူတို့ရဲ ဦးဆောင်မှု နောက်ကို လိုက်ဖို့ စိတ်အားထက်သန်ကြပါတယ်။ အိန္ဒိယနိုင်ငံရဲ့ လူ့အသိုက်အဝန်းကိုလည်း အိန္ဒိယ အနုပညာရှင်များက ရိုက်ခတ်မှုရှိအောင် လုပ်နိုင်ကြပါတယ်။

အရည်အချင်း ရှိတဲ့သူတွေ အပြည့်ရှိတဲ့ အိန္ဒိယရုပ်ရှင်လုပ်ငန်းမှာ လေးစားအားကျရတဲ့ ဇာတ်လမ်းတွေ အများကြီးရှိပြီး အနုပညာရှင်တွေကိုယ်စီမှာ သူတို့ ပရိသတ်တွေကို အိပ်မက်တွေ အောင်မြင်စေဖို့၊ အခက်အခဲတွေ အားလုံးကို ကျော်လွှား စေနိုင်ဖို့ တွန်းအားပေးနိုင်ကြပါတယ်။

အဲဒီထဲကမှ အိန္ဒိယနိုင်ငံ ရုပ်ရှင်လောကရဲ့ ထင်ရှားကျော်ကြားတဲ့ လေးစားအားကျဖွယ် ဘောလိဝုဒ် မင်းသမီး ၇ ဦး အကြောင်း ဧရာဝတီ စာဖတ်ပရိသတ်တွေ ဗဟုသုတအနေနဲ့ သိရှိနိုင်အောင် ရေးသားဖော်ပြ လိုက်ပါတယ်။

(၁) Sushmita Sen

ဘောလိဝုဒ် မင်းသမီး Sushmita Sen ဟာ မယ်စကြာဝဠာဆုကို ရရှိခဲ့တဲ့ ပထမဆုံးအိန္ဒိယ အမျိုးသမီး ဖြစ်ပါတယ်။ Sushmita ဟာ ၁၉၉၄ ခုနှစ်၊ အလှမယ်ရွေးပွဲ တခုမှာ အနိုင်ရရှိခဲ့ပြီး အဲဒီအချိန်ကစလို့ သူဟာ “စိတ်သာရှိမယ်ဆိုရင် အရာခပ်သိမ်း ပြီးမြောက်နိုင်တယ်” လို့ မိန်းကလေးတွေ အားလုံးကို ပြသနိုင်ခဲ့ပါတယ်။

ဘောလိဝုဒ် အနုပညာလုပ်ငန်းမှာ အောင်မြင်တဲ့ အနုပညာလုပ်ငန်းအပြင် သူဟာ လှပတဲ့ မိန်းကလေး နှစ်ယောက်ရဲ့ Single မိခင်တဦးလည်း ဖြစ်ပါတယ်။

(၂) Kangana Ranaut

Kangana Ranaut ဆိုတဲ့ နာမည်ကို ခေါ်လိုက်ချိန်တိုင်း ကျနော်တို့ နားထဲမှာ “လုပ်ပိုင်ခွင့်” ဆိုတဲ့ စကားလုံးကို ကြားလိုက်ရ သလိုပါပဲ။ Kangana ဟာ နိုင်ငံတော်အဆင့်မှာ “Queen” ရုပ်ရှင်နဲ့ အကောင်းဆုံး မင်းသမီးဆု၊ “Tanu Weds Manu Returns” ရုပ်ရှင်နဲ့ အကောင်းဆုံး မင်းသမီးဆု၊ “Fashion” ရုပ်ရှင်နဲ့ အကောင်းဆုံး ဇာတ်ပို့ဆု တို့လိုမျိုး ဆု ၃ ခုကို ရရှိပိုင်ဆိုင်နိုင်တဲ့ အမျိုးသမီးဟာ အိန္ဒိယနိုင်ငံမှာ သူတယောက်ပဲ ရှိပါတယ်။

သူဟာ “Gangster” ရုပ်ရှင်နဲ့ ပွဲဦးထွက်ခဲ့တာဖြစ်ပြီး A အဆင့်ရှိတဲ့ ဒါရိုက်တာတွေရဲ့ မျက်စိကျလောက်တဲ့ အကြည့်တွေ၊ သရုပ်ဆောင်မှုတွေကိုလည်း ပိုင်ဆိုင်ထားသူ ဖြစ်ပါတယ်။ သူ့ အနုပညာသက်တမ်း ၁၂ နှစ်အတွင်းမှာ အမျိုးမျိုးသော ရုပ်ရှင်တွေမှာ ပါဝင်ခဲ့ရပါတယ်။

မင်းသမီးဟာ အင်အားကောင်းကောင်းနဲ့ ဖျော်ဖြေမှုတွေကို ပေးနိုင်တယ်လို့ နာမည်ရှိရုံသာမက တချို့သော အငြင်းပွားမှု တွေမှာတောင် ရိုးသားတဲ့ အမြင်လည်းရှိသူ တယောက် ဖြစ်ပါတယ်။ ဒါပေမယ့် သူရပ်တည်နေတဲ့နေရာကို ယိမ်းယိုင် မသွားစေခဲ့ဘဲ လုပ်ပိုင်ခွင့်တွေ ရရှိခဲ့သူတယောက် ဖြစ်လာခဲ့ပါတယ်။

(၃) Aishwarya Rai Bachchan

Sushmita Sen နဲ့ တနှစ်တည်းမှာပဲ ဘောလိဝုဒ် မင်းသမီး Aishwarya Rai Bachchan ဟာ မယ်ကမ္ဘာဆုကို ရရှိခဲ့ပါတယ်။ ဘောလိဝုဒ် လောကကို ဝင်လာခဲ့ပြီးနောက် သူဟာ နောက်ဆုတ်ခဲ့ခြင်း မရှိခဲ့ဘဲ ဘောလိဝုဒ်ရဲ့ နာမည်အကျော်ကြားဆုံးနဲ့ လွှမ်းမိုးနိုင်မှု အရှိဆုံး နာမည်ကျော်ကြားသူ တယောက်အဖြစ် ထူထောင်နိုင်ခဲ့ပါတယ်။

သူ့နာမည်နဲ့ ဆုတွေ အောင်မြင်မှုတွေလည်း အများကြီး ရရှိထားပါတယ်။ ၂၀၀၃ ခုနှစ်မှာ သူဟာ ကိန်းစ်ရုပ်ရှင်ပွဲတော်မှာ ဂျူရီ အဖွဲ့ဝင်ဖြစ်လာတဲ့ ပထမဆုံး အိန္ဒိယမင်းသမီး ဖြစ်ခဲ့ပါတယ်။ သူဟာ UNAIDS အဖွဲ့ရဲ့ Goodwill Ambassador လည်း ဖြစ်ပါတယ်။

၂၀၀၉ ခုနှစ်မှာ သူဟာ အိန္ဒိယ အစိုးရက ချီးမြှင့်တဲ့ စတုတ္တအမြင့်ဆုံး အိန္ဒိယပြည်သူ့ဆု ဖြစ်တဲ့ Padma Shri ဆုကိုလည်း ရရှိခဲ့ပါတယ်။ သူ့ရဲ့ ပရဟိတလုပ်ငန်းတွေနဲ့ အနုပညာလုပ်ငန်းတွေကြောင့် အိန္ဒိယကို ဂုဏ်တက်အောင် လုပ်နိုင်ရုံသာမက ကမ္ဘာတဝန်းက အမျိုးသမီးတွေရဲ့ လေးစားအားကျဖွယ် ပုဂ္ဂိုလ်တယောက်လည်း ဖြစ်ပါတယ်။

(၄) Deepika Padukone

ဘောလိဝုဒ် မင်းသမီး Deepika Padukone ကတော့ မင်းသား Shah Rukh Khan နဲ့အတူ “Om Shanti Om” ဆိုတဲ့ ရုပ်ရှင်မှာ သရုပ်ဆောင် ပွဲထွက်လိုတဲ့ အိပ်မက်ရှိသူတွေထဲက ကံကောင်းသူတယောက် ဖြစ်ပါတယ်။ အဲဒီရုပ်ရှင်နဲ့ပဲ ၂၀၀၇ ခုနှစ်မှာ Filmfare Best Female Debut ဆုကို ရရှိခဲ့ပါတယ်။

ဒါပေမယ့် အဲဒီဆုဟာ သူ့ရဲ့ အောင်မြင်မှု ပထမဆုံး အသီးအပွင့်တင် မဟုတ်ပါဘူး။ Padukone ဟာ အမျိုးသားအဆင့် ကြက်တောင် အားကစားသမား Prakash Padukone ရဲ့ သမီး တဦးလည်းဖြစ်ပြီး အနုပညာလုပ်ငန်းထဲ မရောက်ခင် အမျိုးသားအဆင့် အားကစားသမားတယောက် ဖြစ်ခဲ့သူပါ။

သူဟာ “Cocktail” ရုပ်ရှင်မှာ အချစ်ဇာတ်လမ်းထက် ပိုလုပ်နိုင်ပြနိုင်ခဲ့ပါတယ်။ ရုပ်ရှင်ဒါရိုက်တာတိုင်းက လိုချင်ကြတဲ့ မင်းသမီးတလက် ဖြစ်လာခဲ့တဲ့သူဟာ အိန္ဒိယနိုင်ငံမှာ စိတ်ပိုင်းဆိုင်ရာ စောင့်ရှောက်ကူညီမှုတွေ ပေးဖို့ ၂၀၁၅ ခုနှစ်မှာ ဖောင်ဒေးရှင်းတခုကို ထူထောင်ခဲ့ပါတယ်။

(၅) Priyanka Chopra

၂၀၀၀ ပြည့်နှစ်မှာ ဘောလိဝုဒ် မင်းသမီး Priyanka Chopra ဟာ Aishwarya Rai Bachchan ပြီးတဲ့နောက် မယ်ကမ္ဘာသရဖူကို အိန္ဒိယနိုင်ငံဆီ သယ်ဆောင်နိုင်ခဲ့သူ တဦး ဖြစ်ပါတယ်။ အဲဒီနောက် ဘောလိဝုဒ် အနုပညာလောကဘက်ကို ခြေဦးလှည့်ခဲ့ပြီး နာမည်ကျော် တယောက် ဖြစ်လာခဲ့ပါတယ်။

သူ့ရဲ့ ရုပ်ရှင်တွေဟာ နှလုံးသားတွေကို ဖမ်းစားနိုင်ရုံသာ မကဘဲ သူ့ရဲ့ ပရဟိတလုပ်ငန်းတွေလည်း အားကျဖွယ်ရာ ဖြစ်ပါတယ်။ ရုပ်ရှင်လုပ်ငန်းမှာ လိင်ကွဲပြားမှုကို တံတားထိုးပေးနိုင်တဲ့ သူတယောက်ဖြစ်ပြီးတော့ အနုပညာကြေး အမြင့်ဆုံး မင်းသမီး တလက်လည်း ဖြစ်ပါတယ်။

ဒါ့အပြင် သူဟာ ဂီတလုပ်ငန်းဖက် ခြေဦးလှည့်ခဲ့ပြီး နိုင်ငံတကာ အဆိုတော်တွေနဲ့အတူ သီချင်း ၃ ပုဒ် ဖြန့်ချိခဲ့ပါတယ်။ ၂၀၁၆ ခုနှစ်မှာ သူဟာ အိန္ဒိယအစိုးရက ချီးမြှင့်တဲ့ “အမြင့်ဆုံး ပြည်သူ့ဆု” Padma Shri ကို ရရှိခဲ့ပါတယ်။ လက်ရှိမှာတော့ သူဟာ အနောက်နိုင်ငံ ရုပ်ရှင်လောကမှာ ကျင်လည်နေပြီး အမေရိကန်နိုင်ငံက ရုပ်သံ ဒရာမာဇာတ်လမ်းတွဲ တခုမှာ ပါဝင်တဲ့ ပထမဆုံး ဘောလိဝုဒ်မင်းသမီး ဖြစ်လာခဲ့ပါပြီ။

(၆) Anushka Sharma

အသက် ၂၉ နှစ်အရွယ်၊ ဘောလိဝုဒ် မင်းသမီး Anushka Sharma ဟာ သူ ငယ်စဉ်ဘဝကတည်းက ရုပ်ရှင်မျိုးစုံမှာ ပါဝင်ခဲ့ပြီး အဲဒီအထဲက ရုပ်ရှင် ၃ ခုကို သူ့ကိုယ်ပိုင် ထုတ်လုပ်ရေး ကုမ္ပဏီက ထုတ်လုပ်ခဲ့တာပါ။ Deepika လိုပဲ Anushka ဟာ “Rab Ne Bana Di Jodi” ရုပ်ရှင်မှာ Shah Rukh Khan နဲ့ အတူ ပွဲဦးထွက်ခွင့် ရရှိခဲ့သူ ဖြစ်ပါတယ်။ သူဟာ အလုပ်တခုကို နောက်ဆံ မတင်းဘဲ လုပ်တတ်တဲ့ မင်းသမီးတဦးလည်း ဖြစ်ပါတယ်။

သူ့ရဲ့ အနုပညာ သက်တမ်းတလျှောက်မှာ မအောင်မြင်ခဲ့တဲ့ ရုပ်ရှင်တွေ ရှိခဲ့ပေမယ့်လည်း မင်းသမီးဟာ ကြယ်တပွင့်လို တောက်ပနေဆဲ ဖြစ်ပါတယ်။ အိန္ဒိယ ခရစ်ကတ်အသင်း ခေါင်းဆောင် Virat Kohil နဲ့ သူ့အရှိန်အဝါ အကြီးဆုံး အချိန်မှာ လက်ထပ်ခဲ့ပြီးနောက် Anushka က လက်ထပ်ခြင်းဟာ ဘောလိဝုဒ် အနုပညာရှင်တယောက်ရဲ့ အဆုံးသတ် မဟုတ်ဘူး ဆိုတာ သက်သေပြခဲ့ပါတယ်။

(၇) Sunny Leone

မင်းသမီး Sunny Leone ကတော့ အိန္ဒိယ လူမှုအသိုက်အဝန်းမှာ လက်ခံလောက်ဖွယ် မရှိတဲ့ မိသားစု နောက်ခံကနေ မွေးဖွား လာခဲ့သူလို့ ဆိုပေမယ့် ကိုယ့်ကိုကိုယ် ယုံကြည်မှုနဲ့ အခွင့်အရေးအတွက် အကင်းပါးမှုတို့ ပိုင်ဆိုင်ထားပါတယ်။ သူဟာ “Bigg Boss Season 5” ကနေ တဆင့် အိန္ဒိယအနုပညာ ရပ်ဝန်းထဲကို ပထမဆုံး ဝင်ရောက်ခဲ့သူ ဖြစ်ပါတယ်။

အရွယ်ရောက်တဲ့ စတားတယောက်ရဲ့ ပုံရိပ်ကို ပြောင်းလဲဖို့ ဆိုတာထက် သူ့အတိတ်က အလုပ်အကိုင်ကို လက်ခံဖို့ ဘယ်တုန်းကမှ ရှက်ရွံ့ခြင်း မရှိခဲ့ပါဘူး။ ၂၀၁၂ ခုနှစ်မှာ Sunny ဟာ ဘောလိဝုဒ် အနုပညာလောကထဲကို “Jism 2” ရုပ်ရှင်နဲ့ ဝင်ရောက်ခဲ့တာဖြစ်ပြီး နောက်ခံတေးတွေအထိ ဝင်ဆိုခဲ့တဲ့ “Ragini MMS”, “Jackpot” နဲ့ “Raees” ရုပ်ရှင်တွေ အထိ သရုပ်ဆောင်ခဲ့သူ ဖြစ်ပါတယ်။

ဒါ့အပြင် Sunny နဲ့ သူ့ခင်ပွန်းဖြစ်သူ Daniel တို့ဟာ ကိုယ်ရေးကိုယ်တာ သမိုင်းမှတ်တိုင်တွေလည်း ဖြတ်ကျော်နိုင်ခဲ့ ကြပါတယ်။ သူတို့ နှစ်ယောက်ဟာ Latur ဆီကနေ မွေးစားထားတဲ့ Nisha Kaur Weber ဆိုတဲ့ မိန်းကလေးတဦးရဲ့ မိဘတွေလည်း ဖြစ်ပါတယ်။

သူတို့နှစ်ဦးရဲ့ သွေးသားဖြစ်တဲ့ အမြွှာရင်သွေးလေး ၂ ဦးကိုလည်း ရရှိခဲ့ပါတယ်။ မြီးကောင်ပေါက် စတား တယောက်ကနေ မင်းသမီးတလက် အဲဒီကနေ စီးပွားရေး လုပ်ငန်းရှင် အမျိုးသမီး၊ ပြီးတော့ ဇနီးတဦး၊ အဲဒီကနေ ကလေး ၃ ဦး မိခင် အဖြစ် လေးစားကျစရာ အမျိုးသမီးတဦး ဖြစ်ပါတယ်။

Ref ; indiatimes

The post အိန္ဒိယနိုင်ငံမှ ထင်ရှားကျော်ကြားတဲ့ လေးစားအားကျဖွယ် ဘောလိဝုဒ် မင်းသမီး ၇ ဦး appeared first on ဧရာဝတီ.