MRTV-4 ရုပ်သံဇာတ်လမ်းတွဲတွေကနေတဆင့် ပရိသတ်တွေ နှစ်သက်အားပေးကြတဲ့ သရုပ်ဆောင် မေမြင့်မိုရ်ကတော့ ဒီနှစ်သြင်္ကန် အစီအစဉ်နဲ့ ပတ်သက်ပြီး အခုလိုပဲ ပြောပါတယ်။
“ဒီနှစ် သြင်္ကန်မှာ ရှေ့ ၃ ရက်ကတော့ ဘယ်မှာရှိမလဲ အစီအစဉ်တွေ မရှိသေးပါဘူး။ သြင်္ကန်အတက်နေ့မှာတော့ ကျိုက္ကစံကွင်းနဲ့ အရှေ့မြင်းပြိုင်ကွင်းမှာလုပ်မယ့် Enervon – C Forever သြင်္ကန်မှာ ရှိမယ်။ အဲဒီမှာ Enervon-C ရဲ့ Booth မှာ ပရိသတ်တွေနဲ့ ဂိမ်းကစားမယ့် အစီအစဉ်တွေ၊ ဓာတ်ပုံ အတူရိုက်မယ့် အစီအစဉ်တွေနဲ့ ဖြတ်သန်းမှာပါ”လို့ မေမြင့်မိုရ်က ပြောပါတယ်။
“ငယ်ငယ်တုန်းကတော့ မိသားစုနဲ့ လည်ဖြစ်တယ်။ အခုနောက်ပိုင်း အလုပ်နဲ့ပဲ ဖြတ်သန်းဖြစ်တယ်။ သီချင်းဆိုဖြစ်တယ်။ မနှစ်ကတော့ တောင်ကြီးမှာ သွားနေဖြစ်တယ်”လို့ မေမြင့်မိုရ်က ဆိုပါတယ်။
သရုပ်ဆောင် မေမြင့်မိုရ်ဟာ ဒီနှစ် Star Awards ဆုပေးပွဲမှာ “မိုးပန်းပွင့်ရဲ့ သင်္ကေတ”ရုပ်ရှင်နဲ့ Rising Star Award (Female) ဆု ရရှိခဲ့ပါတယ်။ မေမြင့်မိုရ်က ရုပ်သံဇာတ်လမ်းတွဲနဲ့ ဆုရမယ်လို့ ပရိသတ်များက ခန့်မှန်းပေးထားကြပေမယ့် အခုလို ရုပ်ရှင်ဇာတ်ကားနဲ့ရတော့လည်း အရမ်းဝမ်းသာရပါတယ်လို့ ဆိုပါတယ်။
“Star Awards မှာ Rising Star Award (Female) ဆုရတဲ့အတွက် အရမ်းဝမ်းသာပါတယ်။ ကိုယ့်ကိုယ်ကိုယ်လည်း ကျေနပ်တယ်။ ‘မိုးပန်းပွင့်ရဲ့ သင်္ကေတ’ ဇာတ်ကားနဲ့ ရတာဖြစ်တဲ့အတွက် ကိုယ့်ကို ရုပ်ရှင်ဘက်မှာ အားလုံးက အသိအမှတ်ပြုပေးကြတဲ့ အတွက်လည်း ပိုပြီးပျော်ပါတယ်”လို့ မေမြင့်မိုရ်က ဆိုပါတယ်။
ဆက်လက်ပြီး မေမြင့်မိုရ်က “Star Award အတွက် ရုပ်သံဇာတ်လမ်းတွဲမှာလည်း ညီမ ဇာတ်ကားတွေ ပါတော့ ပရိသတ်တွေကတော့ ဇာတ်လမ်းတွဲတွေနဲ့ ပိုပြီးခန့်မှန်းပေးခဲ့ကြတယ်။ ကိုယ်တိုင်ဆိုရင်လည်း ဇာတ်လမ်းတွဲတွေက ရိုက်ထားတာမကြာသေးသလို လနဲ့ချီပြီး အချိန်အကြာကြီးကို ဒီဇာတ်ကောင်တခုတည်းအပေါ်မှာ စိတ်နှစ်ပြီး လုပ်ခဲ့ရတာလေ”
“ရုပ်ရှင်ဘက်မှာ ကတော့ ကားကောင်းတွေ အရမ်းများသလို အရမ်းတော်ကြတဲ့ ကိုယ့်ရဲ့ စီနီယာတွေရဲ့ ဇာတ်ကားတွေ ဆိုတော့ ကိုယ်တိုင်လည်း ရုပ်ရှင်ဘက်မှာတော့ မမျှော်လင့်ခဲ့ဘူး။ အခုလိုရတော့ အတိုင်းမသိ ဝမ်းသာပါတယ်။ နောက်ပိုင်း ရုပ်ရှင်ဘက်မှာရော ဇာတ်လမ်းတွဲဘက်မှာ ပိုကြိုးစားသွားမယ်”လို့ မေမြင့်မိုရ်က ပြောပါတယ်။
လတ်တလော အနုပညာလှုပ်ရှားမှုများနဲ့ ပတ်သက်ပြီးတော့လည်း အခုလိုပဲ ပြောပါတယ်။
“အခုက ‘ပျောက်ဆုံးနေသော အမှန်တရား’ ဆိုတဲ့ ဇာတ်လမ်းတွဲလေးကို ဦးလူမင်းတို့နဲ့အတူ ရိုက်ကူးနေပါတယ်။ အဲဒီဇာတ်လမ်းတွဲက မိသားစု ဒရာမာ ဇာတ်လမ်းဖြစ်ပေမယ့် Horror ပုံစံလေးတွေလည်း ပါတယ်။ ညီမကတော့ အဲဒီဇာတ်လမ်းထဲမှာ ချမ်းသာတဲ့ သူဌေးသမီးဖြစ်ပြီး ထက်မြတ်တဲ့ ကောင်မလေးအဖြစ် ပါဝင်ထားပါတယ်”လို့ မေမြင့်မိုရ်က ပြောပါတယ်။
သရုပ်ဆောင် မေမြင့်မိုရ်ကတော့ MRTV-4 ဇာတ်လမ်းတွဲများမှတဆင့် ပရိသတ်များ သတိပြုထားမိခဲ့ကြတဲ့ သရုပ်ဆောင် တယောက် ဖြစ်ပြီး ရုပ်ရှင်ဇာတ်ကားကြီးတွေလည်း ရိုက်ကူးလျက် ရှိပါတယ်။
၂၀၁၈ ခုနှစ်အတွင်းမှာ ရုံတင်ပြသခဲ့တဲ့ “မိုးပန်းပွင့်ရဲ့ သင်္ကေတ” ဇာတ်ကားကြီးနဲ့ အနုပညာကြိုးစားမှုတွေကို မှတ်ကျောက်တင်နိုင်ခဲ့တဲ့ မေမြင့်မိုရ်ဟာ Star Awards 2018 ဆုပေးပွဲမှာလည်း Rising Star Award (Female) ဆုကို ရရှိခဲ့ပါတယ်။
The post ဒီနှစ် သင်္ကြန်အစီအစဉ်တွေ ပြောပြတဲ့ သရုပ်ဆောင် မေမြင့်မိုရ် appeared first on ဧရာဝတီ.
