“Avengers: Endgame” ရုပ်ရှင်ဟာ ကမ္ဘာအရပ်ရပ်မှာရှိတဲ့ ရုပ်ရှင် ရုံဝင်ငွေတိုင်းမှာ စံချိန်အသစ်တွေ ဆက်တိုက် ရရှိနေတာ တွေ့ရပါတယ်။ Marvel Cinematic Universe ရဲ့ ပထမအပိုင်း နောက်ဆုံးရုပ်ရှင်ဟာ ပြီးခဲ့တဲ့ သီတင်းပတ်ကုန်ပိုင်းရဲ့ ဝင်ငွေအကောင်းဆုံး စံချိန်သစ်တခု တင်သွားပြီ ဖြစ်ပါတယ်။
အဲဒီစံချိန်ကို တင်ထားတဲ့ ရုပ်ရှင်ကတော့ တခြား မဟုတ်ပါဘူး။ ပြီးခဲ့တဲ့နှစ်မှာ ရုံတင်ခဲ့တဲ့ “Avengers: Infinity War” ရုပ်ရှင်ဟာ ပထမဆုံးရုံတင်ပြီး သီတင်းပတ်ကုန်ပိုင်းမှာ ဒေါ်လာ သန်း ၆၃၀ ဒဿမ ၅ သန်း ရရှိခဲ့ပါတယ်။ အခု “Avengers: Endgame” ရုပ်ရှင်က ဝင်ငွေ ဒေါ်လာ ၁ ဒဿမ ၂ ဘီလီယံရရှိထားတာ ဖြစ်တဲ့အတွက် နှစ်ဆလောက် ပိုများတာကို တွေ့ရပါတယ်။
မြောက်အမေရိက ရုံဝင်ငွေစာရင်းမှာလည်း တကယ့်ကိုပဲ စံချိန်တင်ခဲ့တာ တွေ့ရပါတယ်။ အမေရိကန်နိုင်ငံတခုမှာတင် ဒေါ်လာ ၃၅၀ သန်း ရရှိထားပါတယ်။ ကမ္ဘာ့အကြီးဆုံး ရုပ်ရှင်ဈေးကွက်ကြီးလို့ ဆိုနိုင်တဲ့ တရုတ်နိုင်ငံမှာ ဒေါ်လာ ၃၂၉ သန်း၊ ကနေဒါနိုင်ငံမှာကတော့ ဒေါ်လာ ၂၈ ဒဿမ ၅ သန်း ရရှိထားပြီးဖြစ်ပါတယ်။
ဒီရုပ်ရှင်ကိုထုတ်လုပ်တဲ့ Disney အနေနဲ့ ကြည့်မယ်ဆိုရင်တော့ သူတို့ကုမ္ပဏီကြီးဟာ တကယ့်ကို အထူးဝင်ငွေကောင်းတဲ့ ရုပ်ရှင်ထုတ်စက်ကြီး တခုအနေနဲ့ တင်စားရမှာ ဖြစ်ပါတယ်။ ကနေဒါနိုင်ငံသမိုင်းမှာ ဝင်ငွေအကောင်းဆုံးရုပ်ရှင် ၅ ကား ဖြစ်တဲ့ “Avengers Endgame”, “Avengers: Infinity War”, “Star Wars: The Force Awakens”, “Star Wars: The Last Jedi” နဲ့ “Marvel’s the Avengers” တို့ကို Disney ကထုတ်လုပ်တာဖြစ်ပါတယ်။
၂၀၀၈ ခုနှစ်မှာ ထွက်ရှိခဲ့တဲ့ “Iron Man” ကနေ ယခုနှစ်မှာ ထွက်ရှိတဲ့ “Endgame” အထိ ရေတွက်မယ်ဆိုရင် ဒေါ်လာ ၁၉ ဘီလီယံ ရရှိထားပြီးဖြစ်ပါတယ်။ လွန်ခဲ့တဲ့ ၄ နှစ်အတွင်းမှာ ရုံတင်ခဲ့တဲ့ ရုပ်ရှင် ၁၀ ကားထဲက ၉ ကားဟာဆိုရင် အဖွင့်သီတင်းပတ်မှာပဲ ကိုယ်ပိုင်စံချိန်တွေကို အသီးသီးတင်ထားခဲ့တာ ဖြစ်ပါတယ်။
Ref: etcanada
The post အဖွင့် သီတင်းပတ်မှာတင် ဒေါ်လာ ၁ ဒဿမ ၂ ဘီလီယံ ရရှိခဲ့တဲ့ “Avengers: Endgame” ရုပ်ရှင် appeared first on ဧရာဝတီ.