အသက် ၂၄ နှစ်အရွယ်ရှိတဲ့ ပါကစ္စတန်နိုင်ငံ ရာဝါပင်ဒီမြို့က စားသောက်ဆိုင်တဆိုင်မှာ စားပွဲထိုးအဖြစ် လုပ်ကိုင်တဲ့ Rozi Khan ဆိုသူ အမျိုးသားတဦးဟာ နာမည်ကြီးနေပါတယ်။
ဘာဖြစ်လို့လဲဆိုတော့ သူက Game of Thrones ရုပ်ရှင်ဇာတ်လမ်းတွဲထဲက နာမည်ကြီးဇာတ်ကောင်Tyrion Lannister အဖြစ် သရုပ်ဆောင်ထားတဲ့ မင်းသား Peter Dinklage နဲ့ ရုပ်ချင်းဆင်တူလွန်းတဲ့အတွက် လူမှုကွန်ရက်မှာ သူ့နဲ့ Peter ကို တွဲလျက်ယှဉ်ပြထားပုံတွေ ပျံ့နှံ့နေတာပဲ ဖြစ်ပါတယ်။ သူကိုယ်တိုင်ကတော့ Game of Thrones ရုပ်ရှင်ကိုလည်း မသိသလို Tyrion ကိုလည်း မသိတာကြောင့် သူအလုပ်လုပ်တဲ့စားသောက်ဆိုင်မှာ လာရောက်စားသောက်ကြတဲ့ ဧည့်သည်တွေကကနေ တဆင့် သိရတာပဲ ဖြစ်ပါတယ်။
“ကျနော်ကိုယ်တိုင်ကတော့ အဲဒီရုပ်ရှင်ကို တခါမှလည်း မကြည့်ဖူးသလို ကျနော်နဲ့တူတယ်ဆိုတဲ့ နာမည်ကြီးမင်းသားကိုလည်း မမြင်ဖူးပါဘူး၊ ဆိုင်မှာလာစားကြတဲ့ နိုင်ငံခြားသားစားသုံးသူတွေက ကျနော့်ကို ဓာတ်ပုံတွေရိုက်ကြပြီး မင်းသားရဲ့ ဓာတ်ပုံတွေကိုလည်း ကျနော့်ကို ပြကြပါတယ်၊ အဲဒီတော့မှ ကျနော်ဘာကြောင့် ဓာတ်ပုံတွေ အရိုက်ခံရပြီး နာမည်ကြီးနေရတယ်ဆိုတာကို သိတာပါ” လို့ Khan က AFP နဲ့ အင်တာဗျူးမှာ ဖြေဆိုသွားခဲ့ပါတယ်။
အမေရိကန်နိုင်ငံက ရုပ်ရှင်ထူးချွန်ဆုအဖြစ် ချီးမြှင့်တဲ့ Emmy Award ဆုရှင် မင်းသား Peter Dinklage နဲ့ ရုပ်ရည်ချင်းရော အရပ်အမောင်း ၄ပေ ၅ လက်မချင်းပါ ကွက်တိနီးပါး ဆင်တူလွန်းတဲ့ ပါကစ္စတန်နိုင်ငံသား Khan ကို ကြည့်ရှုဖို့နဲ့ တွဲဖက်ဓာတ်ပုံရိုက်ကူးဖို့အတွက် သူအလုပ်လုပ်တဲ့ စားသောက်ဆိုင်ကို လာရောက် စားသောက်ကြသူတွေဟာလည်း အမြောက်အများပဲ ဖြစ်ပါတယ်။
“သူ့ကို တွေ့လိုက်တဲ့အချိန်မှာ တော်တော်ပျော်သွားပါတယ်၊ ရုပ်ရှင်ထဲက Tyrion Lannister နဲ့ တကယ့်အပြင်လောကမှာ တွေ့လိုက်ရသလိုကို ခံစားရပါတယ်” လို့ ဆိုင်မှာလာရောက်စားသောက်တဲ့ ဧည့်သည်တဦးက ဖြေကြားသွားခဲ့ပါတယ်။
Game of Thrones ရုပ်ရှင်ဇာတ်လမ်းတွဲချစ်သူတွေကတော့ ဧပြီလ ၁၄ ရက်နေ့မှာ ထွက်ရှိမယ့် Game of Thrones ရုပ်ရှင်ဇာတ်လမ်းတွဲရဲ့ Final Season အတွက် ရင်ခုန်စိတ်လှုပ်ရှားနေကြသလို ဒီ နောက်ဆုံး Season မှာ ပါဝင်မယ့် Tyrion ရဲ့ ဇာတ်ဝင်ခန်းတွေအတွက်လည်း ကြိုတင်ရင်ခုန်နေကြတာကြောင့် Rozi Khan နဲ့တွဲဖက်ဓာတ်ပုံရိုက်ကူး လိုသူတွေဟာလည်း အမြောက်အများပဲ ဖြစ်ပါတယ်။
ပါကစ္စတန်နိုင်ငံရဲ့ ရိုးရာအစားအစာတွေ ရောင်းချတဲ့ ဒီစားသောက်ဆိုင်မှာဆိုရင်တော့ လတ်တလောမှာ နိုင်ငံတကာက Game of Thrones Fan တွေရဲ့ အားပေးမှုနဲ့ Khan နဲ့တွေ့ချင်တဲ့သူတွေကြောင့် တဟုန်ထိုးနာမည်ကြီး ရောင်းအားတက်လာနေတာပဲ ဖြစ်ပါတယ်။
Ref. www.boredpanda.com
The post Game of Thrones ဇာတ်လမ်းတွဲထဲကTyrion Lannister နဲ့တူလွန်းတဲ့ စားပွဲထိုး appeared first on ဧရာဝတီ.