ရိုက်ကူးနေတဲ့ ဂျိမ်းစ်ဘွန်းရုပ်ရှင်ရဲ့ ဒါရိုက်တာနုတ်ထွက်

၂၅ ကားမြောက် ဂျိမ်းစ်ဘွန်းရုပ်ရှင်မှာ မင်းသား Daniel Craig ရဲ့ ဇာတ်ကောင် ဂျိမ်းစ်ဘွန်းကို သတ်ပစ်ရန်ငြင်းဆိုခဲ့ပြီး နောက်ဆက်တွဲရုပ်ရှင်ရိုက်ကူးမှုကနေ ဒါရိုက်တာ Danny Boyle နုတ်ထွက်လိုက်ပြီ ဖြစ်ပါတယ်။

သတင်းရင်းမြစ်တွေရဲ့အဆိုအရ သူ့ရဲ့နောက်ဆုံး 007 ရုပ်ရှင်အဖြစ် ပါဝင်ရိုက်ကူးနေတယ်လို့ ပြောဆိုထားတဲ့ မင်းသား Craig နဲ့ ထုတ်လုပ်သူ Barbara Broccoli တို့ဟာ အခုနောက်ဆုံး ရိုက်ကူးနေတဲ့ ရုပ်ရှင်မှာ ဂျိမ်းစ်ဘွန်းဇာတ်ကောင်ကို သေစေဖို့ ဆန္ဒရှိနေတာလို့ ယုံကြည်ရပါတယ်။

Slumdog Millionaire ၊ 127 Hours ရုပ်ရှင်တို့နဲ့ လူသိများတဲ့ အော်စကာဆုရှင်ဒါရိုက်တာ Boyle ဟာ အဲဒီအစီအစဉ်ဟာ ကျိုးကြောင်းဆီလျော်မှုမရှိဘူးလို့ ဆိုပြီးတော့ လျှို့ဝှက်အေးဂျင့်ဘွန်းကို ဇာတ်လမ်းထဲမှာ သတ်ပစ်ဖို့ ငြင်းဆိုခဲ့တဲ့ အကြောင်း The Sun မီဒီယာမှာ ဖော်ပြထားပါတယ်။

သတင်းရင်းမြစ်တခုက “အဆုံးသတ်မှာ ဒရမ်မာဆန်ဆန်နဲ့ ဘွန်းကို သတ်ပစ်ဖို့အကြောင်းနဲ့ ပတ်သက်လို့ ဆွေးနွေးခဲ့ကြပါတယ်။ မင်းသား Craig အတွက် နောက်ဆုံး ညာသံပေး၊ အော်သံဖြစ်မှာဖြစ်ပြီး ပရိသတ်တွေကို ဆွေးဆွေးမြေ့မြေ့ကျန်စေခဲ့မှာပါ” လို့ ပြောကြားခဲ့ပါတယ်။

ဒါ့အပြင် နောက်လာမယ့် နောက်ဆက်တွဲဇာတ်လမ်းအသစ်မှာ ဘွန်းမသေခဲ့တာပဲဖြစ်ဖြစ်၊ သူ့နေရာကိုမင်းသား အသစ်တယောက်ကို ဆက်ခံစေပြီး ရိုက်ကူးတာပဲဖြစ်ဖြစ် လှည့်စားမှုတွေနဲ့ ပြန်လည်ဖန်တီးမှာ ဖြစ်တယ်လို့လည်း ဆိုပါတယ်။

ဘတ်ဂျက်နဲ့ပတ်သက်လို့ အကျပ်အတည်းတွေ ရှိခဲ့ပြီး ထုတ်လုပ်ရေးအဖွဲ့ရဲ့ ဘယ်၊ ညာနဲ့ အလယ်က ပုဂ္ဂိုလ်တွေ ထွက်ကုန်တာဟာ အဖွဲ့ကို အကျပ်ရိုက်စေခဲ့ပါတယ်။ ရုပ်ရှင်ကလပေါင်းများစွာကြာ နောက်ဆုတ်သွားမယ်ဆိုတဲ့ စိုးရိမ်မှုတွေရှိနေပြီး ရိုက်ကူးရေးဝန်ထမ်းတွေ အနေနဲ့လည်း လစာဘယ်တော့ရမယ်ဆိုတာနဲ့ ပတ်သက်လို့ စိုးရိမ်နေကြတယ်လို့လည်းဆိုပါတယ်။

ပြီးခဲ့တဲ့ သီတင်းပတ်အစောပိုင်းမှာတော့ ဒါရိုက်တာ Boyle က ဖန်တီးမှုဆိုင်ရာ မတူကွဲပြား မှုတွေကြောင့် နုတ်ထွက်ခဲ့ပြီး ဖြစ်တယ်လို့ ကြေညာထားပါတယ်။

ရုပ်ရှင်ရဲ့တရားဝင် Twitter အကောင့်မှာတော့ “Michael G. Wilson, Barbara Broccoli နဲ့ Daniel Craig တို့ဟာ ဖန်တီးမှုဆိုင်ရာ မတူကွဲပြားမှုတွေကြောင့် ဒါရိုက်တာ Danny Boyle က Bond 25 ရုပ်ရှင်ကိုဆက်လက်မရိုက်ကူးဖို့ ဆုံးဖြတ်ခဲ့ပါတယ်ဆိုတာ ကြေညာ လိုက်ပါတယ်” လို့ နာမည်ကျော် 007 လိုဂိုပုံနဲ့ အတူဖော်ပြရေးသားခဲ့ပါတယ်။

မင်းသား Daniel Craig ဟာ ၂၀၀၆ ခုနှစ်တုန်းက Casino Royale ရုပ်ရှင်မှာ ဂျိမ်းစ်ဘွန်းဇာတ်ကောင်နေရာကို မင်းသား Pierce Brosnan ဆီကနေ လက်လွှဲရယူခဲ့တာဖြစ်ပါတယ်။ မင်းသားဟာ ဗြိတိသျှစပိုင် ဂျိမ်းစ်ဘွန်း အနေနဲ့ ပဉ္စမမြောက်၊ နောက်ဆုံးရုပ်ရှင်မှာ ပါဝင်မှာဖြစ်ပါတယ်။

Ref: indianexpress

The post ရိုက်ကူးနေတဲ့ ဂျိမ်းစ်ဘွန်းရုပ်ရှင်ရဲ့ ဒါရိုက်တာနုတ်ထွက် appeared first on ဧရာဝတီ.