မြင့်မြတ်ရဲ့ဇာတ်ဝင်ခန်းတွေနဲ့ နာမည်ကြီးနေတဲ့ “ဗိုလ်အောင်ဒင် ချစ်သော မိန်းမများ”

အခုလတ်တလော ဖေ့စ်ဘွတ် စာမျက်နှာပေါ်မှာရော လူငယ်တွေကြားမှာပါ နာမည်ကြီးနေတဲ့ ဝေါဟာရတခု ရှိနေပါတယ်။ “ဟျောင့် ဂျင်းကောင်” ဆိုတဲ့ စကားပါ။ ဒီစကားကို သိပ်မကြာသေးခင်က ထွက်ရှိခဲ့တဲ့ “ဗိုလ်အောင်ဒင် ချစ်သော မိန်းမများ” ဗီဒီယို ဇာတ်ကားထဲက ဇာတ်ဝင်ခန်းတခန်းမှာ သရုပ်ဆောင်မြင့်မြတ်က ပြောသွားခဲ့တာပါ။

ဒီ ကားကို လာဗင်ဒါ ဗီဒီယို ထုတ်လုပ်ဖြန့်ချိရေးမှ စီစဉ်ထုုတ်လုပ်ပြီး ဇာတ်ညွှန်း မင်းတခေတ်၊ ဒါရိုက်တာ ကိုပေါက် ရိုက်ကူးထားတဲ့ အချစ်ဟာသကားတကား ဖြစ်ပါတယ်။ ဒီကားမှာ မြင့်မြတ်နဲ့ ပိုင်ဖြိုးသုတို့က အဓိက ပါဝင် သရုပ်ဆောင်ထားကြတာပါ။ ဒီဇာတ်ကားကို ပြီးခဲ့တဲ့ ဇွန်လ ၃ ရက်နေ့က စတင်ပြီး မြန်မာတပြည်လုံးကို ဖြန့်ချိလိုက်တာပါ။

ဒီ ဇာတ်ကားထဲမှာဆိုရင် မြင့်မြတ်ကို သရုပ်ဆောင်နေကျ မဟုတ်တဲ့ ပုံစံအသစ်တမျိုးနဲ့ တွေ့မြင်ရမှာဖြစ်ပြီး “အောင်ဒင်” ဆိုတဲ့ ဇာတ်ကောင်နာမည်နဲ့ ကိုယ့်ကိုယ်ကိုယ် ခေသူမဟုတ်လို့ ထင်နေတဲ့ ပုံစံမျိုးကို တွေ့ရမှာ ဖြစ်ပါတယ်။ ပိုင်ဖြိုးသုကတော့ သရုပ်ဆောင်အသစ်ဖြစ်ပေမယ့်လည်း “အေးသီတာ” ဆိုတဲ့ ဇာတ်ကောင်နာမည်နဲ့ မြင့်မြတ်နဲ့ အတွဲညီညီ သရုပ်ဆောင်ထားတာကို တွေ့ရပါတယ်။

ပိုင်ဖြိုးသုနဲ့ မြင့်မြတ်တို့ဟာ ငယ်စဉ်ကတည်းက တရွာတည်းနေတဲ့ ငယ်သူငယ်ချင်းတွေဖြစ်ပြီး ပိုင်ဖြိုးသုက မြင့်မြတ်ကို တဖက်သတ် ချစ်နေတာလည်း ဖြစ်ပါတယ်။ ပိုင်ဖြိုးသုဟာ မြင့်မြတ်နဲ့ လိုက်ဖက်အောင်ဆိုပြီး သူ့ရဲ့နာမည်အရင်း အေးသီတာဆိုတာကိုတောင် မမြဝင်း လို့ ပြောင်းလဲထားတာဖြစ်ပါတယ်။ မြင့်မြတ်ကတော့ ပိုင်ဖြိုးသုုကို သူငယ်ချင်းထက်မပိုဘဲ တခြားကောင်မလေးတွေကိုသာ စိတ်ဝင်စားနေတာ ဖြစ်ပါတယ်။

အဆိုပါ ဇာတ်ကားထွက်ရှိပြီး သိပ်မကြာခင်မှာပဲ ဇာတ်ကားထဲမှာ ဖုန်းဆိုင်မှ အရောင်းဝန်ထမ်းမလေးကို သွားပြီး ဖွန်ကြောင်တဲ့ မြင့်မြတ်ရဲ့ဇာတ်ဝင်ခန်းတချို့ဟာ ဖေ့ဘွတ်စာမျက်နှာထက်မှာ ပျံ့နှံ့လာခဲ့ပြီး ကြိုက်နှစ်သက်ကြကာ ကြည့်ရှုသူနဲ့ ပြန်ရှယ်ကြသူတွေ အတော်လေး များပြားခဲ့တာပါ။

“ဇာတ်ကားကို စပြီး ရိုက်ဖြစ်ခဲ့တာက အကိုတို့က၂၀၁၆၊ ၁၂ လပိုင်းမှာ မြင့်မြတ်ကို တလလုံး ရိုက်ရက်ယူထားတာပေါ့။ တလဆိုတော့ ရုပ်ရှင်ကားကြီးတကားနဲ့ ဗီဒီယို ၂ ကားပေါ့၊ ရုပ်ရှင်ကားကြီးအတွက်ကကျတော့ အကိုက ဇာတ်က ရပြီးသွားပြီ၊ ဗီဒီယိုအတွက်က ဇာတ်မရသေးဘူးပေါ့လေ။ အဲဒီအချိန်မှာ မနောတို့ ဗိုလ်အောင်ဒင်ကလည်း သင်္ကြန်ပြီးကတည်းက ပေါက်နေတာဆိုတော့ ဗိုလ်အောင်ဒင်နဲ့ ပတ်သက်တဲ့ ဇာတ်လမ်းမျိုးလေး တခုခု ရိုက်ကြည့်ရင် ကောင်းမယ်ဆိုပြီး ဒီကားကို ရိုက်ဖြစ်ခဲ့တာပါ” လို့ ဒီ ဇာတ်ကားကို ရိုက်ကူးခဲ့တဲ့ ဒါရိုက်တာဖြစ်သူ ကိုပေါက်က ဒီဇာတ်ကား ရိုက်ဖြစ်ခဲ့ပုံအကြောင်းကို ဧရာဝတီကို ပြောပါတယ်။

ဒီ ဗီဒီယိုဇာတ်ကားထဲတွင် တောရွာဓလေ့စရိုက်များကိုလည်း မြင်တွေ့ရမှာဖြစ်ပြီး လူငယ်ဆန်ဆန် ဟာသစကားလုံးတွေနဲ့ လူကြီးလူငယ်တွေကြား ခေတ်စားခဲ့တာဖြစ်ပါတယ်။

နောက်ထပ် “ဗိုလ်အောင်ဒင်ချစ်သော မိန်းမများ”ရဲ့ အဆက် ရုပ်ရှင်ကားကြီးတကားလည်း ရိုက်ကူးဖို့ ရှိသေးတယ်လု့ိ သိရပါတယ်။ အဆိုပါ ရုပ်ရှင်ကားကို၂၀၁၇ အကုန်မှာ စတင် ရိုက်ကူးမှာဖြစ်ပြီး အမည်ကို “ဂျင်းကောင်” လို့ ပေးထားတယ်လို့ သိရပါတယ်။

The post မြင့်မြတ်ရဲ့ဇာတ်ဝင်ခန်းတွေနဲ့ နာမည်ကြီးနေတဲ့ “ဗိုလ်အောင်ဒင် ချစ်သော မိန်းမများ” appeared first on ဧရာဝတီ.