Cover Song များသီဆိုပြီး ပရိသတ်ရဲ့အားပေးမှုရရှိခဲ့တဲ့ အဆိုတော် မေလသံစဉ်ကတော့ မကြာခင်မှာ သူမရဲ့ ဒုတိယမြောက် တကိုယ်တော်အခွေ ထွက်ရှိတော့မှာဖြစ်ပြီး ဒီအခွေထဲမှာတော့ ကိုယ်တိုင်ရေးသားထားတဲ့ စိတ်ဓာတ်ခွန်အားပေးတဲ့ သီချင်းများ ပါဝင်သွားမယ်လို့ ဧရာဝတီကို ပြောပါတယ်။
“ပုံမှန်အားဖြင့် စိတ်ဓာတ်ခွန်အားပေးတဲ့ သီချင်းတွေ ရေးဖြစ်တာ များတယ်။ သီချင်းလေး နားထောင်တဲ့အချိန်မှာ စိတ်ဓာတ်ကျနေသူဖြစ်ဖြစ်၊ အားငယ်နေတဲ့သူဖြစ်ဖြစ် စိတ်ထဲမှာ တခုခုပျော်သွားရမယ်ပေါ့။ အဲဒီလိုစိတ်ဓာတ် ခွန်အားဖြစ်တဲ့ သီချင်းလေးတွေ ရေးဖြစ်တာများပါတယ်”လို့ အဆိုတော် မေလသံစဉ်က ပြောပါတယ်။
အသက် ငယ်ရွယ်သေးပေမယ့် သီချင်းများကို ကိုယ်တိုင်ဖန်တီး ရေးသားသီဆိုလေ့ရှိတဲ့ မေလသံစဉ်ကတော့ အသက်အရွယ်အရ စိတ်ဓာတ်ခွန်အားပေးတဲ့သီချင်းများကိုသာ ရေးသားဖြစ်တယ်လို့ ဆိုပါတယ်။
“အမြဲတမ်းတော့ ဘယ်သူကတော့ ပျော်နေမှာလဲနော်။ စိတ်ဓာတ်ကျနေတဲ့အချိန်တွေ၊ စိတ်ညစ်နေတဲ့အချိန်တွေ ရှိမှာပေါ့။ အဲဒီလိုအချိန်မှာ သီချင်းလေးတွေ နားထောင်ပြီး ပျော်ရတဲ့ ခံစားမှုမျိုးပေးချင်လို့ သီချင်းလေးတွေ ရေးဖြစ်တာပါ။ နောက်ပြီးတော့ သမီးက အချစ်သီချင်းတွေ မရေးတတ်ဘူး။ ကိုယ်တိုင်လည်းမခံစားဖူးဘူးဆိုတော့ စိတ်ဓာတ်ခွန်အားပေးတဲ့ သီချင်းတွေပဲရေးဖြစ်တာပါ”လို့ မေလသံစဉ်ကပြောပါတယ်။
ဒုတိယမြောက်အခွေအတွက် သီချင်းများကို ပြင်ဆင်နေပြီး သူမကိုယ်တိုင် ရေးသားထားတဲ့ စိတ်ဓာတ်ခွန်အားပေးတဲ့ သီချင်းများအပြင် တေးရေးဆရာ မင်းချစ်သူရဲ့ သီချင်းများနဲ့ စုစုပေါင်း ၁၀ ပုဒ်ခန့် ပါရှိမယ်လို့ သိရပါတယ်။
“သီချင်းနဲ့ ပတ်သက်ပြီးတော့ တကိုယ်တော်အခွေ စီစဉ်နေပါတယ်။ မိုးတွင်းလောက် ထွက်ဖြစ်မယ် ထင်တယ်။ အဓိကက ကိုယ်တိုင်ရေး သီချင်းလေးတွေပေါ့။ သမီးက သီချင်းရေးရတာလည်း ဝါသနာပါတော့ ကိုယ်တိုင်ရေး သီချင်းလေးတွေလည်း ပါမယ်။ ဆရာ မင်းချစ်သူ ရေးပေးတဲ့ သီချင်းတွေလည်း ပါပါတယ်” လို့ မေလသံစဉ်က ပြောပါတယ်။
ပထမအခွေဖြစ်တဲ့ “Celebrity” ဆိုတဲ့အခွေမှာ ကိုယ်တိုင်ရေးသားထားတဲ့ သီချင်းများ ပါဝင်ခဲ့ပြီး အခုပြုလုပ်နေတဲ့ ဒုတိယမြောက်အခွေမှာတော့ အသက်အရွယ်အရ အသံပိုင်း ကွာခြားသွားမယ်လို့ ဆိုပါတယ်။
“အခွေကတော့ စလုပ်နေပါပြီ။ သီချင်းကတော့ ၁၀ ပုဒ်လောက် ပါပါမယ်။ဒုတိယမြောက်အခွေမှာက အသက်အရွယ်အရ အသံပိုင်းကွာခြားသွားမယ်ထင်တယ်။ သမီးအသံကိုက ပရိသတ်တော်တော်များများ ပြောကြတယ်။ သူများနဲ့ မတူဘူး။ ထူးခြားတယ်ပေါ့။ အဲဒီတော့ စိုးရိမ်မှုတော့ မရှိပါဘူး”လို့ မေလသံစဉ်ကပြောပါတယ်။
မေလသံစဉ်ကိုတော့ ပရိသတ်အများက သူမရဲ့ထူးခြားတဲ့အသံဖြင့် အဆိုတော်ကြီးများရဲ့ Cover သီချင်းများ သီဆိုရာမှ သတိထားမိခဲ့ကြပြီး ပရိသတ်တွေ ချစ်ခင်အားပေးကြတဲ့ ဆယ်ကျော်သက် အဆိုတော်တယောက် ဖြစ်ပါတယ်။
The post စိတ်ဓာတ်ခွန်အားပေးတဲ့ သီချင်းများကို ကိုယ်တိုင်ရေးသား သီဆိုနေတဲ့ မေလသံစဉ် appeared first on ဧရာဝတီ.