ချစ်သူ မရှိသေးတဲ့ အဆိုတော် ချယ်ရီသင်းက ချစ်သူထားရင် ကိုယ်ချင်းစာတရားရှိပြီး အလုပ်အပေါ် နားလည် လေးစားမှုရှိတဲ့သူကို ရွေးချယ်မယ်လို့ ဧရာဝတီကို ပြောပါတယ်။
“ချယ်ရီ့ကို ကြိုက်တဲ့သူကို မရှိတာ။ ချယ်ရီက မျက်နှာ တည်တော့ စကားမပြောဖူးတဲ့သူဆိုရင် ရှိန်လို့လား မသိဘူး။ ရည်းစားစကား လာမပြောကြဘူး။ အမှန်တိုင်းပြောရရင် အခုချိန်ထိ ကြိုက်မယ့်သူလည်း မရှိဘူး။ ချစ်သူများနေ့ဆို ဘယ်သူ့ဆီကမှ ဘာမှ မရဘူး။ ရည်းစားရှိခဲ့တာတောင် အဲ့ရက်နား နီးလာရင် ပြတ်သွားရော”
“တယောက်တည်း အထီးကျန်တော့ ကျန်တယ်။ ငါက အရမ်း ကြည့်ကောင်းနေလို့ ရည်စားမရတာလို့ပဲတွေးရတာပေါ့။ ချယ်ရီ့ အသက် အခု ၂၄ ပေါ့။ ၂၀၊ ၂၁ တုန်းကတော့ ကိုယ်လိုချင်တဲ့ ပုံစံတွေ၊ သတ်မှတ်ထားတဲ့ ပုံစံတွေ ရှိတယ်။ အခုနောက်ပိုင်းတော့ အဲ့လို မရှိဘူး။ တကယ်တမ်း စိတ်ပြောင်းသွားတာက ကိုယ်ချင်းစာတရား ရှိပြီး ချယ့်ကို ချစ်ရင် ရပြီ” လို့ ချယ်ရီသင်းက ဆိုပါတယ်။
ဆက်လက်ပြီး ငွေကြေးက အဓိက မဟုတ်ဘဲ အချစ်မှာ အသက်ငယ်တာ၊ ကြီးတာနဲ့လည်း မဆိုင်ဘူးလို့ ချယ်ရီသင်းက ပြောပါတယ်။
“ချယ့်အလုပ်ကို နားလည်ပြီး လေးစားမှုရှိရင် ရပြီ။ ငွေကြေးတွေက အဓိက မဟုတ်ဘူးပေါ့။ အချစ်မှာ ငယ်တာ၊ ကြီးတာ မဆိုင်ပါဘူး။ တချို့ ယောကျာ်းတွေက ယောကျာ်းဆန်တဲ့စိတ် ရှိတယ်။ မိန်းမတယောက်ကို လေသံနဲ့ မောက်မောက်မာမာတောင် မပြောတဲ့သူတွေ ရှိတယ်။ တချို့ကျတော့လည်း သူတို့ မှန်တယ်ထင်ရင် အော်ပြောတာတို့ လက်ပါတို့ ရှိတယ်။ ကိုရယ် မောင်ရယ် မဟုတ်ဘူး။ ချယ့်အတွက် နားလည်မှုရှိပြီး ချစ်ရင် ရပါပြီ ”လို့ ချယ်ရီသင်းက ပြောပါတယ်။
Stay Home ကာလမှာ ဂစ်တာတီးတာကို လေ့ကျင့်ဖြစ်တဲ့ ချယ်ရီသင်းက ရောဂါတွေ ပျောက်လို့ အလုပ်တွေ ပြန်လုပ်ရရင်တော့ သူရတဲ့ အနုညာကြေးတွေ ဖယ်ပြီးလှူဦးမယ်လို့ ဆိုပါတယ်။
“Stay Home ကာလမှာ ဂစ်တာတော့ ကျွမ်းကျွမ်းကျင်ကျင် လေ့ကျင့်ဖြစ်တယ်။ သီချင်းတွေ ရေးဖြစ်တယ်။ ဘုရားတရား လုပ်ဖြစ်တယ်။ ဒီကာလမှာ လူတွေကို နားလည်တတ်အောင်၊ စာနာတတ်အောင် ပိုပြီး စိတ်ကိုကောင်းအောင် ထားရမယ်ဆိုတဲ့ အသိကို ရတယ်။ ရောဂါတွေ ပျောက်လို့ အလုပ်တွေ ပြန်လုပ်ရရင် ချယ်ရတဲ့ အနုညာကြေးတွေ ဖယ်ပြီး လှူမယ်”
“ချယ့်ကို ဝေဖန်ပြောဆို တိုက်ခိုက်တာတွေလည်း ခွင့်လွှတ်ပေးလိုက်တယ်။ ချယ် အခုချိန်မှာ အခက်အခဲတွေ ရှိတာပေါ့။ ချယ်တို့မှ မဟုတ်ဘူး။ တကမ္ဘာလုံး ခက်ခဲနေကြတာပေါ့။ ချယ်ကတော့ အားတင်းထားတယ်။ နောက်ထပ် ကောင်းတဲ့ အခွင့်အရေးတွေ ရလာမယ်လို့ စိတ်ဓာတ်ခွန်အား ပြန်ယူရတယ်။ ခက်ခဲနေကြပေမယ့် စိတ်အားမငယ်ပါနဲ့”လို့ ချယ်ရီသင်းက ပြောပါတယ်။
အဆိုတော် ချယ်ရီသင်းကတော့ မကြာသေးခင်ကမှ “မလို့ပဲခေါ်” သီချင်း ထွက်ရှိထားပြီး ဒီသီချင်းက Facebook ဆိုရှယ်မီဒီယာနဲ့ Tik Tok အသုံးပြုသူတွေကြားမှာ ရေပန်းစားနေပါတယ်။
You may also like these stories:
“မြန်မာရုပ်ရှင်တွေမှာ သဘင်က ကူးလာတဲ့ အိုက်တင်တွေ များနေတယ်”
Food Blogger တယောက်လို့ မခံယူထားဘူးလို့ ရွှေသမီး ပြော
အိမ်ဆောက်လိုက်လို့ ငွေကြေး အကျပ်အတည်းဖြစ်ခဲ့တဲ့ လိမ္မော်သီး
The post ချစ်သူထားရင် ကိုယ်ချင်းစာစိတ် ရှိတဲ့သူကို ရွေးမယ့် ချယ်ရီသင်း appeared first on ဧရာဝတီ.