ငယ်စဉ်ကတည်းက အနုပညာ ဝါသနာပါပြီး ကိုယ်တိုင် စန္ဒရားတီး၊ ဂစ်တာတီးကာ Cover Song တွေ ဆိုရင်း လူသိများလာတဲ့ ဆယ်ကျော်သက် အဆိုတော် မေလသံစဉ်ဟာ ဒီနှစ် တက္ကသိုလ်ဝင်တန်း စာမေးပွဲကြီးကို အောင်မြင်ခဲ့တဲ့အတွက် ဝါသနာပါတဲ့ အနုပညာအလုပ်တွေကို ပိုပြီးလုပ်သွားမယ်လို့ ပြောပါတယ်။
“ကျောင်းကတော့ ဘယ်ကျောင်း ဆက်တက်ဖြစ်မလဲ မစဉ်းစားရသေးဘူးပေါ့။ ပြည်တွင်းနဲ့ ပြည်ပ ဘယ်ဟာတက်ရမလဲ စဉ်းစားနေတုန်းပါ။ သမီး ဝါသနာပါတဲ့ အနုပညာအလုပ်ကို အဓိကထားပြီး လုပ်သွားမယ်။ ပညာရေးပိုင်းကိုလည်း ဘွဲ့ရတဲ့အထိ ကြိုစားသွားမှာပါ။ သမီးကို ဂရုတစိုက် ချစ်ပေးပြီး စာမေးပွဲအတွက်လည်း ဝမ်းသာပေးကြတဲ့အတွက် ပရိသတ် တဦးချင်းစီကို ကျေးဇူးတင်ပါတယ်”
“အခု စာမေးပွဲလည်း ပြီးသွားပြီဆိုတော့ ပြောချင်ပါတယ်။ ၁၀ တန်းတုန်းကတော့ ၁၀ တန်းပြီးရင် အခွေ ထုတ်မယ်၊ ဘာသာရပ်တွေ သင်မယ်။ Video Edit လုပ်တာတွေလည်း သင်မယ်ပေါ့။ စဉ်းစားထားတာတွေ အခု အကုန်လုံး ခွင့်ရပါပြီ။ အဖေရော၊ အမေရော သမီးကို အားလုံး ပံ့ပိုးပေးမှာပါ”လို့ အဆိုတော် မေလသံစဉ်က ပြောပါတယ်။
ရေဒီယို သီချင်းဟောင်းတွေကို ပြန်ဆိုဖို့ရှိတဲ့ အဆိုတော် မေလသံစဉ်က “နတ်သားပုံပြင်”ဆိုတဲ့ သီချင်းကို အွန်လိုင်းကနေ Music Video တင်ပေးဖို့ရှိတယ်လို့ ဆိုပါတယ်။
“လတ်တလောမှာတော့ အနုပညာလှုပ်ရှားမှုအနေနဲ့ ကြော်ငြာတွေ ရိုက်ဖြစ်နေပါတယ်။ တခြား ပွဲတက်တွေလည်း ရှိတယ်။ ရှိုးပွဲတွေလည်း ဆိုဖို့ ရှိတယ်။ နောက်ထပ် ကုန်ပစ္စည်းတခုမှာ Brand Ambassador အနေနဲ့ လက်ခံဖို့လည်း ရှိပါတယ်။ အခုတော့ သမီးကိုယ်တိုင် ရေးထားတဲ့ ‘နတ်သားပုံပြင်’ ဆိုတဲ့ သီချင်း တင်ပေးဖို့ ရှိပါတယ်။ အဲ့သီချင်းကို Tik Tok မှာလည်း ဆော့နေကြတော့ အဲ့သီချင်းလေး တင်ပေးမယ်”
“သမီးက အခွေ ၂ ခွေ ထွက်ချင်တယ်။ သမီးရဲ့ ကိုယ်ပိုင်သံစဉ်ခွေကတော့ ကြာဦးမယ်။ သမီးရဲ့အဘိုး တေးရေး စန်းသော်တာ သီချင်းတွေကို Audio CD အနေနဲ့ တခုထွက်ဖို့ ကြိုးစားနေပါတယ်။ အဲ့အခွေကိုတော့ အရင်တုန်းက ရေဒီယိုသီချင်းတွေ ပြန်ဆိုမှာပါ။ သီချင်း ၆ ပုဒ်လောက် အရင်ထွက်မယ်။ သီချင်းတွေက ခက်တဲ့အတွက် ကြိုးစားပြီး ဆိုရတယ်။ လူသိပြီးသား သီချင်းဟောင်းတွေကို ပြန်ဆိုမှာပါ။ အဲ့အခွေကို အခုပြင်ဆင်နေပြီ။ ၃ လလောက် နေရင်တော့ ထွက်နိုင်အောင် ကြိုးစားနေပါတယ်”လို့ မေလသံစဉ်က ပြောပါတယ်။
ဆယ်ကျော်သက် အဆိုတော် မေလသံစဉ်ကတော့ ပရိသတ်တွေ အားပေးမှုကို အခိုင်အမာ ရရှိထားသူ တဦးဖြစ်ပြီး VIVO စမတ်ဖုန်း Brand ရဲ့ Key Opinion Leader (KOL) တယောက်လည်း ဖြစ်ပါတယ်။
You may also like these stories:
သားတွေအပေါ် ထိန်းကျောင်း ပဲ့ပြင်မှုအပိုင်းကို ပြောပြတဲ့ ဝမ်း
“အစ်ကို နှစ်ယောက်ကို ကြည့်ပြီး အချစ်ရေး မစဉ်းစားသေးဘူး”လို့ ပြောတဲ့ သဇင်ထူးမြင့်
Music Video တွေမှာ ပိန်ပိန်လေးဖြစ်ချင်လို့ ဝိတ်ချခဲ့တဲ့ အဆိုတော် AR-T
The post တက္ကသိုလ်ဝင်တန်း အောင်သွားပြီဖြစ်လို့ အနုပညာ အလုပ်တွေ ပိုလုပ်သွားမယ့် မေလသံစဉ် appeared first on ဧရာဝတီ.