“ရုပ်ရှင်ပွဲတော်တွေမှာ မြန်မာနိုင်ငံ ရုပ်ရှင်နယ်ပယ်ကလူတွေ လာကြည့်ကြတာ နည်းတယ်”

မြန်မာနိုင်ငံမှာ နိုင်ငံတကာမှ ရုပ်ရှင်ပွဲတော်များစွာ လာရောက်ပြသမှုများ ရှိနေပေမယ့် မြန်မာ့ရုပ်ရှင်လောကရဲ့ Main Stream က လူတွေ လာရောက်ကြည့်ရှုတာ နည်းပါးနေတယ်လို့ အကယ်ဒမီ ဆွေဇင်ထိုက်က သုံးသပ်ပြောခဲ့ပါတယ်။

“ကျမတို့ တိုင်းပြည်မှာက ထူးခြားတာက ရုပ်ရှင်ပွဲတော်တွေမှာ ဘယ်တော့မှ ပိုက်ဆံမယူဘူး။ အလကားပြတယ်။ အလကားပြတာကို လာကြည့်တဲ့ ပရိသတ်တွေကို ကြည့်မယ်ဆိုရင်တော့ များသောအားဖြင့် ရုပ်ရှင်ထုတ်လုပ်တဲ့ထဲ Main Stream ထဲက လူကအရမ်းနည်းတယ်။ သူတို့မှာ အချိန် မရှိဘူးနဲ့ တူပါတယ်။ ဒါမှမဟုတ် တတ်ပြီးသားမို့လို့ ထပ်ပြီးတော့ သင်ယူစရာမလိုလို့လည်း ဖြစ်ချင်ဖြစ်နေမှာ။ ဒါပေမဲ့ ရုပ်ရှင်ကြည့်တဲ့သူတွေက တော်တော်များများ လာကြည့်တာကို တွေ့ရပါတယ်”လို့ အကယ်ဒမီ ဆွေဇင်ထိုက်က ပြောပါတယ်။

မြန်မာနိုင်ငံမှာ လာရောက်ပြသကြတဲ့ နိုင်ငံတကာရုပ်ရှင်ပွဲတော်များမှာ များသောအားဖြင့် သက်ဆိုင်ရာသံရုံးများနဲ့ ပူးပေါင်းကာ အခမဲ့ပြသကြပြီး နိုင်ငံတကာမှာတော့ အခကြေးငွေများဖြင့် ပြသကြတာဖြစ်တယ်လို့ သိရပါတယ်။

“နိုင်ငံတကာမှာဆိုရင် ရုပ်ရှင်ပွဲတော်မှာ ရုပ်ရှင်ကြည့်ဖို့ဆို လက်မှတ်က ဝယ်ရပါတယ်။ ကြိုပြီးတော့ ဝယ်ရပါတယ်။ ကျမတို့လို ဧည့်သည် သင်တန်းသားအနေနဲ့ သွားတဲ့သူတွေတောင် တခါတလေကြည့်ချင်တဲ့ကား လက်မှတ်ကုန်သွားလို့ မကြည့်ရတာတွေတောင် ရှိတယ်။ ဒါကို အခွင့်အလမ်းတခု အနေနဲ့ မြင်မယ်ဆိုရင် သိပ်ကောင်းပါတယ်”လို့ အကယ်ဒမီ ဆွေဇင်ထိုက်က ပြောပါတယ်။

နိုင်ငံတကာမှ ရုပ်ရှင်များ လာရောက်ပြသတဲ့ အပေါ်မှာလည်း အကယ်ဒမီ ဆွေဇင်ထိုက်က သူမရဲ့အမြင်ကို အခုလိုပြောပြခဲ့ပါတယ်။

“ရုပ်ရှင်ပွဲတော်တွေကို ပြပေးတာဟာ ရုပ်ရှင်သမားတွေအနေနဲ့ ဘယ်လိုရုပ်ရှင်တွေကို ရိုက်သွားသလဲ။ ရွေးသွားသလဲ။ တွေးသွားသလဲဆိုတာကို သိစေချင်ပါတယ်။ ပြီးတော့ ရုပ်ရှင်ကြည့်တဲ့သူတွေကလည်း ဒီတိုင်းပဲ။ ပြည်တွင်းထုတ်တဲ့ ရုပ်ရှင်တွေရဲ့ ပေးနေတဲ့ Message တွေရယ်။ ရလာခဲ့တဲ့ ရသတွေနဲ့ ဗဟုသုတတွေနဲ့ ပြည်ပမှာရှိတဲ့ ရသတွေနဲ့ ဗဟုသုတတွေကို တွေ့ဖို့အတွက် အခွင့်အလမ်းလို့ ကျမကတော့ ယုံကြည်ပါတယ်” လို့ အကယ်ဒမီ ဆွေဇင်ထိုက်က ပြောပါတယ်။

မကြာမီမှာလည်း ဂျပန်ရုပ်ရှင်ပွဲတော်ကို ရန်ကုန်နဲ့ မန္တလေးမှာ ပြုလုပ်သွားမှာဖြစ်ပြီး အဆိုပါ ပွဲတော်မှာ ပြသမယ့် ရုပ်ရှင်ဇာတ်ကားများကိုလည်း အကယ်ဒမီ ဆွေဇင်ထိုက် ပါဝင်တဲ့ ဆင်ဆာအဖွဲ့မှ ရွေးချယ်ပေးထားတာဖြစ်တယ်လို့ သိရပါတယ်။

“ရုပ်ရှင်ဆိုတာက ကြည့်ပေးရပါတယ်။ နောက်ပြီး ၃၆၀ ဒီဂရီကလည်း တွေးကြည့်ရပါတယ်။ မြင်ရုံနဲ့တင်မဟုတ်ဘူး။ အမြင်ရဲ့နောက်က ပေးချင်တဲ့ Message တွေကို တွေးယူရတာ ဖြစ်ပါတယ်။ ဒီလိုတွေးယူခြင်းအားဖြင့် ကိုယ့်ရဲ့အတွေးမှာလည်း အာဟာရ ပြည့်တယ်။ ကိုယ့်ရဲ့အတွေးတွေနဲ့ အရွေးတွေမှာလည်း အကျိုးရှိမယ်လို့ ယုံကြည်ပါတယ်”လို့ အကယ်ဒမီ ဆွေဇင်ထိုက်က ပြောပါတယ်။

The post “ရုပ်ရှင်ပွဲတော်တွေမှာ မြန်မာနိုင်ငံ ရုပ်ရှင်နယ်ပယ်ကလူတွေ လာကြည့်ကြတာ နည်းတယ်” appeared first on ဧရာဝတီ.