မကြာခင်မှာတော့ ၂၀၁၈ခုနှစ်အတွက် မြန်မာ့ရုပ်ရှင်ထူးချွန်ဆုပေးပွဲကြီးဟာ ကျင်းပပြုလုပ်တော့မှာဖြစ်ပြီး အကယ်ဒမီထင်ကြေးပေးခံရတဲ့ အနုပညာရှင်များထဲမှာတော့ သရုပ်ဆောင် မြင့်မြတ်လည်း ပါဝင်နေပါတယ်။
မြင့်မြတ်ကတော့ အကယ်ဒမီထင်ကြေးပေးတဲ့အပေါ်မှာတော့ ကြည်နူးမိပြီး မှန်းထားပြီးတော့မှ မရခဲ့ရင် ခံရခက်တယ်လို့ ဆိုပါတယ်။
“ကျနော့်ကို အကယ်ဒမီထင်ကြေးပေးတဲ့အပေါ်မှာတော့ ကြည်နူးမိပါတယ်။ ဒါပေမယ့် အကယ်ဒမီကတော့ တကယ်ကြောက်ဖို့ကောင်းပါတယ်။ မှန်းထားပြီး မျှော်လင့်ထားပြီးတော့ မရခဲ့ရင် ခံရခက်တယ်။ အရှက်လည်းကွဲတယ်။ အဲဒီလိုသင်ခန်းစာတွေလည်း အများကြီးပဲရဖူးမှာပါ”
“ အဲဒီတော့ ကျနော်ကတော့ ပေါ့ပေါ့ပါးပါးပဲထားတယ်။ ဒီနှစ်မှာ ကျနော့်ကားတွေတော့ ပါတော့ပေါ့။ အကယ်ဒမီအကဲဖြတ်အဖွဲ့က လူကြီးတွေပေးရင်တော့ရမှာပေါ့” လို့ မြင့်မြတ်က ပြောပါတယ်။
မြင့်မြတ်ကိုတော့ “ငဒူ” ဇာတ်ကားနဲ့ အကယ်ဒမီထင်ကြေးပေးနေကြပြီး ၂၀၁၈ ခုနှစ်မှာတော့ သူ့ရဲ့ရုံတင်ပြသခဲ့တဲ့ ရုပ်ရှင်ဇာတ်ကားများမှာတော့ ဟာသကားတွေများနေတာကိုလည်း တွေ့ရပါတယ်။
“ရုံတင်တဲ့ကားတွေကို ပြန်တော့ကြည့်ဖြစ်ပါတယ်။ အနည်းဆုံးတော့ ကားတကားပြီးပြီဆိုရင် ကြည့်ဖြစ်ပါတယ်။ အဲဒါကျတော့ ပြောရခက်တယ်။ ကျနော်က ဟာသလည်းရိုက်တယ်။ အက်ရှင်လည်းရိုက်တယ်။ ဒါပေမယ့်ခက်တာက ရုံပေါ်ရောက်လာတဲ့ကားတွေက ကျနော်ရိုက်ထားတဲ့ ဒရာမာတွေ ရိုမန့်ဒရာမာတွေ တကားမှတက်မလာဘူး။ ဟာသတွေချည်းပဲ။ ကျနော်အရမ်းအားရတဲ့ ဒရမ်မာတွေက ရုံပေါ်မရောက်လာသေးဘူး” လို့ မြင့်မြတ်က ပြောပါတယ်။
၂၀၁၉ ခုနှစ်ထဲမှာတော့ ဟာသကားရိုက်တာတွေကို လျော့ချသွားမှာဖြစ်ပြီး ၂လပိုင်းမှာတော့ ရေခဲတောင်မှာ သွားရိုက်ဖို့လည်း ရှိတယ်လို့ သိရပါတယ်။
“၂၀၁၉ ထဲမှာတော့ အဲဒီလိုမလုပ်တော့ဘူး။ ဟာသနည်းမယ်။ ပါတော့ပါမှာပါ။ ၂လပိုင်းထဲမှာဆို ရေခဲတောင်မှာ သွားရိုက်ဖို့ရှိတယ်။ ဇာတ်လမ်းကောင်းတဲ့ဇာတ်တွေ ရိုက်သွားဖို့ရှိပါတယ်” လို့ မြင့်မြတ်က ပြောပါတယ်။
လတ်တလောမှာလည်း မြင့်မြတ်ပါဝင်သရုပ်ဆောင်ထားတဲ့ ဟာသကားတကားဖြစ်တဲ့ “ဟောက်စား” ရုပ်ရှင်ဇာတ်ကားကြီးကိုလည်း ရုံတင်ပြတော့မှာဖြစ်ပြီး ထပ်မံပြီးတော့ “ကျားကျားကြိုက်ကြိုက်” ဆိုတဲ့ ရုပ်ရှင်ဇာတ်ကားမှာတော့ မိန်းမလျာ ၄ယောက်နဲ့အတူ ပါဝင်သရုပ်ဆောင်နေပါတယ်။
မြင့်မြတ်ကတော့ ၂၀၁၇ ခုနှစ်မှာတော့ “အမှောင်မှာရွာချတဲ့ မိုးတိမ်” ဆိုတဲ့ ရုပ်ရှင်ဇာတ်ကားကြီးနဲ့ အကောင်းဆုံးဇာတ်ပို့သရုပ်ဆောင်ဆုဖြင့် အကယ်ဒမီရရှိထားပါတယ်။
The post “အကယ်ဒမီက မှန်းထားပြီး မရခဲ့ရင် ခံရခက်တယ်” appeared first on ဧရာဝတီ.