ပရိသတ်တွေရဲ့ ထင်ကြေးပေးမှုများနဲ့ လွဲချော်ခဲ့ရတဲ့ အကယ်ဒမီ ည

၂၀၁၈ ခုနှစ်အတွက် ပေးအပ်ချီးမြှင့်တဲ့ မြန်မာ့ရုပ်ရှင် ထူးချွန်ဆု အကယ်ဒမီပေးပွဲကြီးကတော့ မတ်လ ၂၃ ရက်နေ့ ညက ရန်ကုန်မြို့၊ The One Entertainment Park မှာ ကျင်းပ ပြီးစီးခဲ့ပါတယ်။ အကယ်ဒမီ ဆုပေးပွဲကြီးဟာ နှစ်စဉ်ဖြစ်နေကျ ထုံးစံအတိုင်း ပရိသတ်တွေ ထင်ကြေးပေးထားတဲ့ အနုပညာရှင်များ အကယ်ဒမီဆုများနဲ့ လွဲချော်ခဲ့တဲ့အတွက် ပွဲပြီးတဲ့အခါ ဝေဖန်မှုများစွာ ရှိနေပါတယ်။

အကယ်ဒမီ မတိုင်ခင်က ဆန်ခါတင်စာရင်းမှာ တစ်ပြေးခဲ့တဲ့ အနုပညာရှင်များနဲ့ တကယ်တမ်း ဆုကြေညာတဲ့အခါ ရရှိခဲ့တဲ့ အနုပညာရှင်များ လွဲချော်ခဲ့တာ တွေ့ရပါတယ်။ ယခုနှစ် အကယ်ဒမီဆုပေးပွဲ အခမ်းအနားမှာလည်း ယခင်နှစ်အတိုင်း နိုင်ငံတော်၏ အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည် ကိုယ်တိုင် တက်ရောက်ကာ အမှာစကား ပြောကြားခဲ့ပါတယ်။

ဒေါ်အောင်ဆန်းစုကြည်က ရုပ်ရှင်လောကသားများကို လက်ရှိ ရောက်နေတဲ့နေရာမှာ တိမ်းတိမ် မနေဘဲ နိုင်ငံတကာ အထိရောက်အောင် ကြိုးစားဖို့လိုကြောင်း၊ နိုင်ငံ့ ယဉ်ကျေးမှု၊ သမိုင်းတို့ကို ကမ္ဘာကို ချပြနိုင်အောင်၊ တမူထူးခြားအောင် ရိုက်ပြသင့်ကြောင်း ပြောကြားခဲ့ပါတယ်။

၂၀၁၈ ခုနှစ် မြန်မာ့ရုပ်ရှင် အကယ်ဒမီ ထူးချွန်ဆုပေးပွဲကြီးမှာ “ရုပ်ရှင် တသက်တာ ထူးချွန်ဆု”ကို ပထမဆုံး ပေးအပ် ကြေညာခဲ့ရာ အသက် ၈၅ နှစ်အရွယ်၊ ၅ ထပ်ကွမ်း အကယ်ဒမီဆုရှင် စည်သူ ဒေါ်မြင့်မြင့်ခင်က ရရှိခဲ့ပြီး နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည် ကိုယ်တိုင် ဆုပေးအပ် ချီးမြှင့်ခဲ့ပါတယ်။

အခုလိုမျိုး “ရုပ်ရှင် တသက်တာ ထူးချွန်ဆု”ရတဲ့အတွက် “နောင်လာနောက်သားတွေလည်း ကျမလိုမျိုး အသက်ရှည်ရှည်နဲ့ ဒီလို တသက်သာ ထူးချွန်ဆုကို ရရှိနိုင်ကြပါစေ”လို့ အကယ်ဒမီ ၅ ဆုရှင် စည်သူ ဒေါ်မြင့်မြင့်ခင်က ကျေးဇူးတင်စကားမှာ ပြောကြားခဲ့ပါတယ်။

အဲဒီနောက် “အကောင်းဆုံး ရုပ်ရှင် အသံဆု”ကို ကြေညာခဲ့ရာ “မုန်းစွဲ”ရုပ်ရှင်နဲ့ ကိုအေးက ရရှိခဲ့ပါတယ်။ အကောင်းဆုံး ရုပ်ရှင် တည်းဖြတ်ဆုကို “ရွှေကြာ”ရုပ်ရှင်နဲ့ ကျော်ခိုင်စိုး၊ အကောင်းဆုံး ရုပ်ရှင် ဓာတ်ပုံဆုကို “မုန်းစွဲ”ရုပ်ရှင်နဲ့ ဝင်းလွင်ထက်တို့ ရရှိခဲ့ပါတယ်။

ဆက်လက်ပြီး “အကောင်းဆုံး နောက်ခံတေးဂီတဆု”ကို ကြေညာခဲ့ရာ “မျက်နှာပြင်များ” (Dimensions) ရုပ်ရှင်နဲ့ ရှလုံးအမ်ရောနမ်က ရရှိခဲ့ပါတယ်။ “မျက်နှာပြင်များ” (Dimensions) ရုပ်ရှင်ဟာ လူငယ် ဒါရိုက်တာ ဉာဏ်ထင် ရိုက်ကူးထားပြီး မျက်နှာသစ် လူငယ်သရုပ်ဆောင်များ ပါဝင်သရုပ်ဆောင်ထားတဲ့ ဇာတ်ကားတကား ဖြစ်ပါတယ်။ ဆုရရှိခဲ့တဲ့ ရှလုံးအမ်ရောနမ်ကတော့ ကချင်တိုင်းရင်းသားတဦး ဖြစ်ပါတယ်။

အခုလိုမျိုး တခါမှ အကယ်ဒမီဆု မရရှိဖူးထားသေးတဲ့ မျက်နှာသစ် လူငယ် အနုပညာရှင်၊ အတတ်ပညာရှင်များကို ဆုပေးအပ်ခဲ့တဲ့အတွက်လည်း ပရိသတ်များက အံ့သြ ဝမ်းသာ ချီးကျူး ခဲ့ကြပါတယ်။

“အကောင်းဆုံး ဇာတ်ညွှန်းဆု”ကို “ရွှေကြာ”ရုပ်ရှင်နဲ့ ဒါရိုက်တာဝိုင်း ရရှိခဲ့ပါတယ်။ “ကျနော့် အသက် ၂၃၊ ၂၄ နှစ် ဘိန်းစား ဘဝကတည်းကနေ ချော့တခါ ခြောက်တလှည့်နဲ့ ဇာတ်ညွှန်းပညာကို သင်ကြားပေးခဲ့တဲ့ ဆရာ ညီညီထွန်းလွင်ကို ကျေးဇူးတင်ပါတယ်”လို့ အကယ်ဒမီ ၄ ထပ်ကွမ်းဆုရှင် ဒါရိုက်တာ ဝိုင်းက ပြောပါတယ်။

အဲဒီနောက် “အကောင်းဆုံး ဒါရိုက်တာဆု”ကို ကြေညာခဲ့ရာ ပရိသတ်များ ခန့်မှန်းထားတဲ့ “မုန်းစွဲ”ရုပ်ရှင်နဲ့ ဒါရိုက်တာ သြရသက ရရှိခဲ့ပါတယ်။ အဆိုပါ “မုန်းစွဲ”ရုပ်ရှင်ဟာ ဆရာတော် အရှင်ဆန္ဒာဓိက ရေးသားတဲ့ “အသေလှတဲ့သူ” ဖြစ်ရပ်မှန်ဇာတ်လမ်းကို ရုပ်ရှင်အဖြစ် ဒါရိုက်တာ သြရသက ပုံဖော် ရိုက်ကူးထားတာ ဖြစ်ပါတယ်။

“အကောင်းဆုံး ရုပ်ရှင်ဆု”ကို “ရွှေကြာ”ရုပ်ရှင်နဲ့ ငွေသော်တာ ရုပ်ရှင်ထုတ်လုပ်ရေးမှ ရရှိခဲ့ပါတယ်။ “ရွှေကြာ”ရုပ်ရှင်ကို ဒါရိုက်တာ ဝိုင်း ဇာတ်ညွှန်းရေးသား ရိုက်ကူးပြီး အကောင်းဆုံး ဇာတ်ညွှန်းဆုကိုလည်း “ရွှေကြာ”ရုပ်ရှင်နဲ့ပဲ ဒါရိုက်တာ ဝိုင်းက ရရှိထားပါတယ်။

ဆက်လက်ပြီး “အကောင်းဆုံး အမျိုးသား ဇာတ်ပို့ဆု”ကို ကြေညာရာ အကယ်ဒမီ မတိုင်ခင် တစ်ပြေးနေတဲ့ မင်းသား၊ ပရိသတ်များ ခန့်မှန်းထားတဲ့အတိုင်းပဲ “မုန်းစွဲ”ရုပ်ရှင်နဲ့ ကျော်ကျော်ဗိုက ရရှိခဲ့ပါတယ်။ အဆိုပါ “မုန်းစွဲ”ရုပ်ရှင်ဟာ အသံဆု၊ ဓာတ်ပုံဆုနဲ့ ဒါရိုက်တာဆုတို့ ရရှိထားပြီး ဇာတ်ပို့ဆုဟာ ၄ ဆုမြောက် ဖြစ်ပါတယ်။

“အကောင်းဆုံး အမျိုးသမီး ဇာတ်ပို့ဆု”ကို ကြေညာရာ ပရိသတ်လုံးဝ ထင်မှတ်ထားတဲ့ “နောင်တွင် ဥဒါန်း တည်စေတည်း”ရုပ်ရှင်ကားနဲ့ အေးမြတ်သူက ရရှိခဲ့ပါတယ်။ ဒီဆုဟာ အေးမြတ်သူရဲ့ ပထမဆုံး အကယ်ဒမီဆုဖြစ်ပြီး အေးမြတ်သူမှ ကျေးဇူးတင်စကားကိုလည်း မိနစ် အချိန်အတော်ကြာ ပြောကြားခဲ့ပါတယ်။ အေးမြတ်သူ ကိုယ်တိုင်လည်း ဒီဆုရမယ်လို့ ထင်မှတ်မထားတဲ့ အတွက် ရင်ခုန်စိတ်လှုပ်ရှားနေပုံပါပဲ။

ပရိသတ် အချို့ကတော့ အေးမြတ်သူဟာ ဒီဇာတ်ကားမှာ ဇာတ်ပို့ မင်းသမီး မဟုတ်ပါဘဲ ဘာကြောင့် ဇာတ်ပို့ဆု ပေးရသလဲဆိုပြီး ဝေဖန်မှုများ ရှိနေပါတယ်။ အကယ်ဒမီပွဲ မတိုင်ခင်ကတော့ အကောင်းဆုံး အမျိုးသမီး ဇာတ်ပို့ဆုကို “မုန်းစွဲ” ရုပ်ရှင်နဲ့ မအေးသောင်းလို့ ပရိသတ်တွေက ထင်ကြေးပေး ခန့်မှန်းခဲ့ကြပေမယ့် ပရိသတ်တွေရဲ့ ခန့်မှန်းချက်နဲ့ လွဲချော်ခဲ့ပါတယ်။

“အကောင်းဆုံး အမျိုးသမီး ဇာတ်ဆောင်ဆု”ကို ကြေညာရာမှာတော့ “ရွှေကြာ”ရုပ်ရှင်နဲ့ ဖွေးဖွေးက ရရှိခဲ့ပါတယ်။ “ရွှေကြာ”ရုပ်ရှင်ဟာ တည်းဖြတ်ဆု၊ ဇာတ်ညွှန်းဆု၊ ရုပ်ရှင်ဆုတို့ ရရှိထားပြီး ယခုအခါ “အမျိုးသမီး ဇာတ်ဆောင်ဆု”ကိုပါ ထပ်မံ ရရှိတာ ဖြစ်ပါတယ်။

“ရွှေကြာ”ရုပ်ရှင်မှာ ဖွေးဖွေးက ပြည့်တန်ဆာ မိန်းကလေးတဦးအဖြစ် သရုပ်ဆောင်ထားပြီး ဒီဆုဟာ ဖွေးဖွေး အတွက် ၃ ဆုမြောက် အကယ်ဒမီဆုပဲ ဖြစ်ပါတယ်။ ဖွေးဖွေးကို ပရိသတ်များက “ရွှေကြာ”နဲ့ မဟုတ်ဘဲ “မုန်းစွဲ”ရုပ်ရှင်နဲ့ အကယ်ဒမီ ခန့်မှန်း ပေးခဲ့ကြပါတယ်။ ဖွေးဖွေးဟာ အကယ်ဒမီ မတိုင်ခင်က ကားအက်ဆီးဒင့် ဖြစ်ခဲ့အတွက် အကယ်ဒမီပွဲကိုလည်း လက်မှာ ပတ်တီးဝတ်ဆင်ကာ တက်ရောက်လာတာ တွေ့ရပါတယ်။

နောက်ဆုံးဆု အနေနဲ့ “အကောင်းဆုံး အမျိုးသား ဇာတ်ဆောင်ဆု”ကို ကြေညာခဲ့ရာ ပရိသတ် လုံးဝ ထင်မှတ်မထားတဲ့ “မှော်ဝင်သမန်းကျား”ရုပ်ရှင်နဲ့ သူထူးစံက ရရှိခဲ့ပါတယ်။ “မှော်ဝင်သမန်းကျား”ရုပ်ရှင်ကို အကယ်ဒမီ မောင်မျိုးမင်း (ရင်တွင်းဖြစ်) ရိုက်ကူးပြီး သူထူးစံနဲ့အတူ ခွန်းဆင့်နေခြည် ပါဝင် သရုပ်ဆောင်ထားပါတယ်။ ဒီဆုဟာ သူထူးစံအတွက် ပထမဆုံး အကယ်ဒမီဆု ဖြစ်ပါတယ်။

သူထူးစံဟာ အကယ်ဒမီပွဲ မတိုင်ခင် ပရိသတ်များရဲ့ အကယ်ဒမီ ထင်ကြေးပေးမှုများထဲမှာ တွေ့ရနည်းတဲ့ သရုပ်ဆောင် မင်းသား တလက်ပါ။ အခုလိုမျိုး ပရိသတ်များရဲ့ ထင်ကြေးနဲ့ မတူညီတဲ့အတွက် ပရိသတ်များက အံ့သြနေကြသလို “မုန်းစွဲ”ရုပ်ရှင်နဲ့ “အမျိုးသား ဇာတ်ဆောင်ဆု”ရမယ်လို့ ပရိသတ်များ ခန့်မှန်းပေးခဲ့ကြတဲ့ မင်းသား နေတိုးအတွက်လည်း စိတ်မကောင်း ဖြစ်နေကြပါတယ်။

ဒီနှစ် အကယ်ဒမီ ပေးပွဲကတော့ ပရိသတ်များရဲ့ ထင်ကြေးပေးမှုများနဲ့ အများဆုံး လွဲချော်ခဲ့ရတဲ့ နှစ်လို့လည်း ဆိုနိုင်ပါတယ်။ ဒါ့အပြင် အကယ်ဒမီပွဲ ကျင်းပနေစဉ် အချိန်အတွင်းမှာလည်း ဆုရရှိသူများ စာရင်းဆိုပြီး အွန်လိုင်းမှာ ပေါက်ကြားမှုများ ရှိခဲ့ပါတယ်။ ဒီစာရင်းဟာ တကယ်လား၊ အတည်လားလို့ ဘယ်သူမှ သေချာ တပ်အပ် မပြောနိုင်ပေမယ့် ဒီဆုစာရင်းမှာ ပါဝင်သူများ ကွက်တိ ဆုရခဲ့တာ ဖြစ်ပါတယ်။

၂၀၁၈ ခုနှစ်အတွင်းမှာ ပြသခဲ့တဲ့ ရုပ်ရှင်တွေထဲမှာ ပရိသတ်တွေ သဘောကျ နှစ်ခြိုက်ခဲ့ကြတဲ့ “ဥပါယ်တံမျဉ်”၊ “မုဒြာရဲ့ခေါ်သံ”၊ “မီ”၊ “ဒုဋ္ဌဝတီကို လွန်၍”စတဲ့ ရုပ်ရှင်များကတော့ အကယ်ဒမီဆုများ တဆုမှ မရရှိခဲ့ဘဲ လွဲချော်ခဲ့ပါတယ်။

အကယ်ဒမီ ဆန်ခါတင် စာရင်းဝင်ခဲ့တဲ့ “မီ” ရုပ်ရှင်ဇာတ်ကားကြီးမှာလည်း ရိုက်ကူးသူ ဒါရိုက်တာ ဏကြီးနဲ့ သရုပ်ောဆင် ဇနီးဖြစ်သူ ပိုင်ဖြိုးသုတို့ဟာလည်း အကယ်ဒမီနဲ့ လွဲချော်ခဲ့ရပါတယ်။

ထို့အတူပဲ အကယ်ဒမီ ဆန်ခါတင် စာရင်းဝင်ခဲ့တဲ့ “ဥပါယ်တံမျဉ်”နဲ့ “မုဒြာရဲ့ခေါ်သံ” ရုပ်ရှင်ဇာတ်ကားများကို ဖန်တီး ရိုက်ကူးခဲ့ကြတဲ့ ခီမောင်နှံတို့ နှစ်ဦးလည်း အကယ်ဒမီနဲ့ လွဲချော်ခဲ့ရပါတယ်။ ဒါရိုက်တာ ခရစ္စတီးနားခီ ရိုက်ကူးထားတဲ့ “မုဒြာရဲ့ခေါ်သံ”ရုပ်ရှင်ဇာတ်ကားဟာ နိုင်ငံတကာမှာ ဆုတံဆိပ်ပေါင်းများစွာ ရရှိထားပြီး ခီမောင်နှံဘက်က ပရိသတ်များက ရပ်တည်ကြောင်း ပြောဆိုနေကြပါတယ်။

ဧရာဝတီ သတင်းဌာနမှ အကယ်ဒမီနဲ့ ပတ်သက်ပြီး ပရိသတ်များရဲ့ ဆန္ဒနဲ့ ထပ်တူ ကျမကျ၊ အကယ်ဒမီအပေါ် ကျေနပ်မှု ရှိမရှိ၊ Poll လုပ်မေးမြန်းခဲ့ရာ ၉၄ ရာခိုင်နှုန်းသော ပရိသတ်များက အကယ်ဒမီနဲ့ ထပ်တူ မကျကြောင်း Vote များ ပေးထားတာ တွေ့ရပါတယ်။

၂၀၁၈ ခုနှစ် မြန်မာ့ရုပ်ရှင် အကယ်ဒမီ ထူးချွန်ဆုပေးပွဲ ဆုရရှိသူများ စာရင်း

(၁) တသက်တာ ရုပ်ရှင် ထူးချွန်ဆု – စည်သူ ဒေါ်မြင့်မြင့်ခင်

(၂) အသံဆု – ကိုအေး (မုန်းစွဲ ရုပ်ရှင်)

(၃) တည်းဖြတ်ဆု – ကျော်ခိုင်စိုး (ရွှေကြာ)

(၄) ဓာတ်ပုံဆု – ဝင်းလွင်ထက် (မုန်းစွဲ)

(၅) နောက်ခံ တေးဂီတဆု – ရှလုံးအမ်ရောနမ် (မျက်နှာပြင်များ – Dimensions)

(၆) ဇာတ်ညွှန်းဆု – ဒါရိုက်တာ ဝိုင်း (ရွှေကြာ)

(၇) ဒါရိုက်တာဆု – ဒါရိုက်တာ သြရသ (မုန်းစွဲ)

(၈) ရုပ်ရှင်ဆု – ရွှေကြာ (ငွေသော်တာ ရုပ်ရှင်ထုတ်လုပ်ရေး)

(၉) အမျိုးသား ဇာတ်ပို့ဆု – ကျော်ကျော်ဗို (မုန်းစွဲ)

(၁၀) အမျိုးသမီး ဇာတ်ပို့ဆု – အေးမြတ်သူ (နောင်တွင်ဥဒါန်း တည်စေသတည်း)

(၁၁) အမျိုးသမီး ဇာတ်ဆောင်ဆု – ဖွေးဖွေး (ရွှေကြာ)

(၁၂) အမျိုးသား ဇာတ်ဆောင်ဆု – သူထူးစံ (မှော်ဝင်သမန်းကျား)

The post ပရိသတ်တွေရဲ့ ထင်ကြေးပေးမှုများနဲ့ လွဲချော်ခဲ့ရတဲ့ အကယ်ဒမီ ည appeared first on ဧရာဝတီ.