တေးသီချင်းများကို ကိုယ်တိုင်ဖန်တီးသီဆိုပြီး ဂီတလောကမှာ နေရာတနေရာ အခိုင်အမာရရှိထားတဲ့ ဝေလကတော့ သြင်္ကန်အခါမှာ လွှမ်းမိုးခဲ့တဲ့သြင်္ကန်သီချင်းများကို ပြန်ဆိုဖို့ထက် တန်ဖိုးထားပြီး နားထောင်ဖြစ်တယ်လို့ ပြောပါတယ်။
“သြင်္ကန်သီချင်းတွေကို ပြန်ဆိုဖို့တော့မရှိပါဘူး။ ပွဲတွေမှာလည်းမဆိုဖြစ်ဘူး။ သြင်္ကန်မှာ ကိုယ်ဆိုရမယ့်သီချင်း အပုဒ်ရေနဲ့ဆိုတယ်။ နောက်ဆုံးအပိတ်မှာ အကုန်လုံးနဲ့စုပြီးဆိုခဲ့တာတွေတော့ ရှိပါတယ်။ လွှမ်းမိုးခဲ့တဲ့သြင်္ကန် သီချင်းတွေကတော့ အများကြီးရှိပါတယ်။ အဲဒါတွေကို ပြန်ဆိုဖို့ထက် ကိုယ့်ဘာသာတန်ဖိုးထားပြီး နားထောင်နေချင်တာပါ” လို့ အဆိုတော်ဝေလက ပြောပါတယ်။
သူကိုယ်တိုင်အနေနဲ့လည်း သြင်္ကန်သီချင်းများဖန်တီးထားပြီး ယခုရက်ပိုင်းမှာ ထွက်ရှိထားတဲ့ “နွေနတ်သမီး” ဆိုတဲ့သြင်္ကန်သီချင်းခွေထဲမှာ ကိုယ်တိုင်ရေးပြီး ဆိုထားတဲ့ သီချင်း၁ပုဒ်ပါဝင်ထားပါတယ်။
“အရင်တုန်းက သီချင်းတွေဆိုတာ အကုန်လုံးက တန်ဖိုးထားရတဲ့သီချင်းတွေ။ မြနန္ဒာ တို့ဘာတို့ အနှစ်သာရပြည့်ဝတဲ့ သီချင်းတွေအများကြီးရှိတယ်။ အဲဒါတွေကို နားထောင်ကြည့်လိုက်ရင် သြင်္ကန် Mood ရတယ်။ ဒါတွေက တန်ဖိုးထား ရတယ်။ နောက်အနှစ် ၅၀ဆိုရင်လည်း ဒီသီချင်းတွေက ဘယ်တော့မှပျောက်ပျက်မှာ မဟုတ်ဘူး။ ကျနော်ကလည်း သြင်္ကန်သီချင်းကို ကိုယ်သိသလောက်လေးနဲ့ ကြိုးစားရေးကြည့်လိုက်တဲ့သဘောပါပဲ” လို့ ဝေလကပြောပါတယ်။
အဆိုပါ “နွေနတ်သမီး” အခွေထဲမှာ ပါဝင်ရေးသားသီဆိုထားတဲ့ သြင်္ကန်သီချင်းကတော့ ဝေလရဲ့ ၃ပုဒ်မြောက် သြင်္ကန်သီချင်းဖြစ်တယ်လို့ သိရပါတယ်။
“ဒီအခွေထဲမှာဆိုတာက ပထမဆုံးတော့ မဟုတ်ဘူး။ ကျနော်အရှေ့မှာတော့ လွန်ခဲ့နှစ်တွေက “Water party ရေပါတီ” မှာ ၂ပုဒ်ရေးပြီးဆိုဖူးတယ်။ ဒါနဲ့ဆိုရင် ၃ပုဒ်မြောက်ပေါ့” လို့ ဝေလကပြောပါတယ်။
သြင်္ကန်မှာလည်း ရန်ကုန်မှာ သီချင်းများဖျော်ဖြေရင်းနဲ့ ဖြတ်သန်းသွားမှာဖြစ်ပြီး သူ့ရဲ့ တကိုယ်တော်အခွေ အသစ်အတွက်လည်း သီချင်းတွေလုပ်နေတယ်လို့သိရပါတယ်။
The post နာမည်ကြီးခဲ့တဲ့ သြင်္ကန်သီချင်းတွေကို ပြန်ဆိုဖို့ထက် တန်ဖိုးထားပြီးပဲ နားထောင်တဲ့ ဝေလ appeared first on ဧရာဝတီ.