ဒီတခါမှာတော့ IMDB rating (7.5) ရရှိထားတဲ့ Crime Drama အမျိုးအစား ဇာတ်ကားကောင်းလေးတကားနဲ့ မိတ်ဆက်ပေးချင်ပါတယ်။ ဒီဇာတ်ကားကိုတော့ နာမည်ကြီး ဖက်ရှင်ဒီဇိုင်နာ ဒါရိုက်တာ Tom Ford ကရိုက်ကူး ထားတာဖြစ်ပြီး မင်းသား Jake Gyllenhaal နဲ့ မင်းသမီး Amy Adams တို့အပါအဝင် မင်းသားကြီး Michael Shannon တို့က အဓိက ပါဝင်သရုပ်ဆောင်ထားပါတယ်။
ဒီဇာတ်ကားဟာ စာရေးဆရာ Austin Wright ရဲ့ “Tony and Susan” ဆိုတဲ့ ဝတ္ထုကို ပြန်လည်ရိုက်ကူးထားတာပဲ ဖြစ်ပါတယ်။
ဇာတ်လမ်းအကျဉ်းကတော့ အနုပညာပြခန်းတခုရဲ့ ပိုင်ရှင်ဖြစ်သူ Susan (ဆူဆန်) ရဲ့အိမ်ကို ပါဆယ်ထုပ် တခု ရောက်နေပြီး ဖွင့်ကြည့်လိုက်တဲ့ အခါ ခင်ပွန်းဟောင်းဖြစ်သူ Edward ကနေ သူမဖတ်ဖို့ပို့ပေးလိုက်တဲ့ ဝတ္ထုစာမူကြမ်း တပုဒ်ပဲ ဖြစ်ပါတယ်။ စာမူကြမ်းရဲ့နာမည်က “Nocturnal Animals” လို့ အမည်ရပြီး စာအုပ်အဖုံးမှာတော့ “For Susan” (ဆူဆန် အတွက်) လို့ ရေးသားထားပါတယ်။
အနှစ် ၂၀ ကျော်ကြာ ဘာအဆက်အသွယ်မှ မလုပ်ခဲ့တဲ့ ခင်ပွန်းဟောင်းဖြစ်သူက ပို့ပေးလိုက်တဲ့ စာမူကြမ်းကို မဖတ်ချင်ပေမယ့် တယောက်တည်း အထီးကျန်နေတဲ့ သူမအဖို့တော့ ဒီစာမူကြမ်းကို ဖတ်ဖို့ကလွဲပြီး ဘာမှ ရွေးချယ်စရာ မရှိခဲ့ပါဘူး။
ဒီမှာတင်ပဲ စာအုပ်ထဲက ဇာတ်လမ်းက စပါတော့တယ်။ ဟေးစတင်းဟာ မိန်းမ၊ သမီးဖြစ်သူတို့နဲ့ မိသားစု ၃ ယောက်တို့ ကားမောင်းပြီး တက္ကဆက်ပြည်နယ်ကို ထွက်လာတဲ့လမ်းမှာ အမူးသမားတချို့နဲ့ဆုံပြီး ပြဿနာ ရှာခံခဲ့ရပါတယ်။ အမူးသမားတွေဟာ ကားမှန်တွေကို ရိုက်ခွဲပြီး သမီးဖြစ်သူနဲ့ မိန်းမဖြစ်သူတို့ကို ဖမ်းဆီးခေါ်သွားပြီး ဟေးစတင်းကိုလည်း ကားတစီးနဲ့ သက်သက်ခွဲပြီး ခေါ်သွားရာကနေ ဟေးစတင်းကတော့ လမ်းမှာတင်ပဲ ထွက်ပြေး လွတ်မြောက်သွားပါတယ်။
မိန်းမနဲ့သမီးဖြစ်သူကို ရှာဖို့ပဲအားသန်နေတဲ့ ဟေးစတင်းကို အမူးသမားတွေကလည်း ပိုက်စိတ်တိုက် ရှာဖွေနေတဲ့ ဇာတ်ဝင်ခန်းကို ဖတ်ရှုနေတဲ့ Susan တယောက်ကတော့ စာအုပ်ဖတ်ရင်းနဲ့ ကယောင်ချောက်ချား ဖြစ်နေပါတော့တယ်။
စာအုပ်ထဲက ဇာတ်ကောင် ဟေးစတင်းနဲ့အတူ သူမကပါ လိုက်လံခံစားနေရပြီးတော့ စာအုပ်ထဲကဇာတ်လမ်းနဲ့ အပြင်က Susan တို့ရဲ့ဇာတ်လမ်းတို့ကို ဒါရိုက်တာက တပြေးညီ ပုံစံ ရိုက်ပြထားတာကြောင့် တခြားသောရုပ်ရှင်တွေနဲ့ ကွဲထွက် နေတဲ့ ရုပ်ရှင်ဇာတ်ကားကောင်း တကားလည်း ဖြစ်ပါတယ်။
ဒီရုပ်ရှင်ဇာတ်ကားဟာ ဇာတ်လမ်း၊ ဇာတ်ကွက် တင်ဆက်ပုံ ဆန်းသစ်တာကြောင့် လူအများစု ကြိုက်လောက်မယ့် ဇာတ်ကားမျိုး မဟုတ်ပေမယ့် ရုပ်ရှင်ဇာတ်ကားကောင်း တကားကို လက်မလွှတ်ချင်သူတွေအနေနဲ့တော့ ကြည့်ဖြစ် အောင် ကြည့်သင့်တဲ့ ဇာတ်ကားဖြစ်တာကြောင့် ညွှန်းဆိုပေးလိုက်ပါတယ်။
The post ရုပ်ရှင်ကားကောင်းကြိုက်သူတွေ လက်မလွှတ်တမ်း ကြည့်ရှုသင့်တဲ့ “Nocturnal Animals” appeared first on ဧရာဝတီ.