Miss International Queen Myanmar 2014 ဂေးလ်အလှမယ် မျိုးကိုကိုစန်းကို ရုပ်ရှင်နှင့် ဗီဒီယို သရုပ်ဆောင် အကယ်ဒမီ ဝတ်မှုန်ရွှေရည် (ခေါ်) ကစ်ကစ်က ဆက်သွယ်ရေး ဥပဒေပုဒ်မ ၆၆ (ဃ) နဲ့ တရားစွဲဆိုထားတယ်လို့ သိရပြီး ဒီကနေ့ သူ့ကို ထိန်းသိမ်းထားတဲ့ ရန်ကင်းမြို့နယ် ရဲစခန်းကနေ ရန်ကင်းမြို့နယ်တရားရုံးမှာ ရုံးထုတ်ယမန်ယူတယ်လို့ သိရပါတယ်။
ဇန်နဝါရီလ ၁၇ ရက်နေ့က MAI လေကြောင်းလိုင်းနဲ့ ထိုင်းနိုင်ငံ၊ ဘန်ကောက်မြို့က ပြန်လာတဲ့ ဂေးအလှမယ် မျိုးကိုကိုစန်းကို ရန်ကုန် အပြည်ပြည်ဆိုင်ရာ လေဆိပ်မှာ အရပ်ဝတ်နဲ့ လူ ၄ ဦးက စစ်ဆေးစရာရှိတယ်ဆိုပြီး ရန်ကင်းရဲစခန်းကို ဖမ်းဆီး ခေါ်ဆောင်သွားခဲ့တာဖြစ်တယ်လို့ သိရပါတယ်။
“မျိုးကိုကိုစန်းကို ရဲစခန်းက ခေါ်တယ်ဆိုတာတော့ မသိဘူး။ ဒီနေ့ တရားခွင်မှာ ရောက်နေတယ်ဆိုလို့ မိတ်ဆွေ တယောက်အနေနဲ့ ကူညီပေးဖို့ လာခဲ့တယ်။ တခြားသိရတာတော့ သူနဲ့ အတူတူ ဘန်ကောက်ကနေ ပြန်လာတဲ့ သူငယ်ချင်း နှစ်ယောက်နဲ့အတူ လေဆိပ်မှာ Immigration ဖြတ်ပြီးသွားပြီ။ အထုတ်ရွေးနေတုန်း အရပ်ဝတ်နဲ့ လူ ၄ ယောက် ရောက်လာပြီး သူ့ကို စစ်ဆေးမေးမြန်းစရာရှိတယ်ဆိုပြီး ခေါ်သွားတယ်လို့ မျိုးကိုကိုစန်းက ပြောတယ်။ ပြီးတော့ သူ့ဖုန်းကို စက်ပိတ်လိုက်တယ်လို့လည်း ပြောတယ်။ သူ့ကို ဝတ်မှုန်ရွှေရည်က ၆၆(ဃ) နဲ့ တရားစွဲထားတယ်လို့ သိရတယ်” လို့ မျိုးကိုကိုစန်းရဲ့အရေးကိစ္စကို လိုက်လံဆောင်ရွက်ပေးနေတဲ့ မိတ်ဆွေဖြစ်သူ ရှင်းသန့်က ဧရာဝတီကို ပြောပါတယ်။
ရန်ကင်းရဲစခန်းမှာ အမှုဖွင့်တာကတော့ Facebook မှာ Cele Cele Small Page ရဲ့ Admin ဟာ မျိုးကိုကိုစန်းဖြစ်ပြီး သူ့ကို အဲ့ဒီ လူမှုကွန်ရက် စာမျက်နှာမှာ မဟုတ်မမှန် ရေးသားသူအဖြစ် တရားစွဲဆိုခံထားရတယ်လို့ မျိုးကိုကိုစန်းရဲ့ မိတ်ဆွေဖြစ်သူ ရှင်းသန့်ရဲ့ပြောပြချက်အရ သိရပါတယ်။
တရားရုံး ယမန်ယူချိန်မှာ မျိုးကိုကိုစန်းရဲ့လျှောက်တင်ချက်ကတော့ သူဟာ အဆိုပါ Cele Cele Small Facebook Page ရဲ့Admin မဟုတ်ကြောင်း၊ သူ့ကို လေဆိပ်မှာ စစ်မေးစရာရှိလို့ဆိုပြီး လူ ၄ ဦးမှ ခေါ်ဆောင်သွားကြောင်းနဲ့ ယခုလို သက်သေခိုင်ခိုင်လုံလုံမရှိဘဲ သူ့ကို ဖမ်းဆီးခွင့်ရှိပါသလားလို့ လျှောက်တင်ခဲ့ကြောင်း ရှင်းသန့်က ပြန်လည် ပြောပြ ပါတယ်။
ယခု အမှုမှာ မျိုးကိုကိုစန်းကို ဆက်သွယ်ရေး ဥပဒေပုဒ် ၆၆ (ဃ) နဲ့ တိုင်ကြားထားတာဖြစ်ပြီး စုံစမ်းစစ်ဆေးမှုများ ပြုလုပ်သွားမှာ ဖြစ်ကြောင်း သိရပါတယ်။
ရန်ကင်း ရဲစခန်းမှာ မျိုးကိုကိုစန်းကို ဇန်နဝါရီလ ၁၈ ရက်နေ့မှ လကုန် ဇန်နဝါရီလ ၃၁ ရက်နေ့အထိ ယမန် ၂ ပတ် ချုပ်နှောင်ရန် ရန်ကင်းတရားရုံးက ဆုံးဖြတ်ထားပြီး အဲဒီကာလအတွင်း မျိုးကိုကိုစန်းကို လိုအပ်တာတွေ စစ်ဆေးမေးမြန်း သွားမယ်လို့လည်း သိရပါတယ်။
“Cele Cele Small လို့ စွပ်စွဲပေမယ့် အဲဒီ Page ဟာ အခုချိန်ထိ ပို့စ်တွေတင်ပြီး အသက်ဝင်နေဆဲပဲ။ ပို့စ်တွေ စက္ကန့်မပြတ်၊ မိနစ်နဲ့ အမျှ တက်တယ်။ မျိုးကိုကိုစန်းသည် LGBT တယောက်ဖြစ်တယ်။ ဆိုတော့ မျိုးကိုကိုစန်းကို Admin လို့ စွပ်စွဲထားတော့ Admin ပေါင်း မြောက်မြားစွာတော့ ရှိနိုင်တာပါပဲ။ မိတ်ဆွေတယောက်အနေနဲ့ သူ အခုလို စွပ်စွဲခံရတာကို ဘယ်လို ခံစားချက်ရှိလဲဆိုတော့ သူ တရားခံ ဟုတ်တယ်ဆို ဒါ အပြစ်ကို ခံရမှာပေါ့။ သူ တရားခံ မဟုတ်ဘူးဆိုရင် ဒါ ကျမတို့ တရားဥပဒေစိုးမိုးမှုအရ အမှန်တရားပေါ်ပေါက်အောင် ကြိုးပမ်းသွားမှာပါ။ တရားဥပဒေ အထက်မှာတော့ ဘယ်သူမှ မရှိပါဘူး” လို့ ရှင်းသန့်က ဧရာဝတီကို ပြောပါတယ်။
တရားခွင် အဆုံးသတ်မှာတော့ မျိုးကိုကိုစန်းကို တရားသူကြီးအမျိုးသမီးမှ ယောကျာ်းလား ၊ မိန်းမလားမေးရာ
မျိုးကိုကိုစန်းက ယောကျာ်းဖြစ်ကြောင်း ဖြေကြားခဲ့ပြီး လက်ရှိမှာတော့ မျိုးကိုကိုစန်းကို ရန်ကင်း ရဲစခန်း အမျိုးသမီး အချုပ်ခန်းမှာ ယာယီ ဖမ်းဆီးထိန်းသိမ်းထားတယ်လို့ သိရပါတယ်။
မျိုးကိုကိုစန်းဟာ ၂၀၁၄ ခုနှစ်မှာ Miss International Queen Myanmar 2014 အလှမယ် သရဖူဆုကို ရရှိခဲ့ပြီး မြန်မာနိုင်ငံရဲ့ဂေးလ် အလှမယ်တဦးလည်း ဖြစ်ပါတယ်။
ဆက်စပ်ဖတ်ရှုရန် – ဂေးအလှမယ် မျိုးကိုကိုစန်းရဲ့ ငယ်ဘဝ
The post ဂေးအလှမယ် မျိုးကိုကိုစန်းကို အကယ်ဒမီ ဝတ်မှုန်ရွှေရည်က ၆၆ (ဃ) နဲ့ တရားစွဲ appeared first on ဧရာဝတီ.