မကြာခင်မှာ ရောက်ရှိလာတော့မယ် မြန်မာ့နှစ်သစ်ကူးအခါသမယ အတာသင်္ကြန်မှာ ပရိသတ်တွေ ချစ်ကြတဲ့ အနုပညာရှင်တွေ ဘယ်မှာ ရှိကြမလဲ၊ ဘာလုပ်ကြမလဲ ဆိုတာကို သိချင်ကြမယ်ထင်ပါတယ်။
ဒါကြောင့် နိုင်ငံကျော် အဆိုတော်များ ဖြစ်ကြတဲ့ အဆိုတော် မေခလာ ၊ ဖြူဖြူကျော်သိန်း၊ ဖြိုးပြည့်စုံ၊ အောင်ထက်၊ ဆိုဖီယာ၊ လိမ္မော်သီးတို့ သင်္ကြန်ဘယ်မှာရှိမလဲ ၊ဘယ်လို အစီအစဉ်တွေ ဖြတ်သန်းသွားမလဲ၊ သင်္ကြန်အကြောင်းနဲ့ အတူ သူတို့ပြောတဲ့ နှစ်သစ်ဆုမွန်ကောင်း စကားများကို ဧရာဝတီ စာဖတ် ပရိသတ်တွေ အတွက် ရေးသားဖော်ပြ လိုက်ပါတယ်။
ဖြူဖြူကျော်သိန်း
သင်္ကြန်ကျရင် ဘားအံက ချစ်သူမြိုင် သင်္ကြန်မဏ္ဍပ်မှာ ရှိပါမယ်။ သင်္ကြန် ၄ ရက်လုံးပါ။ သင်္ကြန်ဆိုရင် ရောင်စုံဖက်ရှင်ပေါ့။ နှစ်တိုင်းဆိုရင် အကျီင်္လေးတွေကို ရောင်စုံဝတ်လေ့ရှိတယ်။ ဒီနှစ်မှာတော့ သင်္ကြန်သီချင်းအနေနဲ့ ထွက်ဖို့ မရှိပါဘူး။ တချို့ သီချင်းလေးဖျော်ဖြေမှုပုံစံလေးတွေတော့ ပြောင်းသွားဖို့ ရှိတယ်။ ကိုယ့်သီချင်းတွေကိုပဲ EDM ပုံစံ Rave လုပ်လို့ ရမယ့်ပုံစံ ပြောင်းပြီးတော့ Rave ချင်တဲ့ပရိသတ်တွေအတွက် သီချင်းတွေကို ဗားရှင်းအသစ်လေးတွေနဲ့ လုပ်ဖို့ ရှိပါတယ်။
သင်္ကြန်ကို အဆိုတော်အနေနဲ့ ဖြတ်သန်းရတာ အကြိုက်ဆုံးပဲ။ သီချင်းဆိုရတယ်လေ။ သီချင်းဆိုရတာ ဘဝမှာ အပျော်ဆုံး ဆိုတော့လေ။ နှစ်သစ်မှာ ပရိသတ်ကြီး စိတ်ချမ်းသာပါစေ။ ကျန်းမာပါစေ။ လိုအင် ဆန္ဒတွေပြည့်ဝပါစေလို့ ဆုတောင်းပေး ပါတယ်။
မေခလာ
ချစ်ငယ် ဒီနှစ်သင်္ကြန်ကတော့ ထားဝယ်မှာပါ။ ချစ်ငယ် နှစ်ကိုယ်ခွဲရမယ်။ ဘာဖြစ်လို့လဲ ဆိုတော့ နေပြည်တော်ကလည်း ပြောထားတာကြာပြီ။ ထားဝယ်လည်း ပြောထားတာကြာပြီ။ ဒါပေမယ့် အခုတော့ ထားဝယ်က သေချာသွားပါပြီ။ ထားဝယ်က ကျွန်းတွေကိုလည်း သွားချင်တဲ့အတွက် ထားဝယ်ကို လက်ခံဖြစ်ခဲ့တာပါ။
မကြာခင်မှာ နှစ်သစ် ရောက်တော့မယ်။ မြန်မာတွေရဲ့ New Year ပေါ့။ တကယ့် New Year ပါ။ Happy New year ပါ။ မြန်မာနှစ်သစ်ကူးမှာ အားလုံးသော ၇ ရက် သားသမီးတွေ စီးပွားဥစ္စာ တိုးတက်ပါစေ။ နောက်ပြီးတော့ ကပ်ကြီးတွေနဲ့ မကြုံတွေ့ပါစေနဲ့လို့ ဆုတောင်းပေးပါတယ်နော်။ မြန်မာပြည်သားအားလုံးကို ချမ်းသာစေချင်တယ်။
ဖြိုးပြည့်စုံ
ဒီနှစ်ကတော့ ရန်ကုန်မြို့မှာပဲ ၁၉လမ်းက MNTV မဏ္ဍပ်မှာ သီချင်းဆိုရင်းဖြတ်သန်းမယ်။ ကျနော်ကတော့ သင်္ကြန် မတိုင်ခင်က သင်္ကြန်လေညင်း လုလင် အခွေထွက်ထားတယ်။ မြန်မာ့ရိုးရာ အတာသင်္ကြန်ဆိုတာက ဘယ်လိုပြောမလဲ ခရစ်သက္ကရာဇ် ကုန်ရင်တောင် ကျနော်တို့တွေ ပျော်ကြ ကဲကြသေးတာ ဒါတောင် ကိုယ့်ရဲ့ မူရင်းသက္ကရာဇ် မဟုတ်ဘူး။
တနှစ်ကနေ တနှစ် ကူးပြောင်းတော့မယ့် မြန်မာ့ရိုးရာ အတာသင်္ကြန်မှာ အစဉ်အလာအရ ရေလောင်းရေပက်တယ်။ ရေဆိုတဲ့ သဘော သဘာဝအရ အေးချမ်းတယ်။ ကြည်လင်တယ်။ ကျနော်လည်း ဒီဆန္ဒလေးနဲ့ပဲ ဆုတောင်းပေးချင်ပါတယ်။ နှစ်စဉ် ရေသွန်းလောင်းကြသလိုပဲ တဦးပေါ်တဦး အေးချမ်းခြင်းတွေ ကြည်လင်ခြင်းတွေပဲ ပေးစွမ်းနိုင်ကြပါစေ ရကြပါစေလို့ ဆုတောင်းပေးလိုက်ပါတယ်။ နှစ်သစ်မှာ ပျော်စရာကောင်းတဲ့ နေ့ရက်များကို ပိုင်ဆိုင်နိုင်ကြပါစေလို့ ဆုတောင်း ပေးလိုက်ပါတယ်။
ဆိုဖီယာ
သင်္ကြန်မှာတော့ Sky Net MNTV မဏ္ဍပ်မှာရှိပါမယ်။ သီချင်းတွေကတော့ ညီမဆိုနေကျအတိုင်းပဲ သီချင်း အမြူးလေးတွေ ဆိုဖို့ရှိပါတယ်။ ပါဖောမန့် အသစ်တွေလုပ်သွားဖို့ရှိပါတယ်။ နှစ်သစ်မှာ ပရိသတ်တွေ ပျော်ရွှင်ပါ စေလို့ ပြောချင်ပါတယ်။
လိမ္မော်သီး
သင်္ကြန် ၄ရက်လုံးကို မင်းဓမ္မလမ်းမှာ အင်ပါယာတီးဝိုင်းနဲ့ရှိပါမယ်။ သင်္ကြန်ဆိုရင် ပေါ့ပေါ့ပါးပါးနဲ့ Rock ဆန်တဲ့ ဒီဇိုင်းလေးတွေ ဝတ်ဖြစ်ပါတယ်။ နှစ်တိုင်းက အလုပ်လုပ်ရင်းနဲ့ဖြတ်သန်းရတာဆိုတော့ အလုပ်လုပ်ရင်းနဲ့ ဖြတ်သန်း ရတာကို သဘောကျတယ်။ သင်္ကြန်ဆိုတာက မြန်မာ့နှစ်သစ်ကူး အချိန်အခါဖြစ်တယ်။ အစ်မတို့ အဆိုတော်တွေ အနေနဲ့က ဒီရက်တွေက သီချင်းဆိုရတဲ့နေ့တွေ ဖြစ်တယ်။ သင်္ကြန်ဆိုတာက အမအတွက် နှစ်တိုင်းကတော့ ရင်ခုန်စရာပါပဲ။ နှစ်သစ်မှာ အားလုံးပဲ စီးပွားရေးတွေ တိုးတက်ပြီး ကျန်းမာပျော်ရွှင် အန္တရာယ်ကင်းကြပါစေလို့ ဆုတောင်းပေးပါတယ်။
အောင်ထက်
သင်္ကြန်ကို ရန်ကုန်မှာပဲ ရှိပါမယ်။ မြန်မာ့နှစ်သစ်ကူးမှာ ပရိသတ်များ အားလုံးပဲ စီးပွားရေးတွေ တိုးတက်ကြပါစေ။ ဝန်ထမ်းတွေလည်း လစာတွေ အများကြီး ရကြပါစေ။ စာမေးပွဲဖြေထားတဲ့ ကျောင်းသား ၊ ကျောင်းသူတွေလည်း အောင်မြင်မှု တွေရရှိပြီး လိုရာပန်းတိုင်ကို ရရှိကြပါစေလို့ ဆုတောင်းပေးပါတယ်။
သင်္ကြန်မှာဆိုရင် ကျနော်ကတော့ သင်္ကြန်လိုမျိုး ပဲ ပျော်ပျော်ရွှင်ရွှင် ဖြတ်သန်းရတာကို သဘောကျတယ်။ အခုဆိုရင် အဆိုတော်ဖြစ်ပြီး တဲ့နောက်မှာ စင်ပေါ်ကနေ ပရိသတ်တွေကို ပျော်ရွှင်အောင်လုပ်ပေးရတာကို သဘောကျပါတယ်။
The post သင်္ကြန်မှာ သူတို့ ဘယ်မှာရှိမလဲ၊ ဘာတွေ လုပ်မလဲ appeared first on ဧရာဝတီ.