“Victoria Beckham, Mel B, Mel C, Geri Horner နဲ့ Emma Bunton” တို့နဲ့ ဖွဲ့စည်းထားတဲ့ ကမ္ဘာကျော် Spice Girls အဖွဲ့ဟာ ဒီနှစ်နွေရာသီမှာ သူတို့ရဲ့ ပြပွဲတခုကို ပြုလုပ်ကျင်းပတော့မှာ ဖြစ်ပါတယ်။
တခေတ်တခါက နာမည်ကျော်ခဲ့တဲ့ Spice Girls အဖွဲ့ဟာ အကြီးမားဆုံး မိန်းကလေးအဖွဲ့တခုအဖြစ် သတ်မှတ်ခံထားရပြီး သူတို့ရဲ့ အောင်မြင်ခဲ့တဲ့ အနုပညာ ခြေလှမ်းတွေကို ဂုဏ်ပြုတဲ့အနေနဲ့ ဇူလိုင်လ ၂၈ ရက်နေ့ကနေ သြဂုတ်လ ၂၀ ရက်နေ့ အထိ အင်္ဂလန်နိုင်ငံ၊ လန်ဒန်မြို့၊ Angel Islington မှာရှိတဲ့ Business Design Centre စင်တာမှာ အထူးပြပွဲတခုကို ကျင်းပပြုလုပ်တော့မှာ ဖြစ်ပါတယ်။
“#SpiceUpLondon – The Spice Girls Exhibition” လို့ အမည်ပေးထားတဲ့ အဲဒီပြပွဲမှာဆိုရင် ၁၉၉၀ ပြည့်လွန်နှစ် တွေက သူတို့အဖွဲ့ပထမဆုံး ဝတ်ဆင်ခဲ့ပြီး အများပြည်သူရှေ့မှောက် ချမပြခဲ့ရတဲ့ ဝတ်စုံတချို့ အပါအဝင် သူတို့အဖွဲ့ရဲ့ အထင်ကရ ဖြစ်ခဲ့တဲ့ ရာနဲ့ချီတဲ့ ဝတ်စုံတွေနဲ့အတူ အမှတ်တရ ပစ္စည်းတွေများစွာ ခင်းကျင်းပြသသွားမှာ ဖြစ်ပါတယ်။ ဒါ့အပြင် ကမ္ဘာတဝန်းက ရှားပါပြီး မြင်တွေ့နိုင်ဖို့ ခဲယဉ်းတဲ့ အဖွဲ့နဲ့သက်ဆိုင်တဲ့ ကုန်ပစ္စည်းတချို့ကိုလည်း ပြပွဲမှာ ပြသသွားဦးမယ်လို့ ဆိုပါတယ်။
“ဂရင်းနစ်စံချိန်ပိုင်ရှင် Liz West အပါအဝင် ကမ္ဘာတဝန်းမှ ဒီဇိုင်နာတွေနဲ့ Spice Girls ပစ္စည်း စုဆောင်းသူတွေနဲ့ ကျနော်တို့ ပူးပေါင်းခဲ့ပါတယ်။ အခြားသူတွေနဲ့အတူ ဒီလိုစွဲလမ်းမှုကို ဝေမျှရတာ သိပ်ကိုအံ့ကြာင်းပြီး အထင်ကရဖြစ်တဲ့ Spice Girls သမိုင်း စုစည်းမှုကို ဖန်တီးဖို့ အထက်ပါ ပုဂ္ဂိုလ်တွေက ခွင့်ပြုပေးခဲ့တာပါ။ #SpiceUpLondon ပြပွဲကိုလုပ်ဖို့ အချိန်တော်တော်ကြာခဲ့ပါတယ်”
“ဒါပေမယ့် ကျနော့် မျှော်လင့်ချက်တွေက တဖြည်းဖြည်းကြီးထွားလာခဲ့ပါတယ်၊ ဒီပြပွဲရဲ့ အကျိုးအမြတ်က တော်တော်လေး များပြားပါတယ်။ ကျနော်တို့ ဘာတွေ ရရှိမှာလဲဆိုတာ ပြသဖို့ မစောင့်နိုင်တော့ပါဘူး။ လန်ဒန်ပြပွဲဟာ အကြီးမားဆုံး ဂီတပြပွဲကြီး တခုလို ပုံစံဖြစ်ပြီးတော့ နေ့တိုင်းမှာလည်း အခမ်းအနားအသစ်တွေ ပြသမှုအသစ်တွေနဲ့ ဆက်လက်ဖြည့်စွက် သွားပေးဦးမှာပါ” လို့ ပွဲစီစဉ်သူနှင့် ထိန်းသိမ်းရေးမှူး Alan Smith-Allison က ပြောပါတယ်။
ပြပွဲမှာ ပြသထားမယ့် အမှတ်တရ ပစ္စည်းထဲမှာဆိုရင်တော့ ထိပ်ဆုံးမှာပါဝင်တဲ့အရာက ၁၉၉၉ ခုနှစ်မှာ အရမ်းကို အောင်မြင်ခဲ့တဲ့ “Spice World: The Movie” ရုပ်ရှင်မှာ ပါဝင်ခဲ့တဲ့ အထင်ကရ Spice Bus ပဲဖြစ်ပါတယ်။ အဲဒီကားကို ပြပွဲ အဝင်အဝမှာ ထားရှိမှာ ဖြစ်ပါတယ်။ အဲဒီရုပ်ရှင် ရိုက်ကူးခဲ့ပြီးနောက် အဲဒီကားကြီးကို နှစ်ပေါင်းများစွာကြာ ပစ်ထားခဲ့ပြီး လက်ရှိပိုင်ရှင်တွေက ကားကြီးရဲ့ ဂုဏ်ကျက်သရေကို ပြန်လည် ထိန်းသိမ်းဖို့ ထိန်းသိမ်းရေးလုပ်ငန်းတွေကို အခု ဆောင်ရွက် နေကြပြီ ဖြစ်ပါတယ်။
ပရိသတ်တွေကလည်း #RefurbTheBus ကမ်ပိန်းမှာ ပါဝင် လှူဒါန်းခြင်းနဲ့ သမိုင်းဝင် ပြုပြင်ထိန်းသိမ်းရေး အစီအစဉ်မှာ တစိတ်တပိုင်းအဖြစ် ပါဝင်နိုင်ပါတယ်။ အဲဒီပြပွဲအတွက် လက်မှတ်တွေက တစောင်ကို စတာလင်ပေါင် ၁၀ ပေါင်နှုန်းနဲ့ ရောင်းချပေးနေပြီ ဖြစ်ပါတယ်။
ဆက်စပ် သတင်းလင့်ခ် – Spice Girls အဖွဲ့ ပြန်လည် ပေါင်းစည်းမှုမှာ Victoria Beckham ပါဝင်မည် မဟုတ်
Ref; contactmusic
The post Spice Girls အဖွဲ့ရဲ့ နာမည်ကျော် ဝတ်စုံများနဲ့ အထင်ကရ ပစ္စည်းများ ပြသမည့်ပွဲ appeared first on ဧရာဝတီ.