အခု လတ်တလော tvN ရုပ်သံလိုင်းကနေ ပြသနေတဲ့ “Arthdal Chronicles” ကိုရီးယားစီးရီးဟာ ခန့်မှန်းထားတာထက် လူကြည့်နှုန်း ကျဆင်းနေရုံသာမက နာမည်ကျော် ရုပ်သံစီးရီးနဲ့ ရုပ်ရှင်တွေကို ကူးချထားတယ်လို့ အငြင်းပွားဖွယ် ဝေဖန်မှုတွေနဲ့ ရင်ဆိုင်နေရတယ်လို့ သိရပါတယ်။
ဇွန်လ ၁ ရက်နေ့ကနေ စလို့ အပတ်စဉ် စနေနဲ့ တနင်္ဂနွေနေ့တွေမှာ ထုတ်လွှင့်ပြသနေတဲ့ အဲ့ဒီဒရာမှာဟာ Arthdal လို့ခေါ်တဲ့ ရှေးဟောင်းမြို့မှာ စတင်ပေါက်ဖွားခဲ့တဲ့ နိုင်ငံရေးအကြောင်း ဇာတ်အိမ်တည်ထားပါတယ်။
အဲဒီ ဒရာမာဟာ စတင် မပြသမီမှာပဲ မင်းသား ဂျန်ဒေါင်ဂန်းနဲ့ ဆောင်းဂျွန်ကီတို့လိုမျိုး နာမည်ကျော် သရုပ်ဆောင်တွေ ပါဝင်ထားတဲ့အပြင် ဝမ် ဘီလီယံ ၄၀ အကုန်အကျခံ ရိုက်ကူးထားတဲ့ စီးရီးဖြစ်တာကြောင့် မီဒီယာတွေရဲ့ စိတ်ဝင်စားမှုကို ခံခဲ့ရပါတယ်။
ဒါပေမဲ့ ပထမဆုံး သီတင်းနှစ်ပတ် ပြသခဲ့ပြီးတဲ့အချိန်မှာပဲ ဒရာမာဟာ စိတ်ပျက်စရာ ရလဒ်တွေကို ရရှိခဲ့ပါတယ်။ ပထမဆုံး အပိုင်း ၄ ပိုင်းမှာ လူကြည့်နှုန်းဟာ “Mr. Sunshine” လိုမျိုး tvN ကနေ ထုတ်လွှင့်ခဲ့တဲ့ ဒရာမာ လူကြည့်နှုန်း ဂဏန်းနှစ်လုံး ပမာဏကိုတောင် လိုက်မမီခဲ့ဘဲ ၆ ရာခိုင်နှုန်းကနေ ၇ ရာခိုင်နှုန်းအထိပဲ ရှိခဲ့တာကို တွေ့ရပါတယ်။
တချိန်တည်းမှာပဲ ပါဝင်တဲ့ ဇာတ်ကောင်တွေ၊ ဝတ်စုံတွေ၊ ဆက်တင်တွေနဲ့ “Arthdal Chronicles” မူရင်းဝတ္ထု ရေးသားမှုတွေဟာ နိုင်ငံရပ်ခြားက စိတ်ကူးယဉ်နောက်ခံ ဇာတ်ကြောင်းတွေ၊ သမိုင်းနောက်ခံ အချိန်ကာလ ပါဝင်တဲ့ စိတ်ကူးယဉ် ဒရာမာနဲ့ ရုပ်ရှင်တွေကို ရောနှောထားတာဖြစ်တယ်လို့ ဝေဖန်သူတွေက ပြောဆိုလာပါတယ်။
ဒရာမာရဲ့ အမြည်းဓာတ်ပုံတွေမှာ ဇာတ်ကောင် တော်တော်များများဟာ အမေရိကန် နာမည်ကျော် စီးရီး “Game of Thrones” ထဲက ဝတ်စုံတွေလို အရောင်နဲ့ ဒီဇိုင်းပုံစံတူနဲ့ ဝတ်ဆင်ထားခဲ့တာကို မြင်တွေ့ခဲ့ရပါတယ်။
အဲဒီ ဒရာမာနှစ်ခုကြားက ဇာတ်ကောင်တွေရဲ့ အဝတ်အစားတွေနဲ့ ဇာတ်ဝင်ခန်း အသုံးဆောင်တွေကို နှိုင်းယှဉ်ထားတဲ့ ဓာတ်ပုံတခုကို အမေရိကန် ဆိုရှယ်ဝက်ဘ်ဆိုက် Reddit မှာ တင်ခဲ့တဲ့အပြင် ကိုရီးယား အွန်လိုင်းအသိုင်းအဝန်း၊ Portal တွေနဲ့ ဆိုရှယ်မီဒီယာတွေအထိ ပျံ့နှံ့လာခဲ့ပါတယ်။
ဥပမာ “Arthdal Chronicles” ရဲ့ အဓိကဇာတ်ကောင်၊ မင်းသား ဂျန်ဒေါင်ဂန်း သရုပ်ဆောင်ထားတဲ့ စစ်သည်တော်နဲ့ အထင်ကရပုဂ္ဂိုခ် တာဂွန်းဟာ “Game of Thrones” ထဲက Jon Snow နဲ့ ဆင်တူနေပါတယ်။ ဒရာမာ နှစ်ခုထဲက အမျိုးသမီး ဇာတ်ကောင်နှစ်ဦးရဲ့ အနီနဲ့ အဖြူရောင် ဝတ်စုံတွေဟာလည်း ဆင်တူနေပြီးတော့ “Game of Thrones” စီးရီးရဲ့ ကိုရီးယားပရိသတ်တွေက တော်တော်လေးဝေဖန်နေကြပါတယ်။
ဒါ့အပြင် တချို့ဇာတ်ဝင်ခန်းတွေက ၂၀၀၆ ခုနှစ်မှာ ထွက်ရှိခဲ့တဲ့ “Apocalypto” ရုပ်ရှင်နဲ့ ၂၀၀၉ ခုနှစ်မှာ ထွက်ရှိခဲ့တဲ့ “Avatar” ရုပ်ရှင်ထဲက ဇာတ်ဝင်ခန်းတွေ၊ စကားပြောခန်းတွေနဲ့ တူနေတယ်ဆိုပြီး ထောက်ပြပါတယ်။ ဒါပေမဲ့ ဒရာမာ ရိုက်ကူးရေးအဖွဲ့ကတော့ “Game of Thrones” နဲ့ နှိုင်းယှဉ် ဖော်ပြနိုင်တာမျိုး မရှိဘဲ သူတို့တွေဟာ စိတ်ကူးယဉ်ပုံစံကို အခြေခံထားတဲ့ ဇာတ်လမ်း အသစ်တပုဒ်ကို ဖန်တီးဖို့ ကြိုးစားခဲ့ကြတာ ဖြစ်တယ်လို့ဆိုပါတယ်။
Ref:Yonhap
You may also like these stories:
“Game of Thrones” အပြီးမှာ စိတ်ကျန်းမာရေး ကုသမှု ခံယူနေရတဲ့ မင်းသား Kit Harington
လူကြည့်နှုန်း အများဆုံးစံချိန်နဲ့ အဆုံးသတ်သွားပြီဖြစ်တဲ့ “Game of Thrones” စီးရီး
ဒေါ်လာ ၃၃ သန်းကျော် အကုန်အကျခံ ရိုက်ကူးထားတဲ့ “Arthdal Chronicles” ဒရာမာ မကြာမီ ပြမည်
ပြသတဲ့ ပထမဆုံးရက်မှာတင် ကြည့်ရှုနှုန်း အမြင့်ဆုံး စံချိန်တင်ခဲ့တဲ့ “Arthdal Chronicles”
The post “Game of Thrones” နဲ့ ဆင်တူနေလို့ ဝေဖန်ခံနေရတဲ့ “Arthdal Chronicles” စီးရီး appeared first on ဧရာဝတီ.