တေးသီချင်းကောင်းများကို ဖန်တီးရေးသားခဲ့တဲ့ တေးရေးဆရာ နောင်နောင်(S.F) ကတော့ ဂီတကိုဝါသနာပါတဲ့ မျိုးဆက်သစ်ဝါသနာရှင်များကို ကိုယ်ပိုင်ဂီတ တည်ဆောက်ဖို့ လိုတယ်လို့ ပြောပါတယ်။
“ဝါသနာရှင်တွေအနေနဲ့ ကိုယ်ပိုင်ဂီတကို တည်ဆောက်ရမယ်။ ကျနော်တို့နိုင်ငံမှာဖြစ်နေတာက မှားတဲ့စနစ်လေးတွေ ရှိတာပေါ့။ သူများဟာကို ယူဆိုတယ်။ ဆိုချင်သလောက် တက်ဆိုတယ်။ အဲဒါတွေကို ပိုက်ဆံပေးပြီး အားရပါးရ လက်ခုပ်တီးတယ်။ တကယ့်သီချင်းပိုင်ရှင်တွေရဲ့အောက်မှာကျတော့ အဲဒီညကြေး တဝက်လောက်တောင် မရဘူး။ ဖြစ်တတ်တယ်”
“ဖန်တီးတည်ဆောက်မှု မရှိဘူး။ အမြဲတမ်း သူများခြံထဲကပဲ စားနေတယ်။ ခြံပိုင်ရှင်ဆီက ကုန်ရင်လည်းကုန်သွားမယ်။ ပေးချင်မှလည်းပေးတော့မယ်။ အဲဒီလိုဆို အခက်အခဲဖြစ်လိမ့်မယ်။ အခက်အခဲမဖြစ်အောင် ကိုယ့်အပင်ကိုယ်စိုက် ကိုယ့်အသီးကိုယ်စားမယ်ဆိုရင် နှစ်တွေအများကြီးသွားလို့ရတာပေါ့” လို့ တေးရေးဆရာ နောင်နောင်(S.F)က ပြောပါတယ်။
ယခင်က အဆိုပညာရှင်ကို ဝါသနာပါတဲ့သူများကတော့ ကိုယ်ပိုင်သီချင်းများသီဆိုကာ ပရိသတ်ရှေ့ရောက်ရှိ အောင်မြင်လာတဲ့အတွက် တခေတ်မှာ တယောက်လို့ ပြောလို့ရအောင် အောင်မြင်မှုများရရှိပြီး ယခုခေတ်မှာတော့ တခြားသူရဲ့အောင်မြင်ပြီးသားသီချင်းများကို အဆင့်သင့် ယူဆိုနေကြတာဖြစ်တာကြောင့် ဖန်တီးတည်ဆောက်မှု မရှိဘူးလို့ ဆိုပါတယ်။
“အရင်တုန်းဆို အဆိုတော်တွေ တခေတ်ကိုတယောက် ကောင်းကောင်း ပေါ်ထွက်ခဲ့တယ်။ ဒီဘက်ခေတ်မှာက ရောထွေးနေကြတယ်။ ဖန်တီးမှုလည်း မလိုတော့ဘူး။ ကိုဇော်ဝင်းထွဋ်သီချင်းယူဆိုလိုက် ဟိုလူ့သီချင်းအောင်မြင်တာကို ဝင်ဆိုလိုက်နဲ့က အဆင်မပြေတော့ဘူး။ ရေစုန်မှာတော့ ခဏလေး ဟုတ်နေတယ်။ သီးသန့် တနေရာလည်း ရောက်ရော ရပ်သွားလိမ့်မယ်။ ပေါ်လိုက်ပျောက်လိုက်နဲ့ပဲ ဖြစ်သွားရော” လို့ တေးရေးဆရာ နောင်နောင်(S.F)က ပြောပါတယ်။
ယခုခေတ်မှာတော့ လူမှုကွန်ရက်စာမျက်နှာပေါ်တွင် လူသိများရုံနဲ့ ကျေနပ်နေတတ်ကြပြီး လူသိများသွားတဲ့အားကို ယူကာ ကိုယ်ပိုင်ဖန်တီးမှုကို ဆက်လက် မလုပ်ဆောင်နိုင်ကြဘူးလို့ ဆိုပါတယ်။
“တချို့ဆိုလည်း Facebook ကနေ စားပြီးပြီလား Fan တွေ သမီးလှလား ဘာညာလုပ်တယ်။ အဲဒီလောက်နဲ့ ပဲပျော်တယ်။ လူသိသွားပြီး ချောတာလှတာနောက်မှာ ရပ်နေတယ်။ တကယ်တော့ အဲဒီအားကိုယူပြီးတော့ ကိုယ့်ရဲ့ဖန်တီးမှုကို တင်ဆက်ရမှာ။ ပရိသတ်ရဲ့အားနဲ့ ကိုယ့်ရဲ့အားထုတ်မှုနဲ့ပေါင်းပြီး ဝုန်း ဆိုအောင်မြင်တာ” လို့ပြောပါတယ်။
ဆက်လက်ပြီး “အခုက အားမထုတ်တော့ဘူး။ ဘယ်အားထုတ်ကြတော့မလဲ။ အောင်မြင်တဲ့အဆိုတော် တွေရဲ့သီချင်းကို ယူဆိုလည်းရတာပဲဆိုပြီးတွေးကြတယ်။ အဲဒီလိုတွေးလို့တော့ ရေစုန်လေးတခုတော့ အဆင်ပြေတယ်။ လူ့ဘဝကြီးက ရေစုန်ပဲ ဘယ်တော့မှ မရှိဘူး။ ရေဆန်လေးတွေ ရှိတယ်။ ရေကလည်း အမြဲတမ်းမဆန်ဘူး။ တနေ့ စုန်မှာပဲ။ အဲဒီလိုမျိုးအချိန်ကျရင် အခက်အခဲဖြစ်လိမ့်မယ်” လို့ တေးရေးဆရာ နောင်နောင်(S.F)က ပြောပါတယ်။
အခုအချိန်မှာတော့ သီချင်းဆိုပြိုင်ပွဲများ ပေါ်ထွက်လာခဲ့ပြီး အဆိုပါသီချင်းဆိုပြိုင်ပွဲမှ အဆိုတော်ဖြစ်လာသူများ ၊ လူမှုကွန်ရက်စာမျက်နှာပေါ်တွင် ယခင်က အောင်မြင်ပြီးသား အဆိုတော်များရဲ့ သီချင်းများကို Cover ပြန်လည် သီဆိုသူများလည်း များစွာပေါ်ထွက်လာခဲ့ပါတယ်။
The post “ဝါသနာရှင်တွေအနေနဲ့ ကိုယ်ပိုင်ဂီတကို ဖန်တီးနိုင်ရမယ်”လို့ တေးရေးနောင်နောင် (S.F) ပြော appeared first on ဧရာဝတီ.