အဆိုတော် Demi Lovato ဟာ ပြီးခဲ့တဲ့ သီတင်းပတ်ကုန်ပိုင်းမှာ လန်ဒန်မြို့မှာရှိတဲ့ O2 Arena မှာကျင်းပမှာ ဖျော်ဖြေပွဲကို ဖျက်သိမ်းလိုက်ရပြီးနောက် သူ့ရဲ့ ပရိသတ်တွေထံ တောင်းပန်စကားဆိုလိုက်ပြီး သူအရမ်း နေမကောင်းဖြစ်နေတဲ့ အကြောင်းလည်း ပြောကြားလိုက်ပါတယ်။
အသက် ၂၅ နှစ်အရွယ်၊ အမေရိကန် အဆိုတော် Demi Lovato ဟာ ပြီးခဲ့တဲ့ ဇွန်လ ၁ဝ ရက်နေ့မှာ ဖျော်ဖြေပွဲ ပြုလုပ်ဖို့ စီစဉ် ထားခဲ့ပေမယ့် အနားမယူရင် သူ့အတွက် ထိခိုက်နိုင်တဲ့ အသံကြိုး ရောင်ရမ်းမှု ဝေဒနာကြောင့် အနားနီးမှ ကပ်ပြီး ဖျက်သိမ်းခဲ့ရပါတယ်။
အဆိုတော် Demi က “အရမ်းကို နေမကောင်းဖြစ်နေတာရယ် နား၊ နှာခေါင်း၊ လည်ချောင်းဆရာဝန်ရဲ့ စမ်းသပ်ထားတဲ့ အသံကြိုး ရောင်ရမ်းမှုရယ်ကြောင့် O2 မှာ ပြုလုပ်မယ့် ကျမရဲ့ ဖျော်ဖြေပွဲကို ရွှေ့ဆိုင်းလိုက်ရတဲ့အတွက် ဖြစ်လာတဲ့ ကြေကွဲဝမ်းနည်းမှု မျက်ရည်တွေ ကြားကနေ ဒီစာကို ရေးသားလိုက်တာပါ” လို့ ပရိသတ်ထံ ပြောကြားခဲ့ပါတယ်။ သူဟာ စင်ပေါ်တက်ခါနီး တနာရီလောက် အလိုကျမှ ဖျော်ဖြေပွဲကို ရွှေ့ဆိုင်းလိုက်ရတာ ဖြစ်ပါတယ်။
တကယ်လို့များ အဲဒီညမှာ ဖျော်ဖြေခဲ့မယ်ဆိုရင် အသံကြိုးတွေ ထိခိုက်ရမှာဖြစ်ပြီး ကျန်ရှိတဲ့ ဖျော်ဖြေပွဲ ရက်တွေကိုလည်း ဖျက်သိမ်းရနိုင်ချေရှိတဲ့အကြောင်းလည်း ပြောဆိုထားပါတယ်။
သူက “ကားတွေ၊ လေယာဉ် တွေနဲ့ နာရီပေါင်းများစွာမှ ရောက်လာခဲ့တဲ့ လန်ဒန်မြို့က ကျမရဲ့ ပရိသတ်တွေကို စိတ်ပျက် စေမိလို့ အရမ်း တောင်းပန်ပါတယ်၊ ပြီးတော့ သူတို့ရဲ့မွေးနေ့တွေ၊ အားလပ်ရက်တွေနဲ့ အထူးအချိန်အခါ တွေအတွက် လက်မှတ်တွေ ဝယ်ယူထားတဲ့ ပရိသတ်တွေ အားလုံးကိုလည်း တောင်းပန်ပါတယ်” လို့ ပြောဆိုခဲ့ပါတယ်။
အခုဖျော်ဖြေပွဲကိုတော့ ဇွန်လ ၂၅ ရက်နေ့အထိ သီတင်းပတ် အနည်းငယ်အကြာ ရွှေ့ဆိုင်းလိုက်ရတာ ဖြစ်ပါတယ်။ သူ့ရဲ့ နောက်ထပ်ပြုလုပ်မယ့် ဖျော်ဖြေပွဲကို ဇွန်လ ၁၂ ရက်နေ့ ညပိုင်းမှာပြုလုပ်ဖို့ စီစဉ်ထားပေမယ့် အဲဒီ့ပွဲကိုလည်း ဇွန် ၂၉ ရက်နေ့ အထိ ရွှေ့ဆိုင်းလိုက်ရပါတယ်။
အဆိုတော် Demi ဟာ လက်ရှိမှာ “Tell Me You Love Me” ကမ္ဘာလှည့်ဖျော်ဖြေပွဲ ဥရောပခရီးစဉ်ကို ရောက်ရှိနေတာပါ။ ဒါ့အပြင် ဂလက်စကိုမြို့၊ နယူးကာဆယ်မြို့နဲ့ မန်ချက်စတာမြို့တို့မှာ ဆက်တိုက်ပြုလုပ်သွားမယ့် ဖျော်ဖြေပွဲတွေရဲ့ အခြေအနေကိုလည်း မသိရသေးပါဘူး။
Facebook မှာ ဖော်ပြထားတဲ့ သတင်းစကားမှာတော့ “ပရိသတ်တွေရဲ့ဝမ်းနည်းကြေကွဲမှုကို သိရှိနားလည်ပြီး မဖြစ်မနေ လုပ်ဆောင်လိုက်လို့သာ ဒီကိစ္စကို လုပ်ဖြစ်သွားတာ ဖြစ်ကြောင်း” ပြောကြားပြီး စာကို အဆုံးသတ်ထားပါတယ်။ ရွှေ့ဆိုင်း လိုက်တဲ့ ဖျော်ဖြေပွဲလက်မှတ် ဝယ်ထားတဲ့သူတိုင်းအတွက် မက်ဒရစ်နဲ့ Rock In Rio မြို့တို့ ပြီးတဲ့နောက် ဇွန်လ ၂၅ ရက် နေ့မှာ ပြုလုပ်မယ့် ဖျော်ဖြေပွဲမှာ ပြန်လည် ဆုံစည်းချင်ပါကြောင်း ပြောဆိုထားပါတယ်။
Ref: contactmusic
The post ကျန်းမာရေးကြောင့် ဖျော်ဖြေပွဲ ဖျက်သိမ်းလိုက်ရတဲ့ အဆိုတော် Demi Lovato appeared first on ဧရာဝတီ.