ပရိသတ်တွေကြားမှာ နာမည်ကြီး၊ လူကြိုက်များတဲ့ မင်းသားချော အောင်ရဲလင်းက ၂၀၁၈ ခုနှစ်အတွက် အကယ်ဒမီ ၂၅ ကားစာရင်းမှာ ၂ ကား ပါဝင်ခဲ့ပြီး ၂ ကားလုံးကိုလည်း အကောင်းဆုံး သရုပ်ဆောင်ခဲ့ကာ အကယ်ဒမီက ကံပါရင်တော့ ရမယ်လို့ ဆိုပါတယ်။
“အကယ်ဒမီက ကံပါရင်တော့ ရမှာပါ။ ကံမပါရင်လည်း မရနိုင်ဘူးလို့ တွေးထားပါတယ်။ “ငယ်ကျွန်”မှာရော “ဇာတိမြေ”မှာ ရော ကျနော် သရုပ်ဆောင်ထားတဲ့ ကား ၂ ကားလုံးကို ကြိုက်ပါတယ်။ “ငယ်ကျွန်”ကတော့ အိုက်တင် ပိုလုပ်ရတာပေါ့။ ၂ ကားလုံးကိုတော့ ကြိုက်ပါတယ်။ ၂ ကားလုံးကိုလည်း အကောင်းဆုံးသရုပ်ဆောင်ခဲ့ပါတယ်။ အကယ်ဒမီအတွက် ဖီလင်ကတော့ ပုံမှန်ပါပဲ။ ထွေထွေထူးထူး မရှိပါဘူး”လို့ အောင်ရဲလင်းက ပြောပါတယ်။
“အကယ်ဒမီကိုလည်း သိပ်မမျှော်လင့်ထားဘူး။ ရမယ့် အချိန်မှာ ရမှာပဲ။ အကယ်ဒမီ မျှော်လင့်ပေးကြတဲ့ ပရိသတ်တွေကို ကျေးဇူးတင်ပါတယ်။ အကယ်ဒမီကို တကယ်ကောင်းပြီး တကယ်တော်တဲ့သူတွေကို ရစေချင်ပါတယ်။ အကယ်ဒမီက ကံနဲ့ ဆိုင်ပါတယ်။ ရသင့်တဲ့သူတွေ ရခဲ့သလို ရသင့်တဲ့သူတွေ မရခဲ့တာလည်း ရှိပါတယ်။ ဒီချိန်မှာ ရမယ့် ကံပါလာရင် ရမှာပေါ့။ ဒါတောင် မျှော်လင့်ချက် မထားဘူး”လို့လည်း အောင်ရဲလင်းက ပြောပါတယ်။
လတ်တလောမှာ လူပြောများနေတဲ့ Star Awards နဲ့ ပတ်သက်ပြီးတော့လည်း အောင်ရဲလင်းက ဒီဆုဟာ မျိုးဆက်သစ်တွေအတွက် အခွင့်အရေးကောင်းတွေ ရပြီး ပြိုင်ဆိုင်လာ ကြိုးစားကြမယ်လို့ ထင်ကြောင်း ပြောပါတယ်။
“လူငယ်မျိုးဆက်သစ်တွေအတွက် Star Awards ပေါ်လာတော့ အရမ်းဝမ်းသာတယ်။ ဇာတ်လမ်းတွဲတွေကိုပါပေးတော့ သူတို့လေးတွေအတွက် အရမ်းကောင်းတယ်။ အခုခေတ် အသစ်တွေက ဗီဒီယိုလည်း မရှိတော့ဘူး။ ကျနော်တုန်းက ဗီဒီယိုတွေလည်း ရှိခဲ့တယ်။ အခုက ဗီဒီယိုတွေကလည်း မရှိတော့ဘူးလေ။ စီးရီးတွဲပဲ ရှိတော့တာလေ။ အဲ့လို ဇာတ်လမ်းတွဲတွေကို ကြိုးစားထားတဲ့ လူငယ်တွေအတွက် ဆုချီးမြင့်မယ် ကြားရချိန်မှာ အရမ်းဝမ်းသာပါတယ်”
“ဘာပဲဖြစ်ဖြစ် ဘယ်သူပဲရရ သူကတော့ Star Awards ရတာ။ လူတွေ ပိုပြီး သိလာမယ်။ ပိုပြီး စိတ်ဝင်စားလာမယ်။ သူတို့ အတွက် ပိုကောင်းတယ်။ ရုပ်ရှင်ကားကြီး ရိုက်နေတဲ့သူတွေအတွက်ကတော့ အကယ်ဒမီပဲ ရှိတာ။ ဒီလိုမျိုး Star Awards ပေါ်လာတော့ မျိုးဆက်သစ်တွေအတွက် အခွင့်အရေး ကောင်းမယ်။ ပိုပြီးလည်း ပြိုင်ဆိုင် ကြိုးစားလာမယ်လို့ ထင်ပါတယ်”လို့ အောင်ရဲလင်းက ပြောပါတယ်။
အောင်ရဲလင်းဟာ မြန်မာနိုင်ငံရဲ့ ထိပ်တန်း စာရင်းဝင် မင်းသားတလက် ဖြစ်ပါတယ်။ သူ့ရဲ့ စမတ်ကျတဲ့ ခန္ဓာကိုယ် အချိုးအစားတွေကြောင့် မိန်းကလေး ပရိသတ်များက တခဲနက်အားပေးကြပြီး ပုံစံဒီဇိုင်း ပြောင်းလာတဲ့ အောင်ရဲလင်းက ဒီနှစ်ထဲမှာ ရုပ်ရှင်ဇာတ်ကား အများအပြား ရိုက်ကူးထားတာ တွေ့ရပါတယ်။
The post အကယ်ဒမီနဲ့ ပတ်သက်ပြီး “ကံပါရင် ရမှာပဲ”လို့ ပြောတဲ့ အောင်ရဲလင်း appeared first on ဧရာဝတီ.
