ယခုနှစ်၊ ဒီဇင်ဘာလ ၁ ရက်နေ့က ထွက်ရှိခဲ့တဲ့ “Spider-Man: Into the Spider-Verse” ဇာတ်ကားကတော့ Marvel ပရိသတ်တွေ တင်မကဘဲ တကမ္ဘာလုံးကို ရိုက်ခတ်နိုင်ခဲ့ပါတယ်။ ထင်မထားတဲ့ ပုံစံတွေနဲ့ ရိုက်ကူးထားတဲ့ ဒီကားဟာ Animation ဇာတ်ကား ဖြစ်ပါတယ်။
ဒီကားကို ရိုက်ကူးနေစဉ်မှာ Stan Lee သက်ရှိထင်ရှား ရှိနေသေးတာကြောင့် သူ့ကို လွမ်းဆွတ် တမ်းတတဲ့သူတွေအနေနဲ့ မဖြစ်မနေ သွားရောက်ကြည့်သင့်တဲ့ ဇာတ်ကားဖြစ်ပါတယ်။ ဒီဇာတ်ကား ထွက်ရှိဖို့အတွက် ၂၀၁၄ ခုနှစ်က စတင် စီစဉ်ခဲ့ပြီး ၂၀၁၅ ခုနှစ် ဧပြီလမှာ ရိုက်ကူးနေပြီဖြစ်ကြောင်း အတည်ပြုခဲ့ပါတယ်။
ဒီဇာတ်ကားကို Animation ရေးဆွဲသူ ၁၄၀ကျော် ပါဝင်ရေးဆွဲခဲ့တယ်လို့ သိရပါတယ်။ အမေရိကန်မှာ ဒီဇင်ဘာ ၁ရက်နေ့ က စတင်ပြသခဲ့ပြီး တကမ္ဘာလုံးကိုတော့ ဒီဇင်ဘာလ ၁၄ ရက်နေ့မှာ စတင်ပြသခဲ့ပြီး တပတ်တွင်း ရုံတင်ဝင်ငွေ အမေရိကန်ဒေါ်လာ ၅၆ မီလီယံ ရရှိထားပြီး ရိုက်ကူးတဲ့ ကုန်ကျစရိတ်က အမေရိကန်ဒေါ်လာ ၉၀ မီလီယံ ကုန်ကျထားတယ်လို့ သိရပါတယ်။
ရိုက်ကူးထားတဲ့ ပုံစံက Comic စာအုပ်ကို ကိုယ်တိုင်ဖတ်နေရသလို ခံစားမှုမျိုးရအောင် ရိုက်ကူးထားတာကို တွေ့ရပါတယ်။ နောက်ခံတေးဂီတကိုလည်း ခမ်းနားစွာ အသုံးပြုထားပြီး ကပ္ပလီတွေရဲ့ ယဉ်ကျေးမှု စရိုက်ကို စနစ်တကျ ဖော်ပြထားပါတယ်။ မိသားစုလိုက် သွားကြည့်ဖို့ အဆင်ပြေတဲ့ ဇာတ်ကားတကားလို့ ပြောချင်ပါတယ်။
ဇာတ်လမ်းအကျဉ်းကတော့ “Miles Morales” လို့ ခေါ်တဲ့ ဆယ်ကျော်သက်အရွယ် ကောင်လေးဟာ Graffiti ရေးဆွဲရတာကို ကြိုက်နှစ်သက်သူ ဖြစ်ပါတယ်။ ဖခင်ဖြစ်သူက ရဲဖြစ်တာကြောင့် ဒီလို လမ်းဘေးဆန်တဲ့ စရိုက်တွေကို ပြုလုပ်ခွင့် မပေးထားပါဘူး။
ကျောင်းအိပ်ကျောင်းစား နေရတဲ့ Miles ဟာ ညဖက်မှာ သူ့ကို ချစ်တဲ့ ဦးလေးရှိရာကို သွားရောက်လည်ပတ်ပြီး စွန့်ပစ်ထားတဲ့ ရထားဘူတာဖက်မှာ Graffiti ဆွဲရာမှာ Spider Man တို့ရဲ့ ထုံးစံအတိုင်း ပင့်ကူကိုက်ခြင်းကို ခံခဲ့ရပါတယ်။ နောက်ရက်မှာတော့ သူဟာ ထူးခြားတဲ့ အစွမ်းတွေကို ရရှိလာပါတယ်။ ဒါကို သူက လူပျိုဖော်ဝင်တယ် အထင်ရောက်နေပါတော့တယ်။
ဒီလိုနဲ့ ကျောင်းမှာ ရှိတဲ့ သူ့ခိုးချစ်နေရတဲ့ မိန်းကလေး Gwen Stacy ကို လိုက်ပိုးတဲ့ အခါ ဒုက္ခတွေ ရောက်ပါတော့တယ်။ ငယ်ငယ်က သင်ကြည့်ခဲ့ဖူးတဲ့ စပိုက်ဒါမန်းတွေ အားလုံးကို မြင်တွေရမှာ ဖြစ်ပြီး မတူညီတဲ့ စကြဝဠာ (အပြိုင်စကြဝဠာ) က အခြား စပိုက်ဒါမန်းတွေကိုပါ မြင်တွေ့ရမှာ ဖြစ်ပါတယ်။
“Peter Parker, Peter B Parker, Spider Ham, Peni Parker, Spider Man Noir, Gwen Stacy” စတဲ့ စပိုက်ဒါမန်းတွေ ပါဝင်ပြီး သူတို့ အားလုံးက မတူညီတဲ့ စကြဝဠာတွေက ရောက်ရှိလာတဲ့ စပိုက်ဒါမန်းတွေက ဒီကမ္ဘာမှာရှိတဲ့ ပင့်ကူကိုက်ခံရခါစ Miles ကို လေ့ကျင့်ပေးခဲ့ပါတယ်။ အဓိက ဗီလိန်အဖြစ် King Pin ကို ထည့်သွင်းထားပါတယ်။
ရုပ်ရှင်ဝေဖန်သူတွေရဲ့ မဲပေးချက်အရ ဒီဇာတ်ကားဟာ Rating (8.8) ရရှိထားပါတယ်။ စပိုက်ဒါမန်းတွေရဲ့ အဓိက စွမ်းအားဖြစ်တဲ့ အာရုံခံနိုင်စွမ်း၊ စပိုက်ဒါမန်းတယောက် ဖြစ်ဖို့ ခက်ခက်ခဲခဲ ကြိုးပမ်းရပုံ၊ လက်လွတ် ဆုံးရှုံးရခြင်း စတာတွေကို တခါမှ မကြည့်ဖူးတဲ့ ပုံစံတွေနဲ့ ရိုက်ကူးပြသထားတဲ့ ဒီဇာတ်ကားဟာ ကမ္ဘာအနှံ့က ရုပ်ရှင်ဆုတွေအတွက် လျာထားခြင်းခံနေရပါတယ်။
ဒါကြောင့်မို့လို့ ရုပ်ရျင်ချစ် ပရိသတ်တွေအတွက် “Spider-Man: Into the Spider-Verse” ဇာတ်ကားသစ် ကြည့်ရှုဖို့ ညွှန်းဆိုပေးလိုက်ပါတယ်။
The post ပင့်ကူလူသား အသစ်တွေကို မိတ်ဆက်ခဲ့တဲ့ “Spider-Man: Into the Spider-Verse” appeared first on ဧရာဝတီ.