Canel+ ရုပ်သံလိုင်းကနေမကြာခင်ပြသမယ့် “လောကကြိုးဝိုင်း” ဇာတ်လမ်းတွဲမှာ ပါဝင်သရုပ်ဆောင်ထားတဲ့ ရဲနောင်က ဒီကားက သူ့အတွက် စိန်ခေါ်မှုရှိခဲ့တယ်လို့ ဆိုပြီး မြန်မာ့လက်ဝှေ့ကို သေချာလေ့လာပြီး သင်ယူခဲ့တယ်လို့ ဆိုပါတယ်။
“ကျနော်လက်ဝှေ့သမားတယာက်အဖြစ်သရုပ်ဆောင်ဖို့ ဘာအတွေ့အကြုံတွေရခဲ့သလဲဆို အတွေ့အကြုံက အများကြီးပါပဲ။ ကျနော်တို့က မြန်မာ့လက်ဝှေ့ကို သေချာလေ့လာရတယ်။ ဒီ ကာရိုက်တာကို သရုပ်ဆောင်ဖို့ မြန်မာ့လက်ဝှေ့ကို သေချာသင်ခဲ့ရပါတယ်။ မြန်မာ့ရိုးရာလက်ဝှေ့ရဲ့ သမိုင်းကြောင်း၊ သတ်ကိုးသတ် မောင်းကိုးမောင်းအနုပညာကိုလည်း ပုံစံကျအောင် မြန်မာ့ရိုးရာ လက်ဝှေ့အဖွဲ့ချုပ်က ဆရာဦးဇဗ္ဗူကျော်နဲ့ လက်ထောက်ဆရာ ဦးကျော်ဆန်းတို့က အချိန်ပေးသင်ကြားပေးခဲ့ပါတယ်”
” ဘာကြောင့် ကျနော်တို့ ရိုးရာလက်ဝှေ့ဟာ ဆိုင်းဝိုင်းကို အသုံးပြုတာလဲဆိုတာကအစ နောက်ဆုံး မထိုးသတ်ခင်နဲ့ ထိုးသတ်ပြီးချိန် တဦးပေါ်တဦး ဘယ်လိုဂါရဝ တရားထားရလဲဆိုတာအဆုံး အားလုံးကိုသေချာသင်ယူလေ့လာပြီးမှ ရိုက်ကူးရေးစခဲ့တာပါ။ ဇာတ်လမ်းရဲ့ သဘော သဘာဝအရ မိုက်တိမိုက်ကန်း လူငယ်တယာက်ဖြစ်ပေမယ့် အဆုံးသတ်မှာ ဘယ်လိုဖြစ်မလဲဆိုတာ စောင့်ကြည့်ပြီး အားပေးကြပါဦးခင်ဗျာ”
” ကျနော့်ဒီကားအမှတ်တရက အဆုတ်အအေးပတ်တယ်။ လက်ဆစ်ပြတ်ပါတယ်။ ဒဏ်ရာတွေလည်းရပါတယ်။ ကျနော့်အတွက် ဒီကားက စိန်ခေါ်မှုရှိပါတယ် ”လို့ ရဲနောင် ကဆိုပါတယ်။
တခြားနိုင်ငံက ဇာတ်ကားကို ကူးချရိုက်ကူးထားတယ်လို့ ဝေဖန်နေကြတဲ့အပေါ် မြန်မာ့ရိုးရာလက်ဝှေ့ကို ရိုက်ချိန်မှာ နိုင်ငံသိက္ခာ မချချင်တာဖြစ်တဲ့အတွက် ကူးချတာကို လုပ်တာမျိုးမရှိပါဘူးလို့ ရဲနောင်ကဆိုပါတယ်။
“ကျနော့်အနေနဲ့ ကျနော့်သရုပ်ဆောင်မှုကို အားကျကျေနပ်တယ်လို့ မရှိပါဘူး။ ကျနော့်ပရိသတ်တွေ ပြန်လည် သုံးသပ်ကြတဲ့ အပေါ်ကျနော်ကျေနပ်ဝမ်းသာမှာပါ။ ကျနော့်ဒီကားလေးက မြန်မာ့ရိုးရာ လက်ဝှေ့ကားပါ” လို့ ရဲနောင်က ဆိုပါတယ်။
ဒီဇာတ်ကားကို အိန္ဒိယဇာတ်ကား ကော်ပီယူပြီး ပြန်ရိုက်ထားတယ်လို့ ပြောနေကျတဲ့အပေါ်ကိုလည်း ရဲနောင်က ” ဒီကားလေးကို အိန္ဒိယကားကို ကော်ပီပြန်ယူထားတယ်လို့ပြောနေကြတာတွေ ကျနော်တွေ့ပါတယ်။ ကျနော်လက်ဝှေ့ကားတွေ အများကြီး ရွတ်ပြလိုက်လို့ရပါတယ်။ ကျနော်တို့ မြန်မာ့ရိုးရာ လက်ဝှေ့ကို ရိုက်ချိန်မှာ လုံးဝကူးချခြင်းမရှိပါဘူး”
” ကူးချလိုက်ရင် ကျနော်တို့ တသက်လုံးအရှက်ရစေမှာ ဖြစ်တဲ့အတွက် ကျနော်ကူးမချဘူး။ အပိုင်းတပိုင်းမှမကြည့်ရသေးပဲ ပိုစတာကြည့်ပြီး ဝေဖန်တာ စောပါသေးတယ်။ ရုပ်ရှင်နဲ့စီးရီး တော်တော်ကွာပါတယ်။ သူတို့ပြောနေတာက ရုပ်ရှင်ပါ။ ကျနော်တို့က စီးရီးပါ။ ကျနော်မြန်မာ့ရိုးရာ လက်ဝှေ့ကို ရိုက်ချိန်မှာ နိုင်ငံသိက္ခာ မချချင်တာဖြစ်တဲ့အတွက် ကူးချတာကို လုပ်တာမျိုးမရှိပါဘူး”လို့ ရဲနောင် ကဆိုပါတယ်။
ရဲနောင်ကိုတော့ Hip Hop အဆိုတော် တယောက်အနေနဲ့ လူအများက စတင်သိရှိခဲ့ပြီးနောက် ယခုအခါဇာတ်ညွှန်း ရေးသားသူ တယောက်အနေနဲ့ပါ လုပ်ကိုင်နေပြီး သီချင်းအခွေ ထွက်ဖို့အတွက်လည်း လုပ်နေတယ်လို့ သိရပါတယ်။
ရဲနောင်ပါဝင်ထားတဲ့ “လောကကြိုးဝိုင်း”ဇာတ်ကားထဲမှာတော့ သရုပ်ဆောင် ဇင်ဝိုင်း၊ နေအောင်၊ ရဲနောင်၊ ခါရာ၊ မေမြတ်နိုးနှင့် သရုပ်ဆောင်များစွာပါဝင်ထားပြီး ဇာတ်ကားကိုတော့ ဧပြီ၂၈ရက်နေ့မှာ canal+ကထုတ်လွှင့်ပြသွားမှာ ဖြစ်ပါတယ်။
The post မြန်မာ့ရိုးရာ လက်ဝှေ့အကြောင်း ဇာတ်လမ်းတွဲ ရိုက်ကူးထားတဲ့ ရဲနောင် appeared first on ဧရာဝတီ.