“X-Men: Days of Future Past” ရုပ်ရှင်မင်းသမီး Fan Bingbing ဟာ သူရဲ့မွေးရပ် တရုတ်နိုင်ငံမှာ အခွန်ရှောင်ခဲ့ကြောင်း စွပ်စွဲခံခဲ့ရပြီးနောက် ဖမ်းဆီးထိန်းသိမ်းခံထားရပြီ ဖြစ်တဲ့အကြောင်း သတင်းတွေ ထွက်ပေါ်လာပါတယ်။

အသက် ၃၆ နှစ်အရွယ် မင်းသမီး Fan နဲ့ သူ့ချစ်သူ မင်းသား Li Chen တို့ဟာ ပြီးခဲ့တဲ့ ဇူလိုင်လ ၁ ရက်နေ့ကစလို့ လူမြင်ကွင်းမှာ မတွေ့ရတော့တဲ့အတွက် သူတို့နှစ်ဦးရဲ့အကြောင်း ပရိသတ်တွေက အထူး စိုးရိမ်နေခဲ့ကြတာပါ။ မင်းသမီး Fan ကလည်း မကြာသေးခင် လတွေအတွင်း ဆိုရှယ်မီဒီယာတွေပေါ်ကနေ ပျောက်ချင်းမလှ ပျောက်နေခဲ့တာပါ။

BBC သတင်းရဲ့အဆိုအရ တရုတ်နိုင်ငံရဲ့ နာမည်အကျော်ကြားဆုံးနဲ့ အနုပညာကြေးအများဆုံး မင်းသမီး တဦးဖြစ်တဲ့ Fan ကို အခွန်ရှောင်မှုနဲ့ စုံစမ်းစစ်ဆေးခံနေရတဲ့အကြောင်း တရုတ် အာဏာပိုင်တွေက ထုတ်ဖော် ပြောကြားခဲ့ချိန်ကစလို့ ကောလာဟလတွေ ပျံ့နှံ့နေခဲ့တာပါ။

ယခုနှစ် နွေရာသီကာလ အစောပိုင်းမှာတော့ မင်းသမီးဟာ အခွန်ရှောင်ဖို့ စာချုပ်နှစ်ခုကို တခုတည်းနဲ့ ပူးပေါင်းဖော်ပြတဲ့ နည်းကို သုံးခဲ့တဲ့အကြောင်း တရုတ်အာဏာပိုင်တွေ သံသယရှိနေတယ်ဆိုတဲ့ သတင်းတွေ ထွက်ပေါ်ခဲ့တာပါ။

တရုတ်နိုင်ငံပိုင်သတင်းစာတစောင်ဖြစ်တဲ့ Securities Daily ကတော့ မင်းသမီး Fan ဟာ ထိန်းချုပ်ခံထားရပြီး တရားရေးအရ ဆုံးဖြတ်ချက်ကို လက်ခံရမှာဖြစ်တဲ့အကြောင်း ဖော်ပြထားတဲ့ ဆောင်းပါးတပုဒ်ကို တင်ခဲ့ပြီး နာရီအနည်းငယ်အကြာမှာ အဲဒီဆောင်းပါးကို ပြန်လည် ဖြုတ်ချခဲ့ပါတယ်။

တချို့သတင်းတွေမှာတော့ အခုလိုမျိုး စာချုပ်အခွန်ရှောင်ကိစ္စရပ်ဟာ အမှုရဲ့ ထိပ်ဆုံးခေါင်းစဉ်သာ ဖြစ်ပြီး မင်းသမီးဟာ တရားမဝင် ငွေချေးမှုနဲ့ အခြား အကျင့်ပျက်ခြစားမှုတို့မှာလည်း ပါဝင်ပတ်သက်နေတယ်လို့ သံသယရှိခံထားရတယ်လို့လည်း ဆိုပါတယ်။ အဆိုးဆုံးအနေနဲ့ မင်းသမီးဟာ တရားရေးအရ ပြစ်ဒဏ်ပေးမှုကို ခံရနိုင်တယ်လို့လည်း ဆိုပါတယ်။

ဒါ့အပြင် တိုက်ဆိုင်စွာနဲ့ပဲ မင်းသမီးဟာ အစိုးရက ငွေကြေးထောက်ခံ ပေးထားတဲ့ ပညာရပ်ပိုင်း ဆိုင်ရာ လေ့လာချက် အသစ်တရပ်မှာလည်း အဆင့်ကျရှုံးတဲ့ အခြေအနေနဲ့ ဖော်ပြခံထားရပါတယ်။

တရုတ်အစိုးရက ငွေကြေးထောက်ပံ့ပေးထားတဲ့ Beijing Normal တက္ကသိုလ်ရဲ့ ပြီးခဲ့တဲ့ စက်တင်ဘာလ ၁၁ ရက်နေ့မှာ ထုတ်ပြန်ခဲ့တဲ့ ၂၀၁၇-၂၀၁၈ တရုတ်ရုပ်ရှင်နဲ့ ရုပ်သံစတားတို့ရဲ့ လူမှုတာဝန်ယူမှု အစီရင်ခံစာမှာတော့ မင်းသမီးကို လူမှုဘဝဆိုင်ရာ တာဝန်ယူမှု မရှိတဲ့ သုည ရာခိုင်နှုန်း အဆင့်သတ်မှတ်ချက်နဲ့ ဖော်ပြခံထားရတာကို တွေ့ရပါတယ်။

မင်းသမီး Fan ဟာ မကြာမီရုံတင်တော့မယ့် သည်းထိတ်ရင်ဖို အမျိုးသမီးစပိုင်ရုပ်ရှင် “355” မှာ ပါဝင် သရုပ်ဆောင်ထားပေမယ့် အခုလိုမျိုး အခြေအနေတွေကြောင်း ရုပ်ရှင် ရိုက်ကူးခွင့် ရှိ၊ မရှိကို မသိရသေးဘူးလို့ ဆိုပါတယ်။

ဆက္စပ္ သတင္းလင့္ခ္မ်ား
အမေရိကန်မှာ ခိုလှုံခွင့်တောင်းဖို့ Fan Bingbing ကို ဂျက်ကီချန်း အကြံပေးခဲ့ခြင်း မဟုတ်ဟုဆို

အခွန်ရှောင် အရှုပ်တော်ပုံကြားမှာ ပျောက်ချင်းမလှ ပျောက်နေတဲ့ တရုတ်မင်းသမီး ဖန်ဘင်းဘင်း

အခွန်ရှောင်ခြင်း ရှိ၊ မရှိ စစ်ဆေးခံရမယ့် တရုတ်မင်းသမီး Fan Bingbing

Ref: etcanada

The post အခွန်ရှောင်မှု စွပ်စွဲချက်ကြောင့် မင်းသမီး Fan Bingbing ဖမ်းဆီးထိန်းသိမ်းခံထားရ appeared first on ဧရာဝတီ.

ကမ္ဘာကျော် အဆိုတော်တွေမှာလည်း ရင်ဆိုင်နေရတဲ့ ပြဿနာတွေ ရှိတယ်ဆိုရင် နည်းနည်း ထူးဆန်းနေမလား။ နေရာတကာမှာ သူတို့သီချင်းတွေ၊ နေရာတကာမှာ သူတို့ မျက်နှာတွေချည်း မြင်တွေ့နေရလို့ သူတို့မှာ ဘာပြဿနာမှ မရှိဘူးလို့ မထင်လိုက်ပါနဲ့။

မြန်မာနိုင်ငံက အနုပညာလောကလိုပဲ သူတို့မှာလည်း ပြဿနာတွေနဲ့ သင့်ကို သူတို့က မသိစေချင်တဲ့ အကြောင်းတွေ ရှိပါတယ်။ ဒါကြောင့် ဒီတခါမှာ ကမ္ဘာကျော် အဆိုတော်တွေရဲ့ ပြဿနာတွေနဲ့ သူတို့က သင့်ကို မသိစေချင်တဲ့ အကြောင်းတွေကို ဖော်ပြပေးချင်ပါတယ်။

(၁) သူတို့ဟာ ကိုယ်တိုင် သီချင်းမရေးတာ များပါတယ်

နာမည်ကျော် အဆိုတော် တော်တော်များများဟာ ကိုယ်တိုင် သီချင်း မရေးကြပါဘူး။ သင့်စိတ်ထဲမှာတော့ သူတို့ဟာ သီချင်းတွေရေးလိုက် တီးလိုက်နဲ့ ခက်ခက်ခဲခဲ ဖန်တီးနေရတယ်လို့ ထင်အောင် ပြုလုပ်လေ့ရှိပါတယ်။ ဒါပေမယ့် အများစုက အဲ့လို မဟုတ်ကြပါဘူး။ တချို့အဆိုတော်တွေဆိုရင် ဘာမှ ပင်ပင်ပန်းပန်း အားထုတ်လေ့ မရှိဘဲ အသံသွင်းခါနီးမှ စတူဒီယိုကို ရောက်လာတာမျိုးတွေတောင် ရှိတယ်လို့ CBS သတင်းမှာ ဖော်ပြထားဖူးပါတယ်။

(၂) Music Video တွေမှာ ရိုက်ပြထားတာတွေက အစစ်အမှန်တွေ မဟုတ်ပါဘူး

တချို့ Metal အဆိုတော်တွေဟာ စေတန်ကို ကိုးကွယ်ပုံတွေ၊ ကိုယ့်ကိုယ်ကို အမှောင်လောကမှာ ရှိသူတွေလို နေတတ်ကြပေမယ့် ဒါတွေဟာ သူတို့ရဲ့ အနုပညာဖန်တီးမှု သက်သက်ပါပဲ။ Music Video တွေရဲ့ အပြင်ဖက်မှာတော့ သူတို့ဟာ ဘာသာတရား ကိုင်းရှိုင်းသူတွေ ဖြစ်နေတတ်ပါတယ်။ Hip Hop အဆိုတော်တွေဟာလည်း သူတို့ အကြောင်း ကောင်းသတင်းတွေ လွှင့်တတ်ကြပေမယ့် သတင်းတော်တော်များများဟာ အစစ်အမှန် သိပ်မပါကြပါဘူး။

(၃) သူတို့ဟာ သီချင်းဆိုတာကလွဲလို့ ကျန်တာတွေက ပိုက်ဆံရကြပါတယ်

တကယ်လို့သာ သင်က ပိုက်ဆံလိုချင်လို့ သီချင်းဆိုဖို့ စိတ်ကူးနေတယ်ဆိုရင်တော့ သိပ်စိတ်ကူးတွေ သဲထဲရေသွန်ဖြစ်ဖို့က သေချာနေပါပြီ။ ဘာလို့လဲဆိုရင် ကမ္ဘာကျော် အဆိုတော်တွေတောင်မှပဲ သီချင်းဆိုပြီး ပိုက်ဆံရှာရခက်တယ်လို့ ဖွင့်ပြောထားကြလို့ပါ။

တကယ်တော့ သူတို့ဟာ ပိုက်ဆံကို ဖျော်ဖြေရေး ခရီးထွက်ခြင်းတွေက ရတာ များပါတယ်။ ဒါကလည်း လုံလုံလောက်လောက် မဟုတ်ပြန်ပါဘူး။ သူတို့ဟာ ရေမွှေး၊ အလှကုန်ပစ္စည်း၊ အဝတ်အစား စတာတွေကို ရောင်းချတာကြောင့်သာ ပိုက်ဆံများများ ဝင်ကြတာ ဖြစ်ပါတယ်။

(၄) တေးရေးဆရာတွေဟာ ပိုက်ဆံ မရကြပါဘူး

တေးရေးဆရာ တော်တော်များများဟာ ပိုက်ဆံ သေချာ မရကြပါဘူး။ အခုနောက်ပိုင်း အင်တာနက်ကို လူတိုင်း အသုံးပြုကြတဲ့ နောက်မှ တေးရေးဆရာတွေရဲ့ ဘဝက ပိုခက်ခဲလာပါတယ်။ You Tube မှာ ကြည့်ရှုသူများရင် အဆိုတော်အတွက် ပိုက်ဆံဝင်ပေမယ့် တေးရေးတွေကတော့ ရရှိခြင်း မရှိဘူးလို့ သိရပါတယ်။

ဂျက်စတင်ဘီဘာရဲ့ “As Long As You love Me” သီချင်းဟာ YouTube မှာ ကြည့်ရှုသူ ၃၄ မီလီယံ ရှိပြီး အဆိုတော် ဂျက်စတင်ဘီဘာက ပိုက်ဆံတွေ သန်းနဲ့ချီ ရခဲ့ပေမယ့် တေးရေးဆရာကတော့ အရစ်ကျနဲ့ ဝယ်ရတဲ့ ကားကိုတောင် အနိုင်နိုင် ဝယ်ခဲ့ရတယ်လို့ သိရပါတယ်။

Ref; grunge.com

The post ကမ္ဘာကျော် အဆိုတော်တွေရဲ့ သူတို့ မသိစေချင်တဲ့ အကြောင်းအရာများ appeared first on ဧရာဝတီ.

ကိုရီးယားမင်းသား Hyun Bin နဲ့ မင်းသမီး Son Ye jin တို့ပါဝင်သရုပ်ဆောင်ထားကြတဲ့ သည်းထိတ်ရင်ဖို မှုခင်းရုပ်ရှင် “The Negotiation” ကတော့ ဘန်ကောက်မြို့မှာ အခြေစိုက်ပြီး နာမည်ဆိုးနဲ့ ကျော်ကြားတဲ့ နိုင်ငံတကာလက်နက်ကုန်သည်အဖွဲ့ရဲ့ ဖမ်းဆီးခံထားရတဲ့ ဓားစာခံ နှစ်ဦးကို ကယ်တင်ဖို့ ကြိုးပမ်းရမယ့် ရဲတပ်ဖွဲ့ စေ့စပ်ညှိနှိုင်းရေးမှူး တဦးအကြောင်းကို ဇာတ်အိမ်တည် ရိုက်ကူးထားပါတယ်။

ဆိုးလ်မြို့၊ မက်ထရိုပိုလစ်တန် ရဲတပ်ဖွဲ့အေဂျင်စီမှာ ကျွမ်းကျင်အဆင့် စေ့စပ်ညှိနှိုင်းရေးမှူး တဦးဖြစ်တဲ့ Ha Chae Yoon (Son Ye Jin) ဟာ ကြင်ယာဖက် တွေ့ဆုံတဲ့နေ့မှာ ဓားစာခံတဦးကို ဖမ်းဆီးခဲ့တဲ့ ဖြစ်ရပ်တခုနဲ့ ကြုံတွေ့လိုက်ရတာနဲ့ ဇာတ်လမ်းကို စတင်ထားပါတယ်။

သွေးအေးတဲ့ စေ့စပ်ညှိနှိုင်းရေးမှူး Ha ကသူ စေ့စပ်ညှိနှိုင်းမှု လုပ်ငန်းစဉ် မပြီးဆုံးခင်မှာ ဓားစာခံနဲ့ ဖမ်းဆီးသူကို SWAT ရဲတပ်ဖွဲ့က ပစ်သတ်လိုက်တာကိုတွေ့လိုက်ရပြီးတဲ့နောက် ထိတ်လန့် တုန်လှုပ်သွားခဲ့ပါတယ်။

အဲဒီ ဖြစ်ရပ်အပြီး ၁၀ ရက်ကြာပြီးတဲ့နောက် ညှိနှိုင်းရေးမှူး Ha ကို ရဲတပ်ဖွဲ့အေဂျင်စီအကြီးအကဲက အမည်မသိတဲ့ နေရာတခုကို ခေါ်သွားခဲ့ပါတယ်။ အဲဒီနေရာက အခန်းတခုထဲ သူဟာ ကွန်ပျူတာ မော်နီတာတခုရဲ့ ရှေ့မှာ ထိုင်ရပြီး ဘေးမှာလည်း အစိုးရထိပ်တန်းအရာရှိတွေ၊ ရဲတပ်ဖွဲ့နဲ့ ထောက်လှမ်းရေးအရာရှိတွေ ရှိနေတာကို တွေ့လိုက်ရပေမယ့် ဘာတွေ ဖြစ်နေမှန်း သူမသိခဲ့ရပါဘူး။

မော်နီတာပေါ်မှာတော့ နိုင်ငံတကာ လက်နက်ဂိုဏ်းတခုက လက်နက်ကုန်သည် Min Tae Gu (Hyun Bin) ကို မြင်တွေ့ရပြီး သူက ဘန်ကောက်မြို့မှာ ကိုရီးယား ရဲအရာရှိတဦးနဲ့ ဂျာနယ်လစ် တဦးကို ဖမ်းဆီးထားပါတယ်။ အခုမှ Ha ကို ခေါ်လိုက်ရတဲ့ အကြောင်း ပေါ်လာပါပြီ။ လက်နက်ကုန်သည် Min က သူနဲ့ စေ့စပ်ညှိနှိုင်းဖို့အတွက် Ha ကို တောင်းဆိုခဲ့လို့ ဖြစ်ပါတယ်။

အဲဒီနောက် နောက်ဆုံးသတ်မှတ်ချိန် မတိုင်မီ ၁၂ နာရီပဲ ရရှိမယ့်အချိန် မော်နီတာပေါ်ကနေ ညှိနှိုင်းမှု စတင်ခဲ့ပါတော့တယ်။ အချိန်ကုန်လာတာနဲ့အမျှ Min ရဲ့ လျှို့ဝှက်ထားတဲ့ ရည်ရွယ်ချက်တွေ တဖြည်းဖြည်း ပေါ်လာပါတော့တယ်။

တက်သစ်စ ဒါရိုက်တာ Lee Jong-seok က ဇာတ်လမ်းကို လှည့်ကွက်၊ မြှုပ်ကွက်တွေနဲ့ ပုံဖော်ထားပြီး ပရိသတ်တွေကို အဆုံးသတ်အထိ ဆွဲခေါ်သွားဖို့ ကြိုးစားထားပါတယ်။ ဒါရိုက်တာ Lee ဟာ ၂၀၁၄ ခုနှစ်မှာ နာမည်ကျော်ခဲ့တဲ့ “Ode to My Father” ရုပ်ရှင်မှာ လက်ထောက် ဒါရိုက်တာအဖြစ် ဆောင်ရွက်ခဲ့သူလည်း ဖြစ်ပါတယ်။ အဲဒီနောက် စီးပွားရေးအရ အောင်မြင်မှုရခဲ့တဲ့ “The Himalayas” လို့ိဆိုတဲ့ စွန့်စားခန်းရုပ်ရှင် အတွက်လည်း ဇာတ်ညွှန်းကိုရေးသားပေးခဲ့ပါတယ်။

အခုရုပ်ရှင်အသစ်မှာတော့ ဓားစားခံဖမ်းထားရတဲ့ အခြေအနေနဲ့ စတင်ထားပြီး ဖမ်းဆီးခံထားရတဲ့ ဓားစားခံတွေကို သတ်ပစ်မယ်လို့ မော်နီတာပေါ်ကနေ ခြိမ်းခြောက်တဲ့ တင်းမာမှု အခြေအနေတွေကိုလည်း မြင်တွေ့ရမှာဖြစ်ပါတယ်။

လက်နက်ကုန်သည် Min က ဓားစားခံတွေကို ဖမ်းထားရတဲ့ အကြောင်းအရင်းက ဘာများဖြစ်မလဲ။ ဒီအခက်အခဲကိုရော စေ့စပ်ညှိနှိုင်းရေးမှူး Ha ကဘယ်လို ကျော်ဖြတ်မလဲဆိုတာကို ဇာတ်လမ်းထဲမှာ ကြည့်ရှုနိုင်ပါတယ်။ JK Film က ထုတ်လုပ်ထားတဲ့ အဲဒီရုပ်ရှင်ကိုတော့ စက်တင်ဘာလ ၁၉ ရက်နေ့မှာ ရုံတင်ပြသတော့မှာပဲ ဖြစ်ပါတယ်။

Ref:Yonhap

The post မင်းသား Hyun Bin ကို ဗီလိန်အဖြစ် မြင်တွေ့ရမယ့် “The Negotiation” ရုပ်ရှင် appeared first on ဧရာဝတီ.

ဗီလိန်ဇာတ်ရုပ်တွေမှာ သဘာဝကျကျ ပီပြင်စွာ သရုပ်ဆောင်လေ့ရှိတဲ့ သရုပ်ဆောင် မေပန်းချီက ယနေ့ခေတ်မှာ ဗီဒီယို ဈေးကွက် လျော့နည်းလာတဲ့အပေါ် စိတ်ဓာတ် ကျနေပေမယ့် တယောက်တည်း အဆင်မပြေဖြစ်နေတာ မဟုတ်ဘဲ အကုန်လုံး အဆင်မပြေနေတာကြောင့် နည်းနည်း ခံသာတယ်လို့ ဆိုပါတယ်။

“ဗီဒီယိုဈေးကွက် လျော့နည်းသွားတော့ ပန်းချီတို့တွေ စိတ်ဓာတ်ကျနေတဲ့ အချိန်ပေါ့။ ကိုယ်တယောက်တည်း ဖြစ်တာ မဟုတ်တော့လည်း နည်းနည်းတော့ ခံသာတယ်။ သူငယ်ချင်းတွေကို မေးလိုက်ရင်လည်း ငါမရိုက်ရဘူး။ ၂ လ ရှိပြီ။ ၃ လ ရှိပြီနဲ့။ အဲဒါ ကိုယ်တယောက်တည်း ဖြစ်တာ မဟုတ်ဘူး။ အဖက်ဖက်က စီးပွားရေးသမားတွေရော၊ ဈေးရောင်းတဲ့သူတွေရော အဆင်မပြေကြတာ ဆိုတော့ နားလည်ရမှာပေါ့” လို့ မေပန်းချီက ပြောပါတယ်။

သရုပ်ဆောင် မေပန်းချီက ရုပ်ရှင်ကားများ ရိုက်ကူးတဲ့အခါ ဗီလိန်ဇာတ်ရုပ်ကို အများဆုံး လက်ခံဖြစ်ခဲ့ပုံလည်း အခုလိုပဲ ပြောပါတယ်။

“ပန်းချီကို ဗီလိန်ဇာတ်ရုပ်နဲ့ အတွေ့များတာက ပန်းချီတို့မှာ ရွေးချယ်ပိုင်ခွင့် မရှိဘူး။ စီးပွားရေးအရရော ဝါသနာအရရော ပန်းချီတို့လုပ်ရတာဖြစ်တဲ့အတွက် တခါတလေကျတော့လည်း ကိုယ်မရိုက်ချင်ဘဲနဲ့ ရိုက်လိုက်ရတာတွေ ရှိတယ်။ အရင်တုန်းလောက်တော့ မဆိုးတော့ဘူး။ လက်ခံလာတာ ဖြစ်တဲ့အတွက် ဗီလိန်တွေဘာတွေ မတွေးဖြစ်ဘူး။ ကိုယ့်အတွက် ကာရိုက်တာရရင် ရိုက်ဖြစ် သွားရော”

“အရင်တုန်းက ပန်းချီတို့မှာ နားရက်က၂ ရက် ၃ ရက်ပဲ ရှိတာ အခုကရုပ်ရှင်ကားကြီးပဲရှိတော့ ၁ လကို တကားတောင် မနည်းကြိုးစားနေရတယ်။ အဲ့လိုတလကို တကား ရိုက်ရဖို့ကိုယ့်ကို ကာရိုက်တာလာပေးတယ်။ ကာရိုက်တာမကောင်းရင်လည်း ငြင်းလို့မရတော့ဘူး။ ငါဒါလေးရိုက်ရင် သရုပ်ဆောင်ကြးလေးရမယ်ဟဲ့။ ငါလည်း အဆင်ပြေသွားမယ် ပရိသတ်တွေနဲ့လည်း အဆက်အသွယ်တခု ဖြစ်တယ်ဆိုပြီး လက်ခံဖြစ်တယ်။ ကာရိုက်တာတွေလည်း မရွေးချယ် နိုင်တော့ပါဘူး”လို့ မေပန်းချီက ဆိုပါတယ်။

ဗီဒီယိုဈေးကွက် သိပ်မရှိတော့ပေမယ့် ပရိသတ်တွေ အားပေးနေသေးလို့ ပရိသတ်တွေကို ကျေးဇူးတင်တယ်လို့လည်း မေပန်းချီက ဆိုပါတယ်။ လက်ရှိမှာ မေပန်းချီက “နေရယ်၊ လရယ်၊ အမှန်တရားရယ်” ဇာတ်လမ်းတွဲမှာ ပါဝင် သရုပ်ဆောင်ထားပြီး ဒီဇာတ်လမ်းက MRTV ရုပ်သံလိုင်းကနေ စက်တင်ဘာလ ၅ ရက်နေ့မှာ စတင် ပြသနေပါတယ်။

“စီးရီးတွဲကတော့ ပန်းချီ ‘နေရယ်၊ လရယ်၊ အမှန်တရားရယ်’ ပဲ ရိုက်ထားတာ ရှိတယ်။ နောက်ဇာတ်ကားကြီးတွေ ရိုက်ဖြစ်တယ်။ အခုချိန်ထိ ပန်းချီ့ကို အားပေးနေကြတဲ့ ပရိသတ်တွေကို ကျေးဇူးတင်တယ်။ ပန်းချီတို့ ခုဆိုရင် ဖန်သားပြင်ပေါ်မှာ သိပ်မတွေ့ရတော့တာက ဗီဒီယိုလည်း သိပ်မရှိတော့ဘူး။ အဲဒါကြောင့် အားပေးနေသေးတဲ့ ပရိသတ်တွေကို ကျေးဇူးတင်ပါတယ်” လို့ မေပန်းချီက ပြောပါတယ်။

ကိုယ်ပိုင် စီးပွားရေးအနေနဲ့ ဂျင်းဖက်ရှင်ဆိုင် ဖွင့်လှစ်ထားတဲ့ သရုပ်ဆောင် မေပန်းချီက “နေရယ်၊ လရယ်၊ အမှန်တရားရယ်” ဇာတ်လမ်းတွဲမှာ လာဘ်စားတဲ့ အကောက်ခွန်ထမ်း နေရာကနေ ပါဝင် သရုပ်ဆောင်ထားတယ်လို့ ဆိုပါတယ်။

ဆက်စပ် သတင်းလင့်ခ်များ
ဗီလိန်ဇာတ်ရုပ်ကို အားပေးလို့ အားရှိတယ် ဆိုတဲ့ “မေပန်းချီ”

“အငယ်တွေ တက်လာချိန်မှာ တယောက်နဲ့ တယောက် မလေးစားတာတွေ ရှိတယ်”

“အချစ်နဲ့ ပတ်သက်ပြီး တင်းတိမ်ရောင့်ရဲတယ်” ဆိုတဲ့ မေပန်းချီ

The post ဗီဒီယိုဈေးကွက် လျော့နည်းသွားတာကြောင့် စိတ်ဓာတ်ကျနေတဲ့ မေပန်းချီ appeared first on ဧရာဝတီ.

ဒီတခါ မိတ်ဆက်ပေးမယ့် ရုပ်ရှင်ကတော့ ၂၀၁၂ ခုနှစ်က ထွက်ရှိခဲ့ပြီး ဒါရိုက်တာ Oriol Paulo ရိုက်ကူးထားတဲ့ Mystery,Thriller အမျိုးအစား ရုပ်ရှင် “The Body” ဖြစ်ပါတယ်။ သရုပ်ဆောင်တွေ အနေနဲ့ Jose Coronado , Hugo Silva , Belen Rueda တို့ သရုပ်ဆောင်ထားပြီး အခြား သရုပ်ဆောင်များစွာလည်း ပါဝင်ထားတာ တွေ့ရပါတယ်။

ဇာတ်လမ်းအကျဉ်းကတော့ ညသန်းခေါင်ကျော် အချိန်မှာ လူတယောက်ဟာ ဓာတ်မီးတလက်နဲ့ မှောင်မည်းနေတဲ့ သစ်တောတခုထဲ ပြေးလွှားနေခဲ့ပါတယ်။ သူဟာ ကြောက်လန့်တကြားနဲ့ သူလာခဲ့ရာ အနောက်ကို ကြည့်လိုက် ၊ ပြေးလိုက် မောဟိုက်နေပုံလည်း ပေါ်ပါတယ်။ သူဟာ ပြေးရင်း ပြေးရင်း သစ်တောရဲ့ အဆုံးကို ရောက်ရှိသွားပြီး လမ်းမပေါ်ကို ရောက်ခါနီးမှာပဲ အရှိန်ပြင်းပြင်းနဲ့ မောင်းလာနေတဲ့ ကားတစီးကို ဝင်တိုက်မိပါတော့တယ်။

အဲဒီအချိန်မှာပဲ စုံထောက် Jaime ဆီကို ဖုန်းကောတခုဝင်လာခဲ့ပြီး စုံထောက်လည်း ထိုသူရှိရာ ဆေးရုံကို ရောက်ရှိလာခဲ့ပါတယ်။ ဆေးရုံရောက်မှာ သိလိုက်ရတာကတော့ အဆိုပါ မတော်မတဆမှု ဖြစ်သူဟာ ရေခဲတိုက်မှာ အလုပ်လုပ်သူတဦး ဖြစ်ကြောင်းနဲ့ သူဟာ ဘယ်အရာကို ကြောက်လန့်တကြား ထွက်ပြေးလာသလဲဆိုတာကို ဖော်ထုတ်ဖို့ ဖြစ်ကြောင်း Jaime တယောက် သိရှိလိုက်ပါတော့တယ်။

ဒီလိုနဲ့ သူအလုပ်လုပ်ရာ ရေခဲတိုက်မှာလည်း ပြဿနာတခုရှှိနှင့်နေခဲ့ပြီး အဲဒီပြဿနာကတော့ နှလုံးဖောက်သေဆုံးသွားခဲ့တဲ့ Mayka Villaverde ရဲ့ အလောင်းဟာ ပျောက်ဆုံးနေခဲ့တယ် ဆိုတာပါ။

ကင်မရာ မှတ်တမ်းများအရ ညစောင့်ဟာ အလောင်းထားရာ အခန်းကို ၅ မိနစ်ကြာ သွားရောက် ကြည့်ရှုခဲ့ပြီး ရေခဲတိုက်ကနေ ထွက်ပြေးသွားခဲ့တာပဲ ဖြစ်ပါတယ်။ ညစောင့်နဲ့အတူ ကင်မရာ တလုံးသာ အကောင်းပကတိရှိခဲ့ပြီး ကျန်ကင်မရာတွေကတော့ အကောင်းအတိုင်း မရှိတော့ဘူးလို့ Jiame တယောက် ထပ်မံ သိရှိရပါတယ်။

ပျောက်ဆုံးသွားတဲ့ အလောင်းနဲ့ ပတ်သက်ပြီး မိသားစုကိုလည်း အကြောင်းကြားခဲ့ကြလို့ မိသားစု ဝင်တွေလည်း ထပ်မံ ဝမ်းနည်း ဖြစ်ကြရပြန်ပါတော့တယ်။

ဇာတ်လမ်းတခုလုံးဟာ မသင်္ကာစရာတွေနဲ့ ပြည့်နှက်နေပြီး သို့လော သို့လော မေးခွန်းတွေ ၊ သိလိုစိတ်တွေကြောင့် အဆုံးထိ ကြည့်ရှုမိကြမှာဖြစ်ပါတယ်။ နောက်ခံ အသံအကောင်းအစားတွေနဲ့ ဂီတတွေဟာ ကြည့်ရှုသူတွေကို ဆွဲဆောင်ထားမှာဖြစ်တာကြောင့် IMDb Rating (7.6) ရရှိထားတဲ့ “The Body” ရုပ်ရှင်ကို ရုပ်ရှင်ချစ်ပရိသတ်တွေအတွက် မျှဝေပေးလိုက်ပါတယ်။

The post ပျောက်ဆုံးသွားသော အလောင်း “The Body” ရုပ်ရှင် appeared first on ဧရာဝတီ.

ယနေ့ခေတ်မှာ ဗီဒီယိုဈေးကွက် လျော့နည်းလာပြီး တီဗီ ရုပ်သံလိုင်းတွေကနေ ရုပ်သံ ဇာတ်လမ်းတွဲတွေ လွှင့်တာဟာ မူပိုင်ခွင့်အရ ပိုပြီး လုံခြုံမှု ရှိတယ်လို့ ဝါရင့် သရုပ်ဆောင် ဒေါ်ဆွေဇင်ထိုက်က ဧရာဝတီကို ပြောပါတယ်။

“ဗီဒီယိုဈေးကွက် လျော့နည်းပြီး ဇာတ်လမ်းတွဲတွေကို တီဗီကနေလွှင့်တာဟာ ပိုပြီးတော့ လုံခြုံမှုရှိတယ်။ မူပိုင်ခွင့်အရလည်း လုံခြုံတယ်။ တီဗီဇာတ်လမ်းတွဲကတော့ စီးရီးအလိုက် လုပ်ရတာကိုး။ ဗီဒီယိုကတော့ ၂ နာရီစာလောက်ပဲ ရိုက်ရတာလေ။ ဗီဒီယိုတွေ၊ တီဗီတွေ ဆိုတာ Format သာ ဖြစ်တယ်။ တကယ်တမ်းကျတော့ ကျမတို့ရဲ့ ဇာတ်လမ်းတွေကို ပြောပြနေတာပါ။ အနုပညာဆန်ဆန် ဖန်တီးမှုရှိတဲ့၊ တန်ဖိုးရှိတဲ့ ဇာတ်လမ်းတွေကိုသာ ပြောပြနိုင်ဖို့ ဖြစ်ပါတယ်”လို့ ဒေါ်ဆွေဇင်ထိုက်က ပြောပါတယ်။

“ဖြန့်ချိတဲ့ စနစ်ကတော့ အစောကတည်းက ဖြန့်ချိရေးမှာ လုံခြုံစိတ်ချရမှုတို့၊ မူပိုင်ခွင့်၊ အကာအကွယ်တို့ဆိုတဲ့ ဥပဒေတွေလည်း ရှိဖို့လိုပါတယ်။ ကျမကတော့ ဗီဒီယိုဟာ သေသွားတဲ့ ကျားတကောင်လို့ပဲ မြင်ပါတယ်။ ကျားသေကို အသက်ပြန်သွင်းဖို့ အားစိုက်နေတဲ့ အချိန်မှာ ကောင်းကင်ပေါ်ကနေ လာတဲ့ အခွင့်အရေးတွေကို လက်လွှတ်သွားမှာကိုတော့ စိုးရိမ်တယ်” လို့ ဒေါ်ဆွေဇင်ထိုက်က ပြောပါတယ်။

မြန်မာနိုင်ငံက မင်းသား၊ မင်းသမီးတွေဟာ ဇာတ်လမ်းကို ကြည့်ပြီးမှ ဈေးဖြတ်ပြီး Star Power နဲ့ အနုပညာကြေးကို ရောင်းတယ်။ တကယ်တမ်းတော့ ဒါဟာ အဲဒီလိုမဖြစ်သင့်ပါဘူးလို့ ဒေါ်ဆွေဇင်ထိုက်က ဆိုပါတယ်။

“ပြည်သူလူထုရဲ့ Star Power ကို ကြည့်ပြီးရောင်းတဲ့ သဘောမျိုး ရှိတယ်။ ကျမတို့ဆီက မင်းသား၊ မင်းသမီးကိုကြည့်ပြီးမှ ဈေးဖြတ်ပြီး Star Power နဲ့ရောင်းတာ တကယ်တမ်းတော့ အဲ့လို မဖြစ်သင့်ပါဘူး။ ဥရောပတိုက်မှာ ဆိုရင် ပြောပါတယ်။ ဇာတ်လမ်းအမျိုးအစားကိုပဲ ကြည့်ပါတယ်။ မင်းသား၊ မင်းသမီး Star ကို မကြည့်ပါဘူးဆိုပြီး ဈေးကွက်တခုကို ထူထောင်ခဲ့တာလေ။ ဒါကြောင့်လည်း အကြာကြီးသူတို့ ထူထောင်နိုင်ခဲ့တာ။ ကျမတို့လည်း ဒါကို နားလည်ထားရပါမယ်” လို့ ဒေါ်ဆွေဇင်ထိုက်က ဆိုပါတယ်။

“အထူးသဖြင့် ကျမတို့ တိုင်းပြည်မှာရှိနေတဲ့ ရုပ်ရှင် ဖြန့်ချိသမားတွေ ရုပ်ရှင်ထုတ်လုပ်သူတွေဟာ ပရော်ဖက်ရှင်နယ် သင်ကြားတတ်မြောက်လာတဲ့ သူတွေ မဟုတ်ပါဘူး။ ပြည်တွင်းဈေးကွက် တခုတည်းကိုပဲ အားစိုက်ပြီးတော့ လုပ်နေရတာဖြစ်တယ်။ ပြည်ပဈေးကွက်ကို ချဲ့ဖို့အတွက်လည်း သူတို့မှာ ကန့်သတ်ချက်တွေရှိနေတာကို တွေ့နေရပါတယ်။ ဒါတွေကို ပြင်လိုက်ပါ။ ပြင်လိုက်ရင် အာဆီယံရဲ့ SDG ဆိုတဲ့ Development Gold ရှိတယ်။ အဲ့ဒီ Gold ကို ၂၀၃၀ မှာ မှီအောင် ကြိုးစားရမှာပေါ့’’ လို့ ဒေါ်ဆွေဇင်ထိုက်က ပြောပါတယ်။

ဒေါ်ဆွေဇင်ထိုက်က “နေရယ်၊ လရယ်၊ အမှန်တရားရယ်” ရုပ်သံ ဇာတ်လမ်းတွဲကို ထုတ်လုပ်သူဖြစ် တာဝန်ယူထားပြီး ဒါရိုက်တာ အောင်ကိုလတ်က ရိုက်ကူး ပုံဖော်ထားပါတယ်။ အဆိုပါ ဇာတ်လမ်းတွဲမှာ သရုပ်ဆာင် ဘုဏ်းသိုက်၊ နေယံ၊ မိုးယံဇွန်၊ ခင်ဇာခြည်ကျော်၊ ဆုပန်ထွာ၊ မေပန်းချီတို့ ပါဝင် သရုပ်ဆောင်ထားကြပါတယ်။

ဆက်စပ် သတင်းလင့်ခ် – “နေရယ်၊ လရယ်၊ အမှန်တရားရယ်” ဇာတ်လမ်းတွဲကို ထုတ်လုပ်ခဲ့တဲ့ ဒေါ်ဆွေဇင်ထိုက်

The post ဇာတ်လမ်းတွဲတွေကို တီဗီကနေလွှင့်တာဟာ မူပိုင်ခွင့်အရ ပိုပြီးတော့ လုံခြုံမှုရှိတယ် appeared first on ဧရာဝတီ.

ဒါရိုက်တာ ခရစ္စတီးနားခီ ရိုက်ကူးမယ့် နောက်ထပ် ရုပ်ရှင်ဇာတ်ကားကြီး “Now & Ever” ရုပ်ရှင်အတွက် Central Base Productions ရဲ့ Facebook Page ကနေတဆင့် သရုပ်ဆောင် အသစ်တွေ ခေါ်ယူလျက်ရှိပါတယ်။

အဲဒီဇာတ်ကားမှာ သရုပ်ဆောင် ဇဏ်ခီလည်း ပါဝင်သရုပ်ဆောင်မှာ ဖြစ်ပြီး ပါဝင်ယှဉ်ပြိုင်ကြမယ့် သရုပ်ဆောင်တွေ အတွက်ကို ဇဏ်ခီက အခုလို အကြံပြုစကား ဆိုထားပါတယ်။

”လျှောက်ဖို့ ပြင်ဆင်နေတဲ့သူတွေကို တခု ဝေမျှချင်တာက Casting ဆိုတာ သရုပ်ဆောင်ရွေးပွဲပါ။ သရုပ်ဆောင် ပြိုင်ပွဲ မဟုတ်ပါဘူး။ တကယ်လို့ အရွေး မခံရရင် စိတ်ဓာတ် မကျပါနဲ့။ ရွေးတဲ့သူတွေက ဇာတ်လမ်းထဲက ကာရိုက်တာနဲ့ လိုက်မလိုက်ကို အဓိက ကြည့်ကြတာပါ။ ကိုယ်ညံ့လို့ ကိုယ့်ကို မကြိုက်လို့ မဟုတ်ပါဘူး။ ကိုယ့်ကိုယ်ကို ယုံကြည်မှု ရှိပါ” လို့ သရုပ်ဆောင် ဇဏ်ခီက ဆိုပါတယ်။

“ကြည်ကြည်လင်လင်နဲ့ လေးလေးစားစား ပြုမူပြောဆိုပါ။ ဒါပေမယ့် ကိုယ်ပိုင်ဟန် မပျောက်ပါစေနဲ့။ ကိုယ်ပိုင်ဟန် ရှိတဲ့သူတွေကို Casting ရွေးတဲ့သူတွေက ပိုပြီးတော့ စိတ်ဝင်စားတယ်။ သတိလည်း ထားမိတယ်။ အခုချက်ချင်း မဟုတ်တောင် နောက်နောင် project တွေမှာ ပါဖို့ အခွင့်အရေးတွေ ရနိုင်တယ်။ နောက်ဆုံးတခု ပြောချင်တာကတော့ ကျနော်တို့ဆီမှာက လှမှ၊ ချောမှ သရုပ်ဆောင် ဖြစ်နိုင်မယ်လို့ ထင်နေကြတယ်။ အဲဒီ အယူအဆကို မြောင်းထဲ လွှင့်ပစ်လိုက်ပါ”လို့ ဇဏ်ခီက ဆိုထားပါတယ်။

သရုပ်ဆောင် ဇဏ်ခီဟာ လက်ရှိမှာ သူ့ရဲ့ တတိယမြောက် ရုပ်ရှင် “Now & Ever” ဇာတ်ကား အတွက် ကြိုတင် ပြင်ဆင်မှုများ ပြုလုပ်နေသလို သရုပ်ဆောင်သစ်များ ရွေးချယ်မှုအတွက်လည်း ဇနီးဖြစ်သူ ဒါရိုက်တာ ခရစ္စတီးနားခီနဲ့အတူ လုပ်ကိုင်နေတာ တွေ့ရပါတယ်။

မင်းသား ဇဏ်ခီနဲ့ အတူ သရုပ်ဆောင်သစ်များ Casting ရွေးချယ်ကာ ပါဝင်ရိုက်ကူးခဲ့တဲ့ “မုဒြာရဲ့ခေါ်သံ” နဲ့ “ဥပါယ်တံမျဉ်” ရုပ်ရှင်တို့ဟာလည်း ယခုနှစ်အတွင်း ပရိသတ်တွေကြားမှာ ရေပန်းစား လူကြိုက်များခဲ့ပြီး ယခုအသစ် ရိုက်မယ့် “Now & Ever” ရုပ်ရှင်ဟာလည်း ဘယ်လိုပုံစံ ရိုက်ကူးဖန်တီးမှုတွေနဲ့အတူ ပွဲထွက်လာမလဲဆိုတာ ရင်ခုန်စွာနဲ့ စောင့်ကြည့်ရမှာပဲ ဖြစ်ပါတယ်။

ဆက်စပ် သတင်းလင့်ခ်များ

“Now & Ever” ရုပ်ရှင်ကားအတွက် ခီမောင်နှံ သရုပ်ဆောင်သစ်များ ခေါ်ယူလျက်ရှိ

ပြောင်းလဲမှုကို လိုလားရင် “ဥပါယ်တံမျဉ်” ကို Share မလုပ်ဖို့ တောင်းဆိုလိုက်တဲ့ ဇဏ်ခီ

မင်္ဂလာသက်တမ်း ၁၂ နှစ်ပြည့်သွားပြီ ဖြစ်တဲ့ ခီမောင်နှံ

ဧရာဝတီ သတင်းဌာန ၂၅ နှစ်မြောက် အထိမ်းအမှတ်အတွက် ခီမောင်နှံ၏ ဆုတောင်းစကား

The post သရုပ်ဆောင်ရွေးပွဲ လျှောက်သူတွေအတွက် ဇဏ်ခီရဲ့ အကြံပြုစကား appeared first on ဧရာဝတီ.

“မိုးပန်းပွင့်ရဲ့ သင်္ကေတ”ရုပ်ရှင် ဇာတ်ကားမှာ ပါဝင်သရုပ်ဆောင်ထားတဲ့ သရုပ်ဆောင် ဟန်လင်းသန့်ဟာ ဇာတ်ကား မိတ်ဆက်ပွဲကို မလာရောက်ခဲ့ဘဲ ပျောက်နေကြောင်း “မိုးပန်းပွင့်ရဲ့ သင်္ကေတ” ရုပ်ရှင်ဇာတ်ကားကြီး Facebook Page ကနေ ကြေညာခဲ့ပါတယ်။

အဲဒီလို ကြေညာပြီးတဲ့နောက် မေရှင်းသန့်ဆိုတဲ့ Facebook အကောင့်ကနေ ဟန်လင်းသန့် ပျောက်ဆုံးနေခြင်း မဟုတ်ကြောင်း ပြန်လည် ဖြေရှင်း ရေးသားထားတာ တွေ့ရပါတယ်။

“ပထမဦးဆုံး ဟန်လင်းသန့်ကို အားပေးကြတဲ့ ပရိတ်သတ်များကို အထူး ကျေးဇူးတင်ရှိပါတယ်။ ဟန်လင်းသန့် ပျောက်ဆုံးနေခြင်း မဟုတ်ပါကြောင်း အသိပေးအပ်ပါတယ်” လို့ ရေးသား ထားပါတယ်။

“မိသားစုနဲ့ ယခုအချိန်ထိ အဆက်အသွယ် မပြတ်ပါဘူး။ မူးယစ်ဆေးဝါး ကိစ္စလည်း လုံးဝ မဟုတ်ပါဘူး။ ဆေးလိပ်တောင် ဟန်ကျပန်ကျ သောက်မပြတတ်တဲ့သူပါ။ သူဟာ အနုပညာ အလုပ်ကို ရူးသွပ်ခဲ့ပြီး ဒီ လမ်းကြောင်းပေါ် ရောက်အောင် သူ့ဘာသာသူ ကြိုးစားရုန်းကန်ခဲ့ရတာပါ။ ကျမတို့က သာမန် ဝန်ထမ်း မိသားစု ဖြစ်တဲ့အတွက် သူ့ဝါသနာကို ဘာတခုမှ မပံ့ပိုးပေးနိုင်ခဲ့ပါဘူး”

“မိဘတွေ မရှိကြတော့တဲ့ အတွက် သူ့ဝါသနာကို သူ့ဘာသာ ပြုစုပျိုးထောင်ခဲ့ရတာပါ။ သူ့အနေနဲ့ သူဝါသနာပါတဲ့ အနုပညာ အလုပ်ကို ဆက်မလုပ်တော့ဖို့ ဆုံးဖြတ်ခဲ့တာလည်း သူ့အတွက် အရမ်း ခက်ခဲပါတယ်။ မိသားစု ပံ့ပိုးမှု မရှိ၊ ဘာအထောက်အပံ့မှ မရှိ။ ဘာကျောထောက် နောက်ခံမှ မရှိ ဒီနေရာ အထိ လျှောက်လှမ်းခဲ့ရတဲ့ သူ့ဘဝက တကယ် ပင်ပန်းခက်ခဲခဲ့ပါတယ်။ အခုတော့ မောင်နှစ်မတွေ အတူတူ ပြန်နေထိုင်ပြီး ဒိုးတူဘောင်ဘက် လုပ်ကိုင်စားသောက်ကြဖို့ ဆုံးဖြတ်ခဲ့ကြတာပါ” လို့ မေရှင်းသန့် အကောင့်မှာ ရေးသားထားတာပါ။

“မိုးပန်းပွင့်ရဲ့ သင်္ကေတ” ရုပ်ရှင်ကား Facebook Page ကနေလည်း ယခုလို ဟန်လင်းသန့် ပျောက်ဆုံးနေကြောင်း တင်ခြင်းဟာ Production Team ကနေ စိတ်ပူပြီး ပို့စ် တင်ရခြင်းဖြစ်ကြောင်း၊ ဟန်လင်းသန့်ရဲ့ ဂုဏ်သိက္ခာကို ထိပါး၊ ညှိုးနွယ်လိုမှု လုံးဝ မရှိခဲ့ပါကြောင်း ရေးသားထားပါတယ်။

သရုပ်ဆောင် ဟန်လင်းသန့်ဟာ Mrtv-4မှ ထုတ်လွှင့်ခဲ့တဲ့ “ထာဝရမန္တလေး” ဇာတ်လမ်းတွဲမှ စတင်ကာ ပရိသတ် လက်ခံ အားပေးမှု ရရှိလာခဲ့ပြီး ရုပ်ရှင်ကားများ အနေနဲ့ “ဘယ်ရည်းစားကို အချစ်ဆုံးလဲ” ၊ “ချိုမြိန်သောလက်စားချေခြင်း” စတဲ့ ရုပ်ရှင်ကားတွေမှာ ပါဝင် သရုပ်ဆောင်ထားပါတယ်။

ဆက်စပ် သတင်းလင့်ခ်များ

ပျောက်ဆုံးနေတဲ့ သရုပ်ဆောင် ဟန်လင်းသန့်ကို တွေ့ရှိသူများအား ဆုကြေးပေးမည်ဟု ကြေညာ

ရွှေဝါရောင်တော်လှန်ရေးရဲ့ အငွေ့အသက်တွေ ပါဝင်တဲ့ “မိုးပန်းပွင့်ရဲ့ သင်္ကေတ” ရုပ်ရှင်

The post သရုပ်ဆောင် ဟန်လင်းသန့် အနုပညာအလုပ်များ ဆက်လက် မလုပ်တော့တဲ့ အကြောင်းရင်း appeared first on ဧရာဝတီ.

လူမှုကွန်ရက် မီဒီယာတွေပေါ်မှာ မင်းသမီး Jennifer Lawrence ကို ရှာဖွေဖို့ အခွင့်အရေး ရခဲပေမယ့် သူကတော့ Twitterနဲ့ Instagram မှာ စာရေးသူတို့ိကို သတိပြုမိကောင်း ပြုမိနိုင်ပါတယ်။

အော်စကာဆုရှင် မင်းသမီး Jennifer ဟာ Twitter, Facebook နဲ့ Instagram တို့ကို ဘယ်တော့မှ သုံးဖြစ်မှာ မဟုတ်တဲ့အကြောင်း လွန်ခဲ့တဲ့ နှစ်အနည်းငယ်က ပြောကြားခဲ့ဖူးပေမယ့် အခုတော့ လူမှုကွန်ရက် မီဒီယာတချို့ကို လျှို့ဝှက်အနေအထားနဲ့ အသုံးပြုနေပြီလို့ ဆိုပါတယ်။

ဒါပေမယ့် အသက် ၂၈ နှစ်အရွယ် မင်းသမီးဟာ သူရဲ့ အသုံးပြုမှုကို တိတ်တဆိတ် လေ့လာသူတဦး အနေနဲ့သာ ကန့်သတ်ထားတယ်လို့ ဆိုပါတယ်။ InStyle မဂ္ဂဇင်းနဲ့ ပြုလုပ်ခဲ့တဲ့ အင်တာဗျူးတခုမှာ သူက “ကျမ သုံးနေပါပြီ။ ဒါပေမယ့် ကျမက စောင့်ကြည်နေသူတယောက်ပါ” လို့ ပြောကြားခဲ့ပါတယ်။

ဒါအပြင် မည်သည့်အကြောင်းအရာကိုမှလည်း ရေးသားပြီး ပို့တင်တာမျိုး မလုပ်တဲ့ အကြောင်းကိုလည်း သူက “ကျမ စောင့်ကြည့်တာပါ။ ပြောဆိုတာမျိုး မလုပ်ပါဘူး”လို့ ဆိုပါတယ်။

လူမှုကွန်ရက် မီဒီယာအပေါ်မှာ ကိုယ်ပြောချင်တာကို မပြောတဲ့ အကြောင်းအရင်းနဲ့ ပတ်သက်လို့တော့ “The Hunger Games” ရုပ်ရှင်မင်းသမီး Jennifer က “အမြဲတမ်း တုံ့ပြန်မှုက တော်တော်များများ ရှိပါတယ်။ ဒါကြောင့် လူတော်တော်များများက နားထောင်ပြီး အာရုံစိုက်နေကြတာပါ။ ပြီးတော့ သူတို့မှာ အရာအားလုံးနဲ့ ပတ်သက်လို့ အမြင်တွေ တော်တော်များများ ရှိကြပါတယ်”

“မလိုအပ်ဘူးဆိုရင် ကျမက အဲဒါကို မလက်ခံချင်ပါဘူး။ အကြောင်းပြချက် မရှိဘဲ အဲဒီအကြောင်းကနေ ရှောင်နေတာမျိုးလည်း မဖြစ်ချင်ပါဘူး။ တခုခုကို ပရိုမိုးရှင်းလုပ်တာမျိုးနဲ့ တခုခု ပေါက်ကွဲချင်တာမျိုး မရှိရင်တော့ ကျမဆီကနေ ရှင်တို့ ဘာမှကြားသိရမှာ မဟုတ်ပါဘူး” လို့ ပြောကြားခဲ့ပါတယ်။

သူပြောဖို့ လိုအပ်တာကို ထိန်းချုပ်နိုင်တဲ့ စွမ်းရည်ဟာလည်း အသက်ရတာနဲ့အမျှ ကြီးမားလာတယ်လို့လည်း ဆိုပါတယ်။ သူက “ဟုတ်ပါတယ်။ ကျမက ကိုယ့်ကိုယ်ကို စတင် ထိန်းချုပ်လာနိုင်နေပါပြီ။ ကျမ စိတ်ထဲမှာ ဘာတွေပဲ ရှိရှိ၊ ပြောဖို့ဆိုတဲ့ သတိလေးတော့ရှိပါတယ်။ ဒါကြောင့် ကျမ အပြင်ထွက်တဲ့အခါ ကျမရဲ့ ကိုယ်ပိုင် Trainer နဲ့ ကျမကိုယ် ကျမပြောရတယ်။ ဘယ်သူ့ကိုမှ မပြောနဲ့လို့ပေါ့” လို့ ဆိုပါတယ်။

လူမှုကွန်ရက်မီဒီယာပေါ်မှာ သူ့ရဲ့ လက်ရှိ လုပ်ဆောင်ချက်ဟာ ဝက်ဘ်ဆိုက်ကို အခြေခံတဲ့ နည်းပညာတွေနဲ့ ပတ်သက်လို့ တိတ်ဆိတ်နေမှုအခြေအနေကို ပြောင်းလဲလိုက်တာကို သက်သေပြနေပါတယ်။ ၂၀၁၄ ခုနှစ်တုန်းကတော့ လူမှုကွန်ရက်မီဒီယာတွေပေါ်မှာ အဆိုးမြင်တွေတော်တော်များတဲ့အတွက် သံုံးဖြစ်မှာ မဟုတ်ဘူးလို့ ပြောကြားထားခဲ့ဖူးတာပါ။

လွန်ခဲ့တဲ့ ၄ နှစ်တုန်းက သူက “ကိစ္စမရှိပါဘူး။ ကျမက လေးစားပါတယ်။ ဒါပေမယ့်သုံးမှာ မဟုတ်ပါဘူး။ ကျမ Twitter သုံးမှာမဟုတ်ပါဘူး။ Facebook, Twitter နဲ့ Instagram မှာ ကျမ ပါလို့ ပြောလာခဲ့ရင် အဲဒါကျမမဟုတ်ပါဘူး” လို့ ပြောကြားခဲ့ဖူးပါတယ်။

ဆက်စပ်သတင်းလင့်ခ်များ
အစားမရှောင်ဘဲ စားချင်တဲ့အချိန်တိုင်း စားဖြစ်တယ်လို့ဆိုတဲ့ မင်းသမီး Jennifer Lawrence
အနုပညာပြခန်း ဒါရိုက်တာတဦးနဲ့ တွဲနေတယ်လို့ သတင်းထွက်လာတဲ့ Jennifer Lawrence
အနုပညာအလုပ်တွေလုပ်ဖို့ အလယ်တန်းကျောင်း ထွက်ခဲ့ရတဲ့ မင်းသမီး “Jennifer Lawrence”

Ref:aceshowbiz

The post လူမှုကွန်ရက်မီဒီယာတွေကို လျှို့ဝှက်ပြီး ပြန်သုံးနေတဲ့ မင်းသမီး Jennifer Lawrence appeared first on ဧရာဝတီ.

“Fast and Furious” ရုပ်ရှင်ရဲ့ သီးခြားခွဲထွက်ရုပ်ရှင်”Hobbs and Shaw” ရဲ့ ရိုက်ကူးရေး စတင်နေပြီ ဖြစ်ပါတယ်။ ထုတ်လုပ်ရေးရဲ့ ပထမဆုံးနေ့ အမှတ်တရအနေနဲ့ မင်းသား Dwayne “The Rock” Johnson က စက်တင်ဘာလ ၁ဝ ရက်နေ့မှာ ရိုက်ကွင်းပေါ်က ပထမဆုံး ဓာတ်ပုံကို သူ့ရဲ့ Instagram အကောင့်မှာ တင်ခဲ့ပါတယ်။

မင်းသား Johnson နဲ့အတူ ပူးတွဲပါဝင်သရုပ်ဆောင်ထားတဲ့ မင်းသား Jason Statham နဲ့ ဒါရိုက်တာ David Leitch တို့ ဖန်စီကားတစီးရဲ့ အရှေ့မှာ စကားလက်ဆုံကျနေတဲ့ အဖြူ၊ အမည်း ဓာတ်ပုံ တပုံကိုလည်း တင်ခဲ့ပါသေးတယ်။

အဲဒီရုပ်ရှင်မှာ ဇာတ်ကောင် Deckard Shaw အဖြစ် ပြန်လည်ပါဝင်သရုပ်ဆောင်ထားတဲ့ မင်းသား Statham က အဆောက်အဦတခုလို့ ယူဆရတဲ့အရာကို နောက်ခံထားပြီး အနက်ရောင် အနောက်တိုင်းဝတ်စုံကို ဝတ်ဆင်ထားပါတယ်။

ရိုက်ကွင်းကို ရောက်မလာသေးတဲ့ မင်းသား Johnson က “ ပထမဆုံးနေ့မှာ အဆင့်ဆင့် ပြောင်းလဲမှုတွေက တရားဝင်စတင်ခဲ့ပါပြီ။ အကြာကြီးစောင့်နေခဲ့ရတဲ့ Fast & Furious ခွဲထွက်ရုပ်ရှင် “Hobbs and Shaw” ကို ထုတ်လုပ်နေပါပြီ။ ကျနော့်ရဲ့ တွဲဖက်ကတော့ အကြမ်းအရမ်းနဲ့ ပျော်ဖို့ကောင်းတဲ့ Jason Statham ပဲ ဖြစ်ပါတယ်”

“ဒါရိုက်တာကတော့ Deadpool 2 ရုပ်ရှင်ဒါရိုက်တာ David Leitch ဖြစ်ပါတယ်။ စိတ်လှုပ်ရှားဖွယ် နောက်ဆက်တွဲရုပ်ရှင်ကို အသက်သွင်းဖို့ အဆင်သင့် ဖြစ်နေပါပြီ။ နည်းလမ်းအသစ်နဲ့ တွေ့ရမှာပါ” လို့ ပုံမှာ စာရေးသားထားပါတယ်။ ဒါ့အပြင် မင်းသားဟာ ရုပ်ရှင်မှာ အလုပ်အတူတူ တွဲဖက်လုပ်ကိုင်နေတဲ့ သရုပ်ဆောင်တွေနဲ့ ဝန်ထမ်းတွေကိုလည်း ထောက်ခံပြောကြားခဲ့ပါတယ်။

မင်းသား The Rock ဟာ Disneyland ထဲက ဆာဖာရီ အကြောင်း ဇာတ်အိမ်တည်ရိုက်ကူးထားတဲ့ Disney ရုပ်ရှင် ထုတ်လုပ်ရေးရဲ့ “Jungle Cruise” ရုပ်ရှင်ကို ရိုက်ကူးဖို့ ဟာဝိုင်အီကို အခုရောက်ရှိနေပါတယ်။ ဒါရိုက်တာ Jaume Collet-Serra ရိုက်ကူးမယ့် အဲဒီစွန့်စားခန်း ရုပ်ရှင်မှာတော့ မင်းသမီး Emily Blunt နဲ့အတူ ပါဝင်မှာ ဖြစ်ပါတယ်။

“Hobbs and Shaw” ရုပ်ရှင်ကတော့ မင်းသား Statham ရဲ့ ရာဇဝတ်မှုအထူးကျွမ်းကျင်သူ Shawနဲ့ မင်းသား The Rock ရဲ့ အမေရိကန် သံတမန်လုံခြုံရေးအေးဂျင့် Luke Hobbs တို့ရဲ့အကြောင်း ဇာတ်အိမ်တည်ထားပါတယ်။ ၂၀၁၁ ခုနှစ်က ထွက်ရှိခဲ့တဲ့ ပဉ္စမမြောက် “Fast and Furious” ရုပ်ရှင်ဖြစ်တဲ့ “Fast Five” မှာ စတင်ပါဝင်ခဲ့ပြီး မင်းသား Statham ရဲ့ ဇာတ်ကောင်ကိုတော့ ၂၀၁၅ ခုနှစ်မှာ ထွက်ရှိခဲ့တဲ့ သတ္တမမြောက် ရုပ်ရှင် “Furious 7” မှာ စတင်မိတ်ဆက်ခဲ့ပါတယ်။

အဲဒီရုပ်ရှင်ကို ၂၀၁၉ ခုနှစ်၊ ဇူလိုင်လ ၂၆ ရက်နေ့မှာ ရုံတင်ဖို့ စီစဉ်ထားပါတယ်။ မင်းသမီးကြီး Helen Mirren က Shaw ရဲက မိခင် Magdalene အဖြစ် ပြန်လည်ပါဝင်လာမှာ ဖြစ်ပါတယ်။ ဒါ့အပြင် မင်းသား Idris Elba က ဗီလိန်အဖြစ် ပါဝင်မှာဖြစ်တယ်လို့ မင်းသား The Rock က အတည်ပြုထားပါတယ်။

Ref: aceshowbiz

The post ကမ္ဘာကျော် အက်ရှင်မင်းသားနှစ်ဦးရဲ့ “Hobbs and Shaw” ရုပ်ရှင် ရိုက်ကူးရေး စတင်နေပြီ appeared first on ဧရာဝတီ.

မင်းသား Henry Cavill ဟာ Warner Bros. ရုပ်ရှင်ထုတ်လုပ်ရေးရဲ့ DC Comics ရုပ်ရှင်တွေမှာ သံမဏိလူသား “Superman” အဖြစ် ပါဝင် သရုပ်ဆောင်မှုကနေ နုတ်ထွက်လိုက်ပြီဖြစ်တဲ့အကြောင်း သတင်းတွေထွက်ပေါ်ခဲ့ပါတယ်။

The Hollywood Reporter ရဲ့ သတင်းအရ “Man of Steel”, “Batman v. Superman” နဲ့ “Justice League” ရုပ်ရှင်တွေမှာ ခရစ်ပတွန်ဂြိုဟ်သား Superman အဖြစ် သရုပ်ဆောင်ခဲ့သူ မင်းသား Cavill ဟာ နောက်ထပ်ရိုက်ကူးမယ့် ရုပ်ရှင်တွေကနေ နုတ်ထွက်လိုက်ပြီလို့ သိရပါတယ်။

အခုလိုမျိုး နုတ်ထွက်လိုက်ရတဲ့အကြောင်းအရင်းတခုကတော့ အချိန်ဇယား အကျပ်အတည်းကြောင့် ဖြစ်တယ်လို့ ဆိုပါတယ်။ မင်းသားရဲ့ အေးဂျင့်နဲ့ Warner Bros. တို့အကြား စာချုပ်ကိစ္စ မပြေမလည် ဖြစ်ခဲ့ပြီး တဲ့နောက် မကြာမီရုံတင်တော့မယ့် “Shazam” ရုပ်ရှင်မှာ ဧည့်သည်သရုပ်ဆောင်အဖြစ် ပါဝင်ဖို့ ညှိနှိုင်းမှု အဆင်မပြေ ဖြစ်ခဲ့ရာကနေ မင်းသား Cavill ရဲ့ Superman အဖြစ် ပါဝင် သရုပ်ဆောင်မှု အစီအစဉ် တခန်းရပ်သွားခဲ့တာလို့ ဆိုပါတယ်။

မင်းသား Cavill ဟာ Netflix ကနေ ရိုက်ကူးမယ့် “The Witcher” ရုပ်ရှင်မှာ ပါဝင်သရုပ်ဆောင်ဖို့ မကြာသေးခင်က လက်မှတ်ရေးထိုးခဲ့တာ ဖြစ်ပေမယ့် The Hollywood Reporter ရဲ့အဆိုအရ အဲဒီသဘောတူညီချက်ဟာ Warner Bros နဲ့ ညှိနှိုင်းမှု အဆင်မပြေဖြစ်ခဲ့ပြီးတဲ့ နောက်မှာသာ ဖြစ်လာခဲ့တာလို့ ဆိုပါတယ်။

အခြားအကြောင်းအရင်းတခုကတော့ DC Comics ရုပ်ရှင်လောက တခုလုံးကို ပြုပြင်မြှင့်တင်ရေးတွေ လုပ်ဖို့ စတူဒီယိုရဲ့ ဆန္ဒကြောင့်လည်း ဖြစ်တယ်လို့ဆိုပါတယ်။ အဲဒီဂယက်ကြောင့် မင်းသား Ben Affleck က Batman အဖြစ် သရုပ်ဆောင်တော့မှာ မဟုတ်ဘဲ လူငယ်သရုပ်ဆောင်တဦးနဲ့ အစားထိုးမယ်ဆိုတဲ့ သတင်းတွေ ကနဦး ထွက်ပေါ် ထားခဲ့ပြီးလည်း ဖြစ်ပါတယ်။ ဒါပေမယ့် အဲဒီလို ပြုပြင်ပြောင်းလဲရေး လုပ်တာက DC Comics တခုလုံးကို ပြောင်းလဲစေခဲ့တာတော့ မဟုတ်ပါဘူး။

မင်းသမီး Gal Gadot ဟာ လာမယ့် ၂၀၁၉ ခုနှစ်၊ နိုဝင်ဘာလမှာ ရုံတင်မယ့် “Wonder Woman 1984” ရုပ်ရှင်မှာ ပါဝင်သရုပ်ဆောင်နေသလို မင်းသား Jason Momoa ကလည်း လာမယ့် ဒီဇင်ဘာလမှာ ပြသတော့မယ့် “Aquaman” ရုပ်ရှင်မှာလည်း ပါဝင်ထားပါသေးတယ်။ ဒါ့အပြင် မင်းသား Ezra Miller ဟာ လာမယ့်နှစ်အစောပိုင်းကစလို့ Flash ဇာတ်ရုပ်မှာ ပါဝင် သရုပ်ဆောင်ဦးမှာပါ။

THR ရဲ့ ထောက်ပြချက်တခုကတော့ Disney ရဲ့ Marvel ရုပ်ရှင်တွေဟာ Warner Bros. ရဲ့ DC ရုပ်ရှင်တွေနဲ့ ရုံဝင်ငွေစာရင်းမှာ နှိုင်းယှဉ်မယ်ဆိုရင် တော်တော်ကြီး အလှမ်းကွာနေတာကြောင့် စတူဒီယို အနေနဲ့ အမှန်ပြန်ဖို့ စိုးရိမ်ပူပန်နေတယ်လို့လည်း ဆိုပါတယ်။

အခုလိုမျိုး THR ရဲ့ သတင်းထုတ်ပြန်ချက်ပြီးတဲ့နောက်မှာ မကြာခင် ရိုက်ကူးမယ့် Superman ရုပ်ရှင်တွေနဲ့ ပတ်သက်လို့ ဆုံးဖြတ်ချက် တစုံတရာမချရသေးတဲ့အကြောင်းနဲ့ မင်းသား Cavill နဲ့ ဆက်ဆံရေးကောင်းမွန်ဆဲဖြစ်တဲ့အကြောင်း Warner Bros. က ကြေညာချက်တစောင် ထုတ်ပြန်ခဲ့ပါတယ်။ မင်းသား Cavill ကလည်း “ဒီနေ့ဟာ စိတ်လှုပ်ရှားစရာ ကောင်းခဲ့ပါတယ်” ဆိုတဲ့ ပုံစာနဲ့ ပြီးခဲ့တဲ့ စက်တင်ဘာ လ ၁၂ ရက်နှောင်းပိုင်း Instagram အကောင့်မှာ ပုံတခုကို တင်ခဲ့ပါတယ်။

Ref: etcanada

The post “Superman” အဖြစ်မှ မင်းသား Henry Cavill နုတ်ထွက်လိုက်ပြီလို့ ကောလာဟလ ထွက်ပေါ် appeared first on ဧရာဝတီ.

နာမည်ကျော် Kpop အဆိုတော် စုံတွဲတတွဲဖြစ်တဲ့ HyunA နဲ့ ချစ်သူ E’Dawn တို့ကို Cube Entertainment ကနေ ဖယ်ရှားလိုက်ပြီလို့ ဆိုပါတယ်။ အေဂျင်စီက “Cube Entertainment ဟာ HyunA နဲ့ E’Dawn ကို ကုမ္ပဏီကနေ ဖယ်ရှားဖို့ ဆုံးဖြတ်ခဲ့ပါတယ်။ အများကြီးဆွေးနွေးခဲ့ပြီးတဲ့နောက် အနုပညာရှင်နှစ်ဦး ဖြစ်တဲ့ HyunA နဲ့ E’Dawn တို့နဲ့အတူ ယုံကြည်မှု သစ္စာတရားကို ပြန်လည်ထူထောင်ဖို့ မဖြစ်နိုင်တော့တဲ့အတွက် သူတို့ကို ဖယ်ရှားဖို့ ဆုံးဖြတ်လိုက်ရတာပါ” လို့ စက်တင်ဘာလ ၁၃ ရက်နေ့မှာ ပြောကြားခဲ့ပါတယ်။

4Minute အဖွဲ့ဝင်ဟောင်း၊ အသက် ၂၆ နှစ်အရွယ် အဆိုတော် HyunA က အသက် ၂၄ နှစ်ရွယ် Triple H အဖွဲ့သား E’Dawn နဲ့ မေတ္တာမျှနေတဲ့အကြောင်း ပြီးခဲ့တဲ့လကမှ ဝန်ခံပြောဆိုထားတာပါ။ 4Minute အဖွဲ့ဝင် ဟောင်း HyunA က ချစ်သူဟာ လေ့ကျင့်သူတဦးအနေနဲ့ စတင်ဆုံတွေ့ခဲ့ကြခြင်းဖြစ်ပြီး ၂၀၁၆ ခုနှစ်၊ မေလမှာ ချစ်သူဖြစ်ခဲ့ကြတာ ဖြစ်တဲ့အကြောင်း Instagram မှာ ရေးသားပြောဆိုခဲ့တာပါ။

ဂီတလုပ်ငန်းတွေကို အတူတူ ဖန်တီးနေခဲ့ချိန်မှာ ဆက်ဆံရေးတိုးတက်လာခဲ့တာဖြစ်တဲ့အကြောင်း HyunA က ပြောဆိုခဲ့ပါတယ်။ E’Dawn က နာမည်နဲ့ ဖော်ပြမခံခဲ့ရပေမယ့် သူ့ရဲ့ အယ်လ်ဘမ်အတွက် ကူညီပေးခဲ့တဲ့ အကြောင်းလည်း ဆိုပါတယ်။

ပြီးခဲ့တဲ့ သြဂုတ်လအစောပိုင်းမှာ သူတို့နှစ်ဦးရဲ့ အချစ်ရေးကို Cube Entertainment က ငြင်းဆိုခဲ့ပေမယ့် HyunA ကိုယ်တိုင်က E’Dawn က ချစ်သူတွေဖြစ်နေတဲ့အကြောင်း ရှင်းလင်းပြောကြားခဲ့ပြီးတဲ့နောက် “Retro Futurism” အယ်လ်ဘမ်အတွက် Triple H ရဲ့ ပရိုမိုးရှင်းပွဲတွေကို ဖျက်သိမ်းပစ်ခဲ့ပါတယ်။ အဲဒီနောက် သူတို့ ချစ်သူနှစ်ဦးဟာ ပြင်းထန်တဲ့ ဝေဖန်မှုတွေနဲ့ ကြုံတွေ့ခဲ့ရပြီး ပွဲအစီအစဉ် တော်တော်များများကိုလည်း ဖျက်သိမ်းခဲ့ရပါတယ်။ E’Dawn ရဲ့ မူရင်းအဖွဲ့ဖြစ်တဲ့ Pentagon ကနေလည်း ခေတ္တအနားယူခဲ့ရပါတယ်။

အေဂျင်စီကနေ ထုတ်ပြန်ခဲ့တဲ့ ကြေညာချက်ထဲမှာတော့ Entertainment တခုတည်းမှာရှိတဲ့ HyunA နဲ့ E’Dawn တို့အပါအဝင် အနုပညာရှင်တွေနဲ့ အေဂျင်စီတို့ကြား အပြန်အလှန်ယုံကြည်မှု၊ သစ္စာတရားတို့နဲ့ အနုပညာရှင်တွေကို စီမံခန့်ခွဲရေးဟာ သူတို့ရဲ့ နံပါတ် ၁ ဦးစားပေးဖြစ်တဲ့အကြောင်း၊ အထုတ်ခံလိုက်ရတဲ့ အနုပညာရှင်နှစ်ဦးနဲ့ ယုံကြည်မှုကို ပြန်လည်တည်ဆောက်လို့ မရတော့တဲ့အတွက် ထုတ်ပစ်ဖို့ ဆုံးဖြတ်ခဲ့တာ ဖြစ်တဲ့ အကြောင်းနဲ့ အခုအချိန်အထိ သူတို့နှစ်ဦးကို ထောက်ခံအားပေးခဲ့ကြတဲ့ ပရိသတ်တွေကို ကျေးဇူးတင်တဲ့ အကြောင်း ဖော်ပြရေးသားထားပါတယ်။

Ref:asiaone

The post K-pop အဆိုတော် HyunA နဲ့ ချစ်သူ E’Dawn တို့ကို အေဂျင်စီမှ ထုတ်ပယ် appeared first on ဧရာဝတီ.

ဘောလိဝုဒ် မင်းသား Akshay Kumar ဆိုရင် ဘောလိဝုဒ် ပရိသတ်တွေ မသိသလောက် နည်းပါတယ်။ သူ့ရိုက်ကူးတဲ့ ဇာတ်ကားတွေက ကောင်းမွန်ပြီး အဓိပ္ပာယ်ရှိတာကြောင့် ပရိသတ် အခိုင်အမာ ရထားသူပါ။ ဒရာမာ၊ ဟာသ၊ အက်ရှင် အစရှိသဖြင့် ကာရိုက်တာမျိုးစုံမှာ အံဝင်ခွင်ကျ သရုပ်ဆောင်နိုင်သူပါ။ အခုလည်း သူ့ရဲ့ မြင်နေကျပုံစံ မဟုတ်တဲ့ အသွင်ကို “Kesari” ဆိုတဲ့ဇာတ်ကားမှာ တွေ့ရမှာ ဖြစ်ပါတယ်။

နာမည်ကြီး သရုပ်ဆောင်တွေပါဝင်တဲ့ “Kesari” ဟာ ၂၀၁၉ ခုနှစ်မှာ စောင့်ကြည့်ရမယ့် ဇာတ်ကား စာရင်းထဲမှာ ပါဝင်ပါတယ်။ မင်းသား Akshay Kumar နဲ့အတူ မင်းသမီး Parineeti Chopra တို့ အဓိက ဦးဆောင် ပါဝင်ထားပါတယ်။ ဒီဇာတ်ကား စရိုက်တယ်လု့ိ သတင်းစထွက်ကတည်းကိုက ဝေဖန်မှုတွေ များစွာ ရရှိခဲ့ပါတယ်။ ဒီဇာတ်ကားဟာ ၁၈၉၇ ခုနှစ်၊ စက်တင်ဘာလ ၁၂ ရက်နေ့က ဖြစ်ခဲ့တဲ့ Saragarhi တိုက်ပွဲကို အခြေခံထားတယ်လို့ သိရပါတယ်။

Saragarhi ဟာ ယခု ပါကစ္စတန်နိုင်ငံနဲ့ နီးတဲ့ နယ်စပ်ရွာလေး တရွာပါ။ ဆစ်ခ်လူမျိုး အိန္ဒိယ စစ်သားတွေနဲ့ အာဖဂန်စစ်သားတွေကြား တိုက်ပွဲဖြစ်တဲ့အခါ Saragarhi ကို ကြားခံအဖြစ် သုံးပြီး သတင်းပေးပို့ရပါတယ်။ ဒီလို တိုက်ပွဲမှာ အာဖဂန် ၁ သောင်းကို ဆစ်ခ်လူမျိုး လက်ရွေးစင်စစ်သား ၂၁ ယောက်က အနိုင် တိုက်နိုင်ခဲ့ ပါတယ်။ ဒီလိုဇာတ်ကြောကို အခြေယူပြီး ဒါရိုက်တာ Anurag Singh က ပုံဖော် ရိုက်ကူးထားတဲ့ ဖြစ်ရပ်မှန် ဇာတ်ကားပါ။ ဒီဇာတ်ကားဟာ ဝေဖန်မှုတွေနဲ့အတူ ၂၀၁၉ ခုနှစ်မှာ အောင်မြင်မှုတွေ ဆွတ်ခူးနိုင်မယ်လို့ မျှော်လင့်နေကြပါတယ်။

ထုတ်လုပ်သူ Karan Johar ကိုယ်တိုင်ကလည်း သူ့ရဲ့ Instagram အကောင့်မှာ အဆိုပါ ဇာတ်ကားရဲ့ ပိုစတာကို တင်ထားပါတယ်။ Zee Studio ကနေ မတ်လ ၁၉ ရက်၊ ၂၀၁၉ ခုနှစ်မှာ ဖြန့်ချိမယ်လို့ သိရပါတယ်။ ဒီဇာတ်ကားဟာ ကုန်ကျစရိတ်ကို ကျော်လွန်ပြီး အောင်မြင်မှုတွေ ဆွတ်ခူးနိုင်မလားဆိုတာ အဖွဲ့သားအားလုံးက စိတ်လှုပ်ရှားနေကြပါတယ်။

မင်းသား Akshay Kumar က သူ့ရဲ့ Instagram အကောင့်မှာ အဲဒီရုပ်ရှင်ပိုစတာကို တင်ခဲ့ပြီး Saragarhi က သူရဲကောင်းများကို လေးစားစွာ ဂုဏ်ပြုလျက်ဆိုပြီး ရေးသားထားပါတယ်။

မြင်နေကျပုံမျိုး မဟုတ်ဘဲ နှုတ်ခမ်းမွေးရှည်နဲ့အတူ ဆစ်ခ်လူမျိုး စစ်သားတယောက်ရဲ့ အသွင်အပြင်က ထင်းနေပါတယ်။ Akshay ဟာ ၂၀၁၈ ခုနှစ်မှာ ထွက်ရှိထားတဲ့ “Pad Man” ရုပ်ရှင်မှာလည်း ပရိသတ် အချစ်တွေ ရခဲ့သလို ၂၀၁၉ ခုနှစ်မှာကော ဘယ်လိုတွေ ဖြစ်လာမလဲ စောင့်ကြည့်ရမှာပါ။

ကဲ Akshay ရဲ့ပရိသတ်တွေကတော့ သူ့ရဲ့ဇာတ်ကားကို မျှော်နေလောက်ပြီ ထင်ပါတယ်။

ဆက်စပ် သတင်းလင့်ခ်များ
အသက် ၅၁ နှစ် ပြည့်သွားပြီဖြစ်တဲ့ မင်းသား Akshay Kumar
Instagram မှာ Follower သန်း ၂၀ ကျော်သွားတဲ့ ပထမဆုံး ဘောလိဝုဒ်မင်းသား
သရုပ်ဆောင်တယောက်အနေနဲ့ အကောင်းဆုံးအချိန်ကို ရောက်နေပြီလို့ဆိုတဲ့ Akshay Kumar
အမျိုးသမီးတွေ အတွက် လစဉ်သုံးပစ္စည်း ထုတ်လုပ်တဲ့စက် တီထွင်သူ “Padman”

The post ၂၀၁၉ မှာ စောင့်ကြည့်ရမယ့် Akshay Kumar ရဲ့ ရုပ်ရှင်ဇာတ်ကားသစ် “Kesari” appeared first on ဧရာဝတီ.

ပရိသတ်ကြိုက်တဲ့ တကိုယ်တော် သီချင်းခွေများစွာ ထွက်ရှိခဲ့ပြီး သီချင်းဆိုရုံတင်မက သရုပ်ဆောင်အလုပ်ပါ အကောင်းဆုံးကြိုးစား သရုပ်ဆောင်လေ့ရှိတဲ့ ရဲလေးက အဆိုတော်အလုပ်ဟာ သူ့ရဲ့ အဓိကအလုပ်ဖြစ်သလို သရုပ်ဆောင်ရာမှာလည်း ပေါ့ပေါ့တန်တန် သရုပ်ဆောင်ခဲ့တာ မရှိဘူးလို့ မီဒီယာများကို ပြောပါတယ်။

“သရုပ်ဆောင်ခဲ့တာတွေမှာ ကျနော် လွယ်လင့်တကူ သရုပ်ဆောင်ခဲ့တာ မရှိပါဘူး။ ပရိသတ်ကို စေတနာထားပြီး ကိုယ့်ကိုယ်ကိုယ် မဂွမ်းအောင်ဆိုပြီး အမြဲတမ်းသရုပ်ဆောင်ခဲ့တာ ချည်းပါပဲ။ ဘယ်လို ဇာတ်ကားမှာပဲ ဖြစ်ဖြစ် အကောင်းဆုံး သရုပ်ဆောင်ခဲ့တာပါပဲ။ ပိုပြီးကောင်းလာအောင် လုပ်ရတာတွေပ ဲရှိလာတာပါ။ ပေါ့ပေါ့တန်တန် သရုပ်ဆောင်ခဲ့တာ တခါမှ မရှိပါဘူး။ ဟာသကားလည်း ဟာသကားအလျောက်၊ ဒရာမာလည်း ဒရာမာလို၊ ဖန်စီဆိုလည်း ဖန်စီလို အကောင်းဆုံး စေတနာထားပြီးတော့ သရုပ်ဆောင်ခဲ့ပါတယ်”လို့ ရဲလေးက ပြောပါတယ်။

မကြာခင်မှာတော့ ရဲလေးဟာ တခေတ်တခါက အောင်မြင်ကျော်ကြားခဲ့တဲ့ စာရေးဆရာဖေမြင့်ရဲ့ “ဆတ်သေချောင်းရဲ့ ဒဏ္ဍာရီ” ဆိုတဲ့ ဝတ္ထုကို ဒါရိုက်တာ ဝင်းထွန်းထွန်းက ပြန်လည် ပုံဖော်ရိုက်ကူးမယ့် “တခါက ဆတ်သေချောင်း” ဆိုတဲ့ ရုပ်ရှင် ဇာတ်ကားကြီးမှာလည်း သရုပ်ဆောင်သွားဖို့ရှိတယ်လို့ သိရပါတယ်။

“ကျနော့်အနေနဲ့ အချိန်ရရင်ရသလို ရုပ်ရှင် ရိုက်ဖြစ်တယ်။ ကျနော်က ဒီနယ်ပယ်ထဲ ရောက်လာပြီဆိုရင် ပေါ့ပေါ့တန်တန်လုပ်လို့ မရဘူးဆိုတာ သိတဲ့အတွက် အကောင်းဆုံး သရုပ်ဆောင်ရမယ်။ အကောင်းဆုံး ကြိုးစားမှာပဲ။ သီချင်းဘက်မှာလည်း ဒီတိုင်းပဲ။ ကိုယ့်ကိုယ်ကိုယ် အမြဲပြိုင်တယ်။ ဒီထက် ပိုကောင်းအောင် ဘယ်လို ထပ်လုပ်မလဲကို စဉ်းစားတယ်။ ပရိသတ်ရင်ထဲ ထိရောက်မယ့် စာသားတွေကို အမြဲတွေးပြီး ရေးသားတယ်” လို့ ရဲလေးက ပြောပါတယ်။

ရဲလေးနဲ့ သူ့ရဲ့ညီဖြစ်သူ ဂျိုကာတို့ တည်ထောင်ထားတဲ့ YLJK Entertainment ကနေလည်း ရုပ်ရှင်ရိုက်ဖို့အတွက် စုဆောင်းထားတဲ့ ဇာတ်လမ်းတွေလည်း ရှိနေပြီး နောက်ပိုင်းမှာ “YLJK Film” ဆိုပြီး ဖြစ်လာတဲ့အထိ ကြိုးစားသွားမယ်လို့ ဆိုပါတယ်။

“နောက်ပိုင်း ကိုယ်တိုင် ဖန်တီးမယ့် ဇာတ်လမ်းလေးတွေလည်း ရနေပါပြီ။ ကျနော်ရော ဂျိုကာရော နောက်ပိုင်း YLJK Film ဆိုပြီး ဖြစ်လာတဲ့အထိကို နှစ်ယောက်သား ကြိုးစားနေပါတယ်” လို့ ရဲလေးက ပြောပါတယ်။ သရုပ်ဆောင် လုပ်နေပေမယ့် ဂီတဘက်မှာ မလစ်ဟင်းရအောင်လည်း ညှိနှိုင်းပြီးတော့ လုပ်နေပြီး တခုလိုချင်ရင် တခုပေးဆပ်ရတဲ့ အပိုင်းတွေလည်း ရှိတယ်လို့ ရဲလေးက ပြောပါတယ်။

“ကျနော်ရဲ့ အဓိကကတော့ ဂီတပဲပေါ့။ သီချင်းကို ဥပေက္ခာပြုလို့ မရဘူး။ ပွင့်လင်းရာသီ ရောက်တော့မယ်။ ပွဲတွေ ကမ်းလှမ်းတာ အရင်နှစ်ကထက် များလာတယ်။ အဲဒီကြားထဲမှာ ကားရိုက်နဲ့ ဘယ်လိုလုပ်ရမလဲ ဆိုတာကို ညှိနှိုင်း ရမှာပေါ့။ ကိုယ့်ရဲ့ စီမံခန့်ခွဲမှုက အရေးကြီးပါတယ်။ တခုလိုချင် တခုပေးဆပ်ရတဲ့ အပိုင်းတွေ ရှိပါတယ်။ အရင်တုန်းကလည်း ရှိခဲ့တယ်။ အခုလည်း ရှိပါတယ်” လို့ ရဲလေးက ဆိုပါတယ်။

အဆိုတော် ရဲလေးက တကိုယ်တော်သီချင်းခွေများစွာ ထွက်ရှိပြီးနောက် ယခုနောက်ဆုံးမှာတော့ Single Song အနေနဲ့ “အသည်းကွဲတယ်ဆိုတာ” သီချင်းနဲ့ “နင်မရှိတဲ့နောက်” ဆိုတဲ့ သီချင်းများ ထွက်ရှိထားပါတယ်။

The post “ပေါ့ပေါ့တန်တန် သရုပ်ဆောင်ခဲ့တာ တခါမှ မရှိပါဘူး” လို့ ပြောတဲ့ ရဲလေး appeared first on ဧရာဝတီ.

စာရေးဆရာမကြီး ကြည်အေးရဲ့ နာမည်ကျော် ဝတ္ထုတပုဒ်ဖြစ်တဲ့ “မီ” ကို ဒါရိုက်တာ ဏကြီးက ရုပ်ရှင်ကားအဖြစ် ပြန်လည် အသက်သွင်း ရိုက်ကူး ပုံဖော်ထားပါတယ်။ ဒီဝတ္ထုကို ရုပ်ရှင်အဖြစ် ပြန်လည် ဖန်တီးရိုက်ကူးရာမှာ တာဝန်ကြီးပြီး ဇာတ်ညွှန်း ပြန်ရေးတဲ့ အချိန်မှာ ပိုပြီး စိန်ခေါ်မှုဖြစ်တယ်လို့ ဒါရိုက်တာ ဏကြီးက ဧရာဝတီကို ပြောပါတယ်။

“အခုတော့ ကျနော် သီချင်းတွေ ကြော်ငြာတွေ သိပ်မလုပ်ဖြစ်ဘူး။ မီ ဇာတ်ကားအတွက်ပဲ Marketing လုပ်နေတာကြောင့် ကျနော် လုပ်လက်စလေးတွေ နားပြီး မီကို ဦးစားပေးနေတာပါ။ မီဇာတ်ကား ရိုက်ဖြစ်တာကတော့ သုသု (ပိုင်ဖြိုးသု) ရိုက်ချင်တာကြောင့် ရိုက်ပေးဖြစ်တာပေါ့နော်။ ဆရာမ ကြည်အေးရဲ့ “မီ”ကို ရိုက်ရမှာ ကြောက်ကြတယ်။ ဒီလို ဝတ္ထုတွေကို တထပ်တည်းကျအောင် ရိုက်ဖို့ ဆိုရင် မရိုက်ရဲကြဘူး။ ခက်လည်း ခက်တယ်” လို့ ဒါရိုက်တာ ဏကြီးက ပြောပါတယ်။

“မြန်မာ့ရုပ်ရှင် သမိုင်းမှာ ဆိုရင် ကျနော် သိသလောက် ဆရာကြီး မောင်သာရရဲ့ ‘ကတ္တီပါ ဖိနပ်စီး ရွှေထီးဆောင်း’ ကို ဦးဝဏ္ဏ ရိုက်တာပဲ တွေ့ခဲ့တာ။ ဘယ်သူမဆို Character Dripping ဝတ္ထုတွေဆို ရိုက်ရမှာ ကြောက်ကြတယ်။ သုသုက မီ ဝတ္ထု ဖတ်ပြီး သူအရမ်းကြိုက်လို့ ရိုက်ချင်တာကြောင့် ရိုက်ပေးဖြစ်တယ်။ မီကို ရိုက်မယ်လို့ အသိပေးကတည်းက ဝေဖန်မှုတွေ အများကြီး ရှိတယ်။ ဆရာမကြီး ပရိသတ်အချို့က မရိုက်စေချင်ကြဘူး” လို့ ဏကြီးက ဆိုပါတယ်။

ဆက်လက်ပြီး “ဖြစ်နေကျ တခုရှိတယ်။ ဝတ္ထုကို ရုပ်ရှင်ရိုက်မယ်ဆို မူရင်းဝတ္ထုကို မှီတာ ခဲယဉ်းတယ်။ စာအုပ် အရသာ ပျက်စီးမှာစိုးလို့ မရိုက်စေချင်ဘူး။ တာဝန်တော့ အရမ်းကြီးတယ်။ စိန်ခေါ်မှုလည်း ရှိတယ်။ ဝတ္ထုကို ဇာတ်ညွှန်း ပြန်ရေးတဲ့ အချိန်မှာ ပိုပြီး စိန်ခေါ်မှု ဖြစ်တယ်။ အရမ်းလည်း ခက်ခဲတယ်။ ကျနော့် အတွက်တော့ ပထမဆုံး ဇာတ်ကားကြီး တကားပါ”လို့လည်း ဒါရိုက်တာ ဏကြီးက ပြောပါတယ်။

“မီ” ရုပ်ရှင်ရဲ့ အမြည်း ဗီဒီယို တင်ပြီးနောက်မှာ သရုပ်ဆောင် နေတိုးရဲ့ ဆံပင်ပုံစံကို ဝေဖန်မှုတွေ ရှိနေတာနဲ့ ပတ်သက်ပြီး ဒါရိုက်တာ ဏကြီးက မသေမသပ် ပေါ့ပေါ့လျော့လျော့ လုပ်ထားတာ မဟုတ်ဘဲ ဆံပင်တု ၃ ခုနဲ့ သေချာ လုပ်ထားကြောင်း ပြောပါတယ်။

“ကိုဇော် (Stylist) နဲ့က အမြဲ အတူတူ လုပ်နေကျ။ ကိုဇော်က အရမ်း စေ့စပ်တယ်။ စိတ်လည်း စိတ်ဝင်စားတာကြောင့် ကျနော့် ရုပ်ရှင်မှာ အပြည့် လုပ်ချင်တာကြောင့် ကိုဇော့်ကို အကူအညီ တောင်းရတယ်။ ကျနော် တာဝန်ယူတာတွေ အရမ်းများတာကြောင့် အဲ့ဘက်ပိုင်း ကိုဇော့်ကို အကူအညီတောင်းလိုက်ရတယ်။ ဝတ္ထုကို ဝတ္ထုအတိုင်း ပြန်ရိုက်ဖို့ တော်တော်လေး ခဲယဉ်းတယ်။ စာဖတ်ပရိသတ်တွေ အားလုံးက သူတို့ဖတ်ထားတဲ့ ဇာတ်ကောင်အတိုင်း မျက်လုံးထဲ မမြင်ရင် ဝေဖန်မှုတွေ ထွက်လာတာပေါ့” လို့ ဒါရိုက်တာ ဏကြီးက ဆိုပါတယ်။

ဆက်လက်ပြီး ဒါရိုက်တာ ဏကြီးက ယခုလိုမျိုး ပရိသတ်များက နေတိုးရဲ့ ဆံပင်ပုံစံကို ဝေဖန်ကြတာနဲ့ ပတ်သက်ပြီးလည်း အခုလို ဆိုပါတယ်။

“ကိုနေတိုး ဆံပင်မှာလည်း ဝေဖန်မှုတွေ တွေ့ရတယ်။ ကျနော်တို့ မသေမသပ် ပေါ့ပေါ့လျော့လျော့ မရိုက်ထားဘူး။ ကိုနေတိုး မုန်းစွဲကား ရိုက်ပြီးတော့ ကတုံးဖြစ်နေတာကြောင့် Special Effect မိတ်ကပ်ပညာရှင် ကိုအောင်ကျော်ထွန်းနဲ့ တိုင်ပင်ပြီး စစ်ပြီးကာလတုန်းက ဆံပင်ပုံစံတွေ ကြည့်ပြီး ခေတ်စားနေတဲ့ High & tight ဆံပင်ကို လုပ်ခဲ့တယ်”

“ဆံပင်တု ၃ ခု လုပ်ခဲ့တယ်။ ဆံပင် သပ်သပ်ရပ်ရပ် လုပ်တာ ၂ ခုရယ်၊ ပွနေတာ ၁ ခုရယ်၊ ၃ခုကို ပြင်ဆင်ပြီး လုပ်ထားတယ်။ ဆံပင်တပ်တာတင် ၁ နာရီလောက် ကြာတယ်။ ကျနော်တို့သေချာတော့ လုပ်ထားပါတယ်။ ဝေဖန်မှုတွေတော့ ရှိတယ်။ အဲ့အတွက်တော့ ပြန်ပြင်ဆင်ပြီး ရိုက်မှာ မဟုတ်ပါဘူး။ကျနော်တို့ အကောင်းဆုံးကြိုးစားပြီး လုပ်ထားကြတယ်” လို့ ဒါရိုက်တာ ဏကြီးက ပြောပါတယ်။

ဒါရိုက်တာ ဏကြီးဟာ ကြော်ငြာများနဲ့ တေးသီချင်း Music Video တွေကို ရိုက်ကူးခဲ့ပြီး “မီ” ရုပ်ရှင်ဇာတ်ကားကြီးကို ပထမဆုံး ဇာတ်ကားကြီး အဖြစ် ရိုက်ကူးပုံဖော်ထားပါတယ်။ “မီ” ရုပ်ရှင်ကားကြီးမှာတော့ သရုပ်ဆောင်များအဖြစ် နေတိုး၊ ပိုင်ဖြိုးသု၊ ရဲအောင်၊ မင်းဦး၊ သားညီ၊ အောင်ရဲထိုက်တို့ ပါဝင်သရုပ်ဆောင်ထားပါတယ်။

ဆက်စပ် သတင်းလင့်ခ်များ

• “မီ” ရုပ်ရှင်ဇာတ်ကားရဲ့ ဝတ်စုံ၊ ဆံပင်ပြင်ဆင်မှုပိုင်းနဲ့ပတ်သက်ပြီး ပြောပြတဲ့ Stylist ကိုဇော်ဇော်
• “မီ” ရုပ်ရှင်အတွက် တကားလုံး အဝတ်စား စီစဉ်ပေးခဲ့သူ Production Stylist ဇော်ဇော်
• “မီ” ဇာတ်ရုပ်အတွက် ရင်ခုန်နေတဲ့ ပိုင်ဖြိုးသု

The post “မီ” ဝတ္ထုကို ရုပ်ရှင် ရိုက်ရတာ တာဝန်ကြီးပြီး ဇာတ်ညွှန်း ရေးရတာ စိန်ခေါ်မှု ပိုရှိတယ် appeared first on ဧရာဝတီ.

ဟောလိဝုဒ် မင်းသမီး Halle Berry ဟာ ကိုယ်တိုင် ထုတ်လုပ်ရေးမှူးနဲ့ သရုပ်ဆောင်အဖြစ် ပါဝင်မယ့် ကိုယ်ခံပညာအသားပေး ဒရာမာ “Bruised” ကို ပွဲဦးထွက် ဒါရိုက်တာ အနေနဲ့ ရိုက်ကူးပေးမှာ ဖြစ်ပြီး အဲဒီ ရုပ်ရှင်ဟာ လာမယ့် ၂၀၁၉ ခုနှစ် မတ်လမှာ စတင် ထုတ်လုပ်မယ်လို့ သိရပါတယ်။

အခြားထုတ်လုပ်သူတွေ အနေနဲ့ Thunder Road Pictures ရုပ်ရှင်ထုတ်လုပ်ရေးရဲ့ Basil Iwanyk၊ Entertainment 360 နဲ့ and Linda Gottlieb တို့ ပါဝင်ကြပါတယ်။ အဆိုပါ ရုပ်ရှင်အတွက် Riverstone ကုမ္ပဏီက ငွေကြေး စိုက်ထုတ်ပေးမှာဖြစ်ပြီး Erica Lee က အမှုဆောင်ထုတ်လုပ်သူအဖြစ် ဆောင်ရွက်မှာ ဖြစ်ပါတယ်။

၆ နှစ် အရွယ် သားဖြစ်သူကို သူ့ရဲ့ မိခင်ထံ ထိန်းသိမ်းစောင့်ရှောက်ခွင့် ပြန်ပေးဖို့ အပေးအယူနဲ့ တက်သစ်စ MMA သိုင်းပေါင်းစုံ ဖိုက်တာတဦး ကြုံတွေ့ရတဲ့ စိန်ခေါ်မှုတွေအကြောင်း ဇာတ်အိမ်တည်ရိုက်ကူးမယ့် အဆိုပါ ရုပ်ရှင်ကို Michelle Rosenfarb က ဇာတ်ညွှန်း ရေးသားပေးမှာ ဖြစ်ပါတယ်။

ဒါ့အပြင် “John Wick” ရုပ်ရှင် ဇာတ်လမ်းတွဲ တွေအတွက် တိုက်ခိုက်ရေး ပြကွက်တွေကို ဖန်တီးတဲ့ အဖွဲ့နဲ့လည်း မင်းသမီး Berry က အလုပ်အတူ တွဲလုပ်မှာလည်း ဖြစ်ပါတယ်။

မင်းသမီး Berry ဟာ ၁၉၈၉ ခုနှစ်မှာ ထုတ်လွှင့်ခဲ့တဲ့ “Living Dolls” ဇာတ်လမ်းတွဲကနေ အနုပညာ လုပ်ငန်းတွေ စတင်လုပ်ကိုင်ခဲ့ပြီး ဒါရိုက်တာ Spike Lee ရဲ့ “Jungle Fever” ရုပ်ရှင်မှာ ပထမဆုံးအနေနဲ့ ပါဝင်ခဲ့ပါတယ်။ ၂၀၀၁ ခုနှစ်မှာ ပြသခဲ့တဲ့ “Monster’s Ball” ရုပ်ရှင်နဲ့ အော်စကာဆု ရရှိတဲ့ ပထမဆုံး လူမည်းအမျိုးသမီး ဖြစ်လာခဲ့ပါတယ်။

မင်းသမီးဟာ ပြီးခဲ့တဲ့နှစ်မှာ ထွက်ရှိခဲ့တဲ့ “Kingsman: The Golden Circle” ရုပ်ရှင်နဲ့ သည်းထိတ်ရင်ဖို ရုပ်ရှင် “Kidnap” မှာ ပါဝင်သရုပ်ဆောင်ခဲ့ပါတယ်။

လက်ရှိမှာတော့ “John Wick 3” ရုပ်ရှင်မှာ ပါဝင်သရုပ် ဆောင်နေပြီး ၁၉၈၅ ခုနှစ်မှာ နာမည်ကျော်ခဲ့တဲ့ သည်းထိတ်ရင်ဖိုရုပ်ရှင် “Jagged Edge” ကို ပြန်လည် ရိုက်ကူးမယ့် ရုပ်ရှင်မှာတော့ အဓိကနေရာကနေ ပါဝင်ဦးမှာဖြစ်ပါတယ်။

မင်းသမီးဟာ WME နဲ့ Management 360 နဲ့ အလုပ်လုပ်ကိုင်နေသူလည်း ဖြစ်ပါတယ်။ ယခုသတင်းကို Deadline Hollywood က ပထမဆုံး ဖော်ပြခဲ့တာ ဖြစ်ပါတယ်။

Ref: variety

The post ဒါရိုက်တာတဦးအဖြစ် မြင်တွေ့ရဦးမယ့် မင်းသမီး Halle Berry appeared first on ဧရာဝတီ.

မင်းသား Ben Affleck ဟာ လင်းနို့လူသားအဖြစ် ထပ်မံသရုပ်ဆောင်ဖို့ ငြင်းဆိုလာမယ်ဆိုရင် ကြိုတင် အစီအစဉ်တွေကို Warner Bros. ရုပ်ရှင်ထုတ်လုပ်ရေးက ပြင်ဆင်ထားပုံရပါတယ်။

နာမည်ကျော် ဇာတ်ညွှန်းရေးဆရာ Matt Reeves က ဇာတ်ညွှန်းရေးမှာဖြစ်ပြီး မကြာမီရိုက်ကူးတော့မယ့် လင်းနို့လူသား တကိုယ်တော် ရုပ်ရှင်မှာ ပါဝင်စေဖို့ သရုပ်ဆောင် တော်တော်များများကို စတူဒီယိုက ရှာဖွေနေပြီဆိုတဲ့ သတင်းစကားတွေလည်း ထွက်ပေါ်နေပါတယ်။

Revenge of the Fans မီဒီယာရဲ့အဆိုအရ WB စတူဒီယိုဟာ လက်ရှိ လင်းနို့လူသာအဖြစ် သရုပ်ဆောင်နေတဲ့ မင်းသား Ben နေရာမှာ မင်းသား Kit Harington နဲ့ အစားထိုးဖို့ စဉ်းစားနေတယ်လို့ သိရပါတယ်။

အဲဒီသတင်း အရဆိုရင် လင်းနို့လူသားအဖြစ် သရုပ်ဆောင်စေချင်တဲ့ သရုပ်ဆောင်တချို့ကို ရွေးချယ်ပြီး တောင်းဆိုမှုတွေ လုပ်ထားတဲ့ အကြောင်းနဲ့ အဲဒီထဲက မင်းသားတယောက်ဟာ “Game of Thrones” စီးရီး မင်းသား Kit ဖြစ်တယ်လို့ ဆိုပါတယ်။

ဒါပေမယ့် လင်းနို့လူသားအဖြစ် သရုပ်ဆောင်ဖို့ မင်းသား Kit နဲ့ ကျယ်ကျယ်ပြန့်ပြန့် ဆွေးနွေးနေပြီလား ဆိုတာကိုတော့ ရှင်းရှင်းလင်းလင်း မသိရသေးပေမယ့် အဲဒီဇာတ်ရုပ်မှာ ပါဝင်သရုပ်ဆောင်ဖို့ မင်းသားက စဉ်းစားနေတာ ဖြစ်နိုင်တယ်လို့ ဆိုပါတယ်။

အဆိုပါ သတင်းမီဒီယာ ဝက်ဘ်ဆိုက်မှာတော့ မင်းသား Kit ဟာ အသက် ၅ ပေ ၈ လက်မရှိပြီး အရင်တုန်းက လင်းနို့လူသားအဖြစ် သရုပ်ဆောင်မယ်လို့ သတင်းတွေ ထွက်ခဲ့ဖူးတဲ့ မင်းသားတွေဖြစ်ကြတဲ့ Jake Gyllenhaal နဲ့ Jack Huston တို့ရဲ့ ခန္ဓာကိုယ် အရွယ်အစားနဲ့လည်း ဆင်တူတယ်လို့ ဖော်ပြထားပါတယ်။

ယခုအချိန်မှာတော့ မင်းသား Ben ရဲ့ လင်းနို့လူသားအဖြစ် ထပ်မံသရုပ်ဆောင်ဖို့ ဖြစ်နိုင်ချေဟာ မရေမရာ ရှိနေတာပါ။ ယခုအသစ် ထပ်မံ ရိုက်ကူးမယ့် ရုပ်ရှင်ကို ကိုယ်တိုင်ရိုက်ကူးပြီး ဇာတ်ညွှန်းကိုပါ ကိုယ်တိုင်ရေးဖို့ ပြင်ဆင်ထားခဲ့တာပါ။ ဒါပေမယ့် အခု ဇာတ်ညွှန်းရေးဆရာ Reeves က ရုပ်ရှင်ထုတ်လုပ်ရေးထဲ ဝင်လာခဲ့ပြီး ဇာတ်ညွှန်းကို ပြန်ပြင်ရေးနေခဲ့တာ လတော်တော်များများ ရှိနေပါပြီ။

ဇာတ်ညွှန်းရေးဆရာ Reeves က “လင်းနို့လူသားကို ပုံဖော်ပြီး တကယ့်ကိုပဲ ကိုယ်ရေးကိုယ်တာ ဆန်တဲ့ ဇာတ်လမ်းမျိုးကို အလေးထားပုံဖော်ဖို့ ကျနော် စိတ်လှုပ်ရှားနေခဲ့တာပါ။ ဒါပေမယ့် တချိန်တည်းမှာပဲ မူရင်း ဇာတ်လမ်းအတိုင်း ဆက်လုပ်မှာ မဟုတ်ဘဲ စိတ်ခံစားသက်ဝင်တဲ့ လင်းနို့လူသားအဖြစ်နဲ့ ကမ္ဘာ့ အကြီးကျယ်ဆုံး ထောက်လှမ်းရေး တယောက်အနေနဲ့ ပုံဖော်မှာ ဖြစ်ပါတယ်” လို့ ပြောကြားခဲ့ပါတယ်။

“War for the Planet of the Apes” ဒါရိုက်တာ Reeves က တကိုယ်တော် လင်းနို့လူသား ရုပ်ရှင်အသစ်ကို လာမယ့်နှစ် နွေဦး ဒါမှမဟုတ် နွေရာသီကာလမှာ စတင်နိုင်ဖို့ ပြင်ဆင်ထားတဲ့အကြောင်း ပြီးခဲ့တဲ့ လတုန်းက ပြောဆိုခဲ့ပါတယ်။

ဆက်စပ် သတင်းလင့်ခ် – Batman ရုပ်ရှင်အသစ်မှာ လင်းနို့လူသားအဖြစ် Ben Affleck ကို တွေ့ရဦးမှာလား

Ref: aceshowbiz

The post လင်းနို့လူသားအဖြစ် မြင်တွေ့ရနိုင်ဖွယ် ရှိတဲ့ မင်းသား Kit Harington appeared first on ဧရာဝတီ.

အမေရိကန် ဟာသ သရုပ်ဆောင် Billy Eichner ဟာ အစီအစဉ်တခုမှာ အခုတဖန် လမ်းပေါ်ကို ထွက်လာခဲ့ပြီး အဲဒီအစီအစဉ်မှာ မင်းသမီး Emma Stone လည်း ပါဝင်လာခဲ့ပါတယ်။

“Billy on the Street” လို့ခေါ်တဲ့ အဲဒီ ဟာသအစီအစဉ်မှာတော့ တင်ဆက်သူ Eichner နဲ့အတူ နာမည် ကျော်ကြားတဲ့ ပုဂ္ဂိုလ်တွေဟာ နယူးယောက်မြို့ လမ်းမထက်က လူတွေကို ရောက်တတ်ရာရာ မေးခွန်းတွေကို မေးမြန်းခဲ့ကြပြီး ပြီးခဲ့တဲ့ ၂၀၁၇ ခုနှစ် ဖေဖော်ဝါရီလမှာ အစီအစဉ်ကို နောက်ဆုံး ထုတ်လွှင့်ခဲ့တာပါ။

အခုတော့ Funny or Die နဲ့ Lyft Entertainment တို့က ထုတ်လုပ်ထားတဲ့ အပိုင်းသစ် ၈ ပိုင်းနဲ့ အဲဒီအစီအစဉ် ကို တဖန်ပြန်လည် ပြသတာလည်း ဖြစ်ပါတယ်။

အော်စကာဆုရှင်မင်းသမီး Stone ဟာ အဲဒီအစီအစဉ်ရဲ့ ပထမဆုံးအပိုင်းမှာ တင်ဆက်သူ Eichner နဲ့ ပါဝင်ခဲ့တာဖြစ်ပြီး မင်းသမီးအနေနဲ့ Instagram သုံးသင့်၊ မသုံးသင့် စတဲ့ မေးခွန်းတွေ အပါအဝင် ရောက်တတ်ရာရာ မေးခွန်းတော်တော်များများကို ဖြတ်သွားဖြတ်လာ လူတွေထံ မေးမြန်းခဲ့တာပါ။

ပရိသတ်တဦးက “မင်းဆီမှာ Instagram မရှိဘူး ဟုတ်လား။ ဘာလို့မသုံးတာလဲ နောက်ဆုံး ခေတ်မီ အရာတွေနဲ့ ဘယ်လိုတွေ ထိတွေ့အသုံးပြုနေလဲ” လို့ မေးမြန်းခဲ့တာတွေ ရှိပါတယ်။ အဲဒီအစီအစဉ်ထဲမှာတော့ နယူးယောက်မြို့သားတွေက မင်းသမီးရဲ့ ရုပ်ရှင်တွေနဲ့ ပတ်သက်လို့ မင်းသမီး Stone ထံ တော်တော်များများ ပြောဆိုခဲ့ကြပါတယ်။

အမျိုးသားတဦးက “La La Land” ရုပ်ရှင်ကို ၅ ကြိမ် ကြည့်ရှုပြီးတဲ့အကြောင်း ပြောကြားခဲ့သလို အခြား အမျိုးသမီးတဦးကလည်း မင်းသမီး Stone ကို သည်းထိတ်ရင်ဖို ရုပ်ရှင်တွေမှာ မြင်တွေ့ချင်တဲ့ အကြောင်း ဝေမျှပြောဆိုထားပါတယ်။

အဲဒီအထဲမှာ ထူးဆန်းတဲ့ တုံ့ပြန်ပြောဆိုမှုတခုကတော့ အမျိုးသားတဦးရဲ့ ပြောဆိုမှုပဲ ဖြစ်ပါတယ်။ အဲဒီ အမျိုးသားက ဟယ်ရီပေါ်တာ ရုပ်ရှင်တွေထဲက မင်းသမီး Emma ကို သဘောကျတဲ့အကြောင်း မင်းသမီး Emma Watson နဲ့ မှားယွင်းပြီးပြောဆိုခဲ့တာလည်း ဖြစ်ပါတယ်။

မင်းသမီး Stone ကို မကြာမီ ထုတ်လွှင့် တော့မယ့် သိပ္ပံ စိတ်ကူးယဉ် ဟာသ ရုပ်သံ ဇာတ်လမ်းတွဲ “Maniac” နဲ့ သည်းထိတ်ရင်ဖိုရုပ်ရှင် “Zombieland 2” တို့မှာလည်း မြင်တွေ့ရဖို့ ရှိနေပါတယ်။

Ref: etcanada

The post အစီအစဉ်တခုမှာ Emma Watson နဲ့ လူမှားအခေါ်ခံခဲ့ရတဲ့ မင်းသမီး Emma Stone appeared first on ဧရာဝတီ.

ဒီတခါမိတ်ဆက်ပေးမယ့် ရုပ်ရှင်က ၂၀၁၇ ခုနှစ်က ထွက်ရှိခဲ့ပြီး ဒါရိုက်တာ Clio Barnard ရိုက်ကူးထားတဲ့ Drama ,Mystery,Thriller အမျိုးအစား ရုပ်ရှင်ကားဖြစ်တဲ့ “Dark River” ရုပ်ရှင် ဖြစ်ပါတယ်။ မင်းသမီး Ruth Wilson အဓိကပါဝင် သရုပ်ဆောင်ထားပြီး Sean Bean,Mark Stanley နဲ့ အခြား သရုပ်ဆောင်များလည်း ပါဝင် သရုပ်ဆောင်ထားကြပါတယ်။

ဇာတ်လမ်းအကျဉ်းကတော့ Alice ဟာ သိုးမွှေးရိတ်တဲ့အလုပ်ကို နေ့စားလုပ်ကိုင်နေသူဖြစ်ပြီး သူမရဲ့ အဖေဟာ ဆုံးပါးသွားခဲ့ပြီးဖြစ်လို့ သူမအနေနဲ့ မွေးရပ်ကို ပြန်သွားရဖို့ အကြောင်းဖန်လာပါတယ်။ သူမအဖေဟာ သူမ အတွက် ပိုင်ဆိုင်ခဲ့တဲ့ လယ်တွေ ထားရစ်ခဲ့တာကြောင့်လည်းဖြစ်ပြီး မောင်ဖြစ်သူ Joe က သူမ ပြန်အလာကို တယောက်တည်း စောင့်ဆိုင်းနေခဲ့ပါတယ်။

ဖခင်ကို လောလောလတ်လတ် ဆုံးရှုံးထားရတဲ့ မောင်နှမ နှစ်ယောက်အဖို့ ကိုယ်ပိုင် ပူဆွေးသောကတွေ ကိုယ်စီ ရှိနေကြတဲ့အပြင် သူတို့ချင်း ဆက်ဆံရေးမှာလည်း အဖုအထစ်တချို့ ရှိနေခဲ့ကြပါတယ်။

Alice အတွက် လယ်လုပ်ငန်း ဆက်လက်လုပ်ကိုင်ဖို့ ငွေကြေးနဲ့ တခြားအခက်အခဲတွေဖြစ်တဲ့ စိတ်ပိုင်းဆိုင်ရာ အခက်အခဲတွေ ရှိနေခဲ့ပြီး သူမရဲ့ ဆုံးပါးသွားပြီဖြစ်တဲ့ ဖခင်ကို ထင်ယောင်ထင်မှား မြင်နေမိတာတွေအပြင် Joe ကလည်း သူရသင့်တဲ့ပိုင်ဆိုင်မှုတွေကို ဆုံးရှုံးခဲ့ရတာကြောင့် Alice ကို အမြဲလိုလို ရန်ပြုနေပါတော့တယ်။

Alice နဲ့ သူမရဲ့ ဖခင်ကြား ပုံမှန်မဟုတ်တဲ့ ဆက်ဆံရေးတွေ ၊ Alice နဲ့ Joe တို့ရဲ့ငယ်ဘဝတွေကို တလှည့် လက်ရှိ အချိန်ကိုတလှည့် ပြသနေခဲ့တဲ့ ဒါရိုက်တာ Clio Barnard ဟာ “Dark River” ကို ဘယ်လို အဆုံးသတ်မလဲ ဆိုတာ စိတ်ဝင်စားဖွယ် ကြည့်ရှုကြရမှာပါ။

ဒီဇာတ်ကားက IMDB Rating (5.7) ရရှိထားပြီး အကောင်းအဆိုးတွေ ဒွန်တွဲနေတဲ့ လူသားတွေရဲ့ စိတ်ကို အဓိကထား ပုံဖော်ထားတဲ့အပြင် ကျေးလက်နောက်ခံ ရှုခင်းတွေနဲ့ အလေ့အထတွေကို အသေးစိတ် ပြသထားတာကြောင့် ရုပ်ရှင်ချစ် ပရိသတ်တွေအတွက် ပြန်လည်မျှဝေပေးလိုက်ပါတယ်။

The post အတွေးအမြင် အမှားတွေနဲ့ အမျိုးသမီးတယောက်အကြောင်း (သို့မဟုတ်) “Dark River” appeared first on ဧရာဝတီ.

ကလေးငယ်တွေကို ကျွေးမွေးပြုစု စောင့်ရှောက်ရတာဟာ လွယ်ကူတဲ့ ကိစ္စတရပ်တော့ မဟုတ်ပါဘူး။ ဒါ့အပြင် တယောက်တည်း ဒီကိစ္စကို ပြုလုပ်ဖို့ဆိုတာ ပိုမိုခက်ခဲတတ်တာဖြစ်ပြီး ယခုဖော်ပြပေးမယ့် ကမ္ဘာကျော် အနုပညာရှင်တွေဟာ ကွာရှင်းပြတ်စဲမှုတွေ (သို့မဟုတ်) အချို့သော ပုဂ္ဂိုလ်ရေး ကိစ္စတွေ ရှိခဲ့ပေမယ့်လည်း သူတို့ရဲ့ ကလေးတွေကို ပြုစုစောင့်ရှောက်နေဆဲဖြစ်တဲ့ မိခင်ကောင်းတွေပဲ ဖြစ်ပါတယ်။

(၁) Amanda Stanton

Amanda Stanton ကို ခင်ပွန်းဟောင်းဖြစ်သူ Josh Murray လက်ထပ်ခွင့် တောင်းခဲ့တာဟာ သူမ ပါဝင် ရိုက်ကူးခဲ့တဲ့ “Bachelor in Paradise” ဇာတ်လမ်းတွဲရဲ့ နောက်ဆုံး ဇာတ်ဝင်ခန်းမှာ ဖြစ်ပါတယ်။ တကယ့် လက်တွေ့ဘဝမှာတော့ ၂၆နှစ်အရွယ် Amanda အတွက် ခက်ခက်ခဲခဲ ရုန်းကန်နေရတဲ့ နေ့ရက်တွေ အများကြီးပဲ ဖြစ်ပါတယ်။

“ကိုယ့်ကိုယ်ကိုလည်း အပြစ်တင်မိသလို အိမ်ထောင်ရေးရဲ့ ကျဆုံးမှုကိုလည်း ကျမ လက်ခံ လိုက်တယ်။ နောက်ပြီး ကျမ တယောက်ထဲလည်း ကျမ ကလေးတွေကို ဆက်ပြီး စောင့်ရှောက်နိုင်တယ်လို့ ကိုယ့်ကိုယ်ကို ယုံကြည်မိတယ်။ ကျမလို ဘဝမျိုး ကျမကလေးတွေ မဖြစ်စေရဘူးလို့လည်း ဆုံးဖြတ်ချက်ချမိတယ်”လို့ Amanda က ကွာရှင်းပြတ်စဲမှုအပြီးမှာ ပြောဆိုခဲ့တာဖြစ်ပါတယ်။

(၂) Sandra Bullock

အမေရိကန်နိုင်ငံရဲ့ အသည်းနှလုံး၊ အော်စကာဆုတွေရဲ့ ပိုင်ရှင်အဖြစ် တင်စားခေါ်ဝေါ်ခြင်းခံရတဲ့ Sandra Bullock ဟာလည်း Single mother တယောက်ဖြစ်ပါတယ်။ The Gravity , Speed , Ocean’s 8 နဲ့ အခြား နာမည်ကြီးရုပ်ရှင်များစွာမှာ ပါဝင်သရုပ်ဆောင်ခဲ့တဲ့ သူမဟာ Jesse James နဲ့ ကွာရှင်းပြတ်စဲမှုအပြီးမှာ Louis Bardo လို့ခေါ်တဲ့ နယူးအော်လန်က ကောင်လေးတယောက်ကို မွေးစားဖြစ်ခဲ့ပါတယ်။

၂၀၁၅ခုနှစ်မှာလည်း Laila လို့ခေါ်တဲ့ ကောင်မလေးတယောက်ကို ထပ်မံမွေးစားဖြစ်ခဲ့ပါတယ်။ Sandra Bullock က “မိသားစုဆိုတာ ရောနှောနေတယ်။ အမျိုးမျိုး ကွဲပြားနေတယ်။ ချစ်စရာကောင်းပြီး တယောက်ကို တယောက် နားလည်ပေးနိုင်ကြတာပဲ ဖြစ်ပါတယ်”လိ့ု အင်တာဗျူးတခုမှာ ပြောသွားခဲ့ပါတယ်။

(၃) Gwyneth Paltrow

Iron Man ရုပ်ရှင်ဇာတ်ကားတွေမှာ Iron Man ရဲ့ အိမ်သူသက်ထားအဖြစ် သရုပ်ဆောင်ခဲ့တဲ့ Gwyneth Paltrow ဟာလည်း Single mother တယောက်ပဲဖြစ်ပါတယ်။

Coldplay အဖွဲ့ရဲ့ Chris Martin နဲ့ ကွာရှင်းပြတ်စဲမှုအပြီးမှာတော့ အော်စကာဆုရ မင်းသမီးလည်းဖြစ် GOOP ကို တည်ထောင်သူလည်းဖြစ်တဲ့ Gwyneth ဟာ အင်တာဗျူးတခုမှာ “ခက်ခဲတဲ့ အချိန်တွေကို ကျမနဲ့ ကလေးတွေ ဖြတ်သန်းခဲ့ပြီးပါပြီ။ ကျမတို့ ပြောပြောနေကြတဲ့ ခက်ခဲတယ်ဆိုတဲ့ ကိစ္စတွေဟာ ကျမတို့ ရုန်းကန်လှုပ်ရှားနေတုန်းမှာပဲ ပြီးဆုံးခဲ့ပါပြီ”လို့ ဖြေကြားသွားခဲ့ပါတယ်။

Ref: www.parents.com

The post Single Mother အဖြစ် ရပ်တည်နေကြတဲ့ ကမ္ဘာကျော် အနုပညာရှင်များ appeared first on ဧရာဝတီ.