နာမည်ကျော်ကြားသူ တယောက်ဖြစ်တဲ့ Kim Kardashian West ဟာ ၂၀၁၆ ခုနှစ်၊ အောက်တိုဘာလမှာ ဓားပြတိုက်ခံ ရမှုနဲ့ ကြုံတွေ့ခဲ့ပြီးတဲ့နောက် ပထမဆုံးအကြိမ်အဖြစ် ပဲရစ်မြို့ကို ပြန်လည်ရောက်ရှိလာခဲ့ပါတယ်။
လွန်ခဲ့တဲ့ ၂ နှစ်နီး ပါးလောက်က သေနတ်နဲ့ ခြိမ်းခြောက်ခံရပြီး ဒေါ်လာ ၁၀ သန်း တန်ဖိုးနီးပါးရှိ လက်ဝတ်ရတနာတွေ ဓားပြအတိုက်ခံလိုက်ရတဲ့ အသက် ၃၇ နှစ်အရွယ် ရသစုံအစီအစဉ်စတား Kim ဟာ လက်ရှိမှာ ပြင်သစ်နိုင်ငံ ၊ ပဲရစ်မြို့တော်ကို Paris Fashion Week အတွက် ရောက်ရှိနေတာလည်း ဖြစ်ပါတယ်။
ပြီးခဲ့တဲ့ ဇွန် ၂၁ ရက်မှာတော့ သူနဲ့ သူ့ခင်ပွန်းဖြစ်တဲ့ Kanye West တို့ဟာ Louis Vuitton ကုန်ပစ္စည်းအမှတ် တံဆိပ်ရဲ့ spring/summer 2019 menswear show မှာ ဖန်တီးမှုဒါရိုက်တာ Virgil Abloh ကို အားပေးဖို့ ရောက်ရှိလာခဲ့တာလည်း ဖြစ်ပါတယ်။
Kim Kardashian ကတော့ အမေရိကန်ဖက်ရှင် ဒီဇိုင်နာ Abloh ဖန်တီးထားတဲ့ အပြာရောင်ရှပ်အကျီ ဝတ်စုံနဲ့အတူ ဆိုက်လွန် နေကာမျက်မှန်၊ အနက်ရောက်ကိုယ်ကျပ် ဘောင်းဘီတိုနဲ့ ဒေါက်မြင့်ဖိနပ် တို့ကို ဝတ်ဆင်လာခဲ့တာ တွေ့ရပါတယ်။ အဲဒီပွဲ မတိုင်ခင်မှာတော့ သူတို့စုံတွဲနှစ်ဦးဟာ ပွဲကျင်းပရာနေရာ ပြင်ပမှာ ဖက်ရှင်ဓာတ်ပုံတွေကို ရိုက်ကူးခဲ့တာကိုလည်း တွေ့ရပါတယ်။
အခမ်းအနားကျင်းပရာ Parisien Palais-Royal နန်းတော်ထဲဝင်ရောက်ချိန်မှာတော့ သူတို့နှစ်ဦးဟာ ရှေ့ဆုံးတန်းမှာရှိတဲ့ Kylie Jenner ရဲ့ဘေးမှာ နေရာဝင်ယူခဲ့တာကို တွေ့ရပါတယ်။ Kylie Jenner ဟာလည်း ချစ်သူTravis Scott နဲ့ သူငယ်ချင်း Jordyn Woods တို့နဲ့အတူ ပွဲတက်လာခဲ့တာကို တွေ့ရပါတယ်။
တက်ရောက်လာခဲ့တဲ့ အခြားနာမည်ကျော် ပုဂ္ဂိုလ်တွေထဲမှာဆိုရင် မော်ဒယ် Bella Hadid, အဆိုတော် Rita Ora, မော်ဒယ် Naomi Campbell နဲ့ အဆိုတော် Rihanna တို့လည်း ပါဝင်တာကို တွေ့ရပါတယ်။ အဲဒီပွဲပြီးတဲ့နောက် Kim Kardashian က အခုလိုမျိုး စိတ်လှုပ်ရှားဖွယ် ခရီးပြန်ရောက်လာတဲ့အတွက် ပဲရစ်မြို့ကို ကျေးဇူးတင် ကြောင်း Twitter မှာ ရေးသားခဲ့ ပါတယ်။
Kim က “ပိုကောင်းတဲ့ အကြောင်းပြချက်နဲ့ လာနိုင်ခဲ့တာတော့ မဟုတ်ပါဘူး။ L.A မှာ Teyana ရဲ့ ပါတီကို ဆက်သွား ပါမယ်။ တနေ့တည်း နိုင်ငံနှစ်ခုမှာ အတွေ့အကြုံ နှစ်ခုယူပါမယ်” လို့ရေးသားခဲ့ပါတယ်။ သူဟာ ၂၀၁၇ ခုနှစ်၊ ဇန်နဝါရီ လမှာ ဓားပြတိုက်ခံလိုက်ရတဲ့ အကြောင်းနဲ့ ပတ်သက်လို့ ပထမဆုံး ထုတ်ပြောခဲ့ပြီး ပြန်စဉ်းစားလိုက်တိုင်း အရမ်းဝမ်းနည်း ရတယ်လို့ ဆိုခဲ့ပါတယ်။ သူက “ဓားပြတွေက ကျမကို အနောက်က ပစ်တော့မလို့လေ။ ထွက်ပြေးစရာလမ်းလည်း မရှိခဲ့ဘူး လေ” လို့လည်း ပြောကြားခဲ့ဖူးပါတယ်။
Ref:etcanada
The post ဓားပြတိုက်ခံရဖူးတဲ့ ပဲရစ်မြို့ဆီကို နောက်တကြိမ် ပြန်ရောက်လာတဲ့ Kim Kardashian တို့စုံတွဲ appeared first on ဧရာဝတီ.